စိတ်ကိုအစာကျွေးတတ်ပါစေ

စိတ်ကိုအစာကျွေးတတ်ပါစေ

_________🌹☘🌹___________

စိတ်၏သဘာဝသည် မထင်မှတ်သည့်အချိန်တွင် မထင်မှတ်သည့် ဒုက္ခနှင့် တွေ့ရသည့်အခါ တုန်လှုပ်ခြောက်ခြားသွား၏။ တချို့ဆိုလျှင် " ငါ့နှယ်နော် ဖြစ်မှဖြစ်ရလေခြင်း" ဆိုပြီး ဝမ်းနည်းပက်လက် ဖြစ်သွားလေ၏။ ထိုအခါမျိုးတွင် စိတ်ကို အစာကျွေးရမည် ဖြစ်သည်။ 

ရုပ်ခန္ဓာကိုယ်သည် အစာလိုအပ်သကဲ့သို့ စိတ်မှာလည်း အစာလို၏။ ထို့ကြောင့် စိတ်ကို အစာကျွေးဖို့ လို၏။ စိတ်ကို အစာကျွေးမှ စိတ်ချမ်းသာမည် ဖြစ်သည်။

စိတ်အစာဆိုသည်ကား တခြား မဟုတ်၊ စာဖတ်ခြင်း , တရားနာခြင်း, တရားထိုင်ခြင်းတို့ ဖြစ်သည်။ စိတ်သည် စာပဲဖတ်ဖတ် တရားပဲနာနာ တရားပဲ ထိုင်ထိုင် တစ်ခုခု လုပ်နေလျှင် တောင်တွေးမြောက်တွေး မတွေးတော့၊ တောင်တွေး မြောက်တွေး မတွေးသည့်အတွက် စိတ်သည် ငြိမ်သွား၏။

ငြိမ်လျှင် ငြိမ်း၏ဆိုသည့်အတိုင်း စိတ် ငြိမ်သွားသည့်အတွက် စိုးရိမ်ခြင်း ဝမ်းနည်းခြင်း ပူဆွေးခြင်းတို့လည်း ငြိမ်းသွားလေတော့သည်။ ဘာကြောင့်နည်း၊ စိတ်ကို အစာကျွေးလိုက်သောကြောင့်တည်း။ ထို့ကြောင့် စိတ်ချမ်းသာဖို့အတွက် စိတ်ကို အစာကျွေးရမည် ဖြစ်သည်။

စာဖတ်ခြင်း

-----------

စာဖတ်ခြင်းသည် စိတ်ကို အလုပ်ပေးလိုက်ခြင်းပင် ဖြစ်သည်။ စာဖတ်လိုက်သည့် အတွက် စိတ်သည် စာထဲ ရောက်သွား၏။ စာထဲ ရောက်သွားသည့်အတွက် စာထဲက အကြောင်းအရာပဲ စဉ်းစား၏။ ထို့ကြောင့် စိတ်သည် တည်ငြိမ်သွားလေတော့သည်။

ဂျပန်လူမျိုးများသည် လူကြီး လူငယ်မဟူ စာ အလွန်ဖတ်ကြ၏။ အိမ်မှာသာ ဖတ်သည် မဟုတ်၊ ဘပ်စ်ကားစီးရင်း ဖြစ်စေ, ရထားစီးရင်း ဖြစ်စေ စာဖတ်ကြလေသည်။ ဂျပန်နိုင်ငံသည် ကမ္ဘာတွင် စာဖတ်အား အကောင်းဆုံး နိုင်ငံထဲက တစ်နိုင်ငံ ဖြစ်လေသည်။

ဂျပန်သည် ချမ်းသာသော နိုင်ငံ ဖြစ်သောကြောင့် စာအုပ်စျေးကလည်း ကြီး၏။ သို့သော် စာအုပ်စျေး ဘယ်လောက်ကြီးကြီး စာအုပ်ဆိုင်များတွင် အမြဲလိုလို လူပြည့်နေသတတ်။ မြန်မာလူငယ်များ အတုယူသင့်လှ၏။

စာဖတ်ခြင်းသည် ဗဟုသုတလည်း ရစေ၏။ စဉ်းစားဉာဏ်လည်း အားကောင်းစေ၏။ စိတ်ကိုလည်း ငြိမ်စေ၏။ ထို့ကြောင့် စာဖတ်ခြင်းသည် စိတ်ကို အစာကျွေးခြင်းပင် ဖြစ်သည်။

တရားနာခြင်း

--------------

တရားနာခြင်းသည် စိတ်ကို အလုပ်ပေးလိုက်ခြင်းပင် ဖြစ်သည်။ တရားနာလိုက်သည့် အတွက် စိတ်သည် တရားထဲ ရောက်သွား၏။ တရားထဲ ရောက်သွားသည့်အတွက် တရားထဲက အကြောင်းအရာပဲ စဉ်းစား၏။ ထို့ကြောင့် စိတ်သည် တည်ငြိမ်သွားလေတော့သည်။

မိမိနှင့် ရင်းနှီးသော အမျိုးသမီးတစ်ယောက် ရှိ၏။ ငယ်ရွယ်သည့်အချိန်တုန်းက တရားနာရကောင်းမှန်း မသိပေ။ စီးပွားရေး လုပ်နေသည့်အတွက် အလုပ်ထဲမှာပဲ စိတ်ကို နှစ်ထား၏။ အရွယ်ကလည်း ကောင်း, အလုပ်ကလည်း ကောင်းသည့်အတွက် ကျောင်းကန်ဘုရားကိုလည်း မရောက်ဖြစ်, တရားလည်း မနာဖြစ်ပေ။

ထိုအချိန်မှာပဲ မထင်မှတ်သည့် ဒုက္ခနှင့် ကြုံရလေ၏။ ငွေလိမ်ခံရပြီး အကြွေးများ တင်သွားလေတော့သည်။ တင်ရှိနေသည့် အကြွေးများကြောင့် သောကဖြစ်နေတော့၏။ ထိုအခါကျမှပဲ သူသည် တရားကို နာလေတော့၏။ တရားနာလိုက်တော့မှ စိတ်သက်သာမှု ရရှိသွားလေတော့သည်။ 

သူပြောသည့် စကားလေးက မှတ်သားစရာပင်။ " တပည့်တော် စိတ်ညစ်ပြီး သောကဖြစ်နေတုန်းက တရားနာလိုက်လို့ဘုရား၊ တရားသာ မနာရင် ရောဂါတောင် ဖြစ်နိုင်တယ်၊ တပည့်တော်ကို တရားက ကယ်လိုက်တာပါဘုရား" တဲ့။

တရားနာခြင်းသည် ဗဟုသုတလည်း ရစေ၏။ စဉ်းစားဉာဏ်လည်း အားကောင်းစေ၏။ စိတ်ကိုလည်း ငြိမ်စေ၏။ ထို့ကြောင့် တရားနာခြင်းသည် စိတ်ကို အစာကျွေးခြင်းပင် ဖြစ်သည်။

ဝိပဿနာ

----------

တရားထိုင်ခြင်းသည် စိတ်ကို အလုပ်ပေးလိုက်ခြင်းပင် ဖြစ်သည်။ တရားထိုင်လိုက်သည့် အတွက် စိတ်သည် ခန္ဓာထဲ ရောက်သွား၏။ ခန္ဓာထဲ ရောက်သွားသည့်အတွက် သမာဓိ အားကောင်းသွား၏။ ထို့ကြောင့် စိတ်သည် တည်ငြိမ်သွားလေတော့သည်။

တရားထိုင်ခြင်းဆိုသည်မှာ ဝိပဿနာ အားထုတ်ခြင်းပင် ဖြစ်သည်။ တကယ်တော့ ဝိပဿနာသည် စိပ်ပုတီးနှင့် ရိပ်ကြီးခိုသူများ, ယောဂီသူတော်စင်များအတွက်သာ မဟုတ်ပေ၊ နေ့စဉ်ဘ၀မှာလည်း အသုံးဝင်သည့် တရား ဖြစ်သည်။

ထို့ကြောင့် သိပ္ပံပညာရှင်များက "တရားထိုင်ရင် စိတ်ဖိစီးမှုတွေ ကျဆင်းသွားတယ်၊ စိတ်အေးချမ်းမှုလည်း ရတယ်၊ နှလုံးရောဂါ, သွေးတိုးရောဂါတွေလည်း ပျောက်ကင်းနိုင်တယ်" ဟု မှတ်ချက်ပြုထားကြခြင်း ဖြစ်သည်။

တရားထိုင်ခြင်းသည် သတိကိုလည်း အားကောင်းစေ၏။ သမာဓိကိုလည်း အားကောင်းစေ၏။ ဉာဏ်ကိုလည်း ထက်စေ၏။ ထို့ကြောင့် တရားထိုင်ခြင်းသည် စိတ်ကို အစာကျွေးခြင်းပင် ဖြစ်သည်။

စိတ်ပျိုမှ ကိုယ်နုတယ်

-------------------------

လောကကြီးမှာ စိတ်ချမ်းသာဖို့ အရေးကြီး၏။ စိတ်ချမ်းသာမှ လူချမ်းသာမည် ဖြစ်၏။ စိတ်မချမ်းသာလျှင် လူလည်း မချမ်းသာတော့။ ထို့ကြောင့် " စိတ်ပျိုတော့ ကိုယ်နု စိတ်ထောင်းတော့ ကိုယ်ကြေ" ဟု ဆိုခဲ့ကြခြင်း ဖြစ်သည်။

ဤကမ္ဘာမြေတွင် တည်မြဲသောအရာ ဘာတစ်ခုမှ မရှိပေ။ ထို့ကြောင့် ဘယ်သူပဲဖြစ်ဖြစ် တနေ့နေ့ တချိန်ချိန်တွင် သေရဦးမည် ဖြစ်သည်။ ဤကား မပြောင်းလဲသော နိယာမတည်း။ ထို့ကြောင့် သေသည်ကား မဆန်း၊ အရေးကြီးသည်ကား မသေခင်အချိန်လေးမှာ ဘဝကို ပျော်ရွှင်စွာ ဖြတ်သန်းနိုင်ဖို့ပင် ဖြစ်သည်။

ဘဝကို ပျော်ရွှင်စွာ ဖြတ်သန်းနိုင်ဖို့အတွက် စိတ်ချမ်းသာဖို့ လို၏။ စိတ်ချမ်းသာဖို့အတွက် မဖြစ်မနေ လုပ်ရမည့် အလုပ်ကား စိတ်ကို အစာကျွေးဖို့ပင် ဖြစ်သည်။ ထို့ကြောင့် အချိန်တစ်ခု သတ်မှတ်၍ စာဖတ်၍ ဖြစ်စေ တရားနာ၍ ဖြစ်စေ တရားထိုင်၍ ဖြစ်စေ စိတ်ကို အစာကျွေးရမည် ဖြစ်ပါပေ၏။

"သတ္တဝါခပ်သိမ်း၊ တရားကိန်း၊ အေးငြိမ်းချမ်းသာ ရှိပါစေ"

_______________________

#အင်ကြင်းမြိုင်ဆရာတော်

#အရှင်ဒေဝိန္ဒာဘိဝံသ