မြွေပွေးလို မကျင့်နဲ့
••••••••••••••••••••
မာနဆိုတာ ကိုယ်ရည်သွေးလွန်းတဲ့ စိတ်ပဲ။ ဒီစိတ်လွှမ်းမိုးနေရင် သွေး နားထင်ရောက်ပြီး မောက်မာတော့တာပဲ။
ဒီတော့ အပြုသဘော ဆောင်တဲ့ အပြုအမူ အပြောအဆို ဆိုတာ မရှိတော့ဘူး။
တချို့က ပညာကြောင့် မာန်တက်တယ်။ တချို့က ဥစ္စာကြောင့်၊ တချို့က အာဏာကြောင့်၊ တချို့က ရုပ်ရည်ကြောင့်၊ တချို့က နာမည်ကြောင့်၊ တချို့က အမျိုးကြောင့် မာန်တက်တယ်။
ဘ်ာလိုပင် မာန်တက်တက်၊ မာန ဝင်လာပြီဆိုရင် လူရိုင်းတစ်ယောက်လို ဖြစ်သွားတယ်။ လူကြီးကို လူကြီးမှန်း မသိ၊ မိဘကို မိဘမှန်း မသိ၊ ဆရာကို ဆရာမှန်း မသိ၊ အရိုအသေ ပေးရကောင်းမှန်း မသိတော့ဘူး။ ပြောလိုက်ရင် အထက်စီးကချည်းပဲ။
‘‘ ငါက မဟုတ်မခံကွ၊ မဟုတ်လို့ကတော့ ခွင့်လွှတ်မှာ မဟုတ်ဘူး၊ ကိုယ့် လာ မထိနဲ့၊ လာ ထိလို့ကတော့ ယင်ကောင်တောင် အလွတ် မခံဘူး၊ ငါက မြွေပွေးကွ’’ ဆိုပြီး ဂုဏ်ယူပြီး ပြောတတ်ကြတယ်။
မြေပွေးဆိုတာ
ဘယ်လို သတ္တဝါလဲ
--------------------
ဖားအံဘက်မှာ မြွေဖမ်း အလွန် ကျွမ်းကျင်တဲ့ ကရင်ကြီးတစ်ယောက် ရှိတယ်။
အဲဒီကရင်ကြီးက ခြေထောက် တစ်ဖက်က မသန်ရှာဘူး။ ဒါပေမဲ့ မြွေဖမ်းတဲ့နေရာမှာတော့ အလွန်တော်တယ်။ တစ်ညကို ၂-ကောင် ၃- ကောင်လောက် ရတယ်။ သူဖမ်းလိုက်ရင်လည်း မြွေပွေးပဲ။ သွားရောင်းရင် တစ်ကောင်ကို တစ်သောင်း လောက် ရတာကိုး။
အဲဒီကရင်ကြီးကို လူငယ်လေးတစ်ယောက်က ‘‘ဖထီး မြွေပွေးကို ဘယ်လို ဖမ်းလဲဗျ’’လို့ မေးတယ်။
"ငါက ခြေထောက်မသန်တော့ လင်းမြွေတို့ ရေမြွေတို့ကို မဖမ်းနိုင်ဘူး။ အဲဒီကောင်တွေက လူတွေ့ရင် ထွက်ပြေးတာကိုး။ ဒါကြောင့် ငါက မြွေပွေးပဲဖမ်းတယ်’’။
လာမထိနဲ့ သေသွားမယ်
------------------
"မြွေပွေးကျတော့ လူတွေ့ရင် မပြေးဘူး၊ ငါ့ထိရင် ကိုက်မယ်ဆိုပြီး ငြိမ်နေတာ၊ လာမထိနဲ့ သေသွားမယ် ဆိုတဲ့ပုံစံမျိုးပေါ့။ သူ့ကိုမထိသေးရင် ဘာမှ မလုပ်ဘူး၊ ဒီတော့ သူ့ဦးခေါင်းနားကို မှိန်းနဲ့ အသာလေးကပ်သွားပြီး ဦးခေါင်းကို မှိန်းနှင့် တခါထဲ ထိုးချလိုက်တယ်။ ဒီကောင် မလှုပ်နိုင်တော့ဘူး’’။
"အော် .. ဖထီးက လက်သွက်တော့ ရတာပေါ့ဗျာ"။
‘‘လူလေးရေ .. လက်သွက်လို့ မဟုတ်ဘူးကွ၊ မြွေထဲမှာ မြွေပွေးက ဖမ်းလို့အလွယ်ဆုံးပဲ၊ အဆိပ်ပြင်းတယ် ဆိုပြီး မာန်တက်နေတာကိုး၊ ဒီတော့ မပြေးဘူးလေ၊ မပြေးတော့ မှိန်းစာမိသွားတာပေါ့ကွာ’’ လို့ ပြောပြပါတယ်။
ဒီတော့ မြွေပွေး ဘာကြောင့် သေရသလဲလို့ တရားခံရှာလိုက်တော့ မာန်တတ်လို့ပဲဆိုတာ တွေ့ရတယ်။
အရပ်ထဲမှာလည်း မာန်တက်နေတဲ့ လူတွေ အများကြီး ရှိတယ်။ အဲဒါ မြွေပွေးလို လူပဲ။ အောင်မြင်မှုတွေ ရလာပြီ, နာမည်တွေ ကျော်ကြားလာပြီဆိုရင် မာန်တက်တတ်တယ်။ အဲဒီလို မာန်တက်လာရင် မှန်ကင်းကနေ ထင်း ဖြစ်သွားနိုင်တယ်လေ။
မာနဝင်လာပြီဆိုရင် ကိုယ့်ရဲ့ ဦးခေါင်းပေါ်မှာ မှိန်းကြီး ရောက်လာလိမ့်မယ် ဆိုတာကို သတိရပါ။ မှိန်းဆိုတာ အခြား မဟုတ်ဘူး၊ အကုသိုလ်ကံကြမ္မာပဲ။
ဒါကြောင့် သတိပေးချင်ပါတယ်။ "မြွေပွေးလို မကျင့်နဲ့"။
________________
သီတဂူ အရှင်ဒေဝိန္ဒာဘိဝံသ
Credit.....
No comments:
Post a Comment