အကုသိုလ်မဖြစ်အောင် ကြိုးစားကြစို့
—————————————————
ဆရာတော်ကြီးတစ်ပါးက
မိန့်ကြားဖူးပါတယ်။
ပုထုဇဉ်တွေဟာ တစ်နေ့တစ်နေ့ အိပ်ပျော်နေ
ချိန်ကလွဲလို့ ကျန်တဲ့အချိန်တွေမှာ ကုသိုလ် သို့မဟုတ် အကုသိုလ်စိတ် တစ်ခုခုနဲ့နေကြတာ တဲ့။
ဟုတ်ပါတယ်။ စိတ်ဆိုတာဟာ တစ်ပြိုင်တည်း နှစ်စိတ်ဖြစ်လေ့မရှိပါဘူး။
အကုသိုလ်စိတ်ဖြစ်နေရင်
ကုသိုလ်စိတ် မဖြစ်နိုင်သလို
ကုသိုလ်စိတ်ဖြစ်နေရင်လည်း အကုသိုလ်စိတ် မဖြစ်နိုင်ပါဘူး။
နှစ်နှစ်ခြိုက်ခြိုက် အိပ်ပျော်နေတဲ့အချိန်ကတော့ ကုသိုလ်လည်းမဖြစ် အကုသိုလ်လည်း မဖြစ်တဲ့ ဘ၀င်စိတ်ပါ။
ဆိုတော့ကား… အိပ်ရာက နိုးတဲ့အချိန်ကနေ ညအိပ်ရာ၀င်တဲ့ အချိန်အထိ ကိုယ့်ကိုယ်ကို ပြန်ဆန်းစစ်ကြည့်ရင် …
ကုသိုလ်ဖြစ်တဲ့ အချိန်က များသလား အကုသိုလ်ဖြစ်တဲ့အချိန်က များသလား
သိနိုင်ပါတယ်။
ကုသိုလ်စိတ် မဖြစ်တဲ့အချိန်ဟာ အကုသိုလ်
စိတ်တွေ ဖြစ်နေနိုင်တဲ့အတွက် အကုသိုလ်စိတ်
မဖြစ်အောင် ကြိုးစားနေထိုင်သွားကြဖို့ လိုပါ တယ်။
တစ်နေ့တစ်နေ့ ကုသိုလ် မဖြစ်ချင်နေပါစေ။
အကုသိုလ်မဖြစ်အောင် နေတတ်ဖို့ အရေးကြီး ပါတယ်။
အကုသိုလ်မဖြစ်အောင် နေထိုင်ဖို့အတွက်က
အကုသိုလ်မဖြစ်အောင် မြင်တတ် တွေးတတ်
ဖို့လိုပါတယ်။
အကုသိုလ် မဖြစ်အောင် မြင်တတ်ဖို့က အကောင်းမြင်တတ်ဖို့ လိုပါတယ်။
အကောင်းမြင်တတ်မှ
အကောင်းတွေး တတ်မှာပါ။
အကောင်းတွေးတတ်တာဟာ အကုသိုလ် မဖြစ်အောင် တွေးလိုက်တာပါ။
လောကမှာ ရှိရှိသမျှ ပုဂ္ဂိုလ်သတ္တဝါတွေကို
ကြည့်ကြည့်လိုက်ပါ။
အလုံးစုံပြည့်စုံတဲ့ ပုဂ္ဂိုလ်ရယ်လို့ တစ်ယောက်မှ မရှိပါဘူး။
အဲလို မပြည့်စုံတဲ့သူတွေဖြစ်နေတဲ့အတွက်သူတို့ ရဲ့အားနည်းချက်တွေ ချို့ယွင်းချက် တွေကို ကြည့်ရင် အပြစ်တွေကိုပဲ တွေ့ရမှာပါ။
အပြစ်တွေကို ကြည့်မိတာနဲ့ နောက်ဆက်တွဲ အဖြစ် အကုသိုလ်ဖြစ်စရာတွေပဲ တွေ့လာရမှာပါ။
အဲဒီအခါ အကုသိုလ်စိတ်တွေလည်း မခေါ်ဘဲ ၀င်လာတော့တာပါပဲ။
ဒါကြောင့် ဘယ်သူ့ကိုပဲကြည့်ကြည့် အကုသိုလ်
မဖြစ်အောင် ကြည့်တတ်ဖို့ လိုပါတယ်။
တစ်နည်းပြောရရင် အကောင်းဘက်က
မြင်တတ် ကြည့်တတ်ဖို့လိုပါတယ်။
အကောင်းမြင်တတ်ဖို့ဆိုတာက ဘယ်သူ့ကိုပဲ တွေ့တွေ့ ကောင်းတာလေးတွေကို ရှာဖွေ စဉ်းစား မြင်တတ်ကြည့်တတ်ဖို့ အရေးကြီး ပါတယ်။
ပြီးတော့ အဲဒီအပေါ်မှာ လိုက်နာကျင့်ကြံတတ်ရပါမယ်။
ဘုန်းဘုန်းတို့ ဖတ်ရှုလေ့လာဖူးတဲ့ စာပေတွေ အရ အကုသိုလ်မဖြစ်အောင် ဆက်ဆံနည်း
လေးတွေ တွေးနည်းလေးတွေ ရှိပါတယ်။
အဲဒီနည်းလေးတွေကို ကြည့်ပြီး အကုသိုလ်မဖြစ်အောင် လေ့ကျင့်ကြည့်ပါ။
ဒီသဘောတွေအရ…
လူပုဂ္ဂိုလ်တွေထဲမှာ အချို့ပုဂ္ဂိုလ်တွေဟာ နှုတ်ထွက်စကား ကြမ်းတမ်းပေမယ့် စိတ်ထား အရမ်းကောင်းတာကို တွေ့ရတတ်ပါတယ်။
အဲလိုသူမျိုးကို သူတို့ရဲ့ အပြောအဆို ကြမ်း တမ်းမှုကို မကြည့်ဘဲ
“အော်…သူဟာ အပြောအဆိုကြမ်းတမ်းပေမယ့် စိတ်ထားလေးတော့ ကောင်းရှာသားပဲ”လို့ အကောင်းဘက်ကတွေးပြီး အကုသိုလ် မဖြစ် အောင် ကြိုးစားရပါမယ်။
အချို့ကျတော့ အပြောအဆိုအရမ်းကောင်းပြီး
အရမ်းနူးညံ့သိမ်မွေ့တတ်ကြပေမယ့်စိတ်ထား ယုတ်ညံ့ပါတယ်။
အဲဒီလိုသူမျိုးကျတော့လည်း "သူဟာ စိတ်ဓာတ်မကောင်းပေမယ့် အပြောအဆိုတော့
ညင်သာနူးညံ့ပါလား”လို့ တွေးပြီး အကုသိုလ်
မဖြစ်အောင် ကြိုးစားရပါမယ်။
အချို့ကျတော့ အပြောအဆိုလည်း မကောင်းစိတ်ထားလည်း ယုတ်ညံ့တတ်ကြပေမယ့် “တစ်ခါတစ်ရံ အနည်းငယ် ကောင်းတာ”
လေးတွေ ရှိတတ်ပါတယ်။
အဲလိုသူမျိုးကိုလည်း သူ့ရဲ့ ကောင်းကွက် အနည်းငယ်လေးကိုပဲ ရှာကြံပြီး အကုသိုလ် မဖြစ်အောင် ကြိုးစားရပါမယ်။
အချို့ကျတော့ အပြောအဆိုလည်း မကောင်း
စိတ်ထားလည်း မကောင်း တစ်ခါတစ်ရံလည်း ကောင်းကွက်ဆို ဘာမှကို ရှာမရတာတွေ ရှိပါတယ်။
အဲလိုလူမျိုးကျတော့ ဘာမှမဖြစ်အောင် “ဥပေက္ခာ” သာ ပြုနိုင်အောင်ကြိုးစားရပါ
မယ်။
ဥပေက္ခာပြုတာဟာ ကုသိုလ်လည်းမဖြစ် အကုသိုလ်လည်း မဖြစ်အောင် ကြိုးစားတာပါ။
ဒါကြောင့်…တစ်နေ့တစ်နေ့ ကုန်ဆုံးရတဲ့ အချိန်လေးတွေမှာ …
အကုသိုလ်စိတ်တွေ မများရအောင် အကောင်း
မြင်တတ်အောင် အကောင်းတွေးတတ်အောင် လေ့ကျင့်ပြီး …
ကုသိုလ်စိတ်ဖြစ်အောင် ကြိုးစားကြပါလို့
တိုက်တွန်းလိုပါတယ်။
ဆရာတော် မနာပဒါယီ အရှင်ဝိစိတ္တ (ဒိုက်ဦး)
Credit.
No comments:
Post a Comment