ဘာကြောင့် ဘုရားရှင်က ဂုဏ်တော်ကိုပွားခိုင်းရသလဲ
•••••••••••••••••••••••••••••
ဒို့စိတ်တွေက ရိုင်းလွန်းလို့ ...
ဒီအတိုင်းမထားနိုင်လို့ ...
ဘုရားဂုဏ်ကိုအာရုံပြုပြီးတော့
ဒို့ရဲ့ရိုင်းတဲ့စိတ်ကို
ဘုရားအာရုံလေးနဲ့တွဲပြီးတော့ကပ်ပြီးတော့
ယဉ်အောင် ကျင့်ယူရတာထင်တယ် ။
အဲဒါဗျ ဒို့ချည်းမနိုင်လို့
ဘုရားနဲ့ကပ်ယူရတာ ။
အဲဒီဂုဏ်တော်တွေပွားခြင်းတို့မည်သည်မှာ
' သဒ္ဓါ ' နိုးအောင်လို့ နှိုးပေးတာ ။
ဒို့ စာလိုတော့ လျက်ဆားများဆိုရင်
ပုလင်းအထဲ ထဲမှာ လျက်ဆားထည့်ထားတယ်
အပြင်ပုလင်းမှာ ပုလင်းဘူးပတ်ကလေး မရှိဘူးလား
ဆေးရဲ့အာနိသင်ဆိုပြီး မရေးဘူးလား ။
ဘာတုန်း ...
သလိပ်ခဲသော် သွေးကျသော်နဲ့
မပါဘူးလား ?
( ပါ ပါတယ်ဘုရား )
သလိပ်ကပ်သော် ဘယ့်နှယ်
ရင်ပြည့်သော် ဘယ်နှယ့်
ကွမ်းရွက်ပြုတ်ရည်ကြီးနဲ့ ဘယ်လို
အညွှန်းမရှိဘူးလား ?
( ရှိပါတယ် ဘုရား )
ဒို့ အညွှန်းလေးကို ဖတ်ကြည့်တာက
ဆေးသောက်စေချင်လို့ ။
အဲ့တော့ အညွှန်းဖတ်ကြည့်ရုံနဲ့
ဘယ့်နှယ်တုန်း
သလိပ်ကပ် ပျောက်သလား ?
( မပျောက်ပါဘုရား )
သလိပ်ကပ်ပျောက်ချင်တော့
ဘာလုပ်ရမှာတုန်း ?
(ဆေးသောက်ရမှာပါ ဘုရား )
အဲ့တော့
' အရဟံ '
' ပူဇော်အထူးကို ခံယူတော်မူထိုက်သောဘုရား '
သူ့ဂုဏ်လေးနဲ့ကိုယ့်စိတ်ကို
တွဲထားရတာထင်တယ် ။
အမြဲတမ်းသာပြောနေ နှိုးဆော်နေ
' ပူဇော်အထူးကို ခံယူတော်မူထိုက်သောဘုရား '
ပါဠိလို ' အရဟံ ' နေမှာပေါ့လေ ။
( မှန်ပါ ဘုရား )
ဒို့ အဲဒါလေး အာရုံပြုနေတဲ့အချိန်မှာ
အဟောင်းကိလေသာ တွေးသာသလား ?
( မတွေးသာပါ ဘုရား )
အသစ်ကိလေသာနောက်ကော
ပြေးလိုက်မိသလား ?
( မလိုက်မိပါ ဘုရား )
အဲဒါတစ်ချက်မှတ်လိုက်
တစ်ချက်ဒီဂုဏ်တော်ပွားလိုက်လို့
တစ်ချက်ကိလေသာ
တစ်ခါတည်းပျောက်ထွက်သွားတာ ။
အဲဒါ ဒီသတိစိတ် ဘုရားဂုဏ်စိတ်က
ကိလေသာကို ရှို့မြိုက်ပစ်လိုက်တာ
' စျာန် ' လို့ခေါ်တယ် ။
' စျာန် ' ဆိုတာ ကိလေသာကို
လောင်မြိုက်ပစ်လိုက်တာလေ ။
တစ်ချက်မှတ်လိုက်တဲ့အချိန်
အဟောင်းလည်းပျောက်ပြီ
အသစ်လည်းပျောက်ပြီ အဲဒါ ' စျာန် ' ပဲဗျ ။
အဲဒါ ဗုဒ္ဓါနုဿတိနဲ့
အနုဿတိစျာန်ဝင်စားတာ ။
ဒို့ ပထဝီကသိုင်းတို့ ဘာတို့ဆိုတာကျတော့
သမာဓိကနေ ပညာကိုတန်းသွားမှာ ။
ဒို့ ဘုရားဂုဏ်ကကျတော့ သဒ္ဓါကနေ
ပညာကိုတက်မှာ ။
အဲ့တော့ ...
' အရဟံ ' လို့ ဒို့ကပွားလိုက်ရင်
' အရဟံ ' အကြောင်းမသိလည်း အရေးမကြီးဘူး။
လိုချင်တာက စိတ်ကလေး
ပုတီးလုံးနဲ့စိတ်နဲ့ထိတဲ့နေရာဖြစ်ဖြစ်
အရဟံဂုဏ်ဆိုတဲ့ ဘုရားဂုဏ်မှာ
စိတ်ကလေးထိနေလို့ဖြစ်စေ ...
ဒါပဲလိုချင်တာ သိတာမသိတာ
လိုရင်းမဟုတ်ဘူး ။
အဟောင်းမတွေးစေချင်တာနဲ့
အသစ်နောက်ကိုလိုက်မပြေးစေချင်တာပါ
ဒါလေး ၂ခုပဲ ။
ရည်ရွယ်ချက် ဒါပဲမဟုတ်လား ။
အဲ့တော့...
' ပူဇော်အထူးခံယူတော်မူထိုက်သောဘုရား '
အမြဲတမ်းသာ တဖွဖွနဲ့သာ နှလုံးသွင်းနေ
အဲဒါ ပုလင်းပတ်ကဆေးညွှန်းကို ဖတ်နေတာ ။
ဒါချည်းပဲရွတ်ပါများလာတော့
ကိုယ့်စကား ကိုယ့်နားကကြားသွားရင်
ကိုယ့်ကိုယ်ကုိပြန်မေးလိမ့်မယ်
' ဘာကြောင့် ပူဇော်အထူးကိုခံထိုက်တာလဲ '
သူများကမေးရင် ' မသိဘူးကွာ ' ပြောလိုက်
တစ်ခွန်းထဲပြောလို့ရတယ် ။
ကိုယ့်ကိုယ်ကိုမေးတော့
အဲ့လိုပြောလို့ရပါ့မလား ?
( မရပါ ဘုရား )
အဲ့တော့ မသိ
သိအောင် လုပ်ရတော့မယ် ။
ဒို့ ဘုရားရှင်ကဲ့သို့အကျင့်မျိုး
ဘယ်သူလိုက်ကျင့်နိုင်သလဲ ?
ဆိုပါစို့ ' ဒုက္ကရစရိယာ ' လိုဟာမျိုး
ဘယ်လိုလူ ကျင့်နိုင်သလဲ ?
နတ်တွေကော ကျင့်နိုင်သလား ?
ဗြဟ္မာတွေကော ကျင့်နိုင်သလား ?
အဲဒါကိုထားဦး ။ ဒို့ ...
ဒါက ကျင့်တဲ့ဘက်ကိုပြောတာ ။
ဒို့ ဘုရားဖြစ်မယ့်ဘဝမှာ
သိဒ္ဓတ္ထမင်းသားထင်တယ် ။
နန်းမကြီး ၃ဆောင်
မိဖုရားပေါင်းက ၁သိန်း ၂သောင်းရှိတယ်
ရွှေအိုးကြီးလေးလုံးနှင့်တကွ
ရှိသမျှပစ္စည်းတွေလည်း
မနည်းဘူး အတွင်းပစ္စည်းတွေ
ကမ္ဘာအရပ်ရပ်ကဘုရင်တွေကကို
လှမ်းဆက်သရတာထင်တယ် ။
သူက စကြာမင်းဖြစ်မယ့်ပုဂ္ဂိုလ်
ဒီစကြာဝဠာတစ်ခုလုံးကြီးကို
အုပ်ချုပ်နိုင်စွမ်းရှိတဲ့ဘုရင်
သာမာန်ဘုရင်မဟုတ်ဘူး ။
သူ့ရဲ့ဘုန်းကံကြောင့်လည်း
တိုင်းပြည်မှာ တစ်ဦးနှင့်တစ်ဦး
လုယက်ခြင်း တိုက်ခိုက်ခြင်း
လိမ်ညာခြင်း မူးရူးရမ်းကားခြင်း မရှိတဲ့အတွက်
တရားစီရင်ရေးတွေလုပ်စရာမလိုပဲ
ဘုရင့်စည်းစိမ်သက်သက် ခံစားနေရတာကို
ဒို့ ဘယ်သူစွန့်နိုင်သလဲ ?
ဒို့ ရပ်ကွက်လူကြီးလေးလောက်တောင်
သူတက်မယ် ငါတက်မယ်ဖြစ်နေကြတာ
ဟိုက တစ်ကမ္ဘာလုံးဗျ ...
အခုလိုလည်းအရှုပ်အရှင်းမရှိဘူးဗျ
ဘုရင့်စည်းစိမ်သက်သက်ခံစားရုံပဲ ။
အဲဒါတွေအကုန်စွန့်ပြီး
ဘယ်သူတောထွက်ရဲသလဲ ?
နန်းတော်ကြီးနဲ့နေရပါများလို့
သုခကိုပယ်နိုင်တယ်ထားကဦး။
ဒုက္ခကိုခံနိုင်တဲ့သတ္တိလည်းရှိသေးတယ်။
နန်းတော်ကြီး ပယ်စွန့်ပြီး ၊
သစ်တစ်ပင်အောက် ဘယ်သူနေရဲသတုန်း ?
ပြီးတော့ ဘုရင့်အစားအသောက်
နုပေ့ကောင်းပေ့ဆိုတဲ့
အအီအဆိမ့်တွေပယ်ပြီး ဒီ သူများကလှူတဲ့
ထမင်းအကြမ်း ဟင်းကြမ်းကို ဘယ်သူစားရဲသလဲ ?
သုခကို ရိုးလို့ စွန့်နိုင်တယ်ထားဦး
ဒုက္ခကိုခံနိုင်ဖို့ သူ့လိုသတ္တိမျိုး
လူလည်းမရှိဘူး၊ နတ်တွေမှာလည်းမရှိဘူး။
ဗြဟ္မာတွေမှာလည်းမရှိဘူး ။
အဲ့တော့ ...
ဗြဟ္မာမင်းကြီးတွေကလည်း 'ငါ့ထက်သာတယ် '
နတ်မင်းကြီးတွေကလည်း ' ငါ့ထက်သာတယ် '
လူမင်းကြီးတွေကလည်း ' ငါ့ထက်သာတယ် '
ဆိုပြီး မပူဇော်ရဘူးလား ?
အဲ့တော့ ...
လူမင်း နတ်မင်း ဗြဟ္မာမင်းတို့ကတောင်
ပူဇော်တယ်ဆိုရင် လူသာမာန်
နတ်သာမာန်တွေက
ဘာပြောစရာလိုတုန်း ?
( မလိုပါ ဘုရား )
အဲ့တော့ ... ဘုရားဟာ ...
ဒါ့ကြောင့် ပူဇော်အထူးကိုခံထိုက်တယ်လို့
ဆုံးဖြတ်ချက်ချပြီးရင် ဒီအဖြေရလာပြီဆိုရင်
ငါလည်းပဲ ဘုရားသားတော်
ငါလည်းပဲ ဘုရားသမီးတော်ဆိုပြီး
ကိုယ့်ဘက် လက်ညှိုးထိုးရတော့မယ်ထင်တယ် ။
ငါလည်းပဲ ဘုရားသားတော်
သမီးတော်ဆိုပြီးတော့
ပုလင်းထဲကဆေးကို ဖော်သောက်မိအောင်
အဲဒီဂုဏ်တော်တွေ ပွားခိုင်းတာ ။
ဘုရားက သူ နာမည်ကောင်းရအောင်
ပွားခိုင်းတာမဟုတ်ဘူး ။
ပုလင်းပတ်ကဆေးညွှန်းကိုဖတ်ပြီး
ပုလင်းထဲကဆေးကို သောက်ဖြစ်အောင်လို့
အဲဒီပုလင်းပတ်ကအညွှန်းကိုဖတ်ခိုင်းတာ၊
ဟုတ်ကဲ့လား ?
( မှန်ပါဘုရား )
သာဓု သာဓု သာဓုပါ အရှင်ဘုရား ။
🙏 မဟာဗောဓိမြိုင် ဆရာတော်ဘုရားကြီး 🙏
Credit >> Original Uploader >> Thanks
Post by Young Buddhist Association
•••••••••••••••••••••••••••••••••••••••••••••••••••
ပြန်လည်မျှဝေ ကုသိုလ်ပြုပါ၏။
No comments:
Post a Comment