✔ #ကာယမုဒုတာ၊ #စိတ္တမုဒုတာ ✔
နောက်တစ်ခုက ကာယမုဒုတာ၊ စိတ္တမုဒုတာ။ စေတသိက်ရဲ့ နူးညံ့ပျော့ပျောင်းမှု၊ စိတ်ရဲ့ နူးညံ့ပျော့ပျောင်းမှု။ နူးညံ့ပျော့ပျောင်းတယ်ဆိုတာ ခက်ထန်မှု ကင်းတာ။ အဲဒီတော့ စိတ်က ဘယ်လိုအချိန် ခက်ထန်သလဲဆိုရင် ဒေါသထွက်တဲ့စိတ်၊ မခက်ထန်ဘူးလား? စိတ်ဆိုးနေတဲ့အချိန် ခက်ထန်နေမှာပဲ။ နောက် မာနဖြစ်နေတဲ့သူရဲ့ စိတ်ရော ခက်ထန်တာပဲ။ စာပေထဲမှာ ဘယ်လိုပြောထားလဲဆိုရင် ။သံချောင်းကြီး မြိုထားတဲ့ မြွေလိုပဲ။ တဲ့။ ခွေလို့ မရတော့ဘူး။ အဲဒီ မာနရှိတဲ့ သူက ရင်ကော့ပြီးသွားတာ။ လူကြီးသူမရှေ့လည်း ကုန်းလို့မရဘူး။ မာနရှိနေရင် ကုန်းလို့ မရတော့ဘူး၊ ကော့ထားတာ။ အဲဒီလို မာနရှိလာပြီဆိုရင် လူ့စိတ်ဟာ ပျော့ပျောင်းတာမျိုး မဖြစ်တော့ဘူး၊ လိုသလို လုပ်လို့မရဘူး၊ တထောင်ထောင်နဲ့ ဖြစ်နေပြီ။ မာနဆိုတဲ့ ကိလေသာ စိတ်အညစ်အကြေးကို ကာယမုဒုတာ၊ စိတ္တမုဒုတာ နဲ့ ဖယ်ရှားပစ်ပါ။
ဒီ မုဒုတာကို ကိုယ့်သန္တာန်မှာ ထူထောင်ရမယ်။ စိတ်ဓာတ်နူးညံ့တယ် ပျော့ပျောင်းတယ်၊ သူ့ဆိုင်ရာဆိုင်ရာ ဆန့်ကျင်ဘက် သဘာဝတရားတွေကို ဖယ်ရှားပစ်တယ်။ ဒါက Special ကို ပြောတာပေါ့။ ဆေးဆိုတာ တစ်ခါတစ်ရံမှာ သီးသန့် ထုတ်လုပ်တာရှိတယ်။ ဥပမာ သွေးတိုးရောဂါအတွက် ဆေး၊ ဆီးချိုရောဂါအတွက်ဆေး။ General ကျတော့ ကိုက်တာခဲတာ အားလုံး သုံးလို့ရတာမျိုး။ Special ကျတော့ မဟုတ်တော့ဘူး၊ ဒီ ရောဂါအတွက် သီးသန့်ထုတ်တာ။
အဲဒီလိုပဲ ဒီ သဘာဝတရားလေးတွေက ဆိုင်ရာဆိုင်ရာ ကိလေသာတွေ စိတ်အညစ်အကြေးတွေကို ဖယ်ရှားပစ်ဖို့ သီးသန့်လေးတွေ၊ ဒါကို ကြိုးစားပြီးတော့ ထူထောင်ပေးရမယ်။ ကုသိုလ်စိတ်တွေ ဖြစ်လာတဲ့အခါမှာ ဟောဒီ သဘာဝတရားလေးတွေ ကိုယ့်သန္တာန်မှာ ဖြစ်လာနိုင်တယ်။
#ကာယပါဂုညတာ၊ #စိတ္တပါဂုညတာ
÷••÷••÷••÷•°÷••÷••÷••÷••÷••÷••÷••÷••÷••÷••÷•
ပြီးတော့ ကာယဂုညတာ၊ စိတ္တဂုညတာ။ စိတ်ရဲ့ လေ့လာနိုင်စွမ်းမှု။ ကျန်းမာတယ်ဆိုတဲ့ အဓိပ္ပါယ်၊ စိတ်နေမကောင်းတာ မရှိဘူး၊ စေတသိက်နေမကောင်းတာ မရှိဘူး။ လူနေမကောင်းရင် ဆေးသောက်လို့ ရတယ်။ စိတ်နေမကောင်းတာ ကျတော့ တစ်မျိုး။ အဲဒီ စိတ်နေမကောင်းမှု ကင်းသွားရင် ကာယဂုညတာ,စိတ္တဂုညတာ။ ဒီ သဘာဝတရားတွေဟာ စိတ်နေမကောင်းတာကို ဖယ်ရှားပစ်နိုင်တယ်။
ဘာတွေကြောင့် စိတ်နေမကောင်းတာလဲ ဆိုရင် ကိလေသာတွေ ဖြစ်လာလို့ စိတ်က နေမကောင်းဘူး။ လောဘလွှမ်းနေတဲ့အခါ၊ ဒေါသလွှမ်းနေတဲ့အခါ စိတ်နေမကောင်းဘူးလို့ ပြောရမယ်၊ အမှန်တရားကို မသိလို့ တွေဝေတဲ့အခါ စိတ်နေမကောင်းဘူးလို့ ပြောရမယ်။ အဲဒီလို နေမကောင်းတာကို ပါဂုညတာက ဖယ်ရှားပစ်နိုင်တယ်၊ စိတ်ဟာ ကျန်းမာသွားတယ်၊ စိတ်ကျန်းမာဖို့ဆိုတာ အရေးကြီးတယ်။
ကိုယ်ကျန်းမာဖို့ဆိုတာ လူတိုင်း မတတ်နိုင်ဘူး။ ရဟန္တာဖြစ်သွားပြီဆိုရင် လုံးဝ စိတ်ကျန်းမာမယ်။ ပုထုဇဉ်ကျတော့ စိတ်မကျန်းမာဘူး။ ပုထုဇဉ်တွေက မာနသဘောနဲ့ ထောင်ထောင် ထောင်ထောင် လုပ်နေပေမယ့်လို့ စိတ်ကျန်းမာမှု အားနည်းနေကြတယ်။ စိတ်ထဲမှာ အနာတရတွေ ဖြစ်ပြီးတော့ နေကြတယ်။
ဒါကြောင့် မြတ်စွာဘုရားက ကိုယ်မကျန်းမာတာက သိပ်အရေးမပါပါဘူး၊ စိတ်ကျန်းမာဖို့က အရေးကြီးပါတယ်လို့ နကုလ ပိတာ ဒကာကြီးကို ဟောထားတာရှိတယ်။ '' ခန္ဓာကိုယ်ဆိုတာ နာတာ ကျင်တာ ကိုက်တာ ခဲတာ ထုံးစံပါပဲတဲ့၊ စိတ်မနာစေနဲ့ပေါ့တဲ့၊ ခန္ဓာကိုယ် နာချင်နာပါစေ၊ စိတ်ကျန်းမာအောင် နေပါ '' တဲ့။ ခန္ဓာကိုယ်ဆိုတာ ဘာမှ မတတ်နိုင်ဘူး။ ရုပ်ခန္ဓာကြီးကတော့ မကျန်းမမာဖြစ်လာရင် သာမာန်ဆေးဝါးနဲ့ ကုရုံပဲ။ ဘယ်လိုပဲကုကု သူက ပျောက်ချင်မှ ပျောက်မယ်၊ သူ့သဘာဝပဲ။ ဘာမှ မတတ်နိုင်ဘူး။
အဲဒီတော့ စိတ်မကျန်းမမာဖြစ်ရင် ။စိတ်မကျန်းမာမှု မဖြစ်စေရဘူး။ ဆိုပြီး ကျင့်ရမယ်တဲ့၊ ဒါလည်း မှတ်စရာတစ်ခုပါပဲ။ စိတ်ကျန်းမာဖို့အတွက် ဘာလုပ်ရမလဲ။ ကာယပါဂုညတာ စိတ္တပါဂုညတာ ဒီသဘာဝ တရားတွေ စွမ်းအားဖြစ်စေဖို့ ကုသိုလ်စိတ်တွေနဲ့ ယှဉ်ပြီး ဖြစ်နေအောင် ကြိုးစားဖို့ပဲ၊ စိတ်ကျန်းမာလာမယ်။
#ကာယကမ္မညတာ၊ #စိတ္တကမ္မညတာ
÷••÷••÷••÷••÷••÷••÷••÷••÷••÷••÷••÷••÷••÷••÷•
ကာယကမ္မညတာ စိတ္တကမ္မညတာ။ ကမ္မညတာဆိုတာ စွမ်းဆောင်နိုင်မှု ရှိတာ။ စိတ်ကလည်း စွမ်းဆောင်နိုင်မှု ရှိတယ်၊ ကိုယ်ကလည်း စွမ်းဆောင်နိုင်မှု ရှိတယ်။ လုပ်နိုင်ကိုင်နိုင် စွမ်းရည်ရှိတယ်လို့ ပြောတာပါ။ ဒါပေမယ့် ကိလေသာစိတ် အညစ်အကြေးတွေ ပေါ်လာပြီဆိုရင် စိတ်မှာ စွမ်းဆောင်မှုတွေ အားနည်းသွားတယ်။ စွမ်းဆောင်နိုင်မှု မရှိဘူး။
ဥပမာ- ဒေါသဖြစ်နေတဲ့ ပုဂ္ဂိုလ်တစ်ယောက်မှာ ကုသိုလ်စိတ်ဖြစ်ဖို့၊ သမာဓိဖြစ်ဖို့ ဘယ်လောက်ခက်သွားမလဲ။ စိတ်စွမ်းအားတွေ လျော့ကျသွားတယ်၊ မကောင်းမှုဘက် စိတ်တွေ တိုးတက်လာတယ်။ သမာဓိရအောင် အသိဥာဏ်ပေါ်အောင် မလုပ်နိုင်တော့ဘူး။ စိတ် စွမ်းဆောင်နိုင်မှုတွေ အားနည်းသွားစေတတ်တဲ့ ကိလေသာတွေကို ဖယ်ရှားပစ်နိုင်ဖို့ ကာယကမ္မညတာ၊ စိတ္တကမ္မညတာဆိုတာ အရေးကြီးတယ်။ သဘာဝတရားတွေ ကုသိုလ်စိတ်တွေ မိမိရဲ့ သန္တာန်မှာ ဖြစ်နေပြီဆိုရင် စွမ်းအားတွေ အားလုံးပေါ်နေမှာပဲ။
အပြည်ပြည်ဆိုင်ရာ
ထေရဝါဒ ဗုဒ္ဓသာသနာပြု တက္ကသိုလ် ပါမောက္ခချုပ်ဆရာတော်ဘုရား အဂ္ဂမဟာပဏ္ဍိတ
ဒေါက်တာ ဘဒ္ဒန္တနန္ဒမာလာဘိဝံသ(Ph.D)
အဘိဓမ္မာမြတ်ဒေသနာ ပထမတွဲ အခန်း၇၊ စိတ်ဖြူစင်မှု အင်အားစုများ အပိုင်း ၂ မှ ကူးယူပူဇော်ပါသည်။
No comments:
Post a Comment