ရပ်နေသော ဘုရားရှင်နှင့် ပြေးနေသူ အင်္ဂုလိမာလ
_____________________________________________
ဘုရားရှင်က မပြေးဘဲ ရပ်တော်မူနေပေမယ့်
အင်္ဂုလိမာလက ပြေးလိုက်လို့ မမီနိုင်ဖြစ်နေတယ်။
“အရင်ကတော့
ဆင်ပြောင်ကြီး ပြေးတယ်ဆိုရင် ငါလိုက်မီတယ်၊
မြင်းတွေပြေးတယ်ဆိုရင် နောက်ကလိုက်မီပါရဲ့၊
အခုတော့
သာမာန်လူတစ်ယောက်ကို မလိုက်နိုင်တာ
ဘာ့ကြောင့်လဲ” လို့တွေးကာ ဘုရားရှင်အား
“ရပ်ပါတော့ ရပ်ပါတော့” လို့ တားပါတယ်။
ဘုရားရှင်က
“အင်္ဂုလိမာလ….ငါဘုရားက ရပ်နေတာ၊
မရပ်တာက သင်ပဲ” လို့ မိန့်တော်မူပါတယ်။
ထိုအခါ လူဆိုးကြီးက “သာကီ၀င်မင်းသား
ရဟန်းများဟာ မှန်တဲ့စကားသာ ပြောကြတယ်။
ရဟန်းကြီးဟာ ရပ်နေတယ် ဆိုပြီး
ငါ အပြေးလိုက်တာတောင် မမီဘူး၊ ဘာ့ကြောင့်ပါလဲ”
လို့ သိချင်တဲ့အတွက် ဘုရားရှင်အား မေးလိုက်တယ်။
“ အရှင်ဘုရား ….
အရှင်ဘုရားက ရပ်နေတယ်လို့ပြောပြီး ပြေးနေတယ်၊
တပည့်တော်ကိုတော့ ပြေးနေတယ် လို့ပြောတယ်။
အကြောင်းလေး သိချင်ပါတယ်” လို့ မေးလျှောက်တော့
ဘုရားရှင်က
“ အင်္ဂုလိမာလ….
ငါဘုရားဟာ လေးမြား ဓါး စတာတွေကို
အပြီးတိုင်ပစ်ချခဲ့ကာ
လူအများအား မသတ်တဲ့အတွက်
‘ရပ်နေသူ’ လို့ခေါ်တယ်။
သင်ကား လေးမြားလက်နက်စတာတွေကို
ကိုင်ဆောင်ကာ
လိုက်လံပြေးလွှား သတ်ဖြတ်နေသူဖြစ်တဲ့အတွက်
‘ပြေးနေသူ’ လို့ ခေါ်တယ် အင်္ဂုလိမာလ….” လို့
မိန့်တော်မူလိုက်တဲ့အခါ အင်္ဂုလိမာလလည်း
သံဝေဂအကြီးအကျယ်ရရှိပါတော့တယ်'
No comments:
Post a Comment