မကောင်းသူကိုကဲ့ရဲ့လျှင် အပြစ်ဖြစ်ပါသလား

🔅1️⃣3️⃣6️⃣#မကောင်းသူကိုကဲ့ရဲ့လျှင်အပြစ်ဖြစ်ပါသလား🔅

➖➖➖➖➖➖➖➖➖➖➖➖

     ဝိနည်းပိဋကတ် စာမျက်နှာ အတော်များများ၌ တွေ့ရမည်မှာ ဥဇ္စျာယျန္တိ ခိယန္တိ (ကဲ့ရဲ့ကြကုန်၏) ဟူသော စကားပင်ဖြစ်၏။

          ကဲ့ရဲ့ပြစ်တင်မှု ဟူသည် လူ့စရိုက်အားလျော်စွာ အမျိုးမျိုးရှိတတ်၏။ မည်သို့ပင် ကွဲပြားပါစေ အချုပ်အားဖြင့် ဆိုရလျှင် သုံးမျိုးသာ ရှိ၏။

၁။ ကြိယာစိတ်ဖြင့် ကဲ့ရဲ့ခြင်း 

၂။ကုသိုလ်စိတ်ဖြင့် ကဲ့ရဲ့ခြင်း၊

၃။ ဒေါသစိတ်ဖြင့် ကဲ့ရဲ့ခြင်း ၊

               ဘုရားရဟန္တာများက ကဲ့ရဲ့လျှင် ကြိယာစိတ်ဖြင့် ကဲ့ရဲ့တော်မူကြ၍ ပုထုဇဉ်တို့က ကဲ့ရဲ့လျှင် ကုသိုလ်စိတ်၊ အကုသိုလ်စိတ် နှစ်မျိုးဖြင့် ကဲ့ရဲ့တတ်ကြ၏။ 

        ⛔ကဲ့ရဲ့တိုင်း အကုသိုလ်ဖြစ်၏ ဟု မမှတ်ထိုက်။ ကဲ့ရဲ့သူ၏ စိတ်နေစိတ်ထားအား လျော်စွာ ကုသိုလ်၊ အကုသိုလ် ဟူ၍ နှစ်မျိုးရှိသည်ကို သတိ ပြုသင့်၏။⛔

        လောက၌ မကောင်းမှုနှင့် မကောင်းသူကို ကဲ့ရဲ့သော အလုပ်ဟူသည် လုပ်သင့်သော အလုပ်ဟုပင် ဆိုထိုက် ၏။

          ကဲ့ရဲ့ပြစ်တင်သူ ရှိမှသာ လျှင် လောက၌ မကောင်းမှုတို့ကို ပေါ်ပေါ်ထင်ထင် လုပ်ဝံ့မည် မဟုတ်။ 

               ပြောမည့်သူမရှိလျှင် လောက၌ ဒုစရိုက်များနှင့် ၊

ဒုစရိုက်သမားများ ပေါများလာရုံသည်သာမက ပေါ်ပေါ်ထင်ထင် လုပ်ဝံ့လာကြ

ပေလိမ့်မည်။

   ထို့ကြောင့် ထိုသို့ မကောင်း မှုနှင့် မကောင်းသူကို ကဲ့ရဲသောအလုပ်ကို ဘုရားရဟန္တာ တို့ပင် ပြုလုပ်တော်မူလေ့ရှိသည်ကို ထိုထိုသုတ္တန်နှင့် ဝိနည်းတော်များ၌ များစွာ တွေ့နိုင်၏။

  သဂါထာဝဂ္ဂပါဠိတော်၊သုသိ  မ သုတ်တော်၊ ၆၂ ၌ -

         အရှင်အာနန္ဒသဘောကျ ကြည်ညို အားကျသော အရှင်သာရိပုတ္တ၏ဂုဏ်များထဲတွင်" #ပါပဂရဟီ” ဟူသော ဂုဏ်နှင့် “#စောဒက' ဟူသော ဂုဏ် နှစ်

ခု ပါဝင်၏။

- #ပါပဂရဟီ ဟူသည် -  

      မကောင်းမှုနှင့် မကောင်းမှု ပြုသူတို့ကို ကဲ့ရဲ့ရှုတ်ချ

မှုကို ဆိုလိုကြောင်း သဂါထာဝဂ္ဂ အဋ္ဌကထာ၊ ၁၁၄ ၌ဖွင့်ဆိုထားလေ၏။

     လူယုတ်မာ ရဟန်းယုတ်မာတို့ကို မမြင်လို၊ ထိုယုတ်မာသူတို့၏ စကားကို မကြားလို၊ ဖြစ်နိုင်လျှင် စကြာဝဠာတစ်ခုထဲ၌ပင် အတူမနေလိုသူများဟာလည်း "ပါပဂရဟီ” ယုတ်မာမူနှင့် ယုတ်မာသူတို့ကို ကဲ့ရဲ့သူ ဖြစ်ကြောင်း ဖွင့်ဆိုထားသေး၏။

         “#စောဒက " ဟူသည် အမြင်မတော်သည်တို့ကို မြင်ရကြားရလျှင်  “ရဟန်းဟူသည် ဤသို့ ဝတ်ရမည်။ ဤသို့ နေရမည်။ ဤသို့ သွားရမည်၊ ဤသို့ မနေသင့်' စသည်ဖြင့် ပြောဆို ဆုံးမဲ့ခြင်းပင် ဖြစ်၏။

             အရှင်သာရိပုတ္တသည် ထိုသို့သော သူ ဖြစ်၏။ အရှင်သာရိပုတ္တ သာမကအရှင်စက္ခုပါလသည်လည်း မကောင်းမှု နှင့် မကောင်းသူကို ကဲ့ရဲ့သူဖြစ်ကြောင်း ဓမ္မပဒဋ္ဌကထာတွင် ပါပဂရဟီ အယံ ပါလော ဟူ၍ မိန့်တော်မူ၏။

           ဝိနည်းတော်တွင်လည်း ရဟန်း တို့နှင့် မသင့်လျော်သော အမှုတို့ကို တွေ့ကြ မြင်ကြရလျှင် ရှေးဦးစွာ လူတို့က ကဲ့ရဲ့ ပြစ်တင်ကြ၏။ လူတို့ထံမှ သတင်း ကြားရ၍ သီလကို ချစ်မြတ်သော ရဟန်းတို့ကလည်း ကဲ့ရဲ့တော်မူကြ၏။

  ရဟန်းတို့၏ လျှောက်ထား ချက်အရ မေးမြန်းစစ်ဆေး၍ ဘုရားရှင်သည်လည်း ကဲ့ရဲ့ တော်မူ၏။

      ဤကားဝိနည်းပါဠိတော်၌ တွေ့ရသော ကဲ့ရဲ့ပြစ်တင်မှု အဆင့်ဆင့် ဖြစ်၏။

     ❤️ အချုပ်အားဖြင့် ဆိုရလျှင်မကောင်းမှုနှင့် မကောင်းသူကို ကဲ့ရဲ့မှုသည်လိုအပ်၏။ ❤️

        သို့သော် လောက၌ အဓမ္မ အဝိနယ မထွန်းကားရေးအတွက် ကဲ့ရဲ့မှုမျိုး ဖြစ်သင့်၏။ သို့မှသာ ကုသိုလ်စိတ်ဖြင့် ကဲ့ရဲ့ရာ ရောက်ပေမည်။

🌺#သာသနာပြုရန်လမ်းကြောင်းမှန်အရှင်အဘယာလင်္ကာရ🌺