🔮 ပြုသူအသစ် ဖြစ်သူအဟောင်း 🔮
🎐🎐🎐🎐🎐🎐🎐🎐🎐🎐🎐🎐
မှန်ရှေ့မှာ ရပ်လိုက်ရင် မှန်ထဲမှာ
ကိုယ့်ပုံရိပ်လေး ပေါ်လာတယ်။
ကိုယ်က ပြုံးပြရင် မှန်ထဲမှ ပုံရိပ်ကလည်း ပြုံးပြတယ်။ ကိုယ်က မဲ့ပြရင် မှန်ထဲက ပုံရိပ်ကလည်း မဲ့ပြတယ်။
ဘဝဆိုတာလည်း ဒီတိုင်းပဲ။
ကောင်းတာလုပ်ရင် ပုံရိပ်လှမယ်။
မကောင်းတာ လုပ်ရင် ပုံရိပ် မလှဘူး။
ဒါကြောင့် ကိုယ်လုပ်တဲ့ အလုပ်မှန်သမျှ
သူတပါး မျက်ရည်မပါဖို့ အရေးကြီးပါတယ်။
ဒါမှ ပုံရိပ်လှမှာ မဟုတ်လား။
ယနေ့ တွေ့ကြုံနေရသော ကောင်းကျိုး ဆိုးကျိုး
မှန်သမျှ သည် မနေ့က အတွေးအမြင်
မနေ့က စိတ်ထားကြောင့် ဖြစ်ပေါ်လာကြတယ်။
ယနေ့ အတွေးအမြင် ယနေ့စိတ်ထားသည်
မနက်ဖြန် မိမိတို့ဘဝကို တည်ဆောက်ကြပါလိမ့်မယ်။
ရဇ္ဇုမာလာ
💫💫💫💫
ဘုရားလက်ထက်က အမျိုးသမီးတစ်ယောက် ရှိတယ်။ သူ့ဇာတိက ဂယာမြို့ ၊ သူ့အလုပ်က အစေခံ။
နာမည်က ရဇ္ဇုမာလာတဲ့။
အိမ်ရှင် ပုဏ္ဏားကြီးက သဘောကောင်းပေမဲ့
ပုဏ္ဏားကြီးရဲ့ ချွေးမက ဒေါသကြီးပြီး အနိုင်ကျင့်တယ်။ ဒီတော့ ရဇ္ဇုမာလာကို ခိုင်းစရာရှိရင်
မညှာတမ်း ခိုင်းတယ်။ ဆူတယ်၊ ငေါက်တယ်။
ဆဲတယ်၊ ဆိုတယ်၊ ရိုက်တယ်၊ နှက်တယ်။
တခါတရံ ဆံပင်ဆွဲပြီး ပါးချတယ်။
ဒါနဲ့ ကျွန်မလေးက
"ငါ့ကို သခင်မက ရိုက်ရင် ဆံပင်ဆွဲပြီး ရိုက်တယ်၊
ဒီတော့ ဆံပင်ဆွဲလို့ မရအောင် ကတုံး တုံးမယ်" ဆိုပြီး ကတုံး တုံးလိုက်တယ်။
သူ့သခင်မက " ငါ့ကို ရွဲ့ရကောင်းလား" ဆိုပြီး
ကတုံးကို ကြိုးနှင့် သိုင်းပြီး ချည်လိုက်တယ်။
ရိုက်တဲ့အခါ ကတုံးချည်ထားတဲ့ ကြိုးကိုင်ပြီး
ရိုက်တယ်။ အဲဒီအချိန်က စပြီး
" ရဇ္ဇုမာလာ" လို့ နာမည်တွင်သွားတယ်။
( ရဇ္ဇုဆိုတာ ကြိုး၊ မာလာဆိုတာ ပန်း)။
ကျွန် မလေးဟာ နေ့တိုင်း အရိုက်ခံနေရတော့
စိတ်ဆင်းရဲ ကိုယ်ဆင်းရဲ ဖြစ်လာတယ်။
" ငါ့ဘဝဟာ သေမထူး နေမထူးဘဲ၊
ဒီတော့ ငါ သေတာက ကောင်းတယ်" လို့
တွေးမိတယ်။ ဒါနဲ့ သေကြောင်းကြံဖို့အတွက်
ရေခပ်သွားမယ်ဆိုပြီး တောထဲ ထွက်လာတယ်။
ဓမ္မစကား
💫💫💫💫
အဲဒီအချိန်မှာ မြတ်စွာဘုရားက တောထဲက
သစ်ပင်အောက်မှာ တရားလေး နှလုံးသွင်းနေတယ်။
ရဇ္ဇုမာလာဟာ တောထဲရောက်တော့ ကြိုးဆွဲချ
သေမယ်ဆိုပြီး သစ်ပင်ပေါ် တက်လိုက်တယ်။
သစ်ပင်ပေါ် ရောက်တော့ အနီးအနား ဝန်းကျင်ကို
ကြည့်လိုက်တဲ့အခါ မြတ်စွာဘုရားကို မြင်သွားတယ်။
အဲဒီအချိန်မှာ မြတ်စွာဘုရားက
"ချစ်သမီး ရဇ္ဇုမာလာ"လို့ ခေါ်လိုက်တယ်။
ဘုရားအသံကို ကြားရတော့ ပီတိဖြစ်ပြီး
သစ်ပင်ပေါ်က ပြန်ဆင်း လာတယ်။
ဝမ်းသာအားရဖြစ်ပြီး ဘုရားထံ သွားတယ်။
ဘုရားထံ ရောက်တဲ့အခါ မြတ်စွာဘုရားက
သူ့ကို သစ္စာလေးပါး တရားကို ဟောလိုက်တယ်။ တရားလည်း ဆုံးရော သောတာပန် ဖြစ်သွားတယ်။ ဒါကြောင့် ဓမ္မဆိုတာ စိတ်ခွန်အားပဲ။
အဲဒီနောက် ကျွန် မလေးဟာ ရေခပ်ပြီး
အိမ်ပြန်လာတယ်။
မျက်နှာလေးကလည်း ကြည်လင်နေတယ်။
အခါတိုင်းတော့ စိတ်ညစ်နေသည့်အတွက်
မျက်နှာလေးက ညှိုးငယ်နေတယ်။ အခုတော့ တရားနာရလို့ မျက်နှာလေးက ကြည်လင်နေတယ်။
ဒီတော့ အိမ်ရှင် ပုဏ္ဏားကြီးက မေးတယ်။
"ကောင်မလေး ရေခပ်သွားတာ ကြာလှချည်လား၊
မျက်နှာကလဲ ပြုံးလို့ ရွှင်လို့
ဘာတွေ ကြည်နူးနေတာလဲ" လို့ မေးလိုက်တယ်။
ကျွန် မလေးကလည်း ဖြစ်စဉ်အကုန်လုံး
တစ်ခုချင်း ပြောပြလိုက်တယ်။
ဒါနဲ့ ပုဏ္ဏားကြီးဟာ ချွေးမဖြစ်သူကို
ပြင်းပြင်းထန်ထန် ဆုံးမလိုက်တယ်။
ဝဋ်ဆိုတာ လည်တတ်တယ်
💫💫💫💫💫💫💫💫💫
တစ်ရက်၊ ပုဏ္ဏားကြီးဟာ မြတ်စွာဘုရားကို
အိမ်မှာ ပင့်ပြီး ဆွမ်းကပ်တယ်။
ဆွမ်းဘုဉ်းပေးပြီးတဲ့အခါ မြတ်စွာဘုရားက
ပုဏ္ဏားကြီးရဲ့ ချွေးမ နဲ့ ကျွန်မလေးတို့ရဲ့ အတိတ်က
ဖြစ်ရပ်ကို ဟောကြားလိုက်တယ်။
ကဿပဘုရားလက်ထက်က ချွေးမဟာ ကျွန် မဖြစ်ပြီး ဒီကျွန် မလေးက အလုပ်ရှင်ဖြစ်တဲ့အကြောင်း၊
အလုပ်ရှင်က ကျွန် မလေးကို
အမျိုးမျိုး နှိပ်စက်ခဲ့ကြောင်း၊
ကျွန် မလေးရဲ့ စိတ်ထဲမှာ နာကျည်းသွားကြောင်း၊
ပြန်နှိပ်စက်ရပါလို၏လို့ စိတ်ထဲမှာ ရန်ငြိုး ဖွဲ့ခဲ့ကြောင်း၊ ဒါကြောင့် အဲဒီကျွန် မလေးက ချွေးမဖြစ်ပြီး
အလုပ်ရှင်က ကျွန် မလေး ဖြစ်လာကြောင်း
ဟောကြားတော် မူလိုက်တယ်။
သူများကို ဒုက္ခ ပေးရင် အဲဒီဒုက္ခ အတိုးနှင့်တကွ
ပြန်ရတယ်။ အဲဒါကို ဝဋ်လည်တယ်လို့ ခေါ်တယ်။
ဒါကြောင့် သူများကို ဘယ်တော့မှ ဒုက္ခမပေးကြနဲ့။
ဝဋ်ဆိုတာ လည်တတ်တယ်လေ။
သီရိဂေဟာ
💫💫💫💫💫
ပုဏ္ဏားကြီးဟာ ဘုရားတရား နာလိုက်ရသည့်အတွက် ပီတိ ဖြစ်သွားတယ်။ ကျွန် မလေးကို လည်း သနားပြီး သမီးအဖြစ် မွေးစားလိုက်တယ်။
ချွေးမဖြစ်သူကလည်း တရားနာလိုက်တော့
စိတ်မကောင်း ဖြစ်သွားတယ်။
"ပြုသူအသစ် ဖြစ်သူအဟောင်းဆိုတာ မှန်လိုက်တာ၊ ငါမှားပြီ၊ ဒီနေ့ကစပြီး
ဘယ်သူ့ကိုမှ အနိုင်မယူတော့ဘူး" ဆိုပြီး
ကျွန် မလေးကို ညီမတစ်ယောက်လို ရင်းရင်းနှီးနှီး
ဆက်ဆံတယ်တဲ့။
အဲဒီအချိန်က စပြီး ပုဏ္ဏားကြီးတို့အိမ်မှာ
ဆဲသံဆိုသံတွေ မကြားရတော့ဘူး။
သီရိဂေဟာအိမ်လေး ဖြစ်သွား တယ်ပေါ့။
သီရိဂေဟာဆိုတာ ကျက်သရေ မင်္ဂလာရှိတဲ့ အိမ်ပါပဲ။
အချိန်ရှိခိုက် လုံ့လစိုက်
💫💫💫💫💫💫💫💫
ဘဝဆိုတာ မကြာပါဘူး။ အသက် ၅၀- ဆိုရင်
ရက်ပေါင်း ၁၈၀၀၀- ကျော်ပဲ နေခွင့်ရတယ်။
အသက် ၈၀-ကျော်ဆိုရင် ရက်ပေါင်း ၃၀၀၀၀ - ခန့်ပဲ
နေခွင့်ရပါတယ်။
ဒီလိုခဏတဖြုတ်နေရတဲ့ အခိုက်အတန့်မှာ
လောဘဒေါသ အတ္တမာနတွေနှင့်
ဘာကြောင့် အနိုင်ယူချင်ရသလဲ။
စဉ်းစားကြည့်လေ အဓိပ္ပါယ် မရှိလေပဲ။
ဒါကြောင့် "နည်းလာရင် နီးလာပြီ" ဆိုတဲ့အတိုင်း
နေဖို့ အချိန် နည်းလေလေ သေဖို့ နီးလေလေပဲ။
ဒါကို မကြာမကြာ ဆင်ခြင်ရမယ်။
ဆင်ခြင်မှ အချိန်ရဲ့ တန်ဖိုးကို သိတာ။
သေဖို့ နီးလာသည့်အတွက်
လောဘ ဒေါသ အတ္တမာနတွေ နည်းနည်းလာရမယ်။ ဒါမှ ဘဝက အဓိပ္ပါယ်ရှိတာ။
ဒါကြောင့် "နီးလာရင် နည်းအောင်နေ" ဆိုတဲ့အတိုင်း တဖြေးဖြေးနှင့် သေဖို့ နီးလာသောကြောင့်
အကုသိုလ် တရားဆိုးတွေကို
နည်းသထက် နည်းအောင် ကြိုးစားရမှာ ပါတကား။
"သတ္တဝါခပ်သိမ်း၊ တရားကိန်း၊
အေးငြိမ်းချမ်းသာ ရှိပါစေ"
🙏🙏🙏 သီတဂူ အရှင်ဒေဝိန္ဒာဘိဝံသ 🙏🙏🙏
No comments:
Post a Comment