ကွယ်စေချင်ရင် ကာရတယ်

" ကွယ်စေချင်ရင် ကာရတယ် "

🙏🙏🙏🙏🙏🙏🙏🙏🙏🙏

မြတ်စွာဘုရားသာသနာမှာ ယူတတ်သုံးတတ် သူတွေအတွက် မဟာဖြေဆေးတော်ကြီး ရှိပါတယ်။

အဲဒီ ဆေးတော်ကြီးကို ရဖို့ဆိုရင် ပိုက်ဆံမကုန်ပါဘူး။ သဒ္ဓါတရားစစ်စစ်နဲ့ တူးဖော်လို့ ရပါတယ်။

အဲဒီ ဆေးတော်ကြီး အစွမ်းထက်ဖို့ဆိုရင် ပင်ပင်ပန်းပန်း သိဒ္ဓိတင်နေစရာ မလိုပါဘူး။ ကိုယ်ကျင့် ငါးပါးသီလ လုံလုံခြုံရုံနဲ့ အစွမ်းထက်ပါတယ်။

အဲဒီ ဆေးတော်ကြီး လက်ထဲရောက်ဖို့ဆိုရင် အဝေးကြီးမှာ ရှာနေစရာ မလိုပါဘူး အိမ်ကဘုရားစင်ရှေ့မှာ ခန္တာကိုယ် သန့်သန့်ရှင်းရှင်း ထားပြီး သမာဓိလေးတည်ငြိမ်အောင် ထားကာ သစ္စာပြုပြီး ယူလို့ရပါတယ်။

သဒ္ဓါတရားစစ် ကိုယ်ကျင့်သီလလုံ ယုံကြည်မှုလဲ ထားမယ်ဆိုရင် မိမိလက်က ဆေးဖြစ်ပါတယ်။ သောက် မည့်ရေက ဆေးဖြစ်ပါတယ်။ ရောက် မည့်ဘေးက ဝေးလွင့်ကွာတယ်။ စားမည့်အစာက ဆေးဖြစ်ပါတယ်။

ဓမ္မနည်းနဲ့ ကုသခဲ့လို့ ရောဂါ ပျောက်ကင်းသူတွေ ဓမ္မနည်းကို အသုံးချခဲ့လို့ အန္တရာယ်ကင်းတဲ့သူတွေ ဓမ္မဆေးကို သောက်ခဲ့လို့ အရူးပျောက်ဖူးသူတွေ မြတ်စွာဘုရားသာသနာတော်မှာ အများကြီး သက်သေ အထင်အရှား ရှိပါတယ်။

အရှင်အာနန္ဒာ၏ ပရိတ်တရားတော်ကြောင့် ဝေသာလီပြည်ကြီး တစ်ခုလုံး ကပ်ရောဂါဘေးကြီးမှ ဝေးကွာခဲ့ဖူးပါတယ်။

နမော ဗုဒ္ဓဿလေး တစ်ပုဒ်ကြောင့် လူမမယ် ကလေးငယ်လေး တစ်ဦး ဘီလူးဘေးမှ ကင်းဝေးဖူးခဲ့ပါတယ်။

ဒါတွေက ဘုရားလက်ထက်လေ ခုဘယ်လိုဖြစ်နိုင်မှာတုန်းလို့ စောဒကတက်စရာ ရှိပါတယ်။

မြန်မာနိုင်ငံမှာ ကပ်ရောဂါကြီး ဖြစ်စဉ်က လယ်တီဆရာတော်ဘုရားကြီး ဦးဆောင်တဲ့ သံဃာတော် အရှင်သူမြတ်များ တားဆီးပေးဖူးခဲ့လို့ ပျောက်ကင်းခဲ့တဲ့ သာဓက တွေ..... 

အရှိန်ပြင်းပြင်း ဒေါသတကြီးနဲ့ ရန်မူတိုက်ခိုက်နေတဲ့ နွားနှစ်ကောင်ကို ဝေဘူဆရာတော်ဘုရားကြီးမှ မေတ္တာအစွမ်းနဲ့ ရပ်တန့်စေခဲ့ဖူးတဲ့ သာဓကတွေ.....

ပရိတ်ရေကို ပွက်ပွက်ဆူစေခဲ့ဖူးတဲ့ တောင်တန်းသာသနာပြု ဆရာတော်ဘုရားကြီးရဲ့ သာဓကတွေ.......

အောင်ခြင်းရှစ်ပါးကို အဆောင်အဖြစ် ဦးထုပ်ခမောက် မှာ ရေးထိုးပြီး ရန်သူ၏ တပ်တွေကို အကြိမ်ကြိမ် ထွက်ပြေးစေခဲ့ဖူးတဲ့ ပခုက္ကူခံတပ် ဗိုလ်ကြီးရဲ့ သာ ဓကတွေ.....

မဟာစည်ဆရာတော်ဘုရားကြီး ဩဝါဒနှင့်အညီ တရားဓမ္မထိုင်ရင်း ဆရာဝန်လက်လျော့လိုက်ရတဲ့ ရောဂါကြီးကို သက်သာသွားစေတဲ့ သာဓကတွေ စသဖြင့် အများကြီး ရှိခဲ့ဖူးပါတယ်။

နောက်ပြီး မမြင်နိုင်တဲ့ စွမ်းအားရှင်တွေဟာ သာသနာတော်ကို ချစ်မြတ်နိုးပြီး ရတနာသုံးပါးကို အမြဲမပြတ် ဆည်းကပ်တတ်တဲ့ ပုဂ္ဂိုလ်ကို စောင့်ရှောက်တတ်ဖူးတယ် ဆိုတာလဲ လက်တွေ့ သာဓကတွေ စသဖြင့် အများကြီး ရှိခဲ့ဖူးပါတယ်။

မြတ်စွာဘုရား သာသနာတော်မှာ အရိယာသူတော်စင်တွေ အမြဲရှိပါတယ်။

ဓမ္မဓာတ် ရင်ထဲကိန်းနေသူမှာ အန္တရာယ်နဲ့ ကြုံခဲ့ရင် အရိယာသူတော်စင်တွေဟာ ပြစ်မထားတတ်ကြပါဘူး။

လိုက်နိုင်မှ ခေါ်လို့ရ၊ စားနိုင်မှ ကျွေးလို့ရ ဆိုသလို ဓမ္မဓာတ် ရင်ထဲ ကိန်းမှသာလျှင် ကယ်လို့ရပါတယ်။

လူခြင်းတူသော်လည်း အကျင့်စရိုက်ခြင်း ကွဲပြားနေခဲ့သော် ကယ်လို့ မရနိုင်ပါဘူး။

ဓမ္မမှာ စွမ်းအားတွေ အများကြီး ရှိပါတယ်။ အဲဒီ စွမ်းအားတွေကို သီလနဲ့ ထုပ်ယူသုံးစွဲရပါမယ်။

အိမ်မှာပဲနေနေ တောမှာပဲနေနေ မိတ်ဆွေကြားထဲမှာပဲနေနေ ရန်သူကြားထဲမှာပဲရောက်ရောက် ဓမ္မဟာ နေရာတိုင်းမှာ ရှိနေပါတယ်။

ကပ်ရောဂါ မဆိုထားနဲ့ အပါယ်ငရဲရောဂါကိုတောင်မှ ပျောက်ကင်းနိုင်တဲ့ စွမ်းအား ဓမ္မမှာရှိပါတယ်။

ယုံကြည်မှု မရှိ၍ သော်လည်းကောင်း၊ဝတ္တရားတစ်ခုလို သဘောထား၍ သော်လည်းကောင်း၊ ခုတုံးသဖွယ် အသုံးချနေလို့ သော်လည်းကောင်း၊ သီလ မစောင့်ထိမ်း၍ သော်လည်းကောင်း၊ ဓမ္မက အစွမ်းမပြနိုင်ခြင်း ဖြစ်နေတာပါ။

ဒီအရာတွေ ရှောင်ရှားပြီး အသုံးချမယ်ဆိုရင် သေချာပေါက် အစွမ်းထက်ပါတယ်။

ဗုဒ္ဓဘာသာမှာ ဘေးဥပါတ်အန္တရာယ် ရောဂါဆိုးကြီးတွေကို ကွယ်ပါ့စေချင်ရင် လုပ်ထုံးလုပ်နည်းတွေ အများကြီး ရှိပါတယ်။

သရဏဂုံ သုံးပါးနဲ့ ကာထားရင်လဲ အန္တရာယ်တွေဟာ ကွယ်ပါတယ်။

ကိုယ်ကျင့်ငါးပါးသီလ လုံလုံခြုံခြုံထားပြီး ကာထားရင်လဲ အန္တရာယ်တွေဟာ ကွယ်ပါတယ်။

နေ့စဉ် အာစိဏ္ဏကံနဲ့ ဂုဏ်တော်ပွားပြီး ကာထားရင်လဲ အန္တရာယ်တွေဟာ ကွယ်ပါတယ်။

ဝိပဿနာဓမ္မတွေကို ကျင့်သုံးပြီး သစ္စာတရားနဲ့ ကာထားရင်လဲ အန္တရာယ်တွေဟာ ကွယ်ပါတယ်။

မိမိတို့ဟာ အကောင်းဆုံး ကာတတ်ဖို့ပဲ လိုပါတယ်။ အကောင်းဆုံးကာထားရင် အဆိုးဆုံးတွေဟာ ဝင်မလာနိုင်ပါဘူး။

ဘာမှ မကာထားရင်တော့ အမျိုးစုံ ဝင်လာပြီး စည်းရိုး ကြိုးပျက်သွားပါလိမ့်မယ်။

ဒါ့ကြောင့် မိမိတို့ ကြိုက်နှစ်သက်ရာ တစ်ခုခုနဲ့ ကပ်ရောဂါတွေ ကွယ်စေချင်ရင် အကောင်းဆုံး ကာထားကြပါလို့ ဗုဒ္ဓဘာသာ သူတော်စင်အားလုံးတို့အား တိုက်တွန်းနှိုးဆော် လိုက်ရပါတယ်။

အားလုံး အကောင်းဆုံးကာပြီး အဆိုးဆုံးတွေ ကွယ်ပါစေသတည်း။

ဓမ္မရံသီအရှင်ကဝိန္ဒ(မိုးကုတ်)

5.4.2020

Credit to original uploader.