တရားအာရုံစိတ်မှာထုံ
______🍁🌼🍁______
လူဆိုတာ ကိုယ်နှင့် ပတ်သက်ရာ ပတ်သက်ရာ စုဖွဲ့ပြီး နေကြတယ်။ အတူတူ စုဖွဲ့နေတော့ သံယောဇဉ် ဖြစ်သွားတယ်။ ဒီတော့ တစ်ယောက်ယောက်နဲ့ ခွဲရပြီဆိုတဲ့အခါ ဝမ်းနည်းရတယ်။ ဒါကြောင့် တပည့်သားမြေး အခြွေအရံဆိုတာ ကိုယ့်အနားမှာ အမြဲ ရှိနေမှာ မဟုတ်ဘူးလို့ တွေးထားဖို့ လိုတယ်။ မကွဲခင်က ခွဲထားရမယ်ပေါ့။
ဒါကြောင့် အတူတူနေကထဲက တစ်ယောက်တည်း နေတတ်အောင် ကျင့်ရမယ်။ တစ်ယောက်ထဲ မနေတတ်ရင် ခွဲရပြီဆိုတဲ့အခါ သားမျှော်လိုက်, သမီးမျှော်လိုက်, မြေးမျှော်လိုက်, မိတ်ဆွေမျှော်လိုက်နဲ့ တမျှော်မျှော် ဖြစ်နေတတ်တယ်။ မျှော်လို့ လာရင် တော်သေး၊ မလာရင် စိတ်ဆင်းရဲတယ်။
ဒါကြောင့် တစ်ယောက်ထဲ နေတတ်အောင် ကြိုးစားရမယ်။ တစ်ယောက်ထဲ
နေတတ်ဖို့အတွက် အာရုံတစ်ခုခုကို ကိုင်ထားရတယ်။ အဲဒီအာရုံကလည်း ကောင်းတဲ့အာရုံ ဖြစ်ရမယ်။ စာဖတ်မယ်, ပုတီးစိပ်မယ်, တရားနာမယ်, တရားထိုင်မယ်ပေါ့။
ဒီလို တရားအာရုံနှင့် နေသည့်အတွက် ကိုယ့်စိတ်က တခြားအာရုံဆီ မရောက်တော့ဘူး။ ဒီတော့ စိတ်က ငြိမ်ပြီး တစ်ယောက်ထဲ နေတတ်သွားတယ်။ တစ်ယောက်ထဲ နေတတ်သည့်အတွက် ကိုယ့်အနားမှာ တစ်ယောက်မှ မရှိလည်း ပြဿနာ မရှိတော့ဘူး။
တကယ်တော့ လူ့ဘဝကို လာတုန်းကလည်း တစ်ယောက်ထဲပဲ၊ ပြန်တော့လည်း တစ်ယောက်ထဲပဲ၊ ဘာမှ မဆန်းပါဘူး။ ဒါကြောင့် တစ်ယောက်ထဲ နေတတ်အောင် ကြိုးစားပါ။ တစ်ယောက်ထဲ နေတတ်ဖို့အတွက် တရားအာရုံ လိုတယ်။
တရားအာရုံရှိရင် အဖော်ရှိရှိ မရှိရှိ ကိုယ့်အတွက် အရေးမကြီးတော့ဘူး၊ တစ်ယောက်ထဲ နေတတ်သွားတယ်။ တစ်ယောက်ထဲ နေတတ်မှလည်း အဆင်ပြေမှာ မဟုတ်လား။
တရားအာရုံဆိုတာ
-------------------
ကုသိုလ်ဖြစ်စေတဲ့ အာရုံမှန်သမျှ တရားအာရုံပါပဲ။ စာပဲ ဖတ်ဖတ်, ပုတီးပဲ စိပ်စိပ်, ပဋ္ဌာန်းပဲ ရွတ်ရွတ်, တရားပဲ နာနာ, ဝိပဿနာပဲ အားထုတ်အားထုတ်, တရားအာရုံပဲ ဖြစ်ပါတယ်။
တရားအာရုံ မရှိရင် စိတ်က ဂနာမငြိမ်ဘူး။ စိတ်က ဂနာမငြိမ်လျှင် တောင်တွေးမြောက်တွေး တွေးတော့တာပဲ။ အတွေးများမှတော့ စိတ်ရှုတ်ပြီပေါ့။
တရားအာရုံရှိရင် စိတ်က ဂနာငြိမ်သွားတယ်။ စိတ်က ဂနာငြိမ်တော့ တစ်ယောက်ထဲ နေတတ်သွားတယ်။ ဘယ်သူ့ကိုမှ မမျှော်တော့ဘူး။ ဒါကြောင့် စိတ်ချမ်းသာမှုကို ရချင်ရင် "တရားအာရုံ စိတ်မှာထုံ" ဆိုတဲ့အတိုင်း တရားနှင့် နေနိုင်အောင် ကြိုးစားရမယ်။ တရားနှင့် နေနိုင်လေ အတွေးနည်းလေ၊ အတွေးနည်းလေ စိတ်ချမ်းသာလေပဲ ဖြစ်ပါတယ်။
သတ္တဝါခပ်သိမ်း, တရားကိန်း, အေးငြိမ်းချမ်းသာ ရှိပါစေ။
______________________
#အင်ကြင်းမြိုင်ဆရာတော်
#အရှင်ဒေဝိန္ဒာဘိဝံသ
No comments:
Post a Comment