ဘဝတန်ဖိုးမြှင့်တင်ပါ
_______☘🌺☘_________
ဘဝဆိုတာ အမြဲတမ်းသင်ယူနေရတယ်။ ဘာကြောင့်လဲ၊ လောကကြီးမှာ သင်ယူစရာတွေက မကုန်နိုင်လို့ပါပဲ။ ဒီတော့ ကိုယ့်ရဲ့ လိုအပ်ချက်တွေကို ဖြည့်ဆည်း ပေးနေရမယ်။ လိုအပ်ချက်ကို ဖြည့်ဆည်းပေးမှ ဘဝက တန်ဖိုးရှိမှာ မဟုတ်လား။
တန်ပြန်သက်ရောက်မှု သဘာဝ
-------------------------
နံရံကို ပစ်လိုက်တဲ့ ဘောလုံးဟာ ကိုယ့်ဆီ ပြန်ရောက်လာတာပဲ။ ခပ်ပြင်းပြင်းပစ်လေ တုံ့ပြန်မှုကလည်း ပြင်းထန်လေပဲ။ ကိုယ်က သူတပါးကို ဒုက္ခပေးရင် အဲဒီဒုက္ခဟာ ကိုယ့်ဆီ ပြန်လာမယ်။
သူများကို ဒုက္ခကြီးကြီး ပေးတဲ့သူဟာ ကိုယ့်ဆီကို ဒုက္ခကြီးကြီး ပြန်လာမှာပဲ။ သက်ရောက်မှုတိုင်းမှာ တန်ပြန် သက်ရောက်မှု ရှိတယ် မဟုတ်လား။ ဒါကြောင့် ဘာအကြောင်းကြောင့်မှ သူများကို ဒုက္ခ မပေးမိစေနဲ့၊ အဲဒါ အကောင်းဆုံးပဲ။
တန်ရာတန်ရာဖြစ်နေကြတာပါ
-----------------------------
လောကကြီးမှာ ဘယ်သူမဆို ကိုယ့်စိတ်နဲ့ တန်တဲ့ဘဝကို ရနေကြတာပါ။ စိတ်ထားဖြူရင် ရွှေထီးဆောင်းတဲ့ ဘဝကို ရမယ်။ ဘာမှ ဆုတောင်းစရာ မလိုဘူး။ သူ့အလိုလို ရလာလိမ့်မယ်။
စိတ်ထားယုတ်ရင်တော့ မြေနိမ့်ရာ လှံစိုက်ခံရမယ်။ ဘယ်သူမှ ငြင်းလို့ မရဘူး။ ဖြစ်သမျှ လည်စင်းခံရမှာပဲ။ ဒါကြောင့် မြေနိမ့်ရာ လှံစိုက် မခံရဖို့အတွက် ဘယ်လိုအကြောင်းကြောင့်မှ စိတ်ထား မယုတ်မိစေနဲ့၊ အဲဒါ အကောင်းဆုံးပဲ။
တစ်ခုခု သင်ယူပါ
-----------------
ကမ္ဘာကြီးဟာ ဘာကိုမှ စိတ်မချရဘူး။ ဒါကြောင့် အသက်ရှင်ဖို့ဆိုတာ လွယ်တာ မဟုတ်ဘူး။ ဒီတော့ အသက်ရှင်သန်ခိုက်မှာ တစ်ခုခု ရအောင် ယူရမယ်။ တစ်ခုခု ရဖို့အတွက် တစ်ခုခု သင်ယူနေရမယ်။
တချို့နိုင်ငံတွေမှာ အဘိုးအဘွားတွေဆိုရင် အသက်ရှစ်ဆယ် ရှိနေတာတောင် ဘာသာစကား အသစ် သင်ယူကြသတဲ့။ ဒါမျိုး အတုယူရမယ်။ ဒါကြောင့် အသက်ရှင်နေတုန်းမှာ တစ်ခုခု သင်ယူနိုင်အောင် ကြိုးစား ၊ အဲဒါ အကောင်းဆုံးပဲ။
"သတ္တဝါခပ်သိမ်း၊ တရားကိန်း၊ အေးငြိမ်းချမ်းသာ ရှိပါစေ"
____________________
#အင်ကြင်းမြိုင်ဆရာတော်
#အရှင်ဒေဝိန္ဒာဘိဝံသ
No comments:
Post a Comment