••••••••••••••••••••••••••••••
ပုထုဇဉ်လူသားတိုင်း ကောင်းမှု၊မကောင်းမှုပြုကြပါသည်။ ကံ.. ကံ၏ အကျိုးကို ယုံကြည်ကြသည် ဗုဒ္ဓဘာသာဝင်များ ဖြစ်သည့်အလျောက် မိမိပြုခဲ့သော ကံအလ်ိုက် အကောင်း၊အဆိုး ကို စံစား၊ခံစားကြမယ် ဆိုတာ ယုံကြည်ထားကြပါသည်။ အကောင်းအဆိုး ဝေခွဲမရခင် အချိန်အခါက ကျူးလွန်ခဲ့သော မိမိတို့၏ မကောင်းမှုကံ ကို အကောင်းအဆိုးနားလည် သဘောပေါက်လာ ချိန်တွင် နောင်တရစေလျက်၊ မိမိတို့၏ ပြုလုပ်ခဲ့သော မကောင်းမှုကံကြောင့် ခံစားရမဲ့ ဆိုးကျိုးကို ပပျောက် စေချင်ကြပါသည်။ သို့ဖြစ်ပါ၍ မိမိ ကဲ့သို ပင် ခံစားရသော "မကောင်းမှုအကုသိုလ်"များ ပပျောက်စေရန် ရရှိထားသော နည်းကို ဓမ္မမိတ်ဆွေများ အား ထပ်တူထပ်မျှရရှိကြစေရန်မျှဝေပေးလိုက်ပါသည်။
( ခန္ဓာ-၅ပါးတစ်ဦး )
••••••••••••••••••••
အခြေအနေ၊ အကြောင်းကြောင်းတွေကြောင့် လူမှုပတ်ဝန်းကျင်မှာနေထိုင်ကြစဉ်အတွင်း လူတိုင်းလူတိုင်းကိုယ်စီ အမှားမကင်းနိုင်ကြပါဘူး၊ အမှားဆိုတာကလဲ "လောကအမှား၊ သံသရာ အမှား"၊ တနည်းအားဖြင့် "လောကီအမှား၊လောကုတ္တရာ အမှား"လို့ ဆိုရမှာပါ။
အလုပ်ထဲလုပ်ငန်းခွင်ထဲမှာ၊မိတ်ဆွေတွေကြားမှာ၊ မိသားစုမှာ၊ စသည် မှားတတ်တာမျိုးကို"လောကအမှား၊လောကီ အမှား" လို့ ဆိုနိုင်ပါတယ်၊
ဒါမျိုးက"ပြန်လည်ပြင်ဆင်ခွင့်" ရှိနိုင်ပါသေးတယ်။
"သံသရာ အမှား" ဆိုတာကတော့ "အရိယာသူတော်ကောင်း၊ ဆရာသမား၊
လူကြီးမိဘတွေ"အပေါ်မှာ ကံသုံးပါး တပါးပါးနဲ့ ပြစ်မှား မိတာမျိုး၊ သူတပါးအသက် သတ်ခြင်း၊ ခိုးယူခြင်း၊ ကာမဂုဏ်မှားယွင်းမိခြင်း၊ မုသားပြောဆိုခြင်း၊ အရက်သေစာ သောက်စားခြင်း စတဲ့ သီလချိုး ဖောက်ခြင်းများကတော့ ယခု "လက်ရှိဘဝမှာရော၊ သံသရာ"မှာပါ အကျိုးပေးနိုင်တာမို့ “သံသရာအမှား” လို့ ခေါ်ဆိုရမှာ ဖြစ်ပါ တယ်။
နောင်ဘဝ တွေမှာလဲ
• သူတပါးပယောဂဖြင့် သေဆုံးရခြင်း၊
• ဥပစ္ဆေဒကကံကြောင့် ငယ်ငယ်ရွယ်ရွယ်သေရခြင်း၊
• ရှိပြီးသား ဥစ္စာများ ဆုံးရှုံးရခြင်း၊
• ယောကျာ်းမဟုတ်၊မိန်းမမဟုတ်၊ နပုံးပဏ္ဍုပ် ဖြစ်ရခြင်း၊
• စကားမပီမသ၊ ထစ်အ ဆွံ့အဖြစ်တတ်ခြင်း၊
• ဦးနှောက်ကျပ်မပြည့်ပဲ လူစဉ်မမှီခြင်း
စတာတွေကို ဘဝတခုခု၊ ဒါမှမဟုတ် ဘဝပေါင်းများစွာပေးဆပ်ခံကြရတာမို့ "သံသရာ အမှား" လို့ ဆိုသင့်လှပါတယ်။
"ဝဋ်မှာ အမြဲ၊ ငရဲမှာ အပ" ဆိုတဲ့ ရှေးစကားကလဲ ဒီလို အပြစ်တွေကို ပေးဆပ်ရခြင်းကို ရည်ရွယ်ထားတာဖြစ်တာကြောင့်
မသိလို့ မိုက်မှားခြင်း ရှိခဲ့သော်လည်း တန်ပြန် အကျိုးပေးမှာကိုတော့ ကြောက်ရွံ့ ကြပြန်တာ သတ္တဝါအားလုံးပါပဲ။
ထေရဝါဒ ဗုဒ္ဓဘာသာဝင်တွေမှာ
ကံကောင်းစေတာ တစ်ခုက ဗုဒ္ဓရဲ့ တရားတော်တွေအလိုအရ အပြစ်ရှိသော်လည်း လုံးဝ ကုစားလို့ မရတာမျိုးတော့ မဟုတ်ပါဘူး။"ကုစားလို"့ ရနိုင်ပါသေးတယ်။
မှားမှန်းသိရင် အမှန်ပြင်ဆင်ခွင့် ရှိနိုင်ပါသေးတယ်။
သို့သော် ဒူးထောက်ပြီး “ခွင့်လွှတ်ကျေအေးတော်မူပါ”ဆိုတာမျိုးလောက်နဲ့တော့ မရဘူး။ ပြုပြီးသား အကုသိုလ်ကို လုံးဝ ကင်းစင်သွားအောင်ဆိုသည်မှာ မြတ်စွာဘုရား ကိုယ်တော်တိုင်တောင် မတတ်နိုင်ခဲ့ပါဘူး။
♦ အနာပေါက်ပြီးရင် အမာရွတ်တော့ ကျန်နေအုံးမှာပါ။
♦ အမာရွတ်က အမာရွတ်ပါပဲ။
♦ ထို့အတူ ပြုပြီးသားအကုသိုလ်ပဲ ဖြစ်ဖြစ် ၊ကုသိုလ်ပဲဖြစ်ဖြစ် ဖြစ်စဉ်တစ်ခုမှာ ပုံရိပ်အနေနဲ့( ကံတစ်ခုအနေနဲ့ ) ကျန်ရစ် နေပါလိမ့်မယ်။
"လုပ်ပြီးသား"ကို "မလုပ်ခဲ့ပါဘူး" လို့ ပြောလို့မရတော့ပါဘူး။
သို့သော် "ရှိပြီးသား အကုသိုလ်" ကို အားနည်းသွားအောင်၊ "အကျိုးမပေးနိုင်အောင်” တော့ ဗုဒ္ဓတရားတော်များမှာ အခွင့်အလမ်း ရှိနေပါသေးတယ်။
သတ္တဝါတွေကို ကံ က အကျိုးပေးတယ် ဆိုရာမှာ ထိုကံကို ထောက်ပံ့ပေးနေတဲ့ နောက်ခံအကြောင်းတရားတွေ အများကြီး ရှိနေသေးတာကို ရှေးဦးစွာ လက်ခံရမှာ ဖြစ်ပါတယ်။အဲဒီနောက်ခံအကြောင်းတရားတွေ ဆိုတာဟာလဲ အလွယ်ပြောရရင် “ကိလေသာ”တွေပါ။
အဲဒီ"ကိလေသာ" တွေကို "အားနည်းအောင်၊ကုန်ခမ်းသွားအောင်" လုပ်နိုင်ရင် ဘဝ၊ဘဝများစွာကပြုလုပ်ခဲ့တဲ့ အကုသိုလ်တွေဟာ နောက်ထပ် ဘဝသစ်အနေ နဲ့ ပဋိသန္ဓေအကျိုးကို မပေးနိုင်တော့ပါဘူး။ဒါကိုပဲ ကံ ကို "သတ်ပစ်တယ်" လို့ ဆိုပါတယ်။
ဘုရား ပစ္စေကဗုဒ္ဓါ ရဟန္တာ မထေရ်ကြီးများလဲ အတိတ်ဘဝများစွာက ကံတွေ ရှိခဲ့ကြတာမို့ ဒီဘက်ဘဝမှာ ကံတွေရဲ့အကျိုးပေးကို ခံကြရသေးတယ်။
ဒါပေမယ့် နောက်ဘဝသစ် ဖြစ်ဖို့ တဏှာ အဝိဇ္ဇာတွေကို ပယ်သတ်လိုက်တာကြောင့်
ဒါပေမယ့် နောက်ဘဝသစ် ဖြစ်ဖို့ တဏှာ အဝိ"ချုပ်ငြိမ်း"ကုန်ကြတယ်။
■ ဥပမာအားဖြင့် အညွန့်တလူလူ ဖြစ်နေဆဲ ၊ရှင်သန်နေဆဲ ၊ သစ်ပင်လေးကို ရေနွေးပူနဲ့ လောင်းသတ်လိုက်သလို ........
ဘဝများစွာ က ပါလာခဲ့တဲ့ ကံတွေကို "အရိယာမဂ်ဖိုလ်" ဆိုတဲ့ ရေနွေးနဲ့ လောင်းလိုက်တာမို့ ပြန်လည် မရှင်သန်နိုင်တော့ပါဘူး၊ လုံးဝ အကျိုးမပေးနိုင်တော့ပါဘူး၊
မြတ်စွာဘုရားက ပြုပြီးသား အကုသိုလ်တွေကို ပယ်သတ်ဖို့ နည်းလမ်း( ၄ ) မျိုးကို
“သင်္ခဓမ္မသုတ္တန်” မှာဟောကြားထားခဲ့ပါတယ်၊
၁။ အကုသိုလ်ကို အကုသိုလ်မှန်း သိအောင် လုပ်ပါ။
၂။ သိမြင်ပြီးလျင် ဒါဟာ မကောင်းဘူး လို့ လက်ခံနိုင်အောင် ကြိုးစားပါ။
၃။ အကုသိုလ်ကို နောက်တကြိမ် မပြုမိအောင် စောင့်စည်းပါ။
၄။ အကုသိုလ်စိတ်ဖြစ်ပေါ်တာနဲ့ ကုသိုလ်တခုခုဖြင့် အစားထိုးလိုက်ပါ။
အထက်ပါ အချက်လေးချက်နဲ့ ကုစားလျှင် နောက်ထပ် နောက်ထပ် "အကုသိုလ်"တွေကို ပြုလုပ်မိတာ နည်းပါးသွားမှာ သေချာပါတယ်၊ နောက်ဆုံးတစ်ခုကတော့ "ကိလေသာ"တွေ အားလုံးကုန်သွားရင် ကံတွေကနေ လုံးဝ လွန်မြောက် သွားတာပါ။ဘဝတစ်ခုကို ဖြစ်စေမယ့် ကံတွေကနေ လွတ်မြောက်သွားတယ် လို့ ဆိုနိုင်ပါတယ်။
သို့သော် အတိတ်ဘဝ တခုခုက ပြုလုပ်ပြီးသား အကုသိုလ်ရဲ့ အကျိုးကိုတော့ ဒီခန္ဓာကြီး ရှိနေသေးတဲ့အတွက်ကြောင့် "ပဝတ္တိအကျိုး" အဖြစ် ပေးဆပ်ကြရပါအုံးမယ်။
● မြတ်စွာဘုရားကိုယ်တော်မြတ်ကြီးတောင်မှ ကိလေသာအားလုံး ကုန်ခမ်းသွား ပေမယ့် ခေါင်းကိုက်တာ၊ ခါးနာတာ၊ ၀မ်းသွေးသွန်ရောဂါခံစားရတာ၊ စသဖြင့်ပါရမီနုစဉ်ကပြုခဲ့ဖူးတဲ့ အကုသိုလ်တို့ရဲ့ ၀ဋ်ကြွေးအဖြစ်ပေးဆပ်ရတာပဲ ။
(မြတ်စွာဘုရားရှင်၏ ဝဋ်ကြွေးတော်(၁၂)ပါးအကြောင်း) ။
● အရှင်မောဂ္ဂလာန်မထေရ်ကြီးလဲတန်ခိုးအရာမှာ အသာဆုံး ဘွဲ့ထူးကြီး ရထားပါသော်လည်း ခိုးသားငါးရာရဲ့ လက်ချက်နဲ့ ရိုက်နှက်ခံရထုထောင်းခံရပြီး ပရိနိဗ္ဗာန်စံတော်မူခဲ့ရတာပါ။
ဒါကြောင့် ကံရဲ့ အကျိုးဆက်တွေက ရရှိပြီးသား ဘဝကိုတော့ ဒုက္ခပေးနေအုံးမှာပါ။ ရဟန္တာမထေရ်မြတ်ကြီးတွေအတွက် ယခုဘဝမှာ လုပ်တဲ့ကံတွေကတော့ နောက်ထပ်
အကျိုးမပေးနိုင်တော့ဘူး။ နောက်ထပ် ဘဝသစ်တခုကို ထုတ်လုပ်မပေး နိုင်တော့ပါဘူး။
နောက်ဘဝတွေမှာ ငရဲဘဝ၊ လူ့ဘဝ စသည်ဖြင့် ပဋိသန္ဓေအကျိုးကို မပေးနိုင်တော့ပါဘူး။ "ပဝတ္တိအကျိုး" အနေနဲ့တော့ ဒီဘဝမှာ ဒုက္ခတွေ များစွာ ခံကြရအုံးမယ်။
♠ အကျဉ်းချုပ်လိုက်တော့ပြုပြီးသား အကုသိုလ်တွေကိုတော့ deleting လုပ်လို့တော့ မရတော့ဘူး။
isolate လုပ်ဖို့ပဲ ကျင့်သုံးရမှာ ဖြစ်ပါတယ်။♠
မျိုးစေ့တစ်ခုကို "အပင်မပေါက်"စေချင်ရင် လေလုံခြောက်သွေ့တဲ့ ဖန်ပုလင်းထဲမှာ ပိတ်ထားပါက အပင်မပေါက်နိုင်ပါဘူး၊ သို့မဟုတ် မီးဖုတ်ပစ်လိုက်တယ်။ထုခွဲပြစ်လိုက်တယ်၊ ဖျက်ဆီးပစ်လိုက်တယ်ဆိုရင်
မြေဓာတ်၊ ရေဓာတ်တွေနဲ့ မတွေ့သမျှ အပင်မပေါက်နိုင်တော့ဘူး။ မြေ ရေတွေနဲ့ ထိတွေ့ခွင့်ရလျင်တော့ အပင်ပေါက်ရှင်သန်လာမှာ သေချာပါတယ်။
အဲဒီလိုမျိုးပါပဲ ကံတွေ ဆိုတာဟာ ကိလေသာတွေ နဲ့ မတွေ့တော့ရင် အကျိုးမပေးနိုင်တော့ဘူး။အကျိုးပေးခွင့်မရတော့ဘူး၊ ကိလေသာတွေ ရှိနေသေးသမျှ အကျိုးပေးနေပါအုံးမယ်။ဒါ့ကြောင့် ကိလေသာတွေ နောက်ထပ် မဖြစ်တော့အောင် ကျင့်ကြံနိုင်ပြီ အနုပါဒိသေသ နိဗ္ဗာန်ချမ်းသာကို ခံစားနိုင်ပြီ ဆိုရင် ကံအားလုံး ပြတ်ဆဲပါပြီ။
သဥပါဒိသေသ နိဗ္ဗာန် ဆိုတဲ့ ရရှိပြိးသား မဂ်ဖိုလ်များနဲ့ နိဗ္ဗာန်အငြိမ်းဓာတ်ကို ခံစားနိုင်သော်လည်း ရုပ်နာမ်ခန္ဓာကိုယ်ကြီး ထင်ရှားရှိ နေသေးတာမို့ ကာယိကဒုက္ခများကို ပေးဆပ်ကြအုံးမှာပါ။
ယခုလက်ရှိဘဝ အပါအဝင် နိဗ္ဗာန်မရောက်မှီကြားကာလမှာ
• အကုသိုလ်ကို အကုသိုလ်လို့ သိခြင်း၊
• ဒါမကောင်းပါလား လို့ လက်ခံပြီး
• နောက်ထပ် နောက်ထပ် မကျူးလွန်မိအောင် စောင့်စည်းခြင်း၊
• ကုသိုလ်ကောင်းမှုများဖြင့် အစားထိုးခြင်း ဟူသောနည်းလမ်းလေးသွယ်ဖြင့် ဖြူစင်မြင့်မြတ်သော အကုသိုလ် နည်းပါးသော ကုသိုလ်များဖြင့်သာ ထုံမွှန်းထားသော ဘဝများကို ပိုင်ဆိုင်နိုင်ကြပါစေ...လို့ ပါမောက္ခချုပ် ဆရာတော် ဒေါက်တာ အရှင်နန္ဒမာလာဘိဝံသ ၏ ဓမ္မဗျူဟာ သင်တန်းမှ သင်တန်းသားအမေးအဖြေကို ကောက်နှုတ်တင်ပြယင်း ကုသိုလ်ပြုလိုက်ပါသည်။
တရားအသိဥာဏ်များ တိုးပွားနိုင်ကြပါစေ။
••••••••••••••••••••••••••••••••••••
(ခန္ဓာ-၅ပါးတစ်ဦး)
Credit....
No comments:
Post a Comment