⏩ မီးတောက်ပမာ သံယောဇဉ် 🎡
➖➖➖➖➖➖➖➖➖➖
✤ မီးတကာ့ မီးတွေထဲမှာအပူဆုံး
အလောင်ဆုံးဟာ သံယောဇဉ်မီးပါ ၊မီးခိုးလည်းမထင် ပြာလည်းမမြင်ရပေမယ့်
အမြင့်ဆုံးအပူချိန်ကို ပေးတတ်ပါတယ် ၊ မီးတောက်မီးလျှံတွေလိုအပြင်ကိုမထွက်လာပေမယ့် ရင်ထဲမှာ အပြင်းထန်ဆုံးလောင်
ကျွမ်းမှုတွေကို ဖြစ်ပေါ်စေပါတယ် ၊
✤ ရင်ထဲမှာတမြေ့မြေ့နဲ့
လောင်မြိုက်ခံရတဲ့အတွက် ပူလွန်းမက ပူလောင်ကြရပါတယ် ၊ဘယ်အပူနဲ့မှမတူ ၊ အလွယ်တကူငြိမ်းသတ်လို့လည်း မရနိုင်ပါဘူး ၊
ဒီအပူငြိမ်းအောင် အပြင်လူတွေကူဖို့ဆိုတာလည်း မဖြစ်နိုင်လို့အင်မတန်မှ ခက်ပါတယ် ။
✤ စိတ်တွေပူတယ် ရင်တွေပူတယ် စိတ်မကောင်းဖြစ်ရတယ် ၊စိတ်ညစ်ရတယ် စိတ်ဆင်းရဲရတယ် စတာတွေဟာ သံယောဇဉ်မီးရဲ့ လောင်ကျွမ်းမှုဒဏ်တွေကြောင့်ပါ ၊ သံယောဇဉ်ရဲ့လက်ချက်ကြောင့် ငိုယိုရတာတွေ ၊ သေကျေရတာတွေ ၊ ပျက်ဆီးရတာတွေ ပူလောင်ပြင်းပြ နွမ်းကြေရတာတွေဟာ ကြည့်တတ်မြင်တတ်ရင် ကိုယ့်ပတ်ဝန်းကျင်မှာ နေ့စဉ်နဲ့အမျှ မြင်တွေ့နေရမှာပါ
✤ ဝဋ်ဆင်းရဲနဲ့ သတ္တဝါတွေကို
ထာဝစဉ် ပူးကပ်နေအောင် ငြိနေစပ်
နေအောင် တွယ်ငင်ထားတာ ရစ်ပတ်ထားတာ နှောင်ဖွဲ့ထားတာ ဟာ သံယောဇဉ်ပါ ။
✤ သံသရာဝဋ်က မကျွတ်နိုင်မလွတ်နိုင်အောင် တုပ်ဖွဲ့ချည်နှောင်ထားတာကို သံယောဇဉ်လို့ ခေါ်ပါတယ် ၊ အိုခြင်း နာခြင်း သေခြင်းတွေ ၊ စိုးရိမ်ရတာ ငိုကြွေးရတာ ပူဆွေးရတာကနေ
လွတ်မြောက်ချင်ပေမယ့် ဘာလို့မလွတ်နိုင်တာလည်းလို့မေးရင်
ချည်ထားခံရလို့ပါ ၊ သံယောဇဉ်ကြိုးတွေက ခိုင်ခိုင်မြဲမြဲချည်နှောင်ထားလို့ပါ ။
✤ တစ်ဘဝရတော့လည်း အိုနာသေ ၊ နောက်တစ်ဘဝဖြစ်ပြန်လည်း အိုနာသေ ၊ ဒီဘဝမှာလည်း ငိုကြွေးရ ပူဆွေးရ သောကဖြစ်ရ ၊ နောင်ဘဝကျပြန်တော့လည်း ငိုကြွေးရပြန် ပူဆွေးရပြန် သောကဖြစ်ရပြန်နဲ့
တဝဲဝဲလည်နေတဲ့ သံသရာဝဋ်ကြီးထဲကနေ လွတ်မြောက်ချင်တယ် ၊ လွတ်ထွက်ချင်တယ်ဆိုရင် သံယောဇဉ်ကြိုးတွေ ပြတ်မှဖြစ်ပါမယ် ၊ သံယောဇဉ်မီးတွေ ငြိမ်းသွားမှဖြစ်မယ် ။
✤ မမြင်ရတဲ့ သံယောဇဉ်ကြိုးတွေ
တစ်စတစ်မျှင်မျှ မကျန်အောင်ဖြတ်တောက်နိုင်ပါမှ သံယောဇဉ်မီးတွေ တစ်ကြွင်းတစ်စမကျန်
ရအောင်ငြိမ်းသတ်နိုင်မှသံသရာဝဋ်ကကျွတ်ပါမယ်။
✺ ဒေါက်တာအရှင်ပညိဿရ
🙏🙏🙏
Credit...
No comments:
Post a Comment