ရဟန်းဖြစ်စေ လူဖြစ်စေမည်သူမဆို
ဆင်းရဲသော လောကဓံကိုကြံ့ကြံ့ခံနိုင်ပေမယ့် …
ချမ်းသာပြည့်စုံလာသောအခါ အောက်ခြေ လွတ်၍
မိုးမမြင် လေမမြင်ဖြစ်ပြီး…
အမိအဖ ဆရာသမား ညီအစ်ကို
မောင်နှမ မိသားစု အသိုင်းအဝိုင်းအပေါ် …
အလေးမထား ဂရုမစိုက်မလေးမခန့် အပြောအဆို
အနေအထိုင် မဆင်ခြင်တတ်
ဖြစ်လာတတ်တယ်...။
အောက်ခြေလွတ်ပြီးမပြောသင့်တာ
ပြောလာတတ်တယ်...။
အနေအထိုင်မတတ် မိမိသီလ သမာဓိ အခြေခံပြီး
တရားမကျင့်ဖြစ်ဘဲ လာဘ်လာဘနောက်ကို လိုက်ပြီး နောက်ဆုံးဘဝနေဝင်ချိန်မှာ နောင်တကြီးစွာနဲ့သေရတတ်တယ်၊ သင်သတိထားပါ...။
လောကမှာ မည်သူမည်ဝါမဆိုကိုယ်တွင်း သန္တာန်မှာ ကုသိုလ်အာရုံနဲ့ ဝေးနေတဲ့သူဟာ…
ကြမ်းတမ်းသော လောဘစိတ်ဝင်ရောက်ပြီ ဆိုရင်
ဆွေမျိုးဆိုတာ မရှိတော့ဘူး...
နှလုံးမသာယာတဲ့ ဒေါသအကြမ်း
ဝင်ရောက် နေသူ၏ စိတ်မှာ
ချစ်ခင်သူ မြတ်နိုးရသူဆိုတာမရှိတော့ဘူး...။
အတွေးတွေ ဝေဝေဆာပြီးစိတ်ပြန့်လွင့်ပြီးတည်ငြိမ်မှုမရှိသော မောဟအကုသိုလ်
စိတ်ဓာတ်ကြောင့် …
ကျေးဇူးရှင် ဖြစ်ဖြစ်...မေတ္တာရှင်ဖြစ်ဖြစ်
စေတနာထားသူဖြစ်ဖြစ် ပြန်လည်ပြီး ကျေးဇူးဆပ်ရမှန်းဆိုတာမရှိတော့ဘူး...။
ဒါကြောင့် ဤအကုသိုလ်စိတ်
တစ်ခုခု ဝင်နေသူသည်စိတ်မယဉ်ကျေးတော့ဘူး...။
မိုက်မဲတွေဝေကာ ကောင်းတဲ့ အတွေးအခေါ်
အကြံအစည်တွေ မဖြစ်စေတော့ပြီ...။
ထို့ကြောင့် ...
သင့်စိတ်ကို ခဏခဏစစ်ပေးပါ၊
အကုသိုလ် အဝင်မခံပါစေနဲ့...။
မိမိခန္ဓာကိုယ်ကို
သတိထားကြည့်လိုက်တော့ …
" ခန္ဓာကိုယ် ဇရာထောင်းလေတော့
ပြောင်းအိလို့ရင့်ရော်နောက်ပြန်လို မပျိုပါသည်၊
တိုးလို့သာအို မြဲဇရာတည်း၊မရဏလာ သည်၊
များမကြာ သေမင်းလက်တည်း" ဆိုတဲ့ စကားလို…
တို့ခန္ဓာကြီးဟာ တစ်ရက်နဲ့ တစ်ရက်မတူ
တစ်လနဲ့ တစ်လမတူ ပုံစံတွေပြောင်းလဲပြီး
တဖြေးဖြေး အိုရာကနာ နာရာက သေရာသို့ နီးနီးလာနေတယ်...။
အရှေ့ဘက်ထွက်လာတဲ့နေမင်းကြီးသည်
အနောက်ဂေါရာမြေသို့တဖြေးဖြေးပျောက်ကွယ်သွားသလို …
တို့ခန္ဓာကြီးဟာ မကောင်းတာတွေ စုံပြီး
အကောင်းတွေကုန်ဆုံးခဲ့ပါပေါ့လားဟု
အမြဲ တစေ ဆင်ခြင်နိုင်ကြပါစေဟု
ဆန္ဒပြုလျက်...။
(မြောက်ဦးဆရာတော်ဘုရားကြီး)
🙏🙏🙏🙏🙏🙏🙏🙏🙏
Credit
No comments:
Post a Comment