❒ လောကမှာ အကောင်းဆုံးဥစ္စာကဘာလဲ
နံပါတ်(၁)မေးခွန်းက လောကမှာ အကောင်းဆုံးဥစ္စာကဘာလဲ။ ဒီမေးခွန်း ကိုမေးတယ်။
လောကမှာ အကောင်းဆုံးဥစ္စာ ဘာလဲလို့မေးရင် လူတွေက ဘာပြောကြ မလဲဆိုရင် - စိန်ရွှေရတနာတွေရဲ့ တန်ဖိုး သိတဲ့လူဆိုရင် လောကမှာ စိန်က အကောင်းဆုံးလို့၊ ရွှေက အကောင်းဆုံးလို့ မပြောကြပေဘူးလား၊ ပတ္တမြားကအကောင်းဆုံးလို့ ဒီလိုပဲပြောကြမှာပဲ။ လောကမှာ အကောင်းဆုံးပစ္စည်းဥစ္စာဆိုတာ ဘာလဲတဲ့။ ဒီမေးခွန်း လူတွေကို မေးလိုက်မယ်ဆိုရင် အဖြေအမျိုးမျိုးထွက်မှာ။ တိုက်လိုချင်တဲ့လူက တိုက်ပေါ့၊ ရွှေလိုချင်တဲ့လူက ရွှေလို့ပြောမှာပဲ။ ကားလိုချင်တဲ့ လူက ကားလို့ပြောမှာပဲ။ ဟုတ်ရဲ့လား၊ အဖြေတွေအမျိုးမျိုး မထွက်နိုင်ဘူးလား၊ ထွက်နိုင်တယ်။
အကောင်းဆုံးပစ္စည်းဥစ္စာက ဘာလဲ ဆိုတဲ့မေးခွန်းကို မြတ်စွာဘုရား ဖြေလိုက်တာက လောကလူတွေမတွေးမိတဲ့ အဖြေမျိုးပဲ။ မြတ်စွာဘုရားက ❝သဒ္ဓါ တရားဟာ အကောင်းဆုံးဥစ္စာ❞ တဲ့။ ကဲ-ကြည့်။ ဒီအဖြေရဲ့ လေးနက်မှုက ဘယ်လောက်ထိအောင်သွားလဲဆိုရင်။
ဆိုပါစို့၊ စိန်ရဲ့ တန်ဖိုးကို ကြည့်ရအောင်။ စိန်ဟာ တန်ဖိုးရှိတယ်၊ မှန်တယ် နော်။ အင်မတန်တန်ဖိုးရှိတယ်၊ ရွှေဟာလည်း အင်မတန်တန်ဖိုးရှိတယ်၊ အားလုံး သိကြတဲ့အတိုင်း ပတ္တမြားတွေလဲ အင်မတန်မှ တန်ဖိုးရှိတယ်၊ အခြား ပစ္စည်းဥစ္စာ တွေလဲ တန်ဖိုးရှိတယ်။ သို့သော်လည်း အဲဒီ တန်ဖိုးရှိတဲ့ ရတနာပစ္စည်းတွေဟာ ရန်သူမျိုး (၅)ပါးနှင့် ပျက်နိုင်သလား၊ မပျက်နိုင်ဘူးလား။
ဆိုပါစို့၊ စိန်ရှိတဲ့ပုဂ္ဂိုလ်လည်းပဲ စိန်လိုချင်တဲ့ပုဂ္ဂိုလ်နဲ့တွေ့ပြီး ကိုယ့်ဆီက လုယက်ပြီး ယူမသွားဘူးလား။
နောက်ဆုံး ကိုယ်ကနေပြီးတော့ ဘဝတစ်ခု ပြောင်းသွားရင် ကိုယ်ပိုင်တဲ့စိန် မထားခဲ့ရဘူးလား၊ ထားခဲ့ရတယ်။ ဒီပစ္စည်းတွေရဲ့ တန်ဖိုးဟာ အချိန်ကာလပိုင်းနဲ့ပဲ ကြည့်မယ်ဆို အလွန်တိုတောင်းတယ်။ အလွန်လဲ အန္တရာယ်များတယ်။ သူတောင်းစားကို ဓားပြတိုက်ခံရတယ်လို့ မကြားဘူးပေါင်နော်။ ပိုက်ဆံရှိတဲ့လူမှ ဓားပြတိုက်ခံရတာမဟုတ်လား။ ပိုက်ဆံရှိလာပြီဆိုရင် အန္တရာယ် ကို ဖိတ်ခေါ်နေတာပဲ။ ပစ္စည်းဥစ္စာချမ်းသာပြီး မကြောက်ရဘူးလား၊ ကြောက်ရတယ်။ ပစ္စည်းဥစ္စာရှိတဲ့ပုဂ္ဂိုလ်ဟာ ထိုပစ္စည်းဥစ္စာအတွက် အင်မတန်မှ ထိတ်လန့် ကြောက်ရွံ့ပြီး နေကြရတယ်၊ ဒါလက်တွေ့ပဲ။
မရှိတောင်းတ ရှိကြောင့်ကြတဲ့။ ပစ္စည်းဥစ္စာတွေကို မရှိတဲ့လူက တောင်းတတယ်၊ ရှိတဲ့လူက ကြောင့်ကြတယ်။ ကြောင့်ကြတယ်ဆိုတာ ပူပန်နေရတာကို ပြောတာ။ မီးခံသေတ္တာကြီးကိုသော့လေးတခတ်ခတ်နဲ့၊ ဟိုအပ်လဲစိတ်မချ၊ ဒီအပ်ရလဲ စိတ်မချနဲ့ ဒီလိုဖြစ်မနေဘူးလား။ အဲတော့ ဒီပစ္စည်းဥစ္စာက လူကို အကျိုးပြုနေ တာလား၊ လူကိုနှိပ်စက်နေတာလား။ တကယ်က နှိပ်စက်နေတာနော်။ အဲဒီတော့နှိပ်စက်နေတဲ့ အရာဝတ္ထုတစ်ခုကို အကောင်းဆုံးပစ္စည်းလို့ နာမည်တပ်လို့ ဖြစ်ပါမလား၊ မဖြစ်ဘူး။ ဒါကြောင့်မို့ အကောင်းဆုံးပစ္စည်းလို့ မခေါ်နိုင်ဘူး။
ပစ္စည်းဥစ္စာသည် လူကို နှိပ်စက်တတ်တယ်၊ ဖျက်ဆီးတတ်တယ်ဆိုတာ မြတ်စွာဘုရားကိုယ်တော်တိုင် ဟောထားတာရှိတယ် -
❝ဟနန္တိ ဘောဂါ ဒုမ္မေဓံ၊ နော စ ပါရဂဝေသိနော။❞
ပစ္စည်းဥစ္စာကို အကြောင်းပြုပြီး ဒီဘဝမှာ အလုအယက် အတိုက်အခိုက် သတ်ဖြတ်ခံရတဲ့လူတွေ ရှိတယ်၊ ပစ္စည်းဥစ္စာကြောင့် နောင်ဘဝမှာ ပြိတ္တာဘဝ ရောက်သွားတဲ့လူတွေရှိတယ်။ ငရဲကျသွားတဲ့လူတွေရှိတယ်၊ ပစ္စည်းဥစ္စာက လူကို ဒုက္ခပေးသွားတာ။
လောကလူတွေကတော့ထင်တယ်၊ “အေး-ရွှေတွေ ငွေတွေ ချမ်းသာလို့ ရှိရင် ဒီပစ္စည်းဥစ္စာတွေဟာ ငါ့အတွက် ချမ်းသာသုခပေးလိမ့်မယ်” လို့။ သို့သော် ချမ်းသာချည်းပေးတာ ဟုတ်ရဲ့လား၊ ဆင်းရဲဒုက္ခကိုပေးတာက ပိုများတယ်နော်။ ချမ်းသာကိုပေးတာက နည်းနည်းလေးရယ်။ စိန်လေးရှိလို့ စိန်လေးဝတ်ပြီး စိန် နားကပ်လေးပန်ပြီး ခေါင်းလေးယမ်းလိုက်လို့ ဝင်းကနဲ ဝင်းကနဲ ဆိုတာလေးက လူအထင်ကြီးတယ်၊ ဒီအရသာလေးတစ်ခုပဲခံလို့ရမယ်။ ကြောက်နေရတာက ပိုတယ်၊ ဟုတ်ရဲ့လား။ အဲဒါကြောင့်မို့ ပစ္စည်းဥစ္စာကပေးတဲ့ ချမ်းသာသုခဆိုတာ အင်မတန်နည်းပြီး အင်မတန်တိုတောင်းတယ်။ ဒါကြောင့် “အမြတ်ဆုံးဥစ္စာ”လို့ မခေါ်နိုင်ဘူး။
မြတ်စွာဘုရားရဲ့ အဖြေဟာ လောကလူသားတွေရဲ့အဖြေနဲ့မတူဘူး၊ မြတ်စွာ ဘုရားက “သဒ္ဓိ ဝိတ္တံ ပုရိသဿ သေဋ္ဌ”တဲ့။ လောကမှာလူတွေအဖို့ အကောင်းဆုံး ဥစ္စာဆိုတာ သဒ္ဓါကိုပြောတာတဲ့။
သဒ္ဓါသည် အကောင်းဆုံးဥစ္စာ
ဒါဖြင့်ကောင်းပြီ၊ သဒ္ဒါကို အကောင်းဆုံးဥစ္စာလို့ ဘာဖြစ်လို့ပြောလဲ၊ လောက လူတွေဟာ သဒ္ဓါတရားမရှိရင် ဒါန ကောင်းမှုလုပ်ပါ့မလား၊ သီလရော ဆောက်တည် ပါ့မလား၊ ကမ္မဋ္ဌာန်းဘာဝနာ ရော အားထုတ်ပါ့မလား၊ မထုတ်ဘူး။ သဒ္ဓါလို့ဆိုတဲ့ စိတ်ဝင်စားမှု၊ ယုံကြည်မှုအပေါ်မှာ အခြေခံပြီး လူတွေဟာ ဒါန ကောင်းမှု လုပ်တယ်၊ ဒါနကောင်းမှုလုပ်တဲ့ပုဂ္ဂိုလ်တွေ ဘဝသံသရာမှာ ချမ်းသာသုခရကြတာချည်းပဲ။
လောကမှာ သူဌေးကြီးဖြစ်သွားတဲ့ ပုဂ္ဂိုလ်တွေ ကြည့်- ကိုယ့်ဘဝ ကိုယ့် လက်ထက် ကိုယ်ကြိုးစားလို့စည်းစိမ်ဥစ္စာရလာတာ မရှိမဟုတ်ဘူး၊ ရှိတယ်။ ဒါလည်း ကံပေးမှခိုင်မြဲတယ်၊ ဘဝမှာ အလွန်ချမ်းသာတဲ့ မိသားစုအိမ်ကို ရောက်လာဖို့ဆိုတာ ဘယ်သူကပို့တာလဲ၊ ကံကပို့တာ၊ သဒ္ဓါတရား ရှိခဲ့သည့်အတွက်ကြောင့် သဒ္ဓါတရားက ပို့လိုက်တာလို့ ပြောလို့ရတယ်၊ ချမ်းသာတဲ့မိသားစုအိမ်မှာ လူလာဖြစ်ဖို့ သဒ္ဓါ ရှိခဲ့လို့ ကုသိုလ်ကောင်းမှုလုပ်ခဲ့သည့်အတွက်ကြောင့် သဒ္ဓါတရားက ပို့လိုက်တာ၊ သူ့မှာ ပိုင်ဆိုင်တာ ဘာတုန်းဆိုရင် သဒ္ဓါ ဆိုတဲ့ဥစ္စာ ပိုင်ဆိုင်တယ်။
သဒ္ဓါဆိုတဲ့ဥစ္စာ ပိုင်ဆိုင်လို့ရှိရင် ဇောတိကလို သူဌေးကြီးမျိုးလည်းဖြစ်တာပဲ၊ ဇောတိက ဘာကြောင့်သူဌေးဖြစ်တုန်း။ သဒ္ဓါရှိခဲ့လို့၊ ဟိုတုန်းက ဇဋိလသူဌေး လည်း ဘာကြောင့်သူဌေးဖြစ်တုန်း။ သဒ္ဓါ ရှိခဲ့လို့။ ဟုတ်ရဲ့လား။ သဒ္ဓါကို အရင်း တည်ပြီး ကုသိုလ်ကောင်းမှုတွေလုပ်ခဲ့လို့ ဇောတိက, ဇဋိလ, ပုဏ္ဏ တို့ သူဌေးတွေ ဖြစ်လာကြရတာတဲ့။ ပုဏ္ဏသူဌေးဆိုရင်ကြည့်- လှူတာကနည်းနည်း၊ ရလိုက်တာက အများကြီး၊ ထွန်ထားတဲ့ မြေကြီးခဲတွေ အကုန်ရွှေဖြစ်သွားတယ်၊ ဘယ်သူက ပေးတာတုန်း၊ သဒ္ဓါကပေးတာ။ ဒါကြောင့် သဒ္ဓါကပေးတဲ့ ပစ္စည်းဥစ္စာဆိုရင် ဖျက်ဆီးလို့မရဘူး၊ အလွန်ခိုင်မာတယ်။ သဒ္ဓါ ရှိနေပြီဆိုရင် ဘဝသံသရာ ခရီးမှာ အမြဲပြည့်စုံလုံလောက်နေနိုင်တယ်။ ဒါကြောင့် သဒ္ဓါဆိုတဲ့ ဥစ္စာပါဖို့လိုတယ်။ ကျန်တဲ့ ဥစ္စာ အဓိကမဟုတ်ဘူး၊ သဒ္ဓါဆိုတဲ့ဥစ္စာကို သူခိုးဓားပြက လုယက်တိုက်ခိုက်လို့ မရဘူးတဲ့။
သံသရာခရီးသွားတဲ့အခါမှာ သဒ္ဓါဆိုတဲ့ ပစ္စည်းဥစ္စာ ပါသွားတဲ့ ပုဂ္ဂိုလ် တစ်ယောက်ဟာ လူဖြစ်ရင်လည်း အထက်တန်း၊
နတ်ဖြစ်ရင်လည်း အထက်တန်း၊ ဘယ်နေရာပဲဖြစ်ဖြစ် အထက်တန်းကျကျ စည်းစိမ်ဥစ္စာပြည့်ပြည့်ဝဝနဲ့ ဖြစ်ရတယ်။
ဒါကြောင့်မို့ သဒ္ဓါဆိုတဲ့ ဥစ္စာရှိရင် ခုနက စိန်ရှိဖို့လည်း မခဲယဉ်းတော့ဘူး၊ ရွှေရှိဖို့ လည်း မခဲယဉ်းဘူး၊ တိုက်ရှိဖို့လည်း မခဲယဉ်းဘူး၊ ကားရှိဖို့လည်း မခဲယဉ်းဘူး။ အဓိကအကြောင်းကို မြတ်စွာဘုရားကဖြေတာ။ “သဒ္ဓိ ဝိတ္တံ ပုရိသဿ သေဋ္ဌံ” သဒ္ဓါဆိုတာ တကယ့်အကောင်းဆုံး ပစ္စည်းဥစ္စာ။
လောကမှာ ရသမျှပစ္စည်းဥစ္စာ၊ လူ့သမိုင်းမှာ ချမ်းသာတဲ့လူမှန်သမျှ သဒ္ဓါ တရား အရင်းခံတဲ့ ကံကအကျိုးပေးလို့ရကြတာ၊ ချမ်းသာကြတာချည်းပဲ။ ကံမကောင်း အကြောင်းမလှပြီဆိုရင် ဘာလုပ်လုပ်ပျက်စီးတတ်တယ်။ ကံရှိတဲ့ပုဂ္ဂိုလ်မှအောင်မြင်တယ်၊ ဖြစ်ထွန်းတယ်။ လောကမှာကြိုးစားကြပေမယ့် လူတိုင်းရော စီးပွား ဖြစ်ရဲ့လား၊ မဖြစ်ဘူး။ မဖြစ်တာဘာကြောင့်လဲဆိုရင် ဒီ အခြေခံကွဲလွဲချက်တွေ ရှိနေလို့ပဲ။ အဲဒီ အခြေခံကွဲလွဲချက်ကို ရည်ညွှန်းပြီး မြတ်စွာဘုရားက “သဒ္ဓိဓ ဝိတ္တံ ပုရိသဿ သေဋ္ဌံ - သဒ္ဓါတရားဟာ အကောင်းဆုံးသော ဥစ္စာတစ်ခုပါ” တဲ့။
အဲဒီတော့ ဘုန်းကြီးတို့ တရားချစ်ခင် သူတော်စင် ပရိသတ်တို့ ဘဝအရေး စိတ်အေးရန်အတွက် ဘာပစ္စည်းစုကြမလဲ၊ သဒ္ဓါဆိုတဲ့ပစ္စည်းကို စုရမယ်။
သဒ္ဓါဟူသည်
ဒါဖြင့် သဒ္ဓါဆိုတာ ဘာလဲ၊ ကုသိုလ်ကောင်းမှုပြုလုပ်ရန် စိတ်ဝင်စားနေတာ သဒ္ဓါ၊ ယုံကြည်တာသက်သက်မဟုတ်ဘူး၊
ဘုရား တရား သံဃာကို ယုံကြည်တယ်၊ကောင်းတာလုပ်ရင် ကောင်းတာဖြစ်တယ်လို့ ယုံကြည်တယ်၊ အဲဒါလက်ခံပြီးတော့ ကုသိုလ်ကောင်းမှုလုပ်ရန် စိတ်ဝင်စားနေတာကို သဒ္ဓါလို့ခေါ်တယ်။ သဒ္ဓါ ဆိုတာ စိတ်ဝင်စားတယ်၊ ယုံကြည်တယ်။
သဒ္ဓါတရား မိမိစိတ်ထဲမှာ ဖြစ်လာတာနဲ့ တစ်ပြိုင်နက် ဘာလှူရင် ကောင်းမတုန်းလို့ စိတ်က လှူဖို့တန်းဖို့ ကြံစည်လာတယ်။ သီလဆောက်တည်ဖို့၊ ဥပုသ်စောင့်ဖို့ စိတ်ကူးလာတယ်။ ကမ္မဋ္ဌာန်းအားထုတ်ဖို့ စိတ်ကူးလာတယ်။ အဲဒီ စိတ်ကူးလေး ဖြစ်လာရင် ကိုယ့်သန္တာန်မှာ သဒ္ဓါဖြစ်ပြီလို့ မှတ်ပေတော့နော်။ အဲဒီလို စိတ်ကူးမရသေးရင် သဒ္ဓါတရားမရှိဘူးလို့ ပြောရမယ်။ လှူတာတစ်ခုတည်းတင် မဟုတ်ဘူးနော်။ ကုသိုလ်ကောင်းမှုမှာစိတ်ဝင်စားလာတယ်၊ အခုကြည့်လေ၊ တရားပွဲ သွားပြီး တရားနာဦးမှပဲဆိုတဲ့ စိတ်ကူးလေးဟာ ဘယ်သူ့ကြောင့် ပေါ်လာတာတုန်း၊ သဒ္ဓါကြောင့် ပေါ်လာတာ။
သဒ္ဓါ ရှိတဲ့ပုဂ္ဂိုလ်ဟာ (၁) တရားနာချင်တယ်၊ (၂) သူတော်သူမြတ်ကို ဖူးမြင်ချင်တယ်၊ (၃) လှူချင်တန်းချင်တယ်၊
ဒါ သဒ္ဓါရှိတဲ့ ပုဂ္ဂိုလ်ရဲ့ အမှတ်အသား လက္ခဏာ ၃-ချက်ပဲ။ တရားနာချင်တာလည်း သဒ္ဓါကြောင့်၊ သူတော်သူမြတ်ကို ဖူးမြင်ချင်တာလည်း သဒ္ဓါကြောင့်၊ လှူချင်တန်းချင်တာ တစ်ခုတည်းကိုသာ သဒ္ဓါလို့ ခေါ်တာ မဟုတ်ဘူး။
တာဝတိံသာနတ်ပြည်က နတ်တွေဟာ သေခါနီးဖြစ်တဲ့ သူတို့မိတ်ဆွေ နတ်ကို မှာလိုက်ကြတယ်။ “မင်းစိတ်ကူးမလွဲနဲ့၊ သုဂတိဘုံကိုရောက်အောင်သွား၊အကောင်းဆုံးသောအရာကိုရအောင်ယူ၊ အဲဒီ အကောင်းဆုံးသောအရာကို လက်လွှတ်ဆုံးရှုံးမခံနဲ့” ဒီစကားလေး ၃-ခွန်း မှာလိုက်ကြတယ်။
(၁) “သုဂတိဘုံသွား” ဆိုတာ လူ့ပြည်သွားလို့ ပြောတာ၊ (၂) “အကောင်းဆုံး သောအရာကို ရအောင်ယူ” ဆိုတာ သဒ္ဓါတရားကိုပြောတာ၊ (၃) “အကောင်းဆုံး သောအရာကို လက်လွှတ်ဆုံးရှုံးမခံနဲ့” ဆိုတာ သဒ္ဓါတရား မပျက်စေနဲ့လို့ ပြောလိုက်တာ။
ဘာဖြစ်လို့တုန်းဆိုရင် သဒ္ဓါတရားရှိရင် နတ်ပြည်ရောက်ဖို့ရာ လုံလောက် သောကြောင့်ဖြစ်တယ်။ ဟောဒီ သဒ္ဓါတရားရှိရင် ကုသိုလ်ကောင်းမှုအားလုံးဟာ ဘာမှမခက်တော့ဘူး၊ ဒါကိုပြောတာနော်။
လောကမှာ အောင်မြင်မှု၊ ကြီးပွားမှု၊ စည်းစိမ်ဥစ္စာတွေရမှုရဲ့ အခြေခံ အကျဆုံး အကြောင်းတရားသည် သဒ္ဓါသာ ဖြစ်ပါတယ်တဲ့။ အဲဒါကြောင့် သဒ္ဓါကို အကောင်းဆုံးဥစ္စာလို့ဟောတာဖြစ်တယ်။ ကျန်တဲ့ကုသိုလ်တွေက သူ့ကို အကြောင်း ပြုပြီး ရလာတာ ဖြစ်သောကြောင့် သူ့လောက်အဓိကမကျဘူးတဲ့။ အာဠဝကကြီး မေးတဲ့ ဒီမေးခွန်းရဲ့ အဖြေဟာ ဘဝအရေးနဲ့ပတ်သက်တာ။
ဒါကြောင့်မို့ တရားချစ်ခင် သူတော်စင်ပရိသတ်တို့၊ “ကိုယ့်ဘဝအရေး စိတ်အေးရအောင်” အကောင်းဆုံး ပစ္စည်းဥစ္စာဖြစ်တဲ့ သဒ္ဓါတရားကို ပိုင်ဆိုင်အောင် လုပ်ကြရမှာဖြစ်ပါတယ်။ သဒ္ဓါတရား ကိုယ့်သန္တာန်မှာ မပြည့်စုံသေးရင် ဘဝအရေး စိတ်အေးဖို့ ပြည့်စုံအောင်လုပ်ထားရမယ်။
#ပါမောက္ခချုပ်ဆရာတော်ကြီး
#Credit#သုဝဏ္ဏသျှမ်
#စာဖတ်သူတစ်ယောက်၏ မှတ်စုများ
၁၃၇၀ ပြည့်နှစ်၊ တပို့တွဲလပြည့်ကျော် ၄ ရက်
ရန်ကုန်တိုင်း၊ တာမွေမြို့နယ်၊ မလွှကုန်း(က)ရပ်ကွက်၊ သူဌေးလမ်းတွင် ဟောကြားတော်မူသည့် ဘဝအရေးစိတ်အေးရလေအောင် တရားတော်မှ ကောက်နုတ်ဖော်ပြပါသည်။
No comments:
Post a Comment