ကုသိုလ်အမြဲလုပ်ပါ

🌷🌿🌷 ကုသိုလ်အမြဲလုပ်ပါ 🌷🌿🌷

 ဘဝမှာ အဆင်မပြေတာတွေ ကြုံတဲ့အခါတိုင်း

 ကုသိုလ်ကောင်းမှုကို ပိုပြီးပြုလုပ်ပါ။

 အဆင်မပြေလို့ ဗေဒင်သွားမေးလည်း

 ကုသိုလ်လုပ်ခိုင်းတာပဲ မဟုတ်လား။

 သူတို့အပြောကတော့ ယတြာချေတာပေါ့။

 ဘယ်ဆရာမှ အကုသိုလ်လုပ်ခိုင်းပြီး

 ယတြာမချေခိုင်းဘူး။ ကုသိုလ်ပဲလုပ်ခိုင်းတာ။

 အဲဒီလိုဆိုတော့

 သူ့အားကိုးတာထက် ကိုယ့်အားကိုယ်ကိုးပြီး

 ကုသိုလ်တရား ကြိုးစားပွားရုံပေါ့။

 အဆင်မပြေလည်း ကုသိုလ်လုပ်၊

 အဆင်ပြေရင်လည်း ကုသိုလ်လုပ်၊

 အတိုက်အခိုက်ကြုံရင်လည်း ကုသိုလ်လုပ်၊

 အနှောက်အယှက်ရှိရင်လည်း ကုသိုလ်လုပ်၊

 ပိုပြီးအဆင်မပြေရင် ပိုပြီးကုသိုလ်လုပ်၊

 လုပ်နေရင်းနဲ့ကို ပိုဆိုးလာနေရင်လည်း

 စိတ်ဓာတ်မကျနဲ့။

 ယုံကြည်မှုအပြည့်၊ ဇွဲကြီးကြီးနဲ့သာ ဆက်လုပ်။

 သေချာပေါက်ကို ကုသိုလ်က

 ကိုယ့်ကို စောင့်ရှောက်ပါလိမ့်မယ်။ 

ယုံကြည်မှုနဲ့ ဇွဲရှိမှုကိုတော့ မလျော့စေနဲ့။ 

 ဘဝမှာ ကုသိုလ်တွေ အားကြီးလာရင်

 အကုသိုလ်တွေ၊ အဆိုးတွေ

 အားနည်းသွားမှာပဲလေ။

 သောက်ရေခွက်လောက် ရှိတဲ့ ရေထဲကို

 ဆားတစ်ကုတ်လောက် ပစ်ထည့်ရင်

 အဲဒီရေခွက် ငန်တူးသွားမှာပေါ့။

 ရေအပြည့်ရှိနေတဲ့ ရေကန်ကြီးထဲကို

 ဆားတစ်ကုတ်လောက် ပစ်ထည့်ကြည့်ပါလား၊

 ရေအရသာ ဘာမှပြောင်းမှာ မဟုတ်ဘူးလေ။ 

 ရေက များနေတာကိုး။

 ဒီလိုပဲ ကုသိုလ်တွေ အားကြီးနေရင်

 အကုသိုလ်ဟာ အသေးအမွှားလေးပဲ

 ဖြစ်သွားမှာပေါ့။

 ဒါကြောင့် ကုသိုလ်ကောင်းမှုကို

 လျော့မတွက်ပါနဲ့။ 

 အဆင်တစ်ခါမပြေတိုင်း

 ကုသိုလ်တစ်ခု တိုးလုပ်ပါ။ 

 ပိုပြီးမပြေရင် ပိုပြီးလုပ်ပါ။ 

ကုသိုလ်အားကြီးလာရင်

 အားလုံးက အဆင်ပြေသွားမှာပါ အမှန်ပါပဲ။

 🙏🙏🙏 မနာပဒါယီ အရှင်ဝိစိတ္တ 🙏🙏🙏

Credit

တရားထိုင်ခြင်းသည် ရောဂါကုထုံး တစ်ခုဖြစ်သည်

"တရားထိုင်ခြင်းသည် ရောဂါကုထုံးတခုဖြစ်သည်" 

🌷🌷🌷🌷🌷🌿🌿🌿🌿🌿🌷🌷🌷🌷🌷

တရားရှုမှတ်နေစဉ် ဦးဏှောက်ဇီဝကမ္မဖြစ်စဉ်များက လျင်မြန်စွာပြောင်းလဲလာသြလို အာရုံကြောဇီဝကမ္မဖြစ်စဉ်ပြောင်းလဲခြင်း အာရုံကြော ဓာတုဗေဒဆိုင်ရာ ပြောင်းလဲခြင်းများဖြစ်ပေါ်လာသည်ကိုလည်း သိပ္ပံနည်းကျ ရှာဖွေတွေ့ရှိခဲ့ကြပြီ ဖြစ်သည်။ 

( က ) တရားထိုင်ခြင်းနှင့် အာရုံကြော ဇီဝကမ္မဖြစ်စဉ် ပြောင်းလဲခြင်း။ 

Andrew-Newberg MD၏ လေ့လာချက်ဖြစ်ပြီး 

ပန်ဆိုင်ဗေးနီးယား ဆေးပညာစင်တာ တက္ကသိုလ်ရှိ

အာရုံကြောဌာန စိတ်ရောဂါဌာနတို့နှင့် ပူးပေါင်း၍ လေ့လာခဲ့သည်။

တရားထိုင်ခြင်းဖြင့် ဦးဏှောက်တွင်း သွေးစီးဆင်းမှု 

အားကောင်းစေခြင်း၊ 

MRI, EEG,MEG စက်များဖြင့် ဦးဏှောက်ကိုလေ့လာကြည့်ရာ အာရုံကြော ဇီဝကမ္မဖြစ်စဉ်များအပေါ် လွှမ်းမိုး သက်ရောက်မှုရှိကြောင်း တွေ့ရှိခဲ့ရသည်။

တရားထိုင်အလေ့အကျင့်ရှိသော ဗုဒ္ဓဘာသာဝင်များနှင့် ပြင်သစ်နိုင်ငံမှ သီလရှသ်များ၏ ဦးဏှောက်ကို အဆင့်မြင့် နည်းပညာများဖြင့် လေ့လာခဲ့ခြင်းဖြစ်သည်။ 

အလေးအနက် တွေးခေါ်စဉ်းစားချိန်၌ ဇီဝကမ္မဖြစ်စဉ်များနှင့် အာရုံကြောဆိုင်ရာ အဖြစ်အပျက် အပြောင်းအလဲများ 

အားကောင်းလာသည်ကို တွေ့ရှိခဲ့ရသည်။

တရားထိုင်ခြင်းဖြင့် ဦးဏှောက်၏ 

အ်လ်ဖာ၊ ဘီတာ၊ သီတာလှိုင်းများ တိုးတက်လာသည်၊ ဦးဏှောက်စည်းချက်ညီညီ ဖြစ်ပေါ်မှု အားကောင်းစေသည်။

ထို့ပြင် ဦးဏှောက်ကို အားဖြည့်ပေးသော ရုပ်ပိုင်းဆိုင်ရာ စိတ်ပိုင်းဆိုင်ရာ ပြောင်းလဲမှုများအပေါ် အကျိုးသက်ရောက်မှုရှိစေနိုင်သော "ဆီရိုတိုနင်"ဟော်မုန်း တိုးပွားလာစေသည်။ 

ဆီရိုတိုနင် နည်းလျင် စိတ်ကျရောဂါ ခံစားရခြင်း 

ညဘက်အိပ်မပျော်ခြင်းများ ဖြစ်ပေါ်စေနိုင်သည်။

သို့ဖြစ်ရာ ယင်းလေ့လာချက်များမှနေ၍ တရားထိုင်ခြင်းသည် ဦးဏှောက်အာရုံကြော လျပ်စစ်ဓာတ်ဖြစ်ပေါ်မှု၊ အာရုံကြောဓာတုဆိုင်ရာ ပြောင်းလဲမှုနှင့် အာရုံကြောဇီဝကမ္မ ဖြစ်စဉ်များအပေါ် သက်ရောက်မှုရှိကြောင်း သက်သေပြနိုင်ခဲ့သည်။ 

( ခ )တရားထိုင်ခြင်းဖြင့် ဦးဏှောက်အိုခြင်းကို ကာကွယ်ပေးသည်။

"လော့စ်အိန်ဂျလိစ် ကယ်လီဖိုးနီးယားတက္ကသိုလ်မှ 

သိပ္ပံပညာရှင်များ၏ လေ့လာချက်- ၂၀၁၅ ခုနှစ်"

"ဟားဗတ်တက္ကသိုလ်မှ သုတေသနပညာရှင်များ၏ လေ့လာချက်-၂၀၁၁ ခုနှစ်"

"ဂျွန်ဟော့ကင်းမှ လေ့လာချက်- ၂၀၁၄ ခုနှစ်"တို့တွင်

တရားထိုင်ခြင်းသည် ဦးဏှောက်ကို နုပျိုစေကြောင်း ရေးသားတင်ပြခဲ့သည်။ တွေ့ရှိချက်များအရ ပျမ်းမျှ အနှစ်-၂၀ တရားထိုင်သူများ၏ 

မီးခိုးရောင် ဦးဏှောက်အပိုင်း( အသိဉာဏ်၊ စဉ်းစားဉာဏ်၊ တစ်ရှူး )သည် သာမန်လူသားများထက် ထူနေကြောင်း တွေ့ရပြီး တရားထိုင်ခြင်းဖြင့် အသက်ကြီးလာသော်လည်း၎င်းတို့၏ စဉ်းစားဉာဏ်မှာ လျော့ကျမသွားဘဲ ထိန်းထားနိုင်ကြောင်း တွေ့ရသည်။ 

စိတ်ဖိစီးမှု စိတ်သောကဖြစ်စေသော ဦးဏှောက်၏ 

ဆဲလ်များထုတ်လွှတ်ခြင်း လျော့နည်းစေသည်ကိုလည်း တွေ့ရသည်။

ဦးဏှောက်ကို လေ့ကျင့်ခန်းလုပ်ပေးနေသကဲ့သို့ဖြစ်၍ ဦးဏှောက်၏ အသိစိတ်ကို တိုးမြှင့်စေပြီး စိတ်ဓာတ်ကျခြင်းသောကရောက်ခြင်း နာကျင်ခြင်းတို့ကို လျော့နည်းလာစေသည်။ 

( ဂ )တရားထိုင်ခြင်းဖြင့် ဦးဏှောက်ကျုံ့ခြင်းကို တွန်းလှန်ကာကွယ်နိုင်သည်။

တရားထိုင်ခြင်းဖြင့် ဦးဏှောက်ကြွက်သားများ

တောင့်တင်းခိုင်မာစေပြီး ဦးဏှောက်ကျုံ့ခြင်းကို 

တွန်းလှန်နိုင်ကြောင်း ကယ်လီဖိုးနီးယားတက္ကသိုလ် 

ဦးဏှောက်ဓာတ်မှန်ရိုက် ဓာတ်ခွဲခန်းဌာနမှ 

လက်ထောက်ဧည့်ပါမောက္ခ "အီလင်းလူဝါခ်"နှင့်အဖွဲ့သည် ဦးဏှောက်ဓာတ်မှန်ရိုက်နည်း အသစ်တမျိုးဖြင့် ဦးဏှောက်အတွင်း ဖွဲ့စည်းတည်ဆောက်ထားပုံနှင့် ဆက်စပ်နေပုံကို ဓာတ်မှန်ရိုက် လေ့လာခဲ့ရာ တရားထိုင်သူများ၏ ဦးဏှောက်အစိတ်အပိုင်း တခုနှင့်တခုအကြား ဆက်နွယ်မှုသည် ပိုမိုအားကောင်းကြောင်း တွေ့ရှိခဲ့ကြသည်။ 

ထို့ကြောင့် အသက်ကြီးရင့်၍ မေ့လျော့ခြင်းကို ဖြစ်စေတတ်သော ဦးဏှောက်ကျုံ့ခြင်းကို လျော့ပါးစေကြောင်း တွေ့ရှိခဲ့ကြသည်။

ဆက်သွယ်မှု အားကောင်းသောကြောင့် ဦးဏှောက်အတွင်း အီလက်ထရွန်နစ် အချက်ပြမှုများ ထုတ်လွှတ်နေခြင်းကို တွေ့မြင်ရသည်ဟု ဆိုသည်။

ပျမ်းမျှအသက် ၅၂- နှစ်ရှိ ပုံမှန်တရားထိုင်သူ ၂၇-ဦးနှင့် တရားမထိုင်သူ ၂၇-ဦးတို့ကို နှိုင်းယှဉ်လေ့လာခဲ့ရာမှ အထက်ပါအချက်များကို တွေ့ရှိရခြင်းဖြစ်သည်။ 

ဒေါက်တာနီလာသိန်း( လင်းရောင်သစ် )တွဲဖက်ပါမောက္ခ/မျက်စိအထူးကုဆရာဝန်ကြီး၏ " သိပ္ပံပညာရှင်များ သုတေသနပြုထားသော ဝိပဿနာနှင့်ကျန်းမာရေး ဆောင်းပါးများ " စာအုပ်မှ ကူးယူ မျှဝေပါသည်။

(လွန်ခဲ့တဲ့ ၂ နှစ်က တစ်ခါတင်ခဲ့ဖူးပါတယ်)

credit.....

သတိသာထားလိုက်ပါ

❝ သတိသာ ထားလိုက်ပါ။ ❞

==================

သတိထားတဲ့အလုပ်က...

ရိပ်သာမှာ ပြန်ပြန်ထားခဲ့တာကိုး။

အိမ်မှာလည်း ထားရတယ်။ 

အမြဲတမ်း ထားရတယ်။

သတိလွတ်နေရင် ဘာဖြစ်လဲ ?

အကုသိုလ်ပဲ။

 

လောဘ၊ ဒေါသ၊ မောဟ သုံးခုဟာ

သတိသာလွတ်နေရင် 

သူတို့ချည်းပဲ နေရာယူကြတာ။ 

သတိလွတ်တယ်ဆိုကတည်းက မောဟပဲ။ 

ဒီကြားထဲ လောဘဖြစ်လိုက်၊ ဒေါသဖြစ်လိုက်၊ 

တစ်နေကုန်တစ်နေခန်း။

  

သတိထားလိုက်တော့ 

ကားမောင်းသွားလည်း သတိ၊

စားတာသောက်တာလည်း သတိ၊ 

ချက်တာပြုတ်တာလည်း သတိ၊ 

သတိနဲ့လုပ်တော့...

ချက်ရင်းပြုတ်ရင်းကို တရားရသွားကြတယ်။ 

စားရင်းသောက်ရင်းနဲ့လည်း 

တရားရသွားကြတယ်။

  

သတိကို အတင်းသွားလုပ်ယူလို့တော့ မရဘူး။

အတင်းလုပ်ယူရင် ကျောင်းပြန်ရောက်တယ်။ 

လုပ်မယူရဘူး။ လုပ်ယူရင် လုပ်တဲ့အခိုက်ပဲ။ 

လုပ်တဲ့အခိုက်ပဲ ပညတ် ပေါ်မှာပဲ။

ပညတ် သိပဲ သိလို့ရတယ်။ 

ပရမတ် သဘောတရား မရောက်ဘူး။ 

သူ့ဟာသူ သဘာဝအတိုင်း သိမှ။

  

ရချင်လို့ လုပ်ရင် လောဘ၊ 

လုပ်တိုင်းမရတော့ ဒေါသ၊

ဖြစ်တိုင်းဖြစ်တိုင်း မသိတာက မောဟ။

  

လုပ်ရမှာက...

သတိထားနေတာက ယောဂီအလုပ်။

ကျန်တာက သတိရှိနေရင် 

သတိရဲ့အလုပ်ပဲ။ ဓမ္မ အလုပ်။

 

ဖြစ်ပျက်သမားကလည်း

ဖြစ်ပျက်မြင်အောင် 

အတင်းလိုက်လုပ်နေတယ်။ 

အာရုံကောင်းအောင် လုပ်တယ်။

နာတာကျင်တာတွေ 

ပျောက်အောင် လုပ်တယ်။

ပျောက်တာကို လိုချင်တယ်။ 

မကောင်းတာကို ပျက်အောင် လုပ်တယ်။ 

တရားက အဲဒီကတည်းက လမ်းလွဲနေပြီ။

  

လိုချင်တာနဲ့ မလိုချင်တာကို ပယ်ဖို့ 

တရားအားထုတ်တာ။ 

လိုချင်တာက လောဘပဲ။ 

အနာပျောက်သွားတာလေးကို လိုချင်တယ်။

လိုချင်တာက လောဘ။မလိုချင်တာက ဒေါသ။

သတိသာ ထားလိုက်ပါ။ 

သတိထားရင် သတိက 

သူ့အလုပ်သူ လုပ်သွားမယ်။

သတိက ပယ်သင့်ပယ်ထိုက်တာကို ပယ်မယ်။

သမာဓိက တည်ငြိမ်အောင် လုပ်ပေးနေတယ်။

ပညာက အမှားအမှန် ဝေဖန်ပေးနေတယ်။

အဆုံးအဖြတ်ပေးနေတယ်။ 

ကိုယ်က လိုက်လုပ်စရာ မလိုဘူး။

               

(ရွှေဥမင်တောရ ဆရာတော်ဘုရားကြီး)

📌အမှောင်ပျောက်၍ အလင်းရောက်ပါစေ။📌

credit . .. U Way Phyo

ဘုရားရှိခိုး စိတ်လွင့်သူ မရှိခိုးသူနဲ့တူ မတူ

ဘုရားရှိခိုးစိတ်လွင့်သူ 

      ရှိမခိုးသူနဲ့တူ,မတူ 

   🙏 အရှင်ဘုရား.... တပည့်တော်မသည် ဝန်ထမ်းတစ်ဦး ဖြစ်ပါသည်ဘုရား။ တပည့်တော်မ ည၊ မနက် ဘုရားရှိခိုးလျှင် ဖြစ်စေ၊ အားလပ်သည့် အချိန်၌ ဂုဏ်တော် ကိုးပါးတို့ကို ရွတ်ဆိုနေလျှင် ဖြစ်စေ ပါးစပ်က ရွတ်ဆိုနေပေမယ့် စိတ်ကတော့ အပြင်ထွက် နေပါသည် ဘုရား။ အဲဒါ ရှိမခိုးတဲ့ သူတွေနှင့် တူနေပါသ လားဘုရား။ ဘာမျှ အကျိုးအာနိသင်မရ ဖြစ်နေပါသလား ဘုရား။ ဖြေရှင်းပေးတော်မူပါဘုရား။

 ဥမ္မာကြည်( သံဖြူဇရပ်) 🙏🙏🙏🙏🙏 

   ဘုရားလက်ထက်က မိစ္ဆာဒိဌိသူငယ်ကလေး ခြေထောက်ကို ဘီလူး ဆွဲသဖြင့် အိပ်ရာမှ ယောင်ယမ်း၍ " နမော ဗုဒ္ဓါယ" ဟု ရွတ်ဆိုသဖြင့် ဘီလူး မစားဝံ့ဘဲ စားစရာများ ပူဇော် သွားရပုံ၊ အလမ္ပာယ်ပုဏ္ဏား နဂါးနှင့်တွေ့၍ အဓိပ္ပာယ် မသိ သော်လည်း သူတစ်ပါး ရွတ်ဆိုသံ ကြားဖူး၍ " နမော ဗုဒ္ဓါယ" ရွတ်ဆိုသဖြင့် နဂါးက ရွှေရတနာပန်းခိုင်ဖြင့် ပူဇော်သွားပုံတို့ကို သာဓကပြု၍ ပါးစပ်က ဂုဏ်တော်တို့ကို အသံထုတ်၍ ရွတ်ဆို ပူဇော်နေက ရတနာသုံးပါး၌ စိတ်ညွတ်နေမှု၊ အသံထုတ်၍ ကြည်ညိုပူဇော်နေမှု၊ နေ့စဉ် နိဗဒ္ဓ နိစ္စဓူဝ ပူဇော်နေမှု တို့ကြောင့် ရှိမခိုး၊ ဝတ်မပြုသူတို့ထက် များစွာ သာလွန်နေပါသည်။ 

    သို့သော် စိတ်အပြင်မထွက်အောင် အာရုံပြု၍ ဘုရားရှိခိုးစာတို့ကို မိမိနားလည်သော ( ပါဠိဘာသာဖြစ်က) အနက် ပါဆိုမှု၊ မြန်မာဘာသာ ဘုရားရှိခိုး ဖြင့် ရွတ်ဆိုမှု၊ နေ့စဉ် ဆိုနေကျ အစဉ်ကို ပြောင်း၍ ဆိုမှု၊ စိတ်ပျံ့လွင့်သွားက ထပ်ခါထပ်ခါ ပြန်လည် ရွတ်ဆိုမှု၊ ဖြည်းဖြည်း အသံထုတ်၍ စဉ်းစား ရွတ်ဆိုမှု တို့ကို လေ့ကျင့် ပြုလုပ်က အသံနှင့် စိတ်အာရုံ ညီမျှလာနိုင်ပါသည်။

    ထို့ထက် စိတ်ကို နိုင်နင်းရန် ဝိပဿနာ ဘာဝနာ ပွားမှုကို အလေ့အကျက် ပြုပေးရန် လိုအပ်ပါသည်။ အနည်းဆုံး မည်သည့် ရိပ်သာနည်းဖြင့်မဆို ၁၀ ရက်စခန်းခန့် ဝင်ရောက် ကျင့်သုံးကြည့်လျှင် စိတ်လွင့်မှုများကို ထိန်းသိမ်းနိုင်ပါလိမ့်မည်။ လက်တွေ့ ကျင့်သုံးကြည့်စေလိုပါသည်။ 

ဆရာတော်ဦးတိလောကသာရ 

(ရဝေထွန်း) ၏ဘာသာရေးပြဿနာများ စာအုပ်မှကူးယူ၍ဓမ္မဒါနပြုပါသည်။

credit.... Tin Aung Bo.

ရေချိုးပြီးပြီလား

ရေချိုးပြီးပြီလား

_____________

လူတွေဟာ ညစ်ပတ်နေတဲ့ ခန္ဓာကိုယ်အတွက်တော့ တစ်နေ့ကို အနည်းဆုံး ရေနှစ်ခါတော့ ချိုးကြတယ်။

ခန္ဓာကိုယ် သန့်ရှင်းမှုကို သိပ်အလေးထားပါတယ်။

ခြေထောက်တို့၊လက်တို့မှာ ဖုန်အနည်းငယ် တင်ခဲ့ရင်တောင် ရေဆေးပြီး သန့်စင်စေပါတယ်။

ရေချိုးတဲ့အခါမှာလည်း ခန္ဓာကိုယ်က အနံ့အသက်တွေ ကင်းဝေစေဖို့အတွက်နဲ့ မွှေးပျံ့နေစေဖို့အတွက် အမွှေးဆပ်ပြာကို သုံးကြပါတယ်။

အပြင်ထွက်ရင် ရေမွှေးတောင် ထပ်ဆွတ်ကြပါသေးတယ်။

လူသားတွေဟာ ခန္ဓာကိုယ်ကို သိပ်ဂရုစိုက်ကြပါတယ်။

ဒါဟာလည်း ကောင်းတဲ့လက္ခဏာ တစ်ခုပါပဲ။

ဘယ်လောက်ပဲပြင်ပြင် ဘယ်လောက်ပဲ သန့်ရှင်းရေးလုက်လုပ် ပုပ်မဲ့ခန္ဓာကတော့ ပုပ်မှာပါပဲ။

လူအများ အမြင်တင့်တယ်ဖို့နဲ့၊နှာခေါင်း မရှုံ့ဖို့ပါပဲ။

လူအတော်များများကလည်း အပေါ်ယံပဲ ကြည့်ပြီး ဆုံးဖြတ်တာများကြတော့ ဒါဟာလည်း အခွင့်အရေးတစ်ခုပါပဲ။

ညစ်ပေနေတဲ့ ခန္ဓာကိုယ်ကို ရေချိုးပြီး သန့်စင်စေသလို ညစ်နွမ်းနေတဲ့ စိတ်ကိုလည်း နေ့စဉ် ရေချိုးပြီး သန့်ရှင်းရေး လုပ်ပေးသင့်ပါတယ်။

မေတ္တာရေစင်လေး ပွားများလိုက်၊သတိပဌာန် ရေမွှေးလေး ပတ်ဖြန်းလိုက်နဲ့ ညစ်နွမ်းနေတဲ့ စိတ်ကိုလည်း သန့်ရှင်းပေးရပါမယ်။

ဘုရားရှင်ရဲ့ရှေ့မှာ တက်နိုင်သလောက် ငါးမိနစ်ဖြစ်ဖြစ်၊ဆယ်မိနစ်ဖြစ်ဖြစ် မိမိရဲ့စိတ်ကို မြတ်စွာဘုရားအား လှူ ဒါန်းပြီး သန့်ရှင်းရေး နေ့စဉ်လုပ်ပါ။

စိတ်ဆိုတာ အမြဲတမ်း ဖြစ်ပျက်နေတာဖြစ်တဲ့အတွက် နေ့စဉ် ဆေးကြောနိုင်မှ သန့်စင်မှာပါ။

ခန္ဓာကိုယ် သန့်ရှင်းနေပြီး စိတ်ပုပ်နေရင် အလကားပါပဲ။

ပုပ်နေတဲ့စိတ်ဟာ ခန္ဓာကိုယ် နည်းတူပဲ ကြာလာလေ နံလာလေပါပဲ။

ဒါ့ကြောင့်နေ့စဉ် သန့်ရှင်းဖို့ လိုအပ်တာပါ။

ခန္ဓာကိုယ်ကိုလည်း သန့်ရှင်း၊စိတ်ကိုလည်း ဆေးကြော။

အရင်ကထက်ပိုပြီး လူ၀င်ဆံ့လာပါလိမ့်မယ်။

ရေချိုးတိုင်း မိမိကိုယ်ကို မေးပါ။

"ရေချိုးပြီးပြီလား"လို့ …… ။

လေးစားစွာဖြင့်..

Credit.အလင်းသစ်(သဲကုန်း)

တကယ့်အဖော်

⭐ ❝ တကယ့်အဖော်  ❞ ⭐

💜💜💜💜💜💜💜💜💜💜

⭐ လူတွေဟာ ...

      အဖော်ကို အများကြီး ရှာတယ်။ 

🌍 ကိုယ့်စိတ်ကို သိပြီး 

      နေနိုင်တဲ့လူဟာ ...

ပြင်ပအဖော်ကို ရှာဖို့ မလိုတော့ဘူး။ 

🍎 ကိုယ့်စိတ်ထဲမှာပဲ 

      သတိ၊ သမာဓိ၊ ပညာတွေ 

ဖြစ်နေတဲ့လူဟာ ...

အဲဒါလေးကို သိပြီးတော့ ...

အဖော်လုပ်ပြီးတော့ နေလို့ရတယ်။

🎓 ပြင်ပအဖော်ဆိုတာဟာ ...

      ကိုယ်နဲ့ အတူတူ 

အမြဲတမ်း မပါနိုင်ဘူး။ 

အပေါ်ယံအဖော်ပဲ ဖြစ်မယ်။ 

ခဏ အဖော်ပဲ ဖြစ်မယ်။ 

🔘 တကယ့် တကယ် ...

      ဒုက္ခနဲ့တွေ့တဲ့အခါ ...

အခက်အခဲနဲ့ တွေ့တဲ့အခါမှာ ...

အဲဒီ ပြင်ပအဖော်က 

ကိုယ့်ကို ဘာမှ ထိထိရောက်ရောက်

အကူအညီ မပေးနိုင်ဘူး။ 

နဲနဲပါးပါးတော့ ပေးနိုင်မှာပေါ့။

📸 မိတ်ဆွေတွေ၊ သူငယ်ချင်းတွေ၊

      ဆွေမျိုးတွေက 

ကိုယ့်ဒုက္ခရောက်တဲ့အခါမှာ ...

သူတို့တတ်နိုင်သလောက်တော့ 

အကူအညီ ပေးမယ်ပေါ့။ 

🔴 ဒါပေမဲ့ ကိုယ့်စိတ်ထဲမှာ

      ခံစားနေရတာကို 

ပျောက်သွားအောင်တော့ ...

သူတို့ ဘာမှ မလုပ်ပေးနိုင်ဘူး။ 

👤 ပိုက်ဆံ ပေးချင်ပေးမယ်။ 

      နေမကောင်းတဲ့အခါ 

ဆေး၀ါး ပေးမယ်။ 

စားစရာ သောက်စရာ ပေးမယ်။ 

မိသားစုဆိုလည်း နှိပ်ပေးမယ်။ 

တစ်ခုခုပေါ့။ 

သက်သာအောင် လုပ်ပေးမယ်။ 

ဒါလောက်ပဲ သူတို့တတ်နိုင်တယ်။ 

🌓 တကယ် ကိုယ့်စိတ်ထဲမှာ ...     

      ခံစားနေရတာကိုတော့ 

ဘယ်သူမှ ကူပြီးတော့  မျှပြီးတော့ 

အဖော်အဖြစ် 

မခံစားပေးနိုင်ဘူး။

🔵 အဆိုးဆုံး အခြေအနေကို 

      ပြောရမယ်ဆိုရင် ...

သေခါနီးအချိန် ရောက်ပြီဆိုပါတော့။ 

ပါးစပ်ကလည်း ဘာမှ 

မပြောနိုင်တော့ဘူး။ 

မျက်စိကလည်း ကြည့်လို့ 

ကောင်းကောင်း မမြင်ရတော့ဘူး၊ 

မှုန်၀ါးလာပြီ။ 

💥 နားကလည်း

      ကောင်းကောင်း မကြားရတော့ဘူး။ 

ခန္ဓာကိုယ် ထိတွေ့မှုကလည်းပဲ ...

ကောင်းကောင်း မသိတော့ဘူး။ 

ထုံကုန်ပြီ ဆိုပါတော့။ 

🔳 စိတ်ကတော့ သိနေသေးတယ်။

      ဘေးက ကြည့်နေတဲ့

သူတွေကတော့ ...

မျောနေပြီလို့ ထင်မှာပဲနော်။ 

တကယ်တော့ မျောချင်မှ မျောတာ။

🛑 လူတစ်ယောက် သူ့ကိုယ်တွေ့ကို

      ပြောပြတာကတော့ ...

သူ့ကို ဘေးက လူတွေက 

မျောသွားပြီလို့ ပြောနေကြတယ်။ 

ဒါပေမယ့် ပြောနေတဲ့အချိန်မှာ ...

အဲဒီပြောသံကို 

သူကြားနေရတယ်တဲ့။ 

🔷 အဲဒီအချိန်မှာ 

      နားက မချုပ်သေးဘူး။ 

တကယ်သေတာမှ မဟုတ်ဘဲကိုး။ 

မျက်စိကတော့ မဖွင့်နိုင်ဘူး။ 

ပါးစပ်ကလည်း ပြန်မပြောနိုင်ဘူး။ 

တခြားလည်းပဲ အမူအရာနဲ့

သူဘာမှ လုပ် မပြနိုင်တော့ဘူး။ 

တစ်ကိုယ်လုံးက ငြိမ်ပြီးတော့ 

နေတာကိုး။ 

နားကတော့ ကြားနေသေးတယ်တဲ့။ 

🔶 ကာယပသာဒ အရင်ချုပ်တယ်။ 

      ပြီးတော့ မျက်စိ ချုပ်တယ်။

 နှာခါင်း ချုပ်တယ်။ 

လျှာထဲမှာဖြစ်တဲ့ အရသာတွေကို 

မသိတော့ဘူး။ ချုပ်သွားပြီ။ 

⚽ ပတ်၀န်းကျင်ကလူတွေက 

      သူ့ကို မျောနေပြီလို့ ပြောပေမယ့် ...

သူကတော့ သိနေသေးတယ်တဲ့။ 

သူ မမျောပါဘူးတဲ့။ 

အဲဒီအချိန်မှာ တစ်ခုခုတော့ 

ပြန်ပြောချင်တယ်။ 

ဒါပေမဲ့ ပြောလို့မရဘူးတဲ့။

🔺 အဲဒီတော့ အားငယ်တတ် 

      ကြောက်တတ်တဲ့သူဆိုရင် ...

အဲလိုအချိန်မှာ 

သူ့စိတ်ထဲ ဘယ်လိုနေမလဲ။ 

တော်တော်ကို အားငယ်နေလိမ့်မယ်။

တော်တော်ကို 

ကြောက်နေလိမ့်မယ်နော်။ 

☎ ကိုယ့်စိတ်ကိုယ် သိသူ၊ 

      တရားကို အားထုတ်ပြီး 

နေတဲ့သူဆိုရင် ...

အဲဒီအချိန်မှာ 

စိတ္တာနုပဿနာ အားထုတ်ပြီး

နေလို့ရတယ်။ 

ကိုယ့်စိတ်လေး ကိုယ်သိပြီး 

နေလို့ရတယ်။ 

စိတ်ထဲမှာ ဖြစ်နေတဲ့ ...

လှုပ်ရှားမှုတွေကို 

သိပြီး နေလို့ရတယ်။ 

🔔 အကယ်၍ လှုပ်ရှားမှု

      မရှိဘူးဆိုရင်လည်း 

အဲဒီ လှုပ်ရှားမှု မရှိတာကိုဘဲ 

သိပြီးတော့ နေလို့ရတယ်။ 

အဖော်မလိုတော့ဘူးနော်။

🔰 နောက်ဆုံးအချိန်မှာ ..

      အဖော်မရှိပါဘူး။ 

နောက်ဆုံးအချိန်မှာ ...

ကိုယ့်စိတ်ကိုယ် 

သိနေကျလူဆိုရင်တော့ 

အဲဒီသိနေတဲ့ ကိုယ့်ရဲ့ ဘာ၀နာလေးက 

ကိုယ်ရဲ့ တကယ့်အဖော်

ဖြစ်လိမ့်မယ်နော်။ 

♥ တကယ်တော့ ...

      ဘ၀သံသရာခရီးကို 

တစ်ကိုယ်တည်း သွားနေရတာပါ။ 

အဖော် မရှိပါဘူး၊ 

ခဏ ဆုံမိကြတာပါ။ 

💻 ဒီဘ၀မှာ ခဏလာဆုံပြီးတော့ ...

      ပြီးရင် လမ်းခွဲပြီး 

ကိုယ့်ခရီးကိုယ် ...

ဆက်သွားကြရဦးမှာပါ။

🌕 သံသရာတစ်လျှောက်လုံး လိုက်ပြီး 

      အဖော်လုပ်ပေးမဲ့သူ မရှိပါဘူး။

         🌀 ဆရာတော်ဦးဇောတိက

               မဟာမြိုင်တောရ

  Credit :

ဒါနဖြင့် မြုပ်နှံရမည့် ဌာနများ

"ဒါနဖြင့် မြှုပ်နှံရမည့် ဌာနများ"

  🙏🙏🙏🙏🙏🙏🙏

❖ ဒါနဆိုတဲ့ မြှုပ်နှံမှု လုပ်ချင်လို့ရှိရင် 

ဘယ်နေရာမှာ မြုပ်မလဲ?

❖ အခု ဒါနဆိုတဲ့ ကုသိုလ်ကောင်းမှုကိုတော့ 

ဘယ်မှာ မြှုပ်မလဲဆိုတော့ မြှုပ်နှံတဲ့နေရာကို 

မြတ်စွာဘုရားက ဟောတယ်။

❖ ဒါနဆိုတဲ့ ရင်းနှီးမြှုပ်နှံမှုကို လုပ်မယ်ဆိုရင်

ဗုဒ္ဓမြတ်စွာရဲ့ဓာတ်တော် မွေတော်တွေကို 

ထည့်သွင်းပြီးတော့ ပူဇော်ထားတဲ့ 

စေတီ ပုထိုးတွေမှာ မြှုပ်နှံလို့ ရတယ်။

❖ နောက်တစ်ခုက 

သံဃာတွေမှာ မြှုပ်နှံလို့ ရတယ်။ 

သံဃာ့ဂုဏ်ကို အာရုံပြု ၍၊ 

သံဃာတွေကို လှူ ဒါန်းခြင်းဖြင့် 

ဒါနကုသိုလ် ရင်းနှီးမြှုပ်နှံလို့ ရတယ်။

❖ နောက်တစ်ခုက ပုဂ္ဂိုလ်တစ်ဦးတစ်ယောက်ပဲ

ဖြစ်စေ လှူ ဒါန်းပြီး ရင်းနှီးမြှုပ်နှံလို့ ရတယ်။

❖ နောက် ရင်းနှီးမြှုပ်နှံမှုက 

ကိုယ့်အိမ်ရောက်လာတဲ့ ဧည့်သည် (သို့) 

ဖိတ်ထားလို့ ရောက်လာတဲ့ ဧည့်သည်တွေကို 

ကျွေးမွေးဧည့်ခံတာလည်း ရင်းနှီးမြှုပ်နှံမှု တစ်ခုပဲ။

❖ နောက်တစ်ခုက 

မိဘနှစ်ပါးထင်ရှားရှိနေတဲ့ ပုဂ္ဂိုလ်တွေဟာ 

မိဘကို ပြု စုလုပ်ကျွေးတာဟာလည်း 

ရင်းနှီးမြှုပ်နှံနေတာ တစ်ခုပဲ။

မိသားစုထဲမှာ "အစ်ကိုကြီး အဖအရာ၊ 

အစ်မကြီး အမိအရာ" ဆိုတဲ့အတိုင်း 

မိမိရဲ့ မိသားစုထဲမှာ မိဘနှစ်ပါး မရှိတော့ဘူးဆိုရင် 

အစ်ကိုကြီး အစ်မကြီးတွေမှာလည်း 

ရင်းနှီးမြှုပ်နှံပေးလို့ ရတယ်လို့ ဒီလို ဆိုလိုတယ်။

❖  ဒါနကောင်းမှုပြု ပြီးတော့ 

ရင်းနှီးမြှုပ်နှံလိုက်တာဟာ သေချာတဲ့ 

ရင်းနှီးမြှုပ်နှံမှုကြီးတစ်ခု ဖြစ်တယ်လို့

မြတ်စွာဘုရားက ဟောတယ်။

မြတ်စွာဘုရားက ဆက်ပြီးတော့ဟောတယ်။

❖ ကုသိုလ်ကောင်းမှုလုပ်ပြီးတော့ 

စေတီစတဲ့ ဌာနတွေမှာ ရင်းနှီးမြှုပ်နှံထားပြီ 

ဆိုလို့ရှိရင် ...

အဲဒီ ကုသိုလ်ကောင်းမှုတည်းဟူသော 

ရင်းနှီးမြှုပ်နှံထားတဲ့ ဥစ္စာဟာ ဘယ်သူကမှ 

အနိုင်ကျင့်ပြီးတော့ မယူနိုင်ဘူးတဲ့။ 

အနိုင်ကျင့်ပြီး မယူနိုင်ရုံမျှမက ထိုပစ္စည်းဥစ္စာဟာ 

မိမိဘဝ သံသရာ သွားလေရာ နောက်ကပါလာမယ့် 

ပစ္စည်းဥစ္စာမျိုး ဖြစ်တယ်တဲ့။

အနုဂါမိက လို့ခေါ်တယ်။

အနုဂါမိက လို့ဆိုတဲ့ ကုသိုလ်ကျတော့ 

ဒီဘဝမှာလည်း ကိုယ်နဲ့ ထပ်ချပ်မကွာ ရှိတယ်။ 

တမလွန်ဘဝ ရောက်သွားတဲ့အခါမှာလည်း 

သံသရာခရီးမှာ ကိုယ်နဲ့ ထပ်ချပ်မကွာ ရှိနေမယ်။ 

အနုဂါမိကဆိုတာ မျက်ခြေမပြတ် 

အစဉ်လိုက်ပါနေတဲ့ ပစ္စည်းဥစ္စာလို့ ဆိုလိုတယ်။

ဘယ်လောက် အားကိုးထိုက်တုန်းဆိုတော့-

❖ အခုလို ဒါန သီလ ကုသိုလ်ကောင်းမှု

လုပ်ပြီးတော့ ရင်းနှီးမြှုပ်နှံလိုက်တဲ့ ကုသိုလ်ဟာ 

ထားသွားရမယ့် ပစ္စည်းတွေထဲမှာ ယူသွားလို့ရတဲ့ 

ပစ္စည်းမျိုးပါ ။ ကျန်တာတွေကတော့ 

ထားသွားရမယ်ဆိုတာ အားလုံးအသိပဲ။ 

ဘယ်သူမှ ယူမသွားနိုင်ဘူး။

❖ ကုသိုလ်ကောင်းမှုကျတော့ 

ကိုယ်လုပ်တဲ့သူပဲ ပိုင်တယ်။

ကုသိုလ်ကောင်းမှု ဆိုတာ 

ကိုယ်ပိုင်တဲ့ တကယ့်အမွေပဲ။ 

ပါချုပ်ဆရာတော်ဘုရားကြီး 

ဒေါက်တာ အရှင်နန္ဒမာလာဘိဝံသ

🙏🙏🙏🙏🙏🙏🙏🙏🙏

မအားအောင်နေပါ

“မအားအောင်နေပါ”

လူဆိုတာ ကိုယ့်အကျိုးအတွက်ရော အများအကျိုးအတွက်ရော မထိခိုက်စေဖို့ဆိုရင် အားမနေဖို့ လိုပါတယ်။

ဘာဖြစ်လို့လဲဆိုတော့ အားပြီဆိုတာနဲ့

၁။ တောင်တွေး မြောက်တွေး တွေးမယ်၊ 

လိုချင်မယ်။

၂။ တခြားသူတွေနဲ့ ကိုယ့်ကိုယ်ကိုယ် နှိုင်းယှဉ်မယ်။

၃။ ကိုယ်ကသာတယ်ထင်ရင် ငါကွဆိုပြီး 

ဘဝမြင့်မယ်။

၄။ သေချာမစူးစမ်းပဲ တခြားသူတွေကို နှိမ့်ချပြီး Judge လုပ်မယ်၊ ဆရာကြီး လုပ်မယ်။

၅။ ကိုယ်က နိမ့်နေတယ်ထင်ရင် စိတ်ဓါတ်ကျမယ်။

၆။ စိတ်ရဲ့ သဘောအတိုင်း မဟုတ်တာ တစ်ခုခု လုပ်ဖို့ ကြံမယ်။

၇။ လုပ်စရာမရှိရင် ကိုယ့်မှာ ရှိတာတွေကို ကြွားမယ်၊ ဒါမှမဟုတ် လူတွေ ဂရုစိုက်ခံရအောင် လုပ်မယ်။

အစရှိတဲ့ တစ်စုံတစ်ခုကို လုပ်ကြတော့တာပါပဲ။

မြင်ချင်ရာမြင် ရေးချင်ရာရေးခွင့်ရနေတဲ့ ဆိုရှယ်မီဒီယာခေတ်မှာ ပိုဆိုးသလို ဖြစ်လာပါတယ်။

အဲဒါကြောင့် မအားအောင် နေဖို့ဆိုရင်

၁။ ကိုယ့် ဘဝနဲ့ အလုပ်နဲ့ ပတ်သက်တဲ့ Plan တွေ ရလဒ်တွေကို ပြန်သုံးသပ်ပြီး ပိုကောင်းအောင် အစီအစဉ်ချပါ။

၂။ လုပ်စရာရှိတာတွေအားလုံးချရေးပြီး ဦးစားပေးအရ တစ်ခုပြီး တစ်ခုဖြိုပါ။

၃။ လုပ်ငန်းက အဖွဲ့ဝင်တွေ၊ သူငယ်ချင်းတွေ၊ မိသားစုဝင်တွေနဲ့ အချိန်ကို ကောင်းစွာ အသုံးချပါ၊ မဟုတ်ရင် ခရီးထွက်ပါ။

၄။ ကိုယ့်ရည်မှန်းချက်ကို အထောက်အပံ့ဖြစ်စေမယ့် လေ့လာသင်ယူမှုတွေကို လုပ်ပါ။

၅။ ကျန်းမာရေးအတွက် ကိုယ်လက် လှုပ်ရှား အားကစားတစ်ခုခု လုပ်ပါ။

၆။ အိပ်ရင်အိပ် မအိပ်ချင်ရင် ကိုယ်ပျော်ရွှင်မယ့် ရသစာပေ သို့မဟုတ် ရုပ်ရှင်ကြည့်ပါ။

၇။ တရားထိုင်ရင်ထိုင် မထိုင်နိုင်ရင်တောင် ပါးစပ်ပိတ်ထားပြီး ဝင်လေ ထွက်လေ မှတ်နေပါ။

#Credit

ပြင်ရခက်တဲ့အမှား

ပြင်ရခက်တဲ့အမှား

********************

ဝန်ချတောင်းပန်တာဟာ အပြစ်ကြေသွားတာ ဒီလိုပြောတာမဟုတ်ဘူးနော်၊ဒါ Confession လုပ်တာလို့ခေါ်တယ်၊ Confession-လုပ်တာဟာ အပြစ်တွေ ပြေသွားတာ ဒီလိုပြောတာမဟုတ်ဘူး၊ မှားခဲ့တဲ့အမှားက အမှားပဲ၊လုပ်မိပြီးသားက လုပ်မိပြီးသားပဲ။ဒါကိုပြင်တာမဟုတ်ဘူးဆိုတာ သဘောပေါက်ဖို့လိုတယ်။ကိုယ်လုပ်ခဲ့အမှားဟာ ပြင်မရတဲ့အမှားပဲ၊What's done, cannot be undone ဆိုသလိုပေါ့၊ What's done-လုပ်ခဲ့တဲ့အရာတစ်ခုဟာ Cannot be undone- မလုပ်ဘူးလို့ ဖြစ်အောင် လုပ်လို့မှ မရတာ။လုပ်ပြီးသားဟာ လုပ်ပြီးသားလေ ပြင်လို့မရဘူး။ပြင်လို့မရတဲ့အမှား၊ဘယ်အရာပဲ ဖြစ်ဖြစ် လုပ်ပြီးသားဟာ လုပ်ပြီးသားပဲ။သို့သော် သြကာသ ကန်တော့ကျိုးနဲ့ ကန်တော့ပြီးတော့ တောင်းပန်ရင် တစ်ချို့ကပြေတယ်လို့ထင်တယ်၊ဒီအပြစ်တွေ ပျောက်သွားတယ်လို့ထင်တာ။အပြစ်ပျောက်ခြင်းရဲ့ အကြောင်းတရားတော့ဖြစ်တယ်။အရေးကြီးတာဘာလဲဆိုတော့ ဘာကို ကုစားတာလဲဆိုတာသဘောပေါက်ဖို့ လိုတယ်။အဲ့လိုမဟုတ်ရင် ထိပ်-ခေါက်ပြီးမှ တောင်းပန်နေကြမှာပဲလေ။ထိပ်ခေါက်တာခေါက်ပြီးနေပြီလေ။ထိပ်-ခေါက်ပြီး တောင်းပန်လိုက်ကျေတယ်လို့ ဒီလိုထင်နေကြတာမဟုတ်ဘူး၊ အပြစ်က ဖြစ်သွားပြီ။ဖြစ်သွားတဲ့ အပြစ်ကို ပြင်တာလားဆိုတော့ မဟုတ်ဘူး။

အကုသိုလ်က နှစ်ခုရှိတယ်လို့မှတ်၊အာရမ္ဘဇ - လုပ်လို့ဖြစ်တဲ့ အကုသိုလ်ကတစ်ခု၊ အဲဒီ လုပ်ထားတဲ့ အကုသိုလ်ပေါ်မှာ စိတ်ထဲမှာ တပူပူ တနွေးနွေးဖြစ်နေတဲ့စိတ်ဆင်းရဲမှုတွေဖြစ်ပြီး သောကရောက်နေတာဟာ ဝိပ္ပဋိသာရဇ ၊ တောင်းပန်တယ်ဆိုတာက အဲ့ဒီ  ဝိပ္ပဋိသာရဇ -ဆိုတဲ့ အကုသိုလ်ကို ဖယ်တာ၊စိတ်ထဲမှာ ကြည်သွားပြီ တောင်းပန်လိုက်ပြီဆိုတဲ့ အခါမှာ အကုသိုလ်က ဆက်မပွားတော့ဘူး၊လုပ်ပြီးသားက ပြင်လို့မရဘူး။နောက်ထပ် ထပ်ဖြစ်နေမယ့်အရာကိုတားတယ်။ဒီသဘောပဲ။အကိုသိုလ်နှစ်ခုရှိတယ်လို့မှတ်ထား။လုပ်လို့ ဖြစ်တဲ့ အကုသိုလ်ကတစ်ခု- အဲ့ဒါကပြင်လို့ မရဘူး၊ဖြစ်ပြီးသားက ဖြစ်ပြီးသားပဲ၊ပြင်တာကဘာလဲဆိုတော့ အဲ့ဒီအပေါ်မှာ စိတ်ပူနေတာကို မပူရအောင်လို့ တောင်းပန်လိုက်တဲ့အခါမှာ လူတွေဟာ စိတ်ထဲမှာ အေးချမ်းသွားတယ်၊အဲဒီအေးချမ်းသွားမှုကို ဖြစ်စေတာကို ဆိုလိုတာဖြစ်တယ်၊အဲဒီတော့ တောင်းပန်ခြင်းက အကျိုးမရှိဘူးလားလို့ မေးလို့ရှိရင် တစ်ပိုင်းကအကျိုးရှိတယ်၊Confession -ဘာတုန်းဆိုတော့ စိတ်မပူတော့ဘူး၊ငါတောင်းပန်ပြီးပြီ၊စိတ်နှလုံးအေးချမ်းသွားပြီ၊အဲဒီတော့ အဲ့ဒီနောက်မှာ ကိုယ်ဆက်လုပ်ရမယ့် အလုပ်တွေ ရှိသေးတယ်၊ဘာတွေလဲဆိုတော့ တောင်းပန်ပြီးတဲ့နောက်မှာ “အာယတိ ံ သံဝရံ အာပဇ္ဇတိ“ နောက်ထပ် မလုပ်တော့ပါဘူးဆိုတဲ့ ဝန်ခံကတိ၊Promise -ပေးရတယ်။ဘယ်တော့မှ ဒီအမှားမျိုးကို မကျူးလွန်တော့ပါဘူးဆိုပြီးတော့၊

ကျူးလွန်ခဲ့တဲ့အမှားကို နောင်တရပြီးတော့ ဒီအမှားကို ပြင်တယ်။ကောင်းတာတွေချည်းပဲ ဆက်လုပ်တယ်။ဆက်လုပ်သည့်အတွက်ကြောင့်ရေများရင် ရေနိုင်၊ မီးများရင် မီးနိုင်လုပ်ခဲ့တဲ့အမှားတစ်ခုကို ထပ်မလုပ်တဲ့အတွက်ကြောင့် အမှားကတော့ အမှားအတိုင်းပဲ ရှိတယ်။သို့သော်ကောင်းတာတွေကို ဆက်လုပ်သည့်အတွက်ကြောင့် အမှားဟာ Isolated ဖြစ်သွားတယ်။သူ့ကို ကောင်းတာတွေနဲ့ ရံပတ်ထားတဲ့အခါ သူ့ကို ဖွင့်မရတော့ဘူးလို့ ဒီလိုပြောတာနော်။ပျောက်သွားတာလို့ ပြောတာမဟုတ်ဘူး။အေး တော်ကြာကြတော့ ဒူးလေးထောက်ပြီးတော့ ခွင့်လွှတ်တော်မူပါဆိုတာနဲ့ အကုန်လုံး ခွင့်လွတ်သွားတယ်မထင်နဲ့။ဒီလိုပြောတာ မဟုတ်ဘူး၊လွတ်သွားတာ ဘာလွတ်သွားတာလဲဆိုတော့ ဒီအတွက် စိတ်ပူပြီးတော့ ဖြစ်နေတဲ့ အကုသိုလ်တွေ လွတ်သွားတာ။နောက်ဆုံးမှာ အာယတိ ံ သံဝရ- နောင်မှာ စောင့်စည်းပါမယ်ဆိုတဲ့ Promise အရတကယ်စောင့်စည်းပြီးမှ နေလို့ ရှိရင် အကုသိုလ်တစ်ပိုင်းကို တားပြီးသားဖြစ်သွားတယ်။တားပြီးသား ဖြစ်တဲ့အတွက်ကြောင့် ကောင်းတာတွေချည်းလုပ်တဲ့အတွက်ကြောင့် ကောင်းတာတွေပဲ၊Chance ရပြီးတော့ မကောင်းတာတွေ Chanceမရဘူးဆိုတဲ့ အဓိပ္ပာယ်၊သူအကျိုးပေးဖို့  အခွင့်သာမှ ကံဆိုတာ အကျိုးပေးလို့ ရတာ။အခွင့်မသာရင် မရတော့ဘူး။ ဒါမျိုးကို ဆိုလိုတယ်လို့၊  တောင်းပန်တယ်ဆိုတာ အဲဒီလို အဓိပ္ပာယ်ရတယ်။

ကျေးဇူးတော်ရှင်ပါမောက္ခချုပ်ဆရာတော်ဟောကြားတော်မူသောပြင်ရခက်တဲ့အမှား တရားတော်မှ 

#AshinNandamalabhivamsa

ပြာသို နှင့် ကိုကျော်သင်း စာမျက်နှာမှတဆင့်ဖေါ်ပြပါသည်။

မြွေနှင့်ယုန် ဘယ်ပုံအသက်မွေးမလဲ

မြွေနှင့်ယုန် ဘယ်ပုံအသက်မွေးမလဲ 

 သတ္တဝါရယ်လို့ ဖြစ်လာရင်တော့

 အသက်မွေးရတာပေါ့ဗျာ၊

 ဒါပေမဲ့ မြွေလို အသက်မွေးမလား

 ယုန်လို အသက်မွေးမလား ဆိုတာ

 ရွေးချယ်တတ်ရမယ်။

 မြွေကိုကြည့်ဗျ၊ 

 သူများအသက် သတ်စားနေတာ။

 မြွေရဲ့ထမင်းလုတ်က ဖါးကလေးတွေ

 ငါးကလေးတွေပဲမို့လားဗျ။

 မြွေတစ်ကောင် အသက်ရှင်ဖို့

 သေပေးရတဲ့ ဖါး ငါး တွေက

 နည်းသလားဗျ၊ သေတော့ကော

 ကျေကျေနပ်နပ် သေရသလားဗျ။

 အဲဒီတော့ မြွေရဲ့ 

 အသက်မွေးဝမ်းကြောင်းမှုဆိုတာ 

 တစ်ဖက်သား မကျေနပ်တဲ့ ဝမ်းစာ၊

 ကိုယ်ချင်းစာမှု လုံးလုံးမရှိတဲ့ ဝမ်းစာ။

 မြွေက ဖါးတစ်ကောင်မျိုတိုင်း 

 သံသရာမှာ တစ်ဘဝကျ ပြန်ပြီး 

 အသေဆိုးနဲ့ သေပေးရလိမ့်မယ်။

 မြွေတစ်ကောင်ရဲ့သက်တမ်းမှာ

 ဖါးအကောင်တစ်ရာ မြို ပြီးမှ 

 အသက်ရှင်ရရင် 

 သံသရာလည်တော့လည်း

 ဘဝပေါင်းတစ်ရာ ပြန်အသတ်ခံရပြီး 

 မရှုမလှ သေရမယ်။

 ဒါကြောင့် မြွေရဲ့အသက်မွေးခြင်းဟာ 

 အပြစ်ကင်းတဲ့ ကြွေးကင်းတဲ့

 ထမင်းလုတ် မဟုတ်ဘူး။

 ဟော… ယုန်ကလေးတွေကျတော့ 

 ကန်စွန်းရွက်တို့ မြက်တို့ပဲ စားတာဗျ၊

 သူဝမ်းဝဖို့ ဘယ်သူ့မှ ဒုက္ခမပေးဘူး။

 ဒါဟာ အပြစ်ကင်းတဲ့ အသက်မွေးမှု

 အကြွေးမတင် သန့်စင်တဲ့ 

 ဝမ်းစာ ရှာနည်းပဲဗျ။

 အဲဒီတော့ တို့တကာကြီးများလဲ 

 မြွေလို အသက်မွေးမလား

 ယုန်လို အသက်မွေးမလား ဆိုတာ 

 အဖြေရလောက်ပါပြီဗျာ။

 ကိုယ်ကျင့်သီလတွေ ဖေါက်ဖျက်ပြီး

 ငါကောင်းစား ပြီးစတမ်းဆိုပြီး

 ဝမ်းစာစီးပွား ရှာနေပုံမျိုးက

 မြွေရဲ့ထမင်းလုတ်မျိူ းနဲ့ အတူတူပဲ။

မဟာဗောဓိမြိုင်ဆရာတော်ဘုရားကြီး

Credit to original uploader.

ဉာဏ်လှေကားထစ်ဖြည်းဖြည်းခြင်းတက်ကြ

"ဉာဏ်လှေကားထစ်များ ဖြည်းဖြည်းချင်းတက်ကြပါ"

တရားနာတယ်ဆိုတာ ကုသိုလ်ရရုံမနာပါနဲ့၊ ကိုယ့်ဒုက္ခ ကိုယ်သိမ်းဖို့၊ ကိုယ့်သံသရာ ကိုယ်ဖြတ်ဖို့ လုပ်နေတာဆိုပြီးနာပါ။ နားမလည်လည်းနာပါ ကိလေသာပါးတယ် ဒီဉာဏ်တရားကို မနာရလို့ရှိရင်  ဒီဘဝ လူဖြစ်ကျိုး မနပ်သေးဘူး ဒီနေ့ကစပြီး ငယ်မှတ်တွေ  အကုန်ဖြုတ် ဘုရားဟောတာနဲ့ ဆရာသမားပြောတာကို ယုံပေတော့ ။

ဘုရားသခင် ကိုယ်တော်မြတ်ကြီးလူတစ်ယောက်ကို ချွတ်တော့မယ်ဆိုရင် သူ့အစဉ်ရှိတယ် 

နံပါတ်တစ် 

ဒါနပြုကွ ဟောချလိုက်တယ် ဒါနဆိုတာ လူချမ်းသာ

နတ်ချမ်းသာ ပို့နိုင်ရောက်နိုင်တယ်ဆိုပြီး သူ့အကျိုးပေးတွေ ဟောလိုက်တယ်။

ပန်းလှူလို့ လှပုံ၊ ကျောင်းလှူလို့ ဘုံပေါက်ပုံ၊ ရေတွင်းရေကန်လှူလို့ ဥယျာဉ် ဗိမာန်အကျိုးပေးပုံ ဒါတွေဟောပါတယ်။ 

ဒါတွေက အကျိုးပေးသော်လည်း အသက်မရှည်ရင် အလကားပဲ။ 

နှစ်ချက်တိုးပြီးတော့ 

အသက်ရှည်ချင်ရင် သီလလုပ်ကွ။ သီလကြောင့် အသက်ရှည်တဲ့ နတ်ကြီးဖြစ်ပြီး၊ စီးပွားဥစ္စာ ရတနာနဲ့ အပြည့်အစုံကွ၊ ဘယ်လောက် ကောင်းသတုံး။

 ဒါနကထာ၊

သီလကထာ၊

သက္ကကထာ၊ ဟောပါတယ်။

ပြီးတော့မှ

"ကာမာနံ အာဒီနဝကထာ" မင်းဟောဒီ အကျိုးပေးတဲ့ ဥစ္စာတွေအားလုံးဟာ၊ ငါးပါးအာရုံကာမဂုဏ်တွေကွ ဘာမှအသုံးမကျဘူး။ မျောက် မီးရှူးပန်းကိုင်ထားသလို ကိုယ့်ချည်းလောင်တာပဲကွ။ အမဲသားရတဲ့ ကျီးလိုပဲကွ၊ သည့့်ပြင် ကျီးတွေက အမဲသားတစ် လိုက်လုတာနဲ့ ဘယ်သူမှ ချမ်းသာခွင့် မရဘူးကွ။ 

ဒီလို အပြစ်ပြဟောတဲ့

"ကာမာနံ အာဒီနဝကထာ" ဟောချလိုက်တယ်၊ ဘုရားဟောနော်။ ဘုန်းကြီး လုပ်ကြံဟောတာ မဟုတ်ဘူး၊

ခင်ဗျားတို့ "ဘာဝနာ"မှာ အားငယ်မှာစိုးလို့၊ ဘာဝနာမပါဘဲကိစ္စပြီးနေတယ် ထင်မှာစိုးလို့ ပြီးတော့မှ "နိက္ခမကထာ" ကာမမှ ...ထွက်ဆိုတော့ အလုပ်လုပ်တော့လို့ပြောတာ၊ ကာမမှထွက်ဆိုတော့  ခင်ဗျားတို့၊ ကာမအာရုံတွေကို အနိစ္စ၊ ဒုက္ခ၊ အနတ္တ မရှုရင် ကာမမှ ထွက်နိုင်ပါမလား၊ မထွက်နိုင်၊ ဝိပဿနာ စလုပ်ဆိုတာ မလာဘူးလား ဒါ ဘုရားဟောစဉ်။

               

"ဉာဏ်နားကို ဆောင်၍ ထောင်နိုင်အောင် ထောင်လိုက်ကြပါ"

ခင်ဗျားတို့က ကံကောင်းချိန် ဉာဏ်ကောင်းချိန် တွေကိုတော့၊ ကာမဂုဏ် အာရုံတွေထဲ အသုံးချခဲ့ကြပြီး အခုလို အိုကြီးချက်မ ထုံထိုင်းပြီး အချိန်တွေလွန်ကာမှ ဒီဘုန်းကြီးဆီ ပြေးလာကြ၊ ဟောချင်စရာတောင် မရှိဘူး။ ဒီဘုန်းကြီးမို့ ပေဟောနေတာ၊ ဘုန်ကြီးတရား မကြိုက်လည်း ပေနာကြ၊ တို့မကြိုက်တာ ကလေးစိတ်ရှိလို့မှတ် ဆက်နာ ကြာတော့ လူကြီးစိတ်ပေါက်လာပြီး ဒါမှ တရားစစ် တရားမှန်တွေ ပါကလားဆိုပြီး ကြိုက်လာတာပဲ။

ဒီတရားက တဏှာနားနဲ့ ထောင်လို့မရဘူး၊ ဉာဏ်နားနဲ့ ထောင်မှရတယ်။ ဘုန်းကြီးများကလည်း၊ အဲဒီ ဓမ္မခန္ဓာတွေကို ကြည့်ပြီးသကာလ ကိုယ်တိုင်ကြိုးစား၊ သူတစ်ပါးကိုလည်း ဟောဆိုတဲ့ အဓိပ္ပါယ်မျိုးနဲ့ ချီးမြှောက်နေတာပါ၊ ဒီ ဓမ္မခန္ဓာတွေက သူ့ဟာသူစာအုပ် ပုရပိုက်နဲ့ ကျောက်စာတွေပေါ်မှာ နေတဲ့အတွက် လာပြောဖော် ဆိုဖော်မရပါဘူး။

ဘုန်းကြီးတို့က ဒါတွေကိုကြည့်ပြီး သကာလ အသံထွက်သဘောနဲ့ ပြန်ပြောရတယ်လို့ ဆိုတော့ ဪ ဒို့အတွက် သာသနာ မကွယ်သေးဘူးမှတ်ပါ၊ သစ္စာထိုက်တဲ့ အဆုံးအမရရင် ဒီအတိုင်းခင်ဗျားတို့ကလည်း လိုက်နာရင် သာသနာ မကွယ်သေးဘူး ရှင်းရဲ့လား။

မြို့ထဲမှာ တောင်ကလူက မြောက်၊မြောက်ကလူက တောင်၊အရှေ့ကလူက အနောက်၊ အနောက်ကလူက အရှေ့၊အို ခြေချင်းကို လိမ်နေတာဘဲ၊ ဘာလုပ်နေကြတာလဲဆိုတော့ "ပရိယေသန"ပေါ့ဘုရားတဲ့။ 

ဘယ်နှယ်ကြောင့် ဒီလူတွေ အရူးအနှမ်းဖြစ်ပြီး၊ တောင်ကမြောက်ပြေး၊ မြောက်က တောင်ပြေးနဲ့၊ မအားအောင် ဖြစ်နေကြပါလိမ်မတုံး ဆိုတော့၊ "တဏှာ"အုပ်ချုပ်နေလို့  ဘယ်နှယ်ကြောင့် တဏှာကျွန်ဖြစ်ရပါလိမ့်မတုံးလို့ တစ်ခါ လက်သည်ရှာဦး၊ 

ဝေဒနာကို ဝိပဿနာ မရှုမိလို့  တဏှာကျွန်ဖြစ်ရတယ်၊ကျွန်စျေးကောင်းလို့ ခါးတောင်ကြိုက် မပြုတ်ရတာကိုများ သူ့မှာ လာဘ်ကြီး ဝင်နေတယ် ထင်နေတာ၊ ဒါ သံဝေဂ ရအောင်လို့ ဟောနေတဲ့တရား မဟုတ်ဘူး၊ မိုက်ပြစ်ဖော်တဲ့ တရားပါ။ 

ဪ...နိဗ္ဗာန်များ၊ ဘုန်းကြီးကလည်း အနီးကလေး ဟောတယ်၊ကိုရှုတဲ့နေရာမှာလည်း ဗြုန်းခနဲ့ မပေါ်လာ၊ ဘာကြောင့်များ ပါလိမ့်မတုံးလို့၊ ဘာသက်သေမှ ထူမနေနဲ့၊ မိမိမိုက်ပြစ်ပဲ၊ ခန္ဓာခင်တဲ့တဏှာ မချုပ်သေးလို့ (နိဗ္ဗာန်)မပေါ်လာတာ။

ဒါဖြင့် ဒကာ ဒကာမတို့...

နိဗ္ဗာန်မမြင်သေး ရှုလျှက် ပွားလျှက် ဖြစ်ပျက်တွေမြင်ရက်နဲ့...နိဗ္ဗာန်ကြီး ပေါ်မလာ သေးတာဟာဖြင့် ကိုယ်ရဲ့တဏှာအမျှင်မပြတ်သေးလို့ပဲ။ 

ကြိုးစားရင် မပေါ်မရှိပါဘူး၊ သူများ ပြောသံကြားကို နားမယောင်ပါနဲ့။ ဘုန်းကြီးက ဘုရား၏ ကိုယ်စားလှယ် လုပ်ပြီးတော့ ဟောနေတာ၊ ဆရာဘုန်းကြီး ဆုံးဖြတ်ချက်ချ တာကို ယုံရလိမ့်မယ်။

တရားနာကြပါလို့...ဘုန်းကြီးကပြောတော့၊ခင်ဗျာတို့က ဘုန်ကြီးဆီမှာ၊ တရားနာ များအောင်လို့ ထင်လိမ့်မယ်၊ လွဲလိုက်တဲ့ ဖြစ်ခြင်း၊ ခင်ဗျားတို့ကိုမဟောရရင်၊ ဘုန်းကြီးဟာ ဘုန်းကြီးကျင့်နေဖို့ပဲ။

အဆုံးစွန်သောဘဝ နိဗ္ဗာန်ရရပါလို၏ ဆိုတဲ့... ရှေးမူတွေ ဖျက်ကြပေတော့၊ လူ့ပြည်က အပ်တစ်စင်းနဲ့၊ ဗြဟ္မာပြည်က အပ်တစ်စင်း အသွားချင်း ထိစရာက ထိသေးတယ်...လူဘဝရဖို့ ဒါထက် ခဲ့ယဉ်းတယ်။

ခဲတစ်လုံး ကောင်းကင်မြှောက်သလိုပဲ ၊လူ့ဘဝရတာသည်က.. ခဲလုံး ကောင်းကင်မှာ ရပ်သလောက်ပဲကြာတယ်၊ အပါယ်မှာ နေရတာက. ခဲ မြေကြီးမှာ နေသလောက်ကြာတယ်။ အပါယ်ဒုက္ခအကြောင်းပြောရရင် ဘုရားစဖြစ်တဲ့နေ့က ပြော.. ပရိနိဗ္ဗာန်စံတဲ့ အထိတောင် ပြောလို့ မဆုံနိုင်ဘူးတဲ့့။

ကိုယ်ကိုယ်ကို ခံရမယ့် ဒုက္ခကြီးကို၊ကိုယ်ကိုယ်တိုင် ဉာဏ်နဲ့သိမ်းဖို့ အရေးကြီးတယ်၊ ဒါလောက် ကြီးကျယ်တဲ့ ကိစ္စကြီးကို သာမည မှတ်မနေကြပါနဲ့။ မနက်ဖြန်များ သေသွားရင် .သာသနာနဲ့ငါ၊ အိုးစားကွဲတာပဲလို့မှတ်၊ အခုရှိတဲ့ ကိုယ့်သက်တမ်းဟာ. .သာသနာပဲ။      ။

မိုးကုတ်ဆရာတော်ဘုရား

လေကဓံ ကြံ့ကြံ့ခိုင်ဖို့

#‌လောကဓံကြံကြံခံဖို့

"အားငယ်နေလား။ အားကိုးရှိတယ်။ ဖြေဆည်ရာရှိတယ်။

ချစ်သား အားမငယ်နဲ့" တဲ့။

အဆင်မပြေမှု့တွေ များလာလို့ ဘုရားရှင်

မျက်နှာတော်ကို စူးစူးစိုက်စိုက် နဲ့ဖူးမြင်လိုက်တယ်ဆိုရင်ပဲ

ဗုဒ္ဓက မိန့်တော်မူတယ်။

#ချစ်သားအားမငယ်နဲ့

ငါဘုရားရှင်လည်း 

အဆဲခံရတာပဲ

အစွပ်စွဲခံရတာပဲ

လုပ်ကြံခံရတာပဲ

စားစရာအတွက် အခက်အခဲဖြစ်လို့

တစ်ဝါတွင်းလုံးကို 

ဂျုံ ဆွမ်းနဲ့ပဲပြီးခဲ့တာပဲ

ဝတ်စရာ အတွက် အခက်အခဲဖြစ်လို့

အလောင်းက ဝတ်ရုံကိုခွါပြီးဝတ်ခဲ့ရတာပဲ

နေစရာ အတွက် အခက်အခဲဖြစ်လို့

သစ်ပင်အောက်မှာပဲနေခဲ့ရတာပဲ။

အနာရောဂါ နှိပ်စက်လို့

ငါဘုရားရှင်လည်း ခံစားခဲ့ရတာပဲ။

အခြံအရံ မရှိလို့ ပါလိလေယျ တောထဲမှာ

ဆင်ကြီးက ပြုစုလုပ်ကျွေးရ တယ်။

#ချစ်သား

ဒါတွေက လောကဓံတွေပါ ။ ဘယ်သူမှ မလွတ်ပါဘူး။

ဘယ်လို ဘဝမျိုးပဲရောက်ရောက်

ကုသိုလ်ပြုဖို့ တရားရှာဖို့ မမေ့ပါနဲ့။

အကောင်း ၊အဆိုး၊

ဆင်းရဲ ၊ချမ်းသာ၊

အခြွေအရံပေါတာ၊ အခြွေအရံရှားတာ၊

ချီးမွမ်းတာ၊ ကဲ့ရဲ့တာ၊

အဲဒီရှစ်မျိုးဟာ ဘယ်သူနဲ့မှ မကင်းသလို 

ခဏလေးပါပဲ ချစ်သား 

လူဖြစ်တုန်း သာသနာနဲ့ကြုံ တုန်း သံသရာကလွတ်မြောက်ဖို့သာစဉ်းစားပါ။

#ချစ်သား 

ဒုက္ခ ဘယ်လောက် ကြီးလို့လည်း ၊ ချစ်သမီး ပဋာစာရီလောက် ဆိုးနေလို့ လား။

ဒါ့ကြောင့် ဘာဖြစ်ဖြစ်

အားမငယ်ပါနဲ့ချစ်သား   

~ ~ ~ ~ ~ ~ 

ကျွန်တော်တို့က

ကိုယ့်ဒုက္ခက တော်တော်ကြီးတယ်ထင်ပြီးခံစားနေကြတာ

တကယ်တော့

ဘာမှ မဟုတ်သလိုပါပဲ။

ပဋာစာရီ အကြောင်း

ကြားလိုက်တော့မှ

ေဩာ်.... 

တရားတော်က ခံစားမှုအားလုံးကို

အနိုင်ယူနိုင်တဲ့သတ္တိ ရှိပါလား " ဆိုပြီး

ကျနေတဲ့စိတ်ဓာတ်တွေပြန်တက်လာပါတော့

တယ်။

#အင်း ငါ့ဒုက္ခက ပဋာစာရီ ရဲ့ခြေဖျားတောင်

မမှီပါလားဆိုပြီး နှလုံးသွင်းလိုက်တော့

အပူတွေလျော့သွားသလိုပါပဲ။

အားလုံးကြုံတွေ့လာတဲ့လောကဓံကို ကြံကြံခံပြီး နေတတ်အောင် ကုသိုလ်ပြုကြပါ

     မေတ္တာဖြင့်... 

#ကိုးကားစာ ရာဟုလာ

credit...