သေမင်းဆိုတာ တခြားကမဟုတ်ဘူး ။ ကိုယ့်ရဲ့ရုပ်တွေနာမ်တွေက ကိုယ့်ကို ပြန်သတ်တာပဲ။
သံကိုသံဖျက် သံချေးတက်ဆိုတာလို ဒီရုပ်တွေ နာမ်တွေကနေ
ဒီရုပ်ဒီနာမ်တွေကို ပြန်သတ်တာပဲ။
အဲဒီလို သူက နှိပ်စက်မယ်။
ရုပ်က ဖောက်ပြန်မှာပဲ
ပူလိုက် အေးလိုက်နဲ့ အဲဒါ ရုပ်အလုပ်။
မင်းအလုပ် မင်းလုပ်
ငါ့အလုပ် ငါလုပ်မယ်။
ငါ့အလုပ် ငါလုပ်မယ်ဆိုတာ
ဆရာသမားတွေ သင်ပေးထားတဲ့
ဝိပဿ နာရှုနည်းလေ သူတော်ကောင်းတို့ ။
အဲဒါကို တရားရှုမှတ်နိုင်ရမယ်။
တည့်တည့်ရှုမှတ်နိုင်ရင်
တည့်တည့်ရှုမှတ် မကြောက်နဲ့။
သေသွားရင် ကောင်းတဲ့နေရာရောက်မှာပဲ။
ဘာဖြစ်လို့ ကြောက်ရမှာလဲ။
အခု ခန္ဓာကိုယ်ကြီးက
၉၆ပါး ရောဂါဝေဒနာ နှိပ်စက်ခံရတယ်။
တရားရှုမှတ်ပြီး သေသွားရင်
အနည်းဆုံး နတ်ပြည်ရောက်သွားမယ်။
မပြတ်မလပ် ရှုမှတ်ပွားများနေတဲ့
ယောဂီပုဂ္ဂိုလ်အတွက်
ရရှိမည့် အကျိုးခုနှစ်ပါး
-------------------------
၁။ မပြတ်မလပ် ရှုမှတ်ပွားများနေရင်
သာသနာပြုရာရောက်တယ်။
၂။ မြင်ရတဲ့သူတွေကို
မျက်လုံးအေးစေတယ်။
၃။ မြတ်စွာဘုရားရဲ့အလိုတော်ကို
ယူနိုင်တဲ့ပုဂ္ဂိုလ်ဖြစ်တယ်။
၄။ မိမိကို လှူ တဲ့ ပုဂ္ဂိုလ်တွေကို
အလွန်အကျိုးကြီးမားစေတယ်။
၅။ ဒွါရခြောက်ပါးက
လောဘ ဒေါသတွေ မဝင်နိုင်ဘူး။
လုံခြုံစေတယ်။
၆။ ကာယကံ ဝစီကံ မနောကံမှာ
အကုသိုလ် ဒုစရိုက်တွေ မဖြစ်တော့ဘူး။
ကံသုံးပါး စင်ကြယ်စေတယ်။
၇။ မိမိရထားတဲ့ လူ့ဘဝမှာ
သီလ သမာဓိ ပညာနဲ့ ခန့်ညားမြင့်မြတ်တယ်။
လူ့ဘဝနဲ့ ထိုက်တန်တယ်။
သီလ သမာဓိနဲ့ တည်ဆောက်ထားတဲ့
အသိဉာဏ်ပညာကသာ တဏှာကို သတ်နိုင်တာ။
တဏှာကို သတ်နိုင်တဲ့ပညာမှ ပညာစစ် ပညာမှန်။
တဏှာကို အားပေးတာ ပညာမဟုတ်ဘူး။
သညာအဆင့် ဗဟုသုတအဆင့်ပဲ ရှိသေးတယ်။
မိမိတို့ရဲ့သဒ်ဓါ၊ ဝီရိယ၊ သတိ၊ သမာဓိ၊ ပညာကို
တရားရှုမှတ်တဲ့အခါမှာ အစွမ်းကုန်အသုံးချပါ။
အဲဒီလို အစွမ်းကုန် အသုံးချမှ
ဒီသံသရာခရီးခဲကြီးက လွန်မြောက်နိုင်မှာနော်။
တစ်သံသရာလုံး မောဟအားကြီးခဲ့လို့
ဂင်္ဂါဝါဠု သဲစုမက ဘုရားတွေနဲ့လွဲခဲ့ရတာ။"
“ ဝိပဿ နာမှာ အဆင့်သုံးဆင့်ရှိတယ် ”
၁။ “ ပေါ်တာ ” ကို အရင်သိရမယ်။
၂။ “ ပေါ်တာ” ကိုသိမှ “ပျောက်တာ” ကိုသိမယ်။
၃။ “ ပေါ်တာ ပျောက်တာ ” သိပြီးမှ
“ ပျက်တာ” ကိုသိမယ်။
“ အပျက်” ချည်းပဲ မြင်ပါများရင် နောက်ကျတော့……..
” ဖြစ် ပျက် ” မုန်းပြီး ” ဖြစ် ပျက်” ဆုံးသွားတယ်။
နေရမယ့်အချိန်တွေလည်း နည်းသွားပြီ။
သေဖို့ကလည်း တစ်နေ့ထက်တစ်နေ့
နီးနီးလာပြီဆိုတာ မမေ့ကြနဲ့။
ရခဲတဲ့လူ့ဘဝကို ရပြီးခါမှ
စားဝတ်နေရေး အလုပ်တွေနဲ့ပဲ
ဘဝတစ်ခုလုံးကို မကုန်လွန်ပါစေနဲ့။
ပညာရှိသူတော်ကောင်းတွေကို
မှီဝဲဆည်းကပ်ကြပါ။
သတိပဌာန်တရားတွေ
သစ္စာတရားတွေကိုလည်း နာကြားကြပါ။
သံသရာက လွတ်မယ့် ကျွတ်မယ့်
ဝိပဿ နာအလုပ်ကို ဆင်ခြေအမျိုးမျိုးပေးပြီး
ရှောင်တိမ်းမနေပဲ လုပ်ဖြစ်အောင် လုပ်ကြပါ။
ဒါမှ လူဖြစ်ရကျိုးနပ်မယ်။
သာသနာနဲ့ ကြုံရကျိုးနပ်မယ်။
ယောဂီအပေါင်း သူတော်ကောင်းအပေါင်းတို့
"သတိယှဉ်မှ တရားမြင်" တရားဒေသနာတော်ကို
ကြားနာရ ဖတ်ရှုရတဲ့ အချိန်ကစပြီး
မပေါ့မတန် ထက်သန်တဲ့ သတိတရားနှင့်
လုံ့လစိုက် ကြိုးစားပြီး
ရုပ်ဖြစ်တိုင်း
စူးစူးစိုက်စိုက် ရှုသိနေကြဖို့
ခံစားမှု ဖြစ်ပေါ်တိုင်း
စူးစူးစိုက်စိုက် ရှုသိနေကြဖို့
စိတ်ဖြစ်လေသမျှ ကောင်းကောင်းဆိုးဆိုး
ဘယ်စိတ်မျိုးမဆို ရှုသိနေကြဖို့
မြင်သဘော ကြားသဘော နံ့သဘော
စားသဘော တွေ့ထိသဘော ကြံတွေးသဘော
ဖြစ်တိုင်းဖြစ်တိုင်းလည်း ရှုသိနေကြဖို့
သွားလာလှုပ်ရှား ပြု မူမှု မှန်သမျှကိုလည်း
သတိနဲ့ ရှုသိနေကြဖို့ ဖြစ်ပါတယ်။
ရက်ရှည်လများ
တရားရိပ်သာတွေမှာ အားထုတ်ပြီးလို့
မိမိတို့နေရာရောက်ရင်လည်း
ဆိုင်ရာကိစ္စလေးတွေ ပြုလုပ်တိုင်း
သတိကပ်ပြီး ပြုလုပ်နေလည်း
ဝိပဿ နာဖြစ်တာပါပဲ။
မြတ်စွာဘုရားရဲ့အဆုံးအမဟာ
သီလ သမာဓိ ပညာ
သီလကို လုံခြုံအောင် စောင့်ရှောက်ရင်
"သီလသာသနာ" တည်တာပဲ။
သမာဓိရအောင် အားထုတ်ရင်
"သမာဓိသာသနာ" တည်တာပဲ။
ဝိပဿ နာဉာဏ်တွေ အဆင့်ဆင့်ရအောင်
ကြိုးစားအားထုတ်ရင်
"ပညာသာသနာ"တည်နေတာပဲ။
မိမိကိုယ်တိုင်လည်း ကြိုးစားမယ်
မိမိရဲ့မိသားစုထဲမှာလည်း
သီလ သမာဓိ ပညာတွေ
တည်နေအောင် တိုက်တွန်းပေးမယ်။
'သတိပဌာန်တရား'တွေ ပွားများကြမယ်ဆိုရင်
ဒီမိသားစုဟာ သာသနာအောက်မှာ
သာသနာတည်နေတဲ့ မိသားစု ဖြစ်နေမှာပဲ။
မိမိကိုယ်တိုင်
သီလလည်း မရှိဘူး
သမာဓိလည်း မရှိဘူး
ပညာလည်း မရှိဘူး
သတိပဌာန်လည်း မပွားများဘူးဆိုရင်
အပြင်မှာ သာသနာကြီး
နေလို လလို ထွန်းတောက်နေသော်လည်း
မိမိကိုယ်မှာ သာသနာကွယ်နေတာပဲ။
ရှုတိုင်းချမ်းသာတာ သူတော်ကောင်းတရားပဲ
------------------------------------
ရှုမှတ်ပွားများတဲ့ သူတွေဟာ
သူတော်ကောင်းတရားတွေ
ရင်မှာကိန်းအောင် ပြုလုပ်နေတာ။
မြင်တိုင်း ကြားတိုင်း နံ့တိုင်း စားတိုင်း ရှုမှတ်နေတော့
လောဘ ဒေါသ မောဟတွေ ဝင်ခွင့်မရဘူး။
နှလုံးသားမှာ----
သတိတွေ ဝီရိယတွေ သမာဓိတွေ ပညာတွေ
တဖြည်းဖြည်းအားကောင်းလာတယ်။
နိဗ္ဗာန်ကိုပို့မယ့် ကလျာဏမိတ္တတွေ
ရင်ထဲမှာ ကိန်းအောင်းနေတယ်။
လောဘ ဒေါသ မောဟတွေ နည်းသွားပြီး
"သတိ ပညာ"တွေ အားကောင်းလာတော့
စိတ်ချမ်းသာတယ်။
သူတော်ကောင်းတရားက
စိတ်ကိုချမ်းသာစေတယ်။
သံသရာမှာလည်း ချမ်းသာစေတယ်။
ချမ်းသာဆုံးဖြစ်တဲ့ နိဗ္ဗာန်ကိုလည်း ရောက်စေနိုင်တယ်။
ရှုမှတ်ပွားများနေရတဲ့ အကျိုးတွေနော်--------။
* မြစိမ်းတောင်ဆရာတော်
🙏🙏🙏
Credit..
No comments:
Post a Comment