**************************
🙏🌷🙏🌷🙏🌷🙏🌷🙏🌷🙏🌷🙏
သူတော်ကောင်းဆိုတဲ့ အဓိပ္ပါယ် ကို
တာဝတိံသာနတ်တွေက
ဖွင့်ဆို သတ်မှတ်ကြတာ ရှိတယ် ။
နတ်တွေ သတ်မှတ်တဲ့
အရည်အသွေးဟာ မှတ်သားစရာ ကောင်းတယ် ။
သူတို့က
အရည်အသွေး ( ၇) ရပ်ကို
ထုတ်ဖော် သတ်မှတ် ပြထားတာ ၊
ဒီအရည်အသွေး ( ၇ ) ရပ်ကို
ပြဋ္ဌာန်းပြောဆိုတာလည်း
နတ်တို့ရဲ့ဘုရင် သိကြားမင်း ကိုယ်တိုင်
လူ့ ဘဝတုန်းက ကျင့်သုံးခဲ့တဲ့
ကျင့်ဝတ်တွေကို ရည်ညွှန်းတာပါ ။
အဲဒါ ဘာလဲ ဆိုရင် -
( ၁ )
လူ့ဘဝ ရောက်လာတဲ့အခါ
လူတွေရဲ့ ပထမဆုံးကျေးဇူး
အရှိဆုံး ပုဂ္ဂိုလ်ဟာ အမေနဲ့ အဖေ ပဲ ။
အဲဒီ ကျေးဇူးအရှိဆုံး ပုဂ္ဂိုလ်တွေကို
ကျေးဇူးဆပ်တတ်လို့ ရှိရင် ဒါ သူတော်ကောင်း ပဲ ။
အသက်ထက်ဆုံး မိဘနှစ်ပါးကို
လေးလေးစားစား ပြုစုစောင့်ရှောက် တတ်တဲ့
သားသမီးကို သူတော်ကောင်း လို့
တာဝတိံ သာ နတ်တွေက သတ်မှတ်တယ် ။
------------------
( ၂ ) ကိုယ့် အမျိုးထဲက
ရိုသေလေးစားထိုက်တဲ့ ပုဂ္ဂိုလ်တွေကို
လေးစားတာလည်း သူတော်ကောင်း ပါပဲ ။
အဖေ့ဘက်က တော်တဲ့ အမျိုး
အမေ့ဘက်က တော်တဲ့ အမျိုး
မိသားစုထဲက
ကိုယ့်ထက် အသက်ကြီးတဲ့ အကို , အမတွေ
ကိုယ့်အမျိုးထဲက ရိုသေလေးစားထိုက်တဲ့
ပုဂ္ဂိုလ်တွေကို လေးစားတာလည်း သူတော်ကောင်း ပါပဲ ။
-----------------------
( ၃ ) နောက်တစ်ခုက -
စကားပြောတဲ့အခါ ယဉ်ယဉ်ကျေးကျေး
သိမ်သိမ်မွေ့မွေ့ ပြောတတ်တဲ့
ပုဂ္ဂိုလ်ဟာလည်း သူတော်ကောင်း ပါပဲ ။
ကိုယ်ပြောလိုက်တဲ့ စကားတစ်ခုဟာ
- အပြစ်မပါဘူး ။
အပြစ် ကင်းရမယ် ။
- ကြားလိုက်တဲ့ ပုဂ္ဂိုလ်ရဲ့နားမှာ ချမ်းသာရမယ် ။
နားချမ်းသာတယ် ဆိုတာ -
စိတ်ချမ်းသာမှုကို ဖြစ်စေတယ် ။
- ဒီစကားကို လူတိုင်း နှစ်မြို့တယ် ။
ချွဲ ချွဲ ပျစ်ပျစ် ပြောတာမျိုး မဟုတ်ဘူး တဲ့ ။
- သူပြောတဲ့ စကားလေးက တန်ဖိုး ရှိလိုက်တာ ။
တစ်ဖက်သား စိတ်ချမ်းသာစရာ ဖြစ်တယ် ။
အဲဒီ စကားမျိုး ပြောလို့ ရှိရင်
ဖရုသဝါစာ - ကြမ်းတမ်း ကင်းတဲ့
အတွက် ကြောင့် သိမ်မွေ့တယ် ။
အဲလိုပုဂ္ဂိုလ်မျိုးကိုလည်း တာဝတိံ သာ နတ်တွေက သူတော်ကောင်းတို့ သတ်မှတ်တယ် ။
--------------------------------
( ၄ ) နောက်တစ်ခုက -
လူနှစ်ယောက် ဆုံ လို့ ရှိရင်
နောက်တစ်ယောက် အကြောင်းကို ပြောမိတတ်ကြတယ် ။
အကောင်းပြောတာထက်
အဆိုးပြောတာ ပိုများတတ်တယ် ။
ဒါ လူ့သဘာဝကို ပြောတာ ။
အတင်းအဖျင်း ပြောတယ် ခေါ်တာပေါ့ ။
နှစ်ယောက်က ကျန်သူတစ်ယောက်ရဲ့
အတင်းတွေ ပြောပြီးတော့
တစ်ယောက်က သွားစရာရှိလို့ ထသွားရင်
ကျန်ရစ်တဲ့ တစ်ယောက်က
ဘာလုပ်တုန်း ဆိုရင် မေးငေါ့လိုက်တယ် ။
သူလည်း အတူတူ ပါပဲတဲ့ ။
အဲဒီတော့ လူတွေရဲ့ အကျင့်ဟာ
အတင်းအဖျင်းပြောတာ ,ကုန်းတိုက်တာ
တစ်ယောက်နဲ့ တစ်ယောက် မတည့်အောင် လုပ်ချင်တာ
အဲဒီ စိတ်ဓါတ်တွေ ကင်းပြီး ဆိုရင် သူတော်ကောင်း တဲ့ ။
------------------------
( ၅ ) မစ္ဆရိယ တရားကို ဖယ်ရှားနိုင်တဲ့ ပုဂ္ဂိုလ် ၊
မစၧရိယ ဆိုတာ -
ကိုယ်ရတဲ့ အခွင့်အရေးတစ်ခု သူများကို မရစေချင်တာ ။
ကိုယ်အောင်မြင်ကြီးပွားသလို
သူများကို မကြီးပွားစေချင်တာ ။
လူတစ်ယောက်ရဲ့ ဂုဏ်ကျေးဇူးကို
ချီးမွမ်းတဲ့အခါ ထိန်ချိန်ထားတာ ။
ဒါလည်း မစ္ဆရိယပဲ ။
မစ္ဆရိယ ( ၅ ) မျိုး ရှိတယ် ။
အာဝါသမစ္ဆရိယ - အဆောက်အဦ
နေရာထိုင်ခင်းနဲ့ ပတ်သက်ပြီး ဝန်တိုတာ ။
ကုလမစၧရိယ -
အပေါင်းအသင်းနဲ့ ပတ်သက်ပြီး ဝန်တိုတာ ။
လာဘမစၧရိယ -
ကိုယ်ရတဲ့ လာဘ်လာဘနဲ့ ပတ်သက်ပြီး ဝန်တိုတာ။
ဝဏ္ဏ မစ္ဆရိယ - ဂုဏ်ကျေးဇူး ,
ချီးမွမ်းခံရတဲ့ စကားတို့နဲ့ ပတ်သက်ပြီး ဝန်တိုတာ ။
ဓမ္မ မစ္ဆရိယ - တရားဓမ္မ နဲ့ ပတ်သက်ပြီး ဝန်တိုတာ ။
အဲဒီ မစ္ဆရိယ တရား ဖယ်ရှားလို့ရှိရင်
ဘာသာတရား ထွန်းကားတုန်း ဆိုတော့
" စာဂ - စွန့်ကြဲမှု , စွန့်လွှတ်မှု " တဲ့ ။
ကိုယ်ရလာတဲ့ အခွင့်အရေးတစ်ခုကို
အားလုံးနဲ့ ရှယ်ယာ လုပ်ပြီးတော့
မျှမျှတတ လူ့လောကမှာ အသုံးပြုတတ်တယ် ။
ဒါကြောင့် တာဝတိံသာနတ်တွေက
မစ္ဆရိယ ဆိုတဲ့ စိတ်အညစ်အကြေး ကို
ဖယ်ရှားပစ်နိုင် ပြီး မစ္ဆရိယ ကင်းတဲ့ ပုဂ္ဂိုလ် ဆိုရင် သူတော်ကောင်း လို့ သတ်မှတ်တယ် ။
-------------------------
( ၆ ) နောက်တစ်ခုက ဘာတုန်းဆိုရင်
လောကလူတွေက စကားပြောလို့ရှိရင်
အမှန်တရားကို တိတိကျကျ ပြောဖို့ရာ
ဝန်လေးနေသလို ဖြစ်တယ် ။
" မုသားမပါ လင်္ကာမချော " တဲ့ ။
ချောအောင် အပိုလေး အဆစ်လေး
မဟုတ်တာလေး ဖြည့်စွက် ပြောတတ်တယ် ။
အဲဒီလို မမှန်မကန်တာ လုံးဝ မထည့်ဘဲ
မှန်တဲ့အတိုင်း ပြောလို့ရှိရင်
သစ္စာ လို့ ခေါ်တယ် ။
မှန်တဲ့ သစ္စာစကားဟာ
အလွန်တန်ဖိုးရှိပြီး အလွန် တန်ခိုးကြီးတယ်။
လူတိုင်းလူတိုင်း ဝစီသစ္စာလို့ ခေါ်တဲ့
မှန်တဲ့စကားကို အသုံးချပြီး ကိုယ်လိုချင်တာ
တစ်ခု ပြောမယ်ဆိုရင်
ဒီသစ္စာ ရဲ့ အစွမ်းသတ္တိတွေ ရှိတယ် လို့ ဆိုတယ် ။
အဲဒီလို မှန်မှန်ကန်ကန် , မှန်တဲ့စကားကို ပြောရဲတဲ့ ပုဂ္ဂိုလ်ဟာလည်း သူတော်ကောင်း ပဲ တဲ့ ။
---------------------
( ၇ ) နောက်ဆုံးတစ်ခုက - အမျက်ဒေါသကို ထိန်းသိမ်းဖယ်ရှားနိုင်တဲ့ ပုဂ္ဂိုလ် ၊
လောကမှာ စိတ်ဆိုးလို့
ပြဿနာတက်တာ အများကြီးပဲလေ ။
ဒေါသက တော်တော်များများ
လောကကို ဒုက္ခပေးနေတယ် ။
ကံကြီးတွေ ထိုက်အောင် လုပ်တာ ကြည့်လေ ။
- အမိသတ်ကံ ,
- အဖသတ်ကံ ,
- ရဟန္တာသတ်ကံ ,
-ဘုရား သွေးစိမ်း တည်အောင် လုပ်တဲ့ ကံ
ဒါတွေက ဒေါသ အခြေခံပြီးတော့ ဖြစ်တာ ။
အဲဒီ ဒေါသကို မထိန်းနိုင်ဘူး ။
မဖယ်ရှားနိုင်ဘူး ဆိုလို့ ရှိရင်
လောကကြီးမှာ ပြဿနာတွေ
အများကြီး တက်တယ် ။
ဒါကြောင့်မို့လို့
ကိုယ့်ဒေါသကို ကိုယ်ထိန်းနိုင်တဲ့ ပုဂ္ဂိုလ်ဟာ
လူတော် လူကောင်း တစ်ယောက်ပဲ ။ သူတော်ကောင်းပဲ ။
ဒါဟာ တာဝတိံသာနတ်တွေက
သူတော်ကောင်းလို့ သတ်မှတ်ရတဲ့ စံတွေပဲ ။
ပါမောက္ခချုပ် ဆရာတော်
ဒေါက်တာ အရှင် နန္ဒမာလာဘိဝံသ
( သူတောင်းကောင်းတိုရဲ့
စိတ်နေစိတ်ထား ၊ စာ ၅- ၂၂ )
Credit..
No comments:
Post a Comment