ဒီဘ၀ ပြီးသွားရင်
ဘယ်ဘဝ ရောက်မယ် ဆိုတာ
သာမန် ပုထုဇဉ်တွေ မသိနိုင်ဘူးပေ့ါ …
မြတ်စွာဘုရား တရားတော်တွေ
တို့တတွေ နာခွင့်ရကြတယ် …
တရားတော်တွေ ဆိုတာ
ရောဂါပျောက်အောင် ကုသနိုင်တဲ့
ဆေးနဲ့အလားတူပါတယ် …
ဆေး ဆိုတာ မသောက်ဘဲနဲ့
နေလို့ရှိရင်တော့ ရောဂါ မပျောက်နိုင်ပါ …
ရောဂါ ပျောက်ချင်ရင်
ဆေးကို မှန်မှန် သောက်ရတယ် …
တရား ဆိုတာလည်း
ဘ၀မှ လွတ်မြောက်အောင် မှန်မှန်နှလုံးသွင်းရပါတယ် …
ကိုယ့်စိတ်ထဲမှာနှလုံးသွင်းခြင်းဖြင့်
စိတ်ပိုင်းဆိုင်ရာ ချို့ယွင်းချက်တွေ
စိတ်ရဲ့ အညစ်အကြေးတွေဟာ
တဖြည်းဖြည်း သန့်စင်ပြီးတော့ …
နောက်ဆုံးမှာ …
ကိုယ့် စိတ်ဟာ ကြံ့ခိုင်တဲ့
စိတ်ဓာတ်မျိုးကို ရလာပါမယ် …
ကိုယ့် စိတ်ဓာတ်ကို ကြံ့ခိုင်လာအောင်
ကိုယ်ဘဲ လုပ်ရပါတယ် …
အဲဒါကြောင့် …
မြတ်စွာဘုရားက
" အတ္တာဟိ အတ္တနော နာထော " လို့
ကိုယ် လုပ်မှ ကိုယ်ရတယ် ဆိုတာ
အင်မတန်မှ လက်တွေ့လည်း ကျပါတယ် …
တရားဟာ မိမိရဲ့ ဘ၀ပဲ
ကိုယ့် ဘ၀ပဲ …
တရားလို့ပြောလိုက်တာနဲ့
စီးပွား၊ ရာထူး၊ သားသမီး၊ ဇနီးမယားကို စွန့်ပြီး …
အမျိုးသမီးတွေက မယ်သီလရှင် ၀တ်ဖို့
အမျိုးသားတွေက ဘုန်းကြီး ၀တ်ဖို့ မလိုဘူးပေါ့ …
မိသားစုနဲ့ နေရင်းလည်း
တရား ရနိုင်ပါတယ် …
ကျင့်ဖို့ရာ အဓိက ဖြစ်ပါတယ် …
" နှလုံးသွင်း တရား " ဟာ
အင်မတန်မှ အရေးကြီးပါတယ် …
မြတ်စွာဘုရားလက်ထက်တုန်းက
မိသားစုနဲ့ နေရင်း
သောတာပန် သကဒါဂါမ် အနာဂါမ်တွေ
ဖြစ်တာရှိပါတယ် …
အနာဂါမ် ဖြစ်သည် အထိအောင် တောင်မှ
မိသားစု အသိုင်းအ၀န်းထဲမှာ ရှိနေသေးပါတယ် …
နောက်ဆုံး ရဟန္တာ ဖြစ်သွားရင်တော့
သူက မိသားစုနဲ့ မနေတော့ဘူးပေါ့ …
အဲဒီလို တရားဆိုတာ
ဘယ်လို ပုဂ္ဂိုလ်ဘဲ ဖြစ်ဖြစ်
ကျင့်တဲ့ ပုဂ္ဂိုလ်မှာ ရနိုင်ပါတယ် …
ပစ္စည်း သံယောဇဉ်
သား သံယောဇဉ်
သမီး သံယောဇဉ် ဆိုတော့ …
ပစ္စည်းကို စွန့်ရမှာလား ?
သားကို စွန့်ရမှာလား ?
သမီးကို စွန့်ရမှာ လားလို့
လူတွေက ထင်နေကြတယ် …
ဘယ်ဟာမှ စွန့်စရာ မလိုပါဘူး …
စွန့်ရမှာက ကိုယ့် စိတ်ထဲမှာ ဖြစ်နေတဲ့
" တွယ်တာမှု " ကို စွန့်ရမှာပါ …
အတွယ်အတာ မရှိဘဲနဲ့ နေတာ
မတ်တောနဲ့ နတောပါ......
အဲဒီတော့ …
သား စွန့်ဖို့လည်း မလိုပါ
သမီး စွန့်ဖို့လည်း မလိုပါ
ရာထူး စွန့်ဖို့လည်း မလိုပါ
" တွယ်တာမှု " ကိုဘဲ စွန့်ဖို့ လိုပါတယ် …
အဲဒါကြောင့်မို့လို့ …
မြတ်စွာဘုရား ဟောကြားတော်မူခဲ့တဲ့
တရားတော်တွေဟာ …
သတိသမ္ပဇည တရား ကိုယ့်သန္တာန်မှာ
ဖြစ်ပွားအောင် ကြိုးစားပြီးတော့
အမှန်အကန် သိမယ်ဆိုရင် …
ဘ၀မှာ နေပျော်ပြီး
နောက်ဆုံးမှာ ဘ၀က လွတ်မြောက်တဲ့
နိဗ္ဗာန်ချမ်းသာကို မျက်မှောက်ပြုနိုင်မှာ
ဖြစ်တယ် လို့
ကိုယ်စီ ကိုယ်စီ သဘောကျကာ
ကျင့်ကြံ အားထုတ် နိုင်ကြပါစေကုန်သတည်း …
(ပါချုပ်ဆရာတော်ဘုရားကြီး
ဒေါက်တာအရှင်နန္ဒမာလာဘိဝံသ)
သဗ္ဗဒါနံဓမ္မဒါနံဇိနာတိ
Credit;to
(အမှောင်ပျောက်၍ အလင်းရောက်ပါစေ)။
No comments:
Post a Comment