စတနောဆိုတာ ကံ
➖➖➖➖➖➖
❖ လူတွေဟာ ဘာပဲလုပ်လုပ်
စေတနာနဲ့လုပ်တတ်ကြပါတယ်။
စိတ်ရင်း မကောင်းတဲ့သူဟာ
သူ့စိတ်ဆိုးက စေ့ဆော်တဲ့အတိုင်း
စေတနာဆိုးနဲ့လုပ်ပါတယ်။
စိတ်ရင်းစေတနာ ကောင်းပြီး
ကံကံ၏ အကျိုးကို ယုံကြည့်တဲ့
သူတွေကတော့ စေတနာကောင်းနဲ့
အလုပ်လုပ်လေ့ ရှိကြပါတယ်။
❖ ကိုယ့်စေတနာ ကိုယ်အကျိုးပေးဆိုတဲ့
စကားအတိုင်း စေတနာဆိုးနဲ့
လုပ်လိုက်လို့ အလုပ်တစ်ခု
ပြီးမြောက်သွားတယ်ဆိုရင်
အဲဒီလူအတွက် ကံဆိုးတစ်ခု
ရသွားတာပါပဲ။ မကောင်းကျိုး
ပေးနိုင်တဲ့ကံကို ရသွားတာပါပဲ။
အဲဒီလိုပဲ စိတ်ရင်းကောင်းတဲ့သူ
အလုပ်တစ်ခု ပြီးမြောက်သွားတဲ့အခါမှာ
ကံကောင်းတစ်ခု ပြီးမြောက်သွားတယ်။
အဲဒီကံက အကျိုးပေးကောင်းတွေ ပေးတော့မှာပါပဲ။
❖ ဘ၀မှာ ကံဆိုးအမျိုးမျိုးကိုတွေ့တတ်ကြပါတယ်။
ကံဆိုးနေတဲ့အချိန်မှာ မိမိကိုယ်ကို
မဆောက်တည်နိုင်တဲ့ သူတွေကတော့
အမှား ပိုလုပ်တတ်ကြပါတယ်။
အသိဥာဏ်နဲ့မယှဉ်နိုင်ဖြစ်တတ်ကြတယ်။
သူကံဆိုးတာဟာ ဘယ်သူ့ကြောင့်
ဘယ်ဝါ့ကြောင့် ဆိုပြီးသူတစ်ပါးကို
အပြစ်ပုံချတတ်ကြပါတယ်။
အမှန်တကယ်တော့....
သူတစ်ပါးက မိမိကို
မကောင်းကြံတယ် ဆိုရင်တောင်မှ
မိမိဘက်က ချို့ယွင်းချက်ရှိနေလို့ပါပဲ။
အဲဒီလို့ မတွေးနိုင်ပဲ
သူတစ်ပါးရဲ့အပြစ်ကိုသာ ကြည့်ပြီး
လက်တုံ့ပြန်မယ်ဆိုရင် အမှားတစ်ခု
ထပ်တိုးပြီး ကံဆိုးသံသရာက
ရှည်နေတော့မှာပါ။
❖ မိမိရဲ့ ကံအဆိုးတွေ ပိုမိုဆိုးမသွားအောင်
ဘုရားတရားသံဃာ ရတနာသုံးပါရဲ့
အဆုံးအမနဲ့အညီ နေထိုင်မယ်လို့
စိတ်ကိုဖြောင့်ဖြောင့်ထားကာ
စေတနာမှန်နဲ့ နေထိုင်လုပ်ကိုင်ရမှာ
ဖြစ်ပါတယ်။
❖ ကံဆိုးအကျိုးပေးတဲ့ အချိန်မှာတောင်မှ
မိမိကိုယ်ကို ဆောက်တည်ပြီး
ကံဆိုးတွေ သိပ်မပြင်းထန်အောင်
ကြိုးစားနိုင်သေးတယ်ဆိုရင်
ကံကောင်းတဲ့ သူများလည်း ကံပိုပြီး
ကောင်းလာအောင် ကြိုးစားဖို့သင့်ပါတယ်။
❖ လာဇာဒေ၀ဓီတာ ပေါက်ပေါက်
နတ်သမီးကလေးဆိုတဲ့
နတ်သမီးကလေး တစ်ယောက်ရဲ့
အကြောင်းကို ကြည့်ရအောင်...
❖ သူဟာမူလက အလွန်ဆင်းရဲတဲ့
လယ်သူမကလေး ဖြစ်ပါတယ်။
အရှင်မဟာကဿပ ရဟန္တာ
အရှင်မြတ်ကြီး နိရောဓ သမာပတ်က
ထတော်မူတဲ့အခါ
ချီးမြှင့်သင့်တဲ့သူကို ဆင်ခြင်ပြီး
အဲဒီသူဆင်းရဲမကလေး ထံက
ပေါက်ပေါက်များကို အလှူခံခဲ့ပါတယ်။
ပေါက်ပေါက်များကို လှူပြီး
ဒါနအပေါ်မှာ ပီတိဖြစ်ကာ
အိမ်ကိုအပြန် လမ်းမှာ မြွေကိုက်ပြီး
သူဆင်းရဲမကလေး သေရှာပါတယ်။
သေလျှင်သေချင်း သူ့ကုသိုလ်
အဟုန်ကြောင့် နတ်သမီးဖြစ်သွားပါတယ်။
❖ လာဇာဒေ၀ဓီတာ အမည်နဲ့
နတ်သမီးဖြစ်လာတဲ့ သူဆင်းရဲမလေးက
သူအဖြစ်ကို သူချက်ချင်းဆင်ခြင်ပါတယ်
အဲဒီအချိန်မှာ သူ့အလောင်းဟာ
လယ်ကန်သင်းရိုးပေါ်မှာပဲ
ရှိနေပါသေးတယ်။ နတ်သမီး ကလေးက
သူ့ကုသိုလ်ဟာ အလွန်နည်းပါးပါလား၊
နတ်သမီး ဘ၀များ
မေ့လျော့ ခံစားနေခဲ့ရင်
တစ်နေ့မှာ ကုသိုလ်ကံအဟုန်
ကုန်သွားလိမ့်မယ်။
ကုသိုလ်အမှုများကို ထပ်ပြုဦးမှ
တော်မယ်ဆိုပြီး ကုသိုလ်အမှုများ
ထပ်ပြီး ပြုတဲ့အတွက်
သောတာပန် တည်သွားခဲ့ပါတယ်။
❖ အဲဒီအဖြစ်ကလေးဟာ ကံကောင်းနေတဲ့သူများ
သတိထားဖို့သင့်တဲ့ အချက်ပါ။
ကုသိုလ်ကံကောင်းဆိုတာ
မျိုးစေ့ကောင်းနဲ့တူပါတယ်။
မျိုးစေ့ကောင်းကို လက်၀ယ်ပိုင်ပိုင်
ရထားတဲ့ သူများက
ပိုပြီး သတိထားရပါမယ်။
ကုသိုလ်မျိုးစေ့ ကောင်းပါလျက်နဲ့
ကောင်းစွာစိုက်ပျိုးခြင်း မရှိခဲ့ရင်
မျိုးစေ့ သုဉ်းသွားနိုင်ပါတယ်။
အဲသည်လိုပါပဲ
မိမိရဲ့အတိတ်ကံ ကောင်းနေရုံသာမက
အခုအချိန်မှာလည်း ကောင်းတဲ့
အမှုများကို လုပ်ပြီး
ကောင်းမှုဆက်နေတဲ့ သူဖြစ်ခဲ့ရင်
ကံအကျိုးပေးပုံက ရှင်သန်နေမှာ
ဖြစ်ပါတယ်။
✿ (ယောဆရာတော်) ✿
❖ ဘ၀တု သဗ္ဗမင်္ဂလံ။
🙏🙏🙏🙏🙏🙏🙏🙏🙏🙏🙏🙏🙏
Credit :✍️
ဓမ္မဒါနကုသိုလ်အဖြစ်မျှဝေ ပူဇော်ပါသည်။
🙏Diamond May🙏
No comments:
Post a Comment