🌸🌿🌿🌸🌿🌿🌸🌿🌿
တရားဆိုတာက နေရာတိုင်း၊
အချိန်တိုင်း ကျင့်လို့ရပါတယ်။
ကမ္မဌာန်းထိုင်နေမှ
တရားကျင့်တာမဟုတ်ပါ။
တရားဆိုတာ
ဣရိယာပုတ် လေးပါးစလုံးနဲ့
ကိုယ်ရဲ့စိတ်ထဲမှာ ဖြစ်ပေါ်လာတဲ့
အညစ်အကြေးတွေကို
သန့်ရှင်းအောင်လုပ်တာဟာ
တရားပါပဲ။ လက်တွေ့
ကျင့်သုံးနေတယ်လို့ ခေါ်ပါတယ်။
တရားထိုင်နေတဲ့ ပုဂ္ဂိုလ်သာ
တရားကျင့်တယ်လို့ မအောင့်မေ့နဲ့။
အာရုံတွေနဲ့ တွေ့နေတဲ့အခါမှာ
မကောင်းတဲ့ အာရုံတွေကို
ဖယ်ရှားပစ်နေတာလည်း
တရားကျင့်တာပါပဲ။
မျက်စိက နှစ်သက်စရာအာရုံတွေ့လို့၊
နားက နှစ်သက်စရာအသံကြားလို့၊
ကျန်တဲ့အာရုံတွေကလည်း
နှစ်သက်စရာ ဆုံမိလို့
တဏှာလောဘတွေ နှစ်သက်စရာတွေ
တွေ့လာပြီဆိုရင် ဖယ်ရှားနိုင်ရပါမယ်။
အဲဒီ နှစ်သက်စရာအာရုံဆိုတာ
သက်ရှိရှိတယ်၊ သက်မဲ့ရှိတယ်။
သက်ရှိပေါ်မှာ တွယ်တာစိတ်၊
ချစ်ခင်စိတ်၊ တဏှာလောဘပေါ်လာရင်
အသုဘ ဘာ၀နာပွားပြီး ဖယ်ရှားပစ်ပါ။
တစ်ခါက ရှင်၀င်္ဂီသ
အရပ်ထဲ ဆွမ်းခံသွားတုန်း
နှစ်သက်စရာ
မာတုဂါမ တစ်ယောက်နဲ့ တွေ့လာလို့
စိတ်တွေဖောက်ပြန်လာတဲ့အခါ
အရှင်အာနန္ဒာကို ဖွင့်ပြောတယ်။
တပည့်တော်, ဘုရား
ကာမဂုဏ်အာရုံတွေ လွှမ်းမိုးနေပါတယ်။
အဲဒီ စိတ်တွေကြောင့်
စိတ်ထဲမှာ ပူလောင်နေပါတယ်။
တပည့်တော်ကို ငြိမ်းအေးအောင်
အရှင်ဘုရား ဆုံးမပါ တဲ့။
အဲဒီတော့ ရှင်အာနန္ဒာက-
အေး မင်း အမှတ်သညာလွှဲနေလို့
ဒီလိုဖြစ်တာ၊ မင်း သညာလေးကို
ပြောင်းလိုက်၊ စိတ်ထဲမှာ လှတယ်ဆိုတဲ့
အတွေးကြောင့် ဒီလိုဖြစ်တာ၊
မလှဘူးဆိုတာ ပေါ်အောင်တွေး၊
တင့်တယ်တယ်ဆိုလို့ ဒီလိုဖြစ်တာ၊
မတင့်တယ်ဘူးဆိုတာ ပေါ်အောင်တွေး၊
မတင့်တယ်ဘူးဆိုတဲ့ ရွံ့စဖွယ်တွေကို
လိုက်ရှာတွေး"
လူရဲ့ခန္ဓာကိုယ်မှာ ရွံ့စရာတွေ
အများကြီးရှိတယ်။
ရွံ့စရာတွေမတွေးဘဲနဲ့ နှစ်သက်စရာတွေ
တွေးနေရင်တော့ လောဘဖြစ်တယ်။
အသုဘာယ စိတ္တံ ဘာဝေဟိ၊
မာနာနုသယ မုဇ္ဇဟ တဲ့။
ဒါဟာ တားဆီးတဲ့ နည်းတစ်ခုပဲ။
အဲဒီနည်းနဲ့ ဖြေဖျောက်လိုက်တဲ့အခါမှာ
ပူလောင်နေတဲ့
သူရဲ့တဏှာရာဂ စိတ်တွေဟာ
ချိုးနှိမ်ပြီးသား ဖြစ်သွားတယ်။
ကိုယ့်သန္တာန်မှာ လောဘဖြစ်ရင်
ဖြစ်မှန်းသိရမယ်၊
မဖြစ်အောင်ထိန်းရမယ်။
မာနဖြစ်ရင် ဖြစ်မှန်းသိရမယ်။
အဲဒီ စိတ်ရဲ့ အညစ်အကြေးတွေ၊
သဘာဝတွေကို သိလာပြီဆိုလို့ရှိရင်
သူတို့ရဲ့ ထွက်ပေါက်ကို ရှာရမယ်။
အဲဒီ ထွက်ပေါက်ရှာပြီး
ဖယ်ရှားပစ်တာဟာ တရားကျင့်တာပါပဲ။
ဒါကြောင့် တရားချစ်ခင်
သူတော်စင်တို့ အနေနဲ့
ဗုဒ္ဓမြတ်စွာ ဟောထားတဲ့ ဓမ္မကို
လက်တွေ့ကျင့်သုံးခြင်းဖြင့်
သာသနာတော်နဲ့ ကြုံတွေ့ရကျိုးနပ်ပြီး
ဓမ္မကိုကျင့်သုံးခြင်းကြောင့်
မိမိတို့၏ စိတ်နေသဘောထားအားလုံး
အလွန်မွန်မြတ်ကာ မြတ်နိဗ္ဗာန်ကို
ရရောက်နိုင်ကြပါစေ ကုန်သတည်း။
ပါမောက္ခချုပ်ဆရာတော်
ဒေါက်တာအရှင်နန္ဒမာလာဘိဝံသ
ပြန်လည်မျှဝေခြင်း၊ share ခြင်းဖြင့်
ကုသိုလ်ယူနိုင်ပါသည်။
* ဓမ္မဒါန *
No comments:
Post a Comment