သားသမီး ဇနီးခင်ပွန်းကို
လူတွေက... ကိုယ့်အပိုင်လို့ ထင်နေကြတယ်။
တကယ်က ဘယ်သူကမှ ဘယ်သူ့ကိုမှ
မပိုင်ပါဘူး။
ကိုယ့်ခန္ဓာကိုယ်တောင် ကိုယ်မပိုင်ပါဘူးနော်။
အကြောင်းသင့်တုန်းလေးမို့
ပေါင်းဆုံနေကြရတာ ဖြစ်တယ်။
အကြောင်းမသင့်တဲ့တနေ့ ခွဲကြရမှာဘဲ။
ဒါက ကိုယ့်တစ်ယောက်ထဲပဲ
ဖြစ်နေတာလားဆိုတော့ မဟုတ်ဘူး။
သုံးဆယ့်တစ်ဘုံလုံး ဖြစ်နေကြတာ။
ကိုယ့်တစ်ယောက်ထဲ မဟုတ်ပါဘူး။
ဒါက သတ္တဝါတွေအတွက် ..
ဖြစ်ရိုးဖြစ်စဉ်တစ်ခုမျှသာ ဖြစ်တယ်။
သို့သော်လည်း မိသားစုနဲ့ ပျော်ရွှင်နေတုန်း
စိတ်ကူးယဉ်ကောင်းနေတုန်းမှာ
ရုတ်တရက်ခွဲရတော့ ..
အတော်ခံစားကြရတယ်နော်။
ဒီတော့ သားသမီး ဇနီးခင်ပွန်းတွေကို
ကိုယ်ပိုင်တယ် ကိုယ်ဆိုင်တယ်ဆိုတဲ့
အထင်အမြင်မှားမှုကို ..
သတိလေးနဲ့ လျော့ချရမယ်။
ကိုယ်မထားခဲ့လဲ ..
သူတို့က ကိုယ့်ကို ထားခဲ့မှာပဲ။
ဒီသဘာဝကို နားလည်လက်ခံနိုင်ရမယ်။
ကိုယ်တကယ်ပိုင်တာ
ကိုယ်တကယ်ဆိုင်တာက
ကိုယ်ပြုထားတဲ့ ...
ကုသိုလ်ကံ အကုသိုလ်ကံတွေပဲဖြစ်တယ်။
ကိုယ့်ဘဝရဲ့ အဖော်အမွန်အစစ်ဆိုတာ
ကိုယ်ပြုထားတဲ့ ..
ကုသိုလ်ကံ အကုသိုလ်ကံတွေသာဖြစ်တယ်။
သားသမီး ဇနီးခင်ပွန်းဆိုတာက
သုဿာန် ဟိုဘက်အထိ လိုက်လို့မရဘူး။
ကိုယ်ပြုထားတဲ့ ကံတွေကတော့
ကိုယ်သွားရာကို နိဗ္ဗာန်မရမချင်း
အရိပ်လို လိုက်ပါနေကြမှာဖြစ်တယ်။
လူဆိုတာ အကြောင်းဆုံလို့
ပေါင်းဆုံရတဲ့အခါမှာ -
အကောင်းဆုံးပေါင်းဆုံခဲ့ကြသလို
အကြောင်းမဆုံတော့လို့ ..
ခွဲကြရတော့မယ်ဆိုရင်လည်း
အကောင်းဆုံး ခွဲနိုင်ဖို့လိုတယ်။
ကိုယ်က သားသမီးဇနီးခင်ပွန်းကို
စွဲလမ်းတပ်မက်စိတ်နဲ့ သေမယ်ဆိုရင်
မကောင်းတဲ့ဘုံဘဝကို လားရောက်ရမယ်။
ကိုယ့်ရဲ့ စွဲလန်းတပ်မက်စိတ်က
သူတို့ကို ကောင်းကျိုးတစုံတရာ
ပြုနိုင်သလားဆိုတော့... မပြုနိုင်ဘူး။
ကိုယ့်အတွက် ..
ကောင်းကျိုးပြုသလားဆိုတော့လည်း
မပြုပါဘူး။
နှစ်ဖက်ရှုံး၊ ရှုံးစေတယ်နော် ...။
ဒါကြောင့် နှစ်ဖက်ရှုံး၊ မရှုံးရအောင်
ဒီအချိန်ကစလို့ မိသားစုကို
ငါတကယ်မပိုင် ငါတကယ်မဆိုင်ဘူးလို့
နားလည်လက်ခံပါ။
ဒီအခြေအနေက ..
ငါ့တစ်ယောက်ထဲ ကြုံနေရတာ
မဟုတ်ဘူးဆိုတာကိုလည်း
နားလည်လက်ခံပါ ...။
မိသားစုကို ချစ်သလို ငါ့ကိုယ်ငါလည်း
ချစ်မှတော်မယ်လို့ တွေးပြီး
ဒါန သီလ ဘာဝနာအမှုတို့ကို
စွမ်းအားရှိသလောက် ပြုလုပ်အားထုတ်ပါ။
တစ်ချိန်ချိန်တော့ ..
ကိုယ်မခွဲရင် သူတို့က ခွဲခဲ့မှာပဲနော်။
#ကျေးဇူးတော်ရှင်ပါချုပ်ဆရာတော်ဘုရားကြီး
🙏🙏🙏🙏🙏
No comments:
Post a Comment