◦•●◉✿🌺 ✿◉●•◦
တပည့်တော်မမှာ သမီးလေး တစ်ယောက်ရှိတယ် ဘုရား။
တပည့်တော်မ သေရင် သမီးလေးကို တစ်ယောက်ထဲ ထားခဲ့ရမှာ စိတ်မချဘူး၊
သမီးကိုစွဲတဲ့အစွဲကလည်း
ဖျောက်မရဘူး ဒီအစွဲနဲ့သေရင် တပည့်တော်မတော့
အပါယ်ကျတော့မှာဘုရား။
ဒါကြောင့် သမီးကို စွဲတဲ့
အစွဲပျောက်အောင် ဘယ်လိုဖျောက်ရမလဲဘုရား။
ဒကာမကြီး သမီးက အခု ဘယ်မှာတုန်း။
အိမ်မှာပါ ဘုရား။
အိမ်မှာရှိနေတဲ့ သမီးကို
ဒကာမကြီးစိတ်ထဲကနေ အာရုံပြုကြည့်လိုက်ပါ။
တင်ပါ့။
အာရုံပြုကြည့်လိုက်တော့
ဒကာမကြီးသမီးရဲ့ ပုံဟန်သဏ္ဍန်၊ အရိပ်နိမိတ်တွေက ဒကာမကြီးရဲ့ အာရုံမှာ ထင်လာလိမ့်မယ်။
မြင်တာ မဟုတ်ဘူးနော် အာရုံမှာ ထင်လာတာ။
ဒီတော့ အိမ်မှာရှိနေတဲ့ သမီးက တစ်ယောက်။
ဒကာမကြီး အာရုံပြုလိုက်လို့
အာရုံမှာပေါ်လာတဲ့ သမီးက တစ်ယောက်။ သမီးနှစ်ယောက် ဖြစ်မနေဘူးလား။
ဖြစ်နေပါတယ်ဘုရား။
အိမ်မှာရှိနေတဲ့ သမီးက ဒကာမကြီးလက်နဲ့
ထိတွေ့ ကိုင်တွယ် စမ်းသပ်လို့ရတဲ့ သမီး။
ဒကာမကြီး အာရုံမှာပေါ်နေတဲ့ သမီးကျတော့,,
ကိုင်စမ်းဖမ်းလို့ မရဘူး မဟုတ်လား။
ဒကာမကြီးစိတ်က အာရုံပြုလို့သာ အာရုံမှာပေါ်လာတာလေ။
ဒီတော့ ထိတွေ့ကိုင်တွယ်လို့ရတဲ့ တကယ့်သမီး နဲ့ ထိတွေ့ကိုင်တွယ်လို့မရတဲ့
အပြင်မှာတကယ် မရှိတဲ့ သမီး။
သမီး နှစ်ယောက် ဖြစ်မနေဘူးလား။
ဖြစ်နေပါတယ်ဘုရား။
အခု ဒကာမကြီး သမီးကိုစွဲတယ်ဆိုတာ တကယ့် အပြင်က သမီးကိုစွဲနေတာ မဟုတ်ဘူး။
အာရုံထဲက သမီးကို စွဲနေတာ။
အာရုံပြုလိုက်လို့ မိမိရဲ့အာရုံမှာ သမီးရဲ့ပုံဟန်သဏ္ဍန်ပေါ်လာပြီး။ တကယ်မရှိပါဘဲနဲ့ အာရုံမှာပေါ်လာတဲ့ သမီးကို အရှိထားပြီးကို စွဲတာ။
ငါသေသွားရင် ငါ့သမီးလေးကို ဘယ်သူ စောင့်ရှောက်မလဲ။
ငါမရှိရင် ဘယ်လိုနေထိုင် စားသောက်မလဲ။ ဒီလို တွေးတော ပူပန်တဲ့စိတ်ကြောင့် အာရုံယူလို့ စွဲလန်ရင်းဖြစ်လာတာ။
အာသဝကြောင့် ဖြစ်တဲ့သမီးမို့ အာသဝသမီး လို့ခေါ်တယ်။
လင်နဲ့မယား ညားပြီး မွေးတဲ့သမီးက သဘာဝသမီး။
'အာရုံ'နဲ့'စိတ် 'ညားပြီးမွေးတဲ့သမီးက အာသဝသမီး။
ဒကာမကြီးကို အပါယ်ချမယ့်သမီးက
'သဘာဝသမီး'က ချမှာ မဟုတ်ဘူး။ 'အာသဝသမီး'က ချမှာ။
ဒါကြောင့် ဒကာမကြီးလက်နဲ့
ထိတွေ့ ကိုင်တွယ် စမ်းသပ်လို့ ရတဲ့
သဘာဝသမီးကို စွန့်ပစ်ရမှာ မဟုတ်ဘူး။
သူ့ကိုတော့ ကောင်းကောင်းမွန်မွန် ပြုစုကျွေးမွေးစောင့်ရှောက်နေလို့ရတယ်။
ဒကာမကြီးစိတ်နဲ့ အာရုံယူတွေးလို့ အာရုံမှာ ထင်လာတဲ့ 'အာသဝသမီး'ကိုတော့
အပြီးတိုင် စွန့်ပစ်လိုက်ပါ ဒကာမကြီး။
Credit.. မူရင်းရေးသားသူ
No comments:
Post a Comment