❄❄❄❄❄❄❄❄❄❄❄❄❄
ဗုဒ္ဓရဲ့ ဂုဏ်ကို အာရုံပြုတယ်ဆိုတာ ရည်ရွယ်ချက်နှစ်ခုရှိတယ်။
တစ်ခုက စိတ်ကြည်နူးမှုအတွက်။
လောကမှာ လူတွေက စိတ်ကြည်နူးနေပြီဆိုရင် ထိုကြည်နူးတဲ့စိတ်ကို အားတစ်ရပ်အနေနဲ့ အသုံးပြုပြီး အသိဉာဏ်ဖွံ့ဖြိုးအောင် လုပ်လို့ရတယ်ပေါ့။ စိတ်ညစ်နေတဲ့ ပုဂ္ဂိုလ်တစ်ယောက်မှာ ဘယ်လိုမှ အသိဉာဏ်မဖြစ်နိုင်ဘူးလေ။ အဲဒီတော့ မြတ်စွာဘုရားရဲ့ ဂုဏ်ကို အာရုံပြုလိုက်လို့ စိတ်တွေဟာ ကြည်နူးလာတယ်ဆိုရင် အကြံကောင်း ဉာဏ်ကောင်းတွေ ဖြစ်ပေါ်လာနိုင်တယ်။ ဒါကြောင့်မို့ မြတ်စွာဘုရားရဲ့ ဂုဏ်ကို အာရုံပြုခြင်းအားဖြင့် စိတ်ရဲ့ ကြည်နူးမှုတွေ ရရှိနိုင်တယ်။
ကြည်နူးမှုရလာတဲ့ စိတ်ကလေးကို အသုံးချလိုက်လို့ရှိရင် သမာဓိစွမ်းအားတွေ၊ ပညာစွမ်းအားတွေ တက်လာတယ်။ သမာဓိကလည်း ထက်မြတ်လာမယ်။ ပညာကလည်းပဲ ထက်မြတ်လာမယ်။ ဒီလိုဆိုလိုတာပေါ့နော်။ ဥပမာ ပန်းချီကားတစ်ချပ်ကို ရေးတော့မယ်ဆိုလို့ရှိရင် ပန်းချီရေးမယ့် ကားချပ်ကြီးတစ်ခုဟာ သန့်စင်နေဖို့လိုတယ်။ ညစ်ပေနေလို့ရှိရင် ဒီဆေးခြယ်တဲ့အခါမှာ လှပမှုဖြစ်မှာ မဟုတ်ဘူး။
ထို့အတူပဲ စိတ်ကိုလည်း ရှေးဦးစွာ မြတ်စွာဘုရားရဲ့ ဂုဏ်တော်တွေကို အာရုံပြုပြီး သန့်ရှင်းစင်ကြယ်မှုဆိုတာတွေ လိုအပ်တယ်။ နောက်တစ်နည်းအားဖြင့် ပြောမယ်ဆိုရင် မြတ်စွာဘုရားဂုဏ်တော်နဲ့ ဆေးကြောသန့်စင်လိုက်လို့ သန့်ရှင်းနေတဲ့လူရဲ့ သမာဓိစွမ်းအားတွေ၊ ပညာစွမ်းအားတွေဟာ ထက်မြက်လာတယ်။ ဒါ့အတွက် ဝိပဿနာကျင့်စဉ်တစ်ခုကို ကျင့်လိုက်မယ်ဆိုရင် လွယ်လွယ်ကူကူ အောင်မြင်ပေါက်ရောက်သွားနိုင်တယ်လို့ ဒီလိုဆိုတာ။
ဘယ်အခါဖြစ်ဖြစ် လုပ်စရာ အလုပ်အကိုင်ရှိတယ်။ ဘုရားဂုဏ်ကို အာရုံပြုလိုက်မယ်။ ပြုပြီးတော့ စိတ်ဓာတ်တွေ၊ အင်အားတွေ တက်လာပြီဆိုတော့မှ ကိုယ်လုပ်စရာကို ဆက်လုပ်မယ်ဆိုရင် အောင်မြင်နိုင်တယ်။
တချို့က အရက်ကလေးသောက်ပြီးလုပ်မှ ပိုပြီးတော့ ဉာဏ်ရွှင်တယ်လို့ ထင်ကြတယ်ပေါ့နော်။ အဲဒီတော့ အခုလို တရားဓမ္မ အားထုတ်တာကျတော့ အရက်ကလေး သွားသောက်မိရင်တော့ အဲဒါ တရားဓမ္မနဲ့ ဝေးသွားမှာပဲ သေချာတယ်။ မှန်ကန်တဲ့ အမြင်တစ်ခုကို ရဖို့ဆိုတာ မဖြစ်နိုင်ဘူး။ ဒါကြောင့်မို့ မြတ်စွာဘုရားဂုဏ်တော်ကို ပွားထုံခြင်းအားဖြင့် လူတွေရဲ့ အသိဉာဏ်ဟာ ရွှင်လန်းတက်ကြွလာနိုင်တယ်။
နောက်တစ်ခုက ဝိပဿနာအားထုတ်ဖို့အတွက်။
ဝိပဿနာဉာဏ် ရင့်သန်ဖို့အတွက်လည်း မြတ်စွာဘုရားဂုဏ်တော်ကို ပွားပေးရမယ်လို့ ဆိုတယ်။ မြတ်စွာဘုရားဂုဏ်တော်ကို အာရုံပြုလိုက်တာနဲ့ သဒ်ဓါစှမျးအားတှကေ တက်လာတယ်။ သဒ်ဓါစှမျးအားနဲ့ ညီမျှစွာ ဝီရိယတို့၊ သတိတို့၊ သမာဓိတို့၊ ပညာတို့ ဆိုတာတွေလည်း ထက်မြက်လာတတ်တယ်။
အဲဒီတော့ မြတ်စွာဘုရားဂုဏ်ကို အာရုံပြုခြင်းအားဖြင့် ဆေးကြောလိုက်တဲ့ အသိဉာဏ်နဲ့ ရှုမှတ်လိုက်တဲ့အခါ ဝိပဿနာဉာဏ်က ပိုပြီး စူးစူးရှရှ၊ ထက်ထက်မြက်မြက်၊ အောင်အောင်မြင်မြင် ဖြစ်နိုင်တယ်လို့ဆိုတာကို စာပေကျမ်းဂန်မှာ ပြောထားတယ်။
- ဒေါက်တာအရှင်နန္ဒမာလာဘိဝံသ
No comments:
Post a Comment