ဘယ်သူနိုင်လို့ ဘယ်သူရှုံးမလဲ ❓
လူ့လောကမှာ လူတွေ
အနိုင်အရှုံး သတ်မှတ်တဲ့နေရာ
အယူအဆခြင်း မတူညီကြဘူး။
လောကရှုထောင့်က ကြည့်တဲ့အခါ
အနိုင်လို့ ထင်ရပေမယ့်လို့
ဓမ္မရှုထောင့်က ကြည့်တဲ့အခါ
အရှုံးဖြစ်နေတာတွေ တွေ့တယ်။
ဒါကြောင့်မို့ အနိုင်အရှုံးဆိုတာဟာ
ရှု့ထောင့်အလိုက် ဘယ်သူက နိုင်ပြီး
ဘယ်သူက ရှုံးသလဲဆိုတာ သိကြရတယ်။
တစ်ခါတစ်ရံ လူတွေဟာ
ကိုယ်က နိုင်လိုက်တယ်လို့ ယူဆတယ်။
သို့သော် ကိုယ်က ရှုံးသွားတာကို မသိကြဘူး။
အဲ့ဒီတော့ နိုင်လိုက်တယ် ထင်ပြီး
အရှုံးကြီး ရှုံးသွားကြတဲ့ ပုဂ္ဂိုလ်တွေဟာ
တစ်ဘဝမကဘူး၊ တစ်သံသရာလုံးထိအောင်
ရှုံးသွားကြတယ်။
ဒါကြောင့် လောကအမြင် နဲ့ ဓမ္မအမြင်ဟာ
အင်မတန်မှကွာခြားတယ်။
တစ်ခါတစ်ရံ လုံးဝ ဆန့်ကျင့်ဘက်ဖြစ်တယ်။
မြတ်စွာဘုရားက
အနိုင်ယူနည်း လေးမျိုးကို
ဟောကြားထားတာ ရှိတယ်။
ဘယ်လိုပုဂ္ဂိုလ်မျိုးကို
ဘာနဲ့ အနိုင်ယူရမယ် ဆိုတာကို
မြတ်စွာဘုရား ဟောထားတဲ့ ဒေသနာတော်
အထင်အရှားရှိတယ်။
ဒေါသသမားကို အနိုင်ယူနည်း
~~~~~~~~~~~~~~~~~~~~
မြတ်စွာဘုရားက
"အတ္ထဓောနေ ဇိနေကောဓံ"
ဒေါသခက်ထန်နေတဲ့ ပုဂ္ဂိုလ်တစ်ယောက်ကို
မိမိက ဒေါသ ခက်ထန်ခြင်း မပြု၊
သည်းခံခြင်း၊မေတ္တာ ထားခြင်း၊
အေးငြိမ်းတဲ့ စိတ်ဓါတ်မျိုးဖြင့်သာလျှင်
အနိုင်ယူလို့ ဟောတော်မူတယ်။
ဟော ..
လောကရဲ့ အမြင်နဲ့ အလွန်ဆန့်ကျင်တယ်။
ခက်ထန်တဲ့ ပုဂ္ဂိုလ်တစ်ယောက်ကို
ဒေါသနဲ့ မတုံ့ပြန်ဘဲ
မေတ္တာနဲ့ တုံ့ပြန်ရမယ်လို့ ဆိုတာပါပဲ။
ဒေါသကို မေတ္တာနဲ့ အနိုင်ယူပါ။
ခန္တီ ဆိုတဲ့တရားနဲ့ အနိုင်ယူပါ။
မကောင်းသူကို အနိုင်ယူနည်း
~~~~~~~~~~~~~~~~~~
"အသာဓုံ သာဓုနာ ဇိနေ"တဲ့။
လောကလူတွေဟာ လူတိုင်း
အကောင်းချည်း လုပ်နေတာ မဟုတ်ဘူး။
မကောင်းတာလည်း လုပ်ကြတယ်။
မကောင်းတာတာတွေလုပ်တဲ့ ပုဂ္ဂိုလ်တယောက်ကို
ကိုယ်က ကောင်းတာလုပ်ပြီးတော့ နေရမယ်။
သူမကောင်းတာလုပ်တာမျိုးကို
လိုက်ပြီး မတုရဘူး။
မကောင်းတာကို မကောင်းတာနဲ့ မတုံ့ပြန်ရဘူး။
မကောင်းတာကို ကိုယ်က
ကောင်းတာနဲ့ တုံ့ပြန်ရတယ်။
မြတ်စွာဘုရားက မကောင်းသူကို
မိမိကိုယ်တိုင်က သူ့အပေါ်မှာ ကောင်းခြင်းဖြင့်
ကိုယ်ကအနိုင်ယူပါတဲ့။
မစ္ဆရိယသမားကို အနိုင်ယူနည်း
~~~~~~~~~~~~~~~~~~~~
"ဇိနေ ကဒရိယံ ဒါနနေ"တဲ့။
နှမြောတဲ့ ပုဂ္ဂိုလ်တို့ကို
မိမိက ပေးကမ်းစွန့်ကြဲခြင်းဖြင့်
အနိုင်ယူပါတဲ့။
နှမြောတဲ့ပုဂ္ဂိုလ်နဲ့
စွန့်ကြဲပေးကမ်းတတ်တဲ့ ပုဂ္ဂိုလ်၊
ဘယ်သူက နိုင်လို့ ဘယ်သူက ရှုံးတာလဲ?
အနိုင်အရှုံး တွက်ကြည့်ရမယ်။
ဒါနကောင်းမှု မရှိတဲ့ ပုဂ္ဂိုလ်ဟာ ရှုံးနေတယ်၊
ဒါနရှိတဲ့ ပုဂ္ဂိုလ်ဟာ အနိုင်ရနေတယ်၊
ဒီလို အနိုင်အရှုံးကို တွက်လို့ ရတယ်။
လူလိမ်ကို အနိုင်ယူနည်း
~~~~~~~~~~~~~~~
နောက်တစ်ခုက "သစ္စေနာလိကဝါဒိနံ" တဲ့။
"အလိကဝါဒီ" ဆိုတာ
ဘယ်တော့မှ မှန်မှန်မပြောဘူး။
မဟုတ်တာ မမှန်တာကို
အမြဲပြောနေတဲ့ ပုဂ္ဂိုလ်မျိုးကို
သစ္စေန -မိမိက မှန်တာကိုသာ ပြောခြင်းဖြင့်
အနိုင်ယူပါတဲ့။
မှန်ကန်တဲ့ စကားကို ဆိုတဲ့သူဟာ
တဖြည်းဖြည်း မြင့်တက်လာတယ်။
မှန်ကန်တဲ့ စကားတွေဆိုမှုကို အကြောင်းပြုပြီး
သူရဲ့ သန္တာန်မှာ
ကုသိုလ်တဖြေးဖြေးမြင့်တက်လာတယ်။
ဒာကြောင့် လိမ်တဲ့လူဟာ အရှုံးသမားဖြစ်ပြီး
မှန်ကန်စွာပြောဆိုတဲ့ ပုဂ္ဂိုလ်က အနိုင်ရတယ်။
နိုင်သူနဲ့ ရှုံးသူ
လောကအမြင် နဲ့ နိုင်သူနှင့်ရှုံးသူဟာ
ပုံစံတစ်မျိုးနဲ့ မြင်ရမှာ ဖြစ်သော်လည်း
ဓမ္မအမြင် နဲ့ ကြည့်မှ တကယ့်
နိုင်သူအစစ်နဲ့ ရှုံးသူအစစ်ကို
မြင်ကြရမှာ။
တို့တေတြဟာ
နိုင်သူဘက်က နေမလား၊
ရှုံးသူဘက်က နေမလား။
တို့တတွေဟာ ဘယ်နည်းနဲ့
အနိုင်ယူမလဲဆိုတာကိုလည်းပဲ
ဗုဒ္ဓမြတ်စွာဟောကြားတဲ့ ဒေသနာတော်အရ
မှတ်သားသင့်တယ်။
မှတ်သားပြီးတော့
မိမိတို့ရဲ့ နေ့စဉ်ဘဝမှာ
လက်တွေ့ကျင့်သုံးဖို့လိုအပ်တယ်။
လက်တွေ့ကျင့်သုံးခြင်းဖြင့်
တို့တေတြဟာ
သံသရာမှာ အရှုံးသမားများမဖြစ်ဘဲ
အနိုင်ရသူများဖြစ်အောင်
ကြိုးစားအားထုတ်ရမယ်။
ဒါကြောင့်
ဗုဒ္ဓမြတ်စွာဟောကြားခဲ့တဲ့
ဒေသနာတော်ကို ဦးထိပ်ထားပြီး
သံသရာဘဝမှာ အနိုင်ရတဲ့ ပုဂ္ဂိုလ်တွေသာ
ဖြစ်ကြပါစေကုန်သတည်း။
🙏သာဓု သာဓု သာဓု🙏
ပါမောက္ခချုပ်ဆရာတော်ဘုရားကြီး
ဒေါက်တာနန္ဒမာလာဘိဝံသ
("နိုင်သူနှင့် ရှုံးသူ" တရားတော်မှ
ကောက်နုတ်ဖော်ပြ ဓမ္မဒါနပြုပါသည်။
ထပ်ဆင့်ကုသိုလ်ယူခြင်းဖြင့်
ကပ်ကြီးသုံးပါးဘေးက ကင်းဝေးကြပါစေ။
credit..Dhamma Practitioner
No comments:
Post a Comment