🙏.....(၂)လှမ်း (၃)ဖဝါးဖြင့် ကြွတော်မူခြင်း
🌷🌷🌷🌷🌷🙏🙏🙏🙏🙏🌷🌷🌷🌷🌷
⚙...မြတ်စွာဘုရားဟာ လူ့ပြည်ကနေ နတ်ပြည်
ကို ခြေတော်(၂)လှမ်း(၃)ဖဝါးနဲ့ ဘယ်လိုကြွခဲ့
တာလဲ..အဲ့ဒါလေး..အနည်းငယ်ရှင်းပြပါမယ်။
ဆရာတော်က ဒီနေ့လပြည့်မနက်ခင်းမှာ ရှစ်ပါး
သီလပေးရင်းနဲ့ ဒီအကြောင်းတွေဟောပြခဲ့ပါ
တယ်။
…ဘုရားရှင်က သူ့ရဲ့သာသနာမှာ တန်ခိုးပြခွင့်
မရှိဘူးလို့ ပညတ်တော်မူခဲ့ပါတယ်။ဒါကိုအခွင့်
ကောင်းယူခဲ့တာက တိတ္ထိတွေပဲဖြစ်ပါတယ်။
ဘုရားရှင်ဆိုတာ ပြောပြီးတဲ့စကားကို ဘယ်-
တော့မှ မပြင်တတ်ဘူးလို့ တိတ္ထိတွေသိပါတယ်
ဒါကြောင့် တိတ္ထိတွေဟာ သူတို့မှာ တန်ခိုးမရှိ
ပါဘဲနဲ့ ဘုရားရှင်ကို တန်ခိုးပြိုင်ဖို့ စိန်ခေါ်ခဲ့ကြ
ပါတယ်။ချည်ပြီးတုတ်ပြီး ရိုက်ဖို့ဂွင်ရှာကြတာ
ဖြစ်ပါတယ်။ဒါကိုကြည့်ပြီး ဘာတွေးမိသလဲဆို
တော့ မိစ္ဆာဒိဋ္ဌိတွေဟာ တစ်ဖက်သားရဲ့ အား
နည်းချက်ကို အမြဲတန်းအခွင့်ကောင်းယူလေ့ရှိ
ကြတယ်ဆိုတာ သတိမူသင့်ပါတယ်။
ဘုရားရှင်က သူတို့စိန်ခေါ်မှုကို ”ပြိုင်ကြမယ်”
ဆိုပြီးသတင်းပြန်လိုက်ပါတယ်။တတ္ထိတွေ မျက်
လုံးပြူးသွားတယ်။ရှင်ကြီးဂေါတမ ဘယ်လိုဖြစ်
တာလဲ..ပေါ့။ကောသလမင်းထံသွားပြီး ဗုဒ္ဓဟာ
ရှေ့နောက်စကားမညီကြောင်း သွားတိုင်ပြော
ကြတယ်။ဒီကိစ္စ ကောသလမင်းကြီးက ဗုဒ္ဓကို
မေးမြန်းခဲ့ပါတယ်..ဘုရားရှင်ကဖြေပါတယ်
”ဒါယကာမင်းမြတ်..ဘုရင့်ဥယျာဉ်ထဲက သီးပင်
စားပင်တွေကို ဘယ်သူမှ မဆွတ်ရ မခူးရလို့
အမိန့်ထုတ်ထားတယ် မဟုတ်လား..”
”မှန်ပါ..အမိန့်ထုတ်ထားပါတယ်ဘုရား..”
”ဒါဆို ဘုရင့်ဥယျာဉ်ထဲက သစ်သီးတွေကို
ဒါယကာမင်းကြီးကော ခူးခွင့်မရှိဘူးလား”
”တပည့်တော်ကတော့ ခူးခွင့်ရှိပါတယ်ဘုရား”
”အေး..အဲ့ဒီဥပမာအတိုင်းပဲ ငါဘုရားသာသနာ
မှာ တန်ခိုးပြခွင့်မရှိဘူးဆိုတာ တပည့်သာဝက
တွေအတွက်ပြောတာပါ..ငါဘုရားကတော့
ပြခွင့်ရှိပါတယ်..ဒါကြောင့် တန်ခိုးပြမယ်လို့
ပြန်ကြားခဲ့တာပါ..မင်းကြီး..”
…အကျိုးကြောင်းသင့်တဲ့စကားတော်မို့ ဘယ်သူ
မှ ငြင်းလို့မရပါဘူး။
”ဒါဆို ဘယ်နားမှာ တန်ခိုးပြိုင်မှာလဲ ဘုရား”
”သရက်ပင်ခြေရင်းမှာ တန်ခိုးပြိုင်မှာပါ..”
…နန်းတော်ကနေတဆင့် ဒီသတင်းကို တိတ္ထိ
တွေကြားပါတယ်။အဲ့ဒီသတင်းလည်းကြားရော
တိတ္ထိခေါင်းဆောင်ကြီးတွေက တိတ်တဆိတ်
အမိန့်ထုတ်ပါတယ်။တနယ်လုံးဝန်းကျင်မှာရှိ
တဲ့သရက်ပင်မှန်သမျှ သတ်စေ..တဲ့။သူတို့မှာ
ပြစရာတန်ခိုးမရှိလေတော့ အရှက်ကွဲမခံနိုင်လို့
ဒီလိုကြံတာဖြစ်ပါတယ်။သူတို့.. တကယ်တန်း
မုန်းတာက ဘုရားရှင်ဖြစ်ပါတယ်။ဘုရားရှင်ကို
မယှဉ်နိုင်တော့ အပြစ်မဲ့တဲ့ သရက်ပင်တွေကို
လိုက်ပြီးခုတ်သတ်ခဲ့ပါတယ်။(ဒီနေရာမှာ သိ
ထားရမှာက မိစ္ဆာဒိဋ္ဌိတွေဟာ သူတို့မယှဉ်နိုင်
ဘူးလို့ဆုံးဖြတ်ရင် သက်မဲ့သစ်ပင်ကိုတောင်
သတ်ခဲ့ဖူးတယ်ဆိုတာ သတိမူရမှာဖြစ်တယ်)။
တနယ်လုံးမှာ သရက်ပင် တစ်ပင်မှမကျန်ရ
အောင် သူတို့လိုက်လံရှင်းလင်းခဲ့ပါတယ်။
ဘုရားရှင် တန်ခိုးပြစရာ အပင်မရှိအောင်လုပ်
ကြတာဖြစ်ပါတယ်။ဒီလိုနဲ့ ဝါဆိုလပြည့်နေ့မှာ
(ကဏ္ဍ)အမည်ရှိတဲ့ ဥယျာဉ်စောင့်ကလှူတန်း
တဲ့ သရက်သီးကို ဘုရားရှင်က အချိုပွဲအဖြစ်
ဘုဉ်းပေးခဲ့ပါတယ်။အဲ့ဒီသရက်စေ့ကို မြေမှာ
ချပြီး ဘုရားရှင်က သရက်စေ့ပေါ်ကို ရေနဲ့
လက်ဆေးချလိုက်တာ..ချက်ခြင်းပဲ အတောင်
(၆၀)လောက်မြင့်တဲ့ သရက်ဖြူပင်ကြီး”ဝုန်း”
ခနဲ ပေါ်ပေါက်လာပါတယ်။ဝါဆိုလပြည့်နေ့..
အဲ့ဒီသရက်ပင်ရင်းမှာ တတ္ထိတွေကို နှမ်နင်းဖို့
ရေမီးအစုံ အစုံ တန်းခိုးပြတော်မူခဲ့ပါတယ်။
ပါဠိလိုဆိုရင်တော့(ယမကပါဋိဟာရိယာ)လို့
ခေါ်ပါတယ်။(ယမက)ဆိုတာ အစုံ အစုံလိုက်
ကို ပြောတာပါ။ဆံပင်တစ်ပင်က ရေပန်းဖွား
တွေ ပန်းထွက်နေရင် အခြားဆံပင်တစ်ပင်က
မီးပန်းဖွားတွေ ပန်းထွက်နေတယ်။ဆံပင်တိုင်း
မွှေးညှင်းတိုင်းက အဲ့ဒီလိုအစုံလိုက် ပန်းထွက်
နေတာပါ။ဘယ်ဘက်မျက်လုံးတော်က မီးပန်း
ပွားတွေပန်းထွက်နေရင် ညာဘက်မျက်လုံးက
ရေအလျှံတွေထွက်နေတယ်။ဘယ်ဘက်နား
ရွက်တော်က ရေပန်းပွားတွေထွက်ရင် ညာ
ဘက်နားတော်က မီးအလျှံတွေ ပန်းထွက်နေ
တယ်။အလွန်လျှင်မြန်တဲ့စျာန်အဘိညာဉ်နဲ့
တစ်ခုချင်းစီကို စဉ်ဆက်မပြတ်ဝင်စားပြီးတော့
တန်ခိုးပြတော်မူတာဖြစ်ပါတယ်။စိတ်ကူးနဲ့မှန်း
ပြီးတော့ ကြည်ညိုပူဇော်လို့ရအောင် တင်ပြ
ပေးတာဖြစ်ပါတယ်။ပရိသတ်တွေကလည်း
ကြက်ပျံမကျ ကြိတ်ကြိတ်တိုး ဖူးမျှော်လိုက်ကြ
တာ..ကျနော်တို့လည်း ခပ်ညံ့ညံ့လူသားဘဝနဲ့
ခပ်ဝေးဝေးက ဖူးချင်လည်း ဖူးခဲ့ရမှာပေါ့...။
နေဝင်ဖြိုးဖျ ညနေဆည်းဆာအချိန်မှာ အဲ့ဒီလို
တန်ခိုးပြာဋိဟာပြတော်မူပြီး တာဝတိံသာနတ်
ပြည်ကို ခြေ(၂)လှမ်း(၃)ဖဝါးနဲ့ ကြွတော်မူခဲ့
ပါတယ်။ပထမခြေလှမ်း လှမ်းလိုက်ချိန်မှာပဲ
ယုဂန္ဓိုရ်တောင်ထိပ်ကြီးက ဘုရားရားရှင်ရဲ့
ခြေဖဝါးအောက်ကို ကိုင်းညွတ်ပြီး လာရောက်
ခံယူသွားတယ်။နောက်တစ်လှမ်း လှမ်းလိုက်
တဲ့ အချိန်မှာ မြင့်မိုရ်တောင်ထိပ်ကြီးက ကိုင်း
ညွတ်လာပြီး ဘုရားရှင်ရဲ့ခြေဖဝါးအောက်ကို
လာရောက်ခံယူပါတယ်။သရက်ပင်ထိပ်ဖျားက
နေပြီး လှမ်းလိုက်တဲ့ခြေလှမ်းက(၂)လှမ်းပဲ
ဖြစ်ပါတယ်။ဒါပေမဲ့ ခြေဖဝါးတော်က သရက်
ပင်နားမှာ တစ်ဖဝါး၊..ယုဂန္ဓိုရ်တောင်ထိပ်မှာ
တစ်ဖဝါး၊.မြင့်မိုရ်တောင်ထိပ်မှာ တစ်ဖဝါးဆို
ပြီး သုံးဖဝါးနဲ့အရောက်ကြွသွားတော်မူခဲ့တာ
ဖြစ်ပါတယ်။နတ်ပြည်ရောက်တော့ သိကြား
မင်းကြီး ထိုင်နေကျ ပင်လယ်ကသစ်ပင် ခြေ
ရင်းက ပဏ္ဍုကမ္ဗလာမြကျောက်ဖျာကြီးပေါ်မှာ
ထိုင်တော်မူပါတယ်။မယ်တော်မာယာဒေဝီ-
တဖြစ်လဲ..သန္တုသိတနတ်သားအမှူးပြုတဲ့
စကြာဝဠာတိုက်တစ်သောင်းက နတ်ဗြဟ္မာ
တွေကို အဘိဓမ္မာတရား စတင်ဟောကြား
တော်မူခဲ့ပါတယ်။
🙏..တန်ခိုးပြလို့ပြီးတော့ မြတ်စွာဘုရားက
ဖြတ်ခနဲ ပျောက်သွားတယ်လို့ ဘုရားဖူးတွေ
ကထင်ကြပါတယ်။ဘယ်ရောက်သွားတာပါ
လဲလို့မေးကြတော့..အရှင်မောဂ္ဂလာန်က..
နတ်ပြည်ကြွသွားကြောင်း..ဝါကျွတ်မှသာ
ပြန်ဆင်းလာမယ့်အကြောင်းပြောပြခဲ့ပါတယ်။
ဘုရားဖူးပရိသတ်တွေကလည်း ဒါဆိုရင် သူတို့
လည်း အိမ်မပြန်တော့ဘူး..ဒီမှာပဲဖြစ်သလိုနေ
ကြပြီး ဘုရားရှင်ပြန်ဆင်းလာတာကို စောင့်
ကြမယ်ဆိုပြီး အဲ့ဒီနားမှာပဲ သစ်ခက်တည်းနန်း
ထိုးပြီးနေတဲ့သူ နေကြပါတယ်။နီးစပ်ရာ ရွာ
တွေ အ်ိမ်တွေမှာ နေကြသူတွေလည်းရှိမှာပါ။
အဲ့ဒီပရိသတ်ကို အရှင်မောဂ္ဂလာန်က နေ့စဉ်
တရားဟောပေးတော်မူပါတယ်။ဘုရားရှင်ဟာ
လူသားစင်စစ်ဖြစ်တာမို့ နတ်ပြည်မှာ တရား
ဟောနေပေမဲ့လည်း နေ့စဉ်ဆွမ်းဘုဉ်းပေးလေ့
ရှိပါတယ်။အစာကြေခဲတဲ့ နတ်သုဒ္ဓါတွေနဲ့
သိပ်အဆင်ပြေပုံမရပါဘူး။ဒါကြောင့် မြောက်-
ကျွန်းကို ဆွမ်းခံကြွပြီး ဆွမ်းဘုဉ်းပေးတော်မူ
ပါတယ်။ဆွမ်းခံကြွရင်းနဲ့ အရှင်သာရိပုတ္တဆီ
ဝင်ပြီး အဘိဓမ္မာကို အကျဉ်းနည်းနဲ့ ဟောပြ
တော်မူပါတယ်။ပညာဥာဏ်ကြီးတဲ့ အရှင်သာ
ရိပုတ္တက အကျဉ်းဟောတာကို ကောင်းစွာနား
လည်ပါတယ်။နတ်ပြည်မှာတော့ နတ်တွေကို
အဘိဓမ္မာအကျယ်နည်းဟောပြတော်မူတာဖြစ်
ပါတယ်။အရှင်သာရိပုတ္တကလည်း နေ့စဉ်ပဲ
သူ့တပည့်(၅၀၀)ကို ဘုရားဟောပြတဲ့ အဘိ
ဓမ္မာတရားကို မကျဉ်းမကျယ် အလောတော်
နည်းနဲ့ ပြန်ဟောပြပါတယ်။အခု..လူ့လောက
မှာ ကျွန်တော်တို့သင်ယူခွင့်ရနေတဲ့ အဘိဓမ္မာ
တရားတွေဟာ အရှင်သာရိပုတ္တက သူ့တပည့်
တွေကို ပြန်ဟောပြတဲ့ မကျဉ်းမကျယ်နည်းပဲ
ဖြစ်ပါတယ်။
(အောက်ကစာကို သေသေချာချာဖတ်ပေးပါ)
⚙..သီတင်းကျွတ်လပြည့်နေ့ရောက်လာပါပြီ။
အဘိဓမ္မာတရားတော်ကို ဘုရားရှင်တော်က
နတ်ဗြဟ္မာတွေကို အကျယ်ဟောပြလို့ပြီးခဲ့ပါ
တယ်။အဲ့ဒီနေ့မှာပဲ အရှင်သာရိပုတ္တကိုအကျဉ်း
နည်းပြန်ဟောပြလို့ပြီးပါတယ်။အရှင်သာရိပုတ္တ
ကလည်း လပြည့်နေ့မှာပဲ အဘိဓမ္မာကို မကျဉ်း
မကျယ် အလောတော်နည်းနဲ့ တပည့်ငါးရာကို
ပြန်သင်ပေးလို့ပြီးပါတယ်.အဲ့ဒါကြောင့်.
သီတင်းကျွတ်လပြည့်နေ့ကို..
”အဘိဓမ္မာ အခါတော်နေ့လို့”
ခေါ်တွင်ခဲ့ကြတာဖြစ်ပါတယ်။
..သီတင်းကျွတ်လပြည့်ညချမ်းမှာ.သိကြားမင်း
နေရာ သုဒဿန မြို့တော်ကနေပြီးတော့..
လူ့ပြည် သင်္ကဿနဂိုရ်ပြည် တောင်တံခါးဝ
ကို ဆင်းသက်လာမယ်လို့ အရှင်မောဂ္ဂလာန်
က ပရိသတ်ကြီးကို သတင်းစကားပြောလာ
ပါတယ်။ဘုရားဖူးတွေလည်း သင်္ကဿနဂရ
အထိ သွားကြပြီးတော့ နေရာယူကြပါတယ်။
သားတော်ကြီး သာရိပုတ္တက သင်္ကဿနဂရ
မှာ ဝါကပ်တာမို့ အဲ့ဒီမြို့ကနေ ဆင်းသက်ရ
တာဖြစ်ပါတယ်။သိကြားမင်းဖန်ဆင်းတဲ့
စောင်းတန်းသုံးသွယ်နဲ့ နတ်ဗြဟ္မာတွေခြံရံ
ပြီးတော့..ဒီည ယခုည.သီတင်းကျွတ်လပြည့်
ညမှာ လူ့ပြည်ကို ဆင်းသက်တော်မူခဲ့ပါတယ်။
ဒါကြောင့် ကျွန်တော်တို့က နတ်ပြည်ကဆင်း
လာတဲ့ ဘုရားရှင်ကို အာရုံပြုပြီး ဆီမီးပူဇော်
ခြင်း.မီးပုံးပျံတွေလွှတ်ပြီးပူဇော်ခြင်းတွေ လုပ်
ခဲ့ကြတာဖြစ်ပါတယ်။
သင်္ကဿနဂိုရ်ပြည် တောင်တံခါးဝမှာ ဘုရား
ရှင်ကို လာရောက်ဖူးမျှော်တဲ့ အရှင်သာရိပုတ္တ
နဲ့ တပည့်ငါးရာ...အခြားသောလူနတ်ဗြဟ္မာ
များကို ဘုရားရှင်က တရားဟောတော်မူခဲ့ပါ
တယ်။အရှင်သာရိပုတ္တရဲ့ တပည့်(၅၀၀)က
ရဟန္တာဖြစ်ကြပြီးတော့ ပရိသတ်အပေါင်း
လည်း တရားရခဲ့ကြပါတယ်။လူ့ပြည်ဋ္ဌာနကို
ပြန်ရောက်ရောက်ခြင်း အဲ့ဒီညမှာပဲ ဘုရား
ရှင်ဟာ သံဃာများနဲ့အတူ ပဝါရဏာပြုတော်
မူခဲ့ပါတယ်။
။။သီတင်းကျွတ်လပြည့်ဆိုတာကို ပြည့်ပြည့်
စုံစုံလေး သိစေချင်တဲ့စေတနာနဲ့ ဓမ္မဒါနပြု
ရေးသားပါတယ်။
။။ဤကုသိုလ်ကံကြောင့် မြန်မာပြည်ကြီး
ကပ်ဘေးအပေါင်းမှ အမြန်ဆုံးကျော်လွှား
နိုင်ပါစေ..ခင်ဗျား...။
သူရိန်စိုး(ဓမ္မဒူတ)
သီတင်းကျွတ်လပြည့်နေ့
Credit.. သူရိန်စိုး ( ဓမ္မဒူတ)
No comments:
Post a Comment