တဏှာရဲ့ကျွန်

တဏှာရဲ့ ကျွန်

••••••••••••••••••••••••••

လူတွေက ကိုယ့်ကိုယ်ကို လွတ်လပ်တယ်လို့ ထင်တာ။ ဒါပေမဲ့ မလွတ်လပ်ဘူး၊

ခိုင်းရာနေ စေရာသွားနေကြရတာ။ ဘယ်သူက ခိုင်းတုန်း၊ တဏှာက ခိုင်းနေတာ၊

တဏှာစေရာ သွားနေကြရတာ၊ လိုချင်မှု လောဘ ဆိုတဲ့ တဏှာက ခိုင်းတာကို လုပ်နေကြတာ၊

ဒါကြောင့်မို့ လူတွေက ကိုယ့်ကိုယ်ကို လွတ်လပ်တယ် independent လို့ ပြောနေကြပေမယ့်

တကယ်တော့ မလွတ်လပ်ဘူး၊ တဏှာက အုပ်စိုးနေတာ၊ ဟုတ်ရဲ့လား၊

တဏှာရဲ့ အုပ်ချုပ်မှုကို ခံနေကြရတာဖြစ်တယ်။

လောကမှာ လူတွေက ပြောကြသေးတယ်နော်၊ အဖော်မရှိဘူး၊ တစ်ယောက်တည်း နေတာတဲ့။

တစ်ယောက်တည်းနေတယ် ထင်ပေမယ့် ဘယ်ဟုတ်မတုန်း၊ တကယ်တော့ အဖော်နဲ့နေတာပဲ။

ဘာ အဖော်လဲ၊ တဏှာ အဖော်လေ၊ တဏှာက သူ့အဖော်ပဲ၊ အတွေးလေးနဲ့ကျေနပ်လို့ ဆိုတာ

တဏှာနဲ့နေတာ။ တဏှာအဖော်နဲ့နေတဲ့ ပုဂ္ဂိုလ်တစ်ယောက်ဟာ ဘယ်တော့မှ အဖော်မဲ့ မဟုတ်ဘူး။

အဲဒီရှိနေတဲ့ အဖော်က သူ့ကို အုပ်ချုပ်နေတာ။ တဏှာတစ်ယောက်ဟာ ဘယ်တော့မှ အဖော်မဲ့ မဟုတ်ဘူး။

အဲဒီရှိနေတဲ့ အဖော်က သူ့ကို အုပ်ချုပ်နေတာ။ တဏှာက ခိုင်းတာ၊

မင်း တစ်ယောက်တည်းနေဆိုလို့ သူက တစ်ယောက်တည်း နေရတာပါ။

ဒါကြောင့်မို့ မြတ်စွာဘုရားက တဏှာဒါသော၊ "လောကော - လောကကြီးဟာ၊ တဏှာဒါသော - တဏှာရဲ့ကျေးကျွန် ဖြစ်၍နေပါပေတော့၏" လို့ ဟောခဲ့တာဖြစ်တယ်။ တို့တစ်တွေ တဏှာရှိသေးသမျှ ကျွန်အဖြစ်ကမလွယ်သေးဘူး။ ဘယ်သူ့ရဲ့ကျွန်လဲ၊ တဏှာရဲ့ကျွန်ပေါ့။ ကျွန်မှ တဏှာကို သိမ်ပြီးရိုသေလေးစားရတာ၊

သူခိုင်းရင် မြင်းရဲဘူး၊ မငြင်းနိုင်ဘူး၊ တဏှာရဲ့ ကျေးကျွန် ဖြစ်နေတာကိုး။

ကဲ ကိုယ့်ရဲ့ ဘဝအသွင်ကို ဓမ္မအမြင်နဲ့ကြည့်မယ်ဆိုရင် ဘဝကြီးဟာ ကောင်းတယ် ဆိုးတယ်လို့

ပြောနေကြတာ မဟုတ်ဘူးနော်၊ လောကအမြင်မှာတော့ ဘဝဆိုတာ ပျော်စရာကြီးလို့ ထင်ကြတာ၊

တချို့ကလည်း ဘဝဆိုတာ ငြီးငွေ့စရာကြီးလို့ ပြောတယ်။

အခု ဓမ္မအမြင်နဲ့ ကြည့်လိုက်တော့ -

(၁)    ဘဝဆိုတာ မကောင်းတဲ့ဆီ တွန်းပို့တာ ခံနေရတာ၊ အခြေအနေက တည်ငြိမ်နေတာ မဟုတ်ဘူး။

(၂)    အဲဒီတွန်းပို့ခံနေရတဲ့ မတည်ငြိမ်တဲ့ ဘဝကြီးမှာ အကာအကွယ်မဲ့နေတယ်။

(၃)     ဘဝကြီးမှာ ပိုင်ဆိုင်တယ်ဆိုတာ တစ်ခုမှ မရှိဘူး၊ အားလုံးထားခဲ့ရမှာဖြစ်တယ်။

(၄)    ဘဝကြီးဟာ အမြဲတမ်း လိုပြီးတော့နေတယ်၊ ဘယ်တော့မှ ရောင့်ရဲတင်းတိမ်တယ်ဆိုတာ မရှိဘူး။

(၅)    တို့ဟာ တဏှာရဲ့ ကျွန် ဖြစ်နေကြတယ်။

ဟော ဘဝနဲ့ပတ်သက်ပြီး ဒါတွေကို ဒီလိုမြင်မှ ဓမ္မနဲ့မြင်တယ်လို့ ပြောရမှာနော်။

ယခုလို ဘဝရဲ့အသွင်အပြင်ကို ဓမ္မအမြင်နဲ့ ကြည့်လိုက်တဲ့အခါမှာ....

ဘဝမှာ သာယာစရာတွေ ရှိသလို.. အပြစ်တွေလည်းရှိတယ်။

ဘဝရဲ့ ထွက်ပေါက် exit ဆိုတာလည်းရှိတယ်။ အဲဒီ ထွက်ပေါက်ဆိုတာ ဘဝကို

ဖြစ်ပေါ်စေတဲ့၊ ဘဝကို တွယ်တာတဲ့ တဏှာကို ဖယ်ရှားပစ်တာဖြစ်တယ်။

တဏှာကို ဖယ်ရှားပစ်ဖို့က မဂ္ဂရှစ်ပါး အကျင့်တရားကို ကျင့်ရမှာပဲ ဖြစ်တယ်။

ဒီအကျင့် လမ်းကြောင်းအတိုင်း လျှောက်လမ်းမယ်ဆိုရင်တော့ ဘဝနိရောဓ ဆိုတဲ့

ပန်းတိုင်ကို မျက်မှောက်ပြုနိုင်ကြမှာ ဖြစ်ပါတယ်။

တရားချစ်ခင် သူတော်စင် ပရိသတ်အပေါင်းတို့သည် ဘဝအသွင်ကို ဓမ္မအမြင်ဖြင့်

ကြည့်ပြီးလျှင် "ဘဝနိရောဓ" လို့ဆိုတဲ့ နိဗ္ဗာန်ချမ်းသာကို ကိုယ်စီကိုယ်ငှ မျက်မှောက်ပြုနိုင်ကြပါစေကုန်သတည်း။

(သာဓု... သာဓု... သာဓု ပါ အရှင်ဘုရား......။)

ဆရာတော် ဒေါက်တာနန္ဒာမာလဘိဝံသ ၏

"ဘဝအသွင်ကို ဓမ္မအမြင်ဖြင့် ရှုကြည့်ခြင်း" တရားတော်မှ ကောက်နုတ်ထားပါသည်။

သံသရာဝယ်၊ ဆွေချင်းကျေးဇူး၊ ရှိခဲ့ဘူး ကို၊

အထူးဆပ်ရန်၊ စိတ်အားသန်ဖြင့်၊

ကျင့်ရန်မှန်စွ၊ မြတ်ဓမ္မကို၊ ဝေငှပေ၏၊

ဓမ္မမိတ်ဆွေအပေါင်း ကိုယ်၏ကျန်းမာခြင်း စိတ်၏ချမ်းသာခြင်းများစွာဖြင့် ပြည့်စုံနိုင်ပါစေရှင်..

Credit. ...မိုးတိမ်လွင်ပြင်(Pakokku)

3.10.2013