မြတ်စွာဘုရား လူ့ပြည်ဆင်းတော်မူခန်း

မြတ်စွာဘုရားတာဝတိံသာနတ်ပြည်မှ လူ့ပြည်သို့ဆင်းတော်မူခန်း။

တာဝတိံသာနတ်ပြည်မှ လူ့ပြည်သို့ဆင်းရာ၌ သင်္ကဿမြို့ကို ဘုရားရှင် ဘာကြောင့် ရွေးချယ်ခဲ့သလဲ ?

ရှင်သာရိပုတ္တရာ အဲဒီသင်္ကဿမှာရှိနေလို့ / ရှင်သာရိပုတ္တရာရဲ့ ဉာဏ်ပညာကြီးမားပုံကို နတ်လူအပေါင်းအား သိစေလို ချီးမြှောက်လိုတဲ့အတွက်ကြောင့် ဖြစ်ပါတယ်။

မှန်ပေ၏ ထိုအချိန်တုန်းက ရှင်မဟာမောဂ္ဂလာန်သည် တန်ခိုးအရာမှာ အလွန်ကြီးမား၏ ဆိုတာ လူတိုင်းနီးပါးသိကြ၏ ဘာကြောင့်လဲဆိုတော့ မြတ်စွာဘုရား တာဝတိံသာမှာ ရှိနေတာကို ရှင်မဟာမောဂ္ဂလာန်ကသာ တန်ခိုးဖန်ဆင်းပြလိုက် မြေလျှိုးမိုးပျံပြီး မြတ်စွာဘုရားထံတော်သို့သွားကာ  လျှောက်စရာရှိတာ သွားလျှောက်လိုက်ဆိုတော့ လူသိများလှ၏။ ရှင်သာရိပုတ္တရာကိုကား ဘယ်သူမှ မသိကြသေးပေ။

လူအပေါင်းတို့သည်လည်း မြတ်စွာဘုရား ဝါဆိုလပြည့်နေ့က သာဝတ္ထိမြို့ ကဏ္ဍ၏သရက်ပင်ရင်းမှာ တိတ္ထိတို့အားနှိမ်နင်းကြောင်း တန်ခိုးပြာဋိဟာပြတော်မူပြီး တာဝတိံသာနတ်ပြည်သို့ တက်သွားသည်အချိန်မှ စ၍ မြတ်စွာဘုရားကို ဖူးပြီးမှသာပြန်တော့မယ် ဟု နှလုံးပိုက်ကာ အားလုံးနီးပါး ကဏ္ဍသရက်ပင်နားမှာပဲ တဲထိုးကာ ဝါတွင်းသုံးလပတ်လုံးစောင့်နေကြ၏၊ ထိုသုံးလပတ်လုံးကို အနာထပိဏ်ကပဲ ကျွေးမွေးကုသိုလ်ပြုထား၏ ဟု ဆို၏။

ဝါလကျွတ်လို့ ပဝါရဏာပြုပြီး ရှင်မဟာမောဂ္ဂလာန်က တာဝတိံသာသို့ ကြွသွားကာ မြတ်စွာဘုရားအား လူအပေါင်းတို့ ကဏ္ဍသရက်ပင်ရင်းမှာ ဖူးမျှော်ဖို့စောင့်နေကြကြောင်း  ဘယ်နေရာမှာဆင်းဖို့ ရွေးချယ်ထားကြောင်း လျှောက်ထားရာ မြတ်စွာဘုရားက အောက်ပါစကားကို မိန့်တော်မူတာဖြစ်ပါတယ်။

ကုဟိံ ပန တေ မောဂ္ဂလာန ဧတရဟိ ဇေဋ္ဌဘာတာ

ဓမ်မသနောပတိ?

သင်္ကဿ နဂရေ ဘန္တေ။ (ဝိသုဒ္ဓိမဂ် ၂)

မောဂ္ဂလာန် သင့်ရဲ့ နောင်တော်ကြီးသာရိပုတ္တရာ ဘယ်မှာနေလဲ ဟုမေးရာ သင်္ကဿမှာပါဘုရား ဟုလျှောက်ထား၏။ ထိုအခါ ဘုရားရှင်က ဒီလိုဆို ငါဘုရားကို ဖူးမြင်လိုသူတို့သည် သင်္ကဿကို လာရောက်ဖူးမျှော်ကြစေ ဟု မိန့်တော်မူလိုက်၏။

မောဂ္ဂလာန မံ ဒဋ္ဌုကာမာ သွေ သင်္ကဿနဂရေ အာဂစ္ဆန္တု အဟံ သွေ မဟာပဝါရဏပုဏ္ဏမာသီဥပေါသထဒိဝသေ သင်္ကဿနဂရေ သြတရိဿာမိ။

ရှင်မဟာမောဂ္ဂလာန်သည် ထိုအကြာင်းကို လူအပေါင်းအား သိစေပြီးနောက် သာဝတ္ထိမှ သင်္ကဿသို့ ယူဇနာသုံးရာဝေးသော ထိုခရီးကို လူအပေါင်းအား တမုဟုတ်ချင်းဖြင့် ရောက်အောင် တန်ခိုးဖြင့် ပိုဆောင်တော်မူ၏။

သီတင်းကျွတ်လပြည့်နေ၌့မြတ်စွာဘုရားသည် သိကြားမင်းအား လူ့ပြည်ပြန်ကြွရောက်မည့်အကြောင်း ပြောကြားရာ ဝိသကြုံနတ်သားကို ရွှေ ငွေ ပတ္တမြားစောင်းတန်းသုံးခုကို မြင့်မိုရ်တောင်ထိပ်မှနေ၍ သင်္ကဿမြို့တံခါးဝအထိ ဖန်ဆင်းစေပြီး မြတ်စွာဘုရားသည် အလယ်ပတ္တမြားစောင်းတန်းက ကြွရောက်ဆင်းသက်တော်မူ၏။ နတ်ဗြဟ္မာများက ဘေးစောင်းတန်းနှစ်ခုတွင်  အသီးသီး ပူဇော်လျက် လိုက်ပါလာကြ၏။

ထိုသို့ဆင်းလာချိန်တွင် မြတ်စွာဘုရားသည် လောကဝိဝရဏမည်သော တန်ခိုးကိုပြုတော်မူ၏၊ ထိုတန်ခိုးကား  သတ္တလောက သြကာသလောက အားလုံးကို ဖွင့်ပြသောတန်ခိုးတည်း၊ ငရဲပြည်မှ အထက် အကနိဋ္ဌဘုံတိုင်အောင်း ဟင်းလင်းပြင်ကဲသို့ဖြစ်နေ၏။ လူတို့သည်လည်းနတ်တို့ကိုမြင်နိုင်သလို နတ်တို့သည်လည်း လူတို့ကို မြင်ရပေ၏။ ထိုအံ့သြဖွယ်တန်းခိုးကို လူတိုင်းမြင်နိုင်ကြ၏။

မြတ်စွာဘုရား သင်္ကဿမြို့ စောင်းတန်းဦးရောက်သောအခါ ရှင်သာရိပုတ္တရာသည် ပဌမဦးဆုံး ခြေတော်အစုံကို ရှိခိုးဦးတိုက်ခွင့်ရ၏။

အောက်ပါဂါထာဖြင့်လည်း ပူဇော်လေ၏။

န မေ ဒိဋ္ဌော ဣတော ပုဗ္ဗေ။

န သုတော ဥဒ ကဿစိ။

ဧဝံ ဝဂ္ဂုဝဒေါ သတ္ထာ။

တုသိတာဂဏိမာဂတော။

ဘုန်းတော်ကြီးမြတ်တော်မူသော မြတ်စွာဘုရား ဤနေ့လို ထူးခြားဆန်းကြယ်သော ဖြစ်ရပ်မျိုးကာ 

ရှေးက မမြင်ဘူးသလို ကြားလည်း မကြားခဲ့ဘူးပါဘုရား။ ကရဝိတ်ငှက်မင်း၏အသံ ဗြဟ္မာမင်း၏ အသံတော်နှင့်တူစွာ အင်္ဂါရှစ်ပါးနှင့် ပြည့်စုံတော်မူသော မြတ်စွာဘုရားရှင်ကိုယ်တော်မြတ်ကြီးသည် ထူးခြားသော တန်ခိုးပြာဋိဟာအဖုံဖုံတို့ဖြင့် သင်္ကဿမြို့တံခါးအနီး မြေပြင်သို့ ကြွဆင်းတော်မူခဲ့ပါပြီ။ ရှင်တော်မြတ်ဘုရားကို ဖူးမြင်ရ၍ လူနတ်အားလုံးတို့က ချစ်မြတ်နိုးစွာ ဘုရားအဖြစ်ကို တောင့်တ ကြပါကုန်၏ ဟု လျောက်ထားလေ၏။

ဤသို ရှင်သာရိပုတ္တရာက ရှေးဦးစွာဦးခိုက်ပြီး နောက်မှ ကျန်သောသူများ ရှိခိုးဦးတိုက်ခွင့်ရကြ၏။ 

သတ္ထာရံ ဓုရသောပါနေ ပတိဋ္ဌိတံ ပဌမမေဝ သာရိပုတ္တတ္ထေရော ဝန္ဒိ၊ ပစ္ဆာ သေသပရိသာ၊

{ဇာတ်အဋ္ဌကထာ.၄}

ထိုအချိန်တွင် ပရိသတ်အင်အားသည်ကား (၁၂) ယူဇနာအတိုင်းရှိ၏။ ထိုပရိသတ်တို့အလယ်၌ မြတ်စွာဘုရားသည် ရှင်သာရိပုတ္တရာ၏ ဉာဏ်ပညာကြီးကျယ်မှူကို ထင်ရှားပြလိုသည်ဖြစ်၍ ရှေးဦးစွာ ပုထုဇဉ်တို့သိနိင်သော ပုစ္ဆာကိုမေးတော်မူ၏၊ ထိုပုစ္ဆာကို ပုထုဇဉ်တို့သာဖြေကြကုန်၏။ ထိုနောက် သောတာပန်အရာနှင့်စပ်သောပုစ္ဆာကို မေးတော်မူ၏၊ ထိုပုစ္ဆာကို သောတာပန်တို့သာဖြေကုန်၏။ ပုထုဇဉ်တို့ ဘာမှမသိကုန်။

ထို့နောက် သကဒါဂါမ် အနာဂါမ် ရဟန္တာ မဟာသာဝကအရာတို့၌ အသီးသီးမေးတော်မူ၏ ထိုပုစ္ဆာတို့ကိုလည်း အထက်အထက်ပုဂ္ဂိုလ်တို့သာဖြေနိုင်ကြ၍ အောက်အောက်ပုဂ္ဂိုလ်တို့ ဘာမှ မသိကြကုန်။ ဆက်လက်၍ အဂ္ဂသာဝကအရာနှင့်စပ်သော ပုစ္ဆာကိုမေးတော်မူရာ၌ အဂ္ဂသာဝကတို့သာဖြေနိုင်ကုန်၏ အခြားသူတို့ ဘာမှမသိကြကုန်။

ထိုနောက် ရှင်သာရိပုတ္တရာအရာနှင့်စပ်သော ပုစ္ဆာကိုမေးတော်မူရာ ရှင်သာရိပုတ္တရာသည်သာလျင်ဖြေဆိုတော်မူနိုင်၏။ အခြားသောသူတွေ ဘယ်သူမှ မသိကုန်။ ထို့နောက် ဘုရားအရာ၌ ပြဿနာကို အကျဉ်းအားဖြင့် မေးတော်မူပြန်၏။ ရှင်သာရိပုတ္တရာသည် ပြဿနာရဲ့သဘောကိုသိသော်လည်း ဘုရားရှင်ရဲ့အလိုကျ မဖြစ်မှာကို စိုးရိမ်နေ၏၊ ထိုအကြောင်းသိတော်မူ၍ ဘုရားရှင်က နည်းလမ်းပေးတော်မူ၏။ ထိုသို့နည်းလမ်းရသောအခါ မထေရ်မြတ်သာ အကျဉ်းအားဖြင့်မေးသောပြဿနာကို အကျယ်တဝင့်ဖြေဆိုတော်မူ၏

ထိုအခါ နတ်လူတွေက မြတ်စွာဘုရားနှင့် ပြောတာ ဘယ်မထေရ်လဲ ဘယ်မထေရ်လဲ ဟု မေးမြန်းကြရာ ဓမ္မသေနာပတိ သာရိပုတ္တရာမရေ် တဲ့ ဟု သိကြသောအခါ "" အဟော မဟာပညော "" အံ့သြဖွယ်ကောင်းလောက်အောင် ဉာဏ်ပညာကြီးကျယ်လှပေတကား ဟု ချီးမွမ်းထောမနာပြုကြ၏။ ထိုအချိန်စ၍ ရှင်သာရိပုတ္တရာသည် နတ်လူတို့အကြားမှာ ဥာဏ်ပညာကြီးကျယ်သူအဖြစ် ထင်ရှားလာ၏။ မြတ်စွာဘုရားသည် ယူဇနာ ၁၂၀ ပမာဏရှိသောပရိသတ်ကြီးအားတရားဟောတော်မူပြီးအဆုံးမှာ အာလုံး ကုဋေပေါင်းသုံးဆယ် တရားထူးရကြ၏။

တိံသ ပါဏကောဋိယော အမတပါနံ ပိဝိံသု။

မြတ်စွာဘုရားသည် ဤသို့ ဓမ္မသေနာပတိ တရားစစ်သူကြီး ရှင်သာရိပုတ္တရာ၏ ပညာဉာဏ်ကြီးကျယ်ခြင်းဂုဏ်ကို ချီးမြှောက်ဖော်ထုတ်လိုသောကြောင့် တာဝတိံသာနတ်ပြည်မှ လူပြည်သို့ပြန်ကြွတော်မူလာသည့်အခါ သင်္ကဿမြို့ကို ရွေးချယ် ကြွတော်မူလာခြင်းဖြစ်ပါကြောင်း ဗဟုသုတအလို့ငှါ တင်ပြလိုက်ရပေတော့သည်။

ဒါကြောင့် တရားချစ်ခင်သူတော်စင်တို့တစ်တွေလည်း ခုလိုသီတင်းကျွတ်လပြည့်နေ့မှာ စောင်းတန်းသုံးသွယ်ဖြင့် ကြွတော်မူလာသော မြတ်စွာဘုရားအား အာရုံပြုကာ ဆီးမီးများဖြင့် ပူဇော်၍ ရှင်သာရိပုတ္တရာကဲ့သို့ ဉာဏ်ပညာကြီးကျယ်သောသူများ ဖြစ်ကြပြီး အမြိုက်ရေကို သောက်သုံးနိုင်ကြပါစေ ဟု ဆုတောင်းပေးလိုက်ပါတယ်။

မဇ္စျိမစာသင်သား { နေမိန္ဒ }

22.10.2018.

Credit photo Than Zaw 

Original post