***သပ်ပုရိသဒါန(၅)ပါး***
🌸🌸🌸🌷🌷🌷🌸🌸🌸
(၁) သဒ်ဓါဒါန။ ။
(ကံနှင့် ကံ၏အကျိုးတရားတို့၌ သက်ဝင်ယုံကြည်မှု သဒ္ဓါတရား ထက်ထက်မြက်မြက် ထား၍ လှူဒါန်းခြင်း။)
(၂) သက်ကစ်စ ဒါန။ ။
(လှူဖွယ်ဝတ္ထုကို သပ်သပ်ရပ်ရပ် ပြု၍လည်းကောင်း၊ အလှူခံပုဂ္ဂိုလ်ကို အရိုအသေပြု၍ လည်းကောင်း လှူဒါန်းခြင်း။)
(၃) ကာလ ဒါန။ ။
(သူ့အခါနှင့်သူ သိ၍ လှူဒါန်းခြင်း။ ဥပမာ- ရဟန်း သံဃာအား နံနက်အခါဖြစ်လျှင် ဆွမ်း ခဲဖွယ် ဘောဇဉ်ကို လှူဒါန်းခြင်း၊ မွန်းလွဲအခါဖြစ်လျှင် အဖျော်ယာမကာ စတုမဓု စသည်ကို လှူဒါန်းခြင်းမျိုး ဖြစ်သည်။)
(၄) အနဂ္ဂဟိတဒါန။ ။
(လှူဖွယ်ဝတ္ထု၌ ငြိတွယ်သောစိတ် လုံးဝမရှိဘဲ မုတ္တစာဂ လွတ်လွတ် စွန့်ကြဲသော စေတနာ ရှေ့သွားပြု၍ လှူဒါန်းခြင်း။)
(၅) အနုပဟစ်စဒါန။ ။
(မိမိ-သူတစ်ပါး နှစ်ဦးသားတို့ကို မထိပါးမူ၍ လှူဒါန်းခြင်း။)
လောက၌ စီးပွားရေး၊ လူမှုရေး၊ ပညာရေး စသည် ပြိုင်ဘက် ရှိတတ်သည်။ ထို လောကီစီးပွားရေး၊ လူမှုရေး၊ ပညာရေး စသည်တို့၌ အပြိုင်အဆိုင်စိတ် ထားမှလည်း တိုးတက်ကြီးပွားနိုင်သည်။
ဒါနကောင်းမှု ကုသိုလ်ပြုရာ၌ကား ထို လောကီ အပြိုင်စိတ်ကို ဖယ်ရှားထားရမည်။
အကယ်၍ ဒါနကောင်းမှု မိမိကပြုသောအခါ ``ငါနှင့် စီးပွားပြိုင်ဘက် ငဖြူ ငါလိုလှူနိုင်သေးရဲ့လား´´ ဤသို့ စသည်ဖြင့် အောက်မေ့ နှလုံးသွင်း၍ လှူဒါန်းလျှင် မိမိကိုယ်ကိုကား မြှောက်ပင့်ခြင်း အတ္တုက္ကံသနလောဘ ဖြင့် ထိပါး၍ လှူသည်မည်၏။
ဤကဲ့သို့ မအောက်မေ့ဘဲ ``ငါသည် ဥစ္စာစီးပွား၏ အနှစ်သာရ ဒါနကောင်းမှုကို ပြုရပေပြီ´´ ဤသို့ စသည်ဖြင့် အောက်မေ့၍ လှူလျှင် မထိမပါး လှူသည် မည်၏။
ထိုကဲ့သို့သော အလှူမျိုးကို လှူရမည်ဟု ဆိုလို၏။ ထိုသပ္ပုရိသဒါန (၅)ပါး၏ အချုပ် လင်္ကာကား-
၁။ သဒ္ဓါကြည်ညို၊
၂။ ရိုသေလှစွာ၊
၃။ အခါကိုသိ၊
၄။ မစွန်းငြိဘဲ၊
၅။ မထိမပါး၊ လှူတုံငြား၊ ငါးပါးသပ္ပုရိသ မြတ်ဒါန။
ထိုသပ္ပုရိသ ဒါနအရာ၌ လှူဒါန်းခြင်းကြောင့် စီးပွား ဥစ္စာ ပေါများသော မင်း၊ ပုဏ္ဏား၊ သဌေး သူကြွယ် ဖြစ်ရ၏။
၁။ သဒ္ဓါကြောင့် ရုပ်ရည်အဆင်း တင့်တယ်လှပ၏။
၂။ သက္ကစ္စကြောင့် ထိုသူ့စကားကို အများက နာယူကြ၏။
၃။ အခါကို သိခြင်းကြောင့် လိုအပ်သော အချိန်၌ လိုအပ်သော ကောင်းကျိုးတို့ ဝှန်းဝှန်းဖြိုးဖြိုး အကျိုးပေး၏။
၄။ မစွန်းငြိခြင်းကြောင့် အကောင်းကို သုံးဆောင်ရ၏။
၅။ မထိပါးခြင်းကြောင့် ထိုသူ၏ စည်းစိမ်များကို ရန်သူမျိုး ၅-ပါးတို့ အန္တရာယ် မပြုနိုင်ခြင်း အကျိုးများကို ထူး၍ ရရှိ၏။
ထို၏ဆိုင်ရာ လင်္ကာအချုပ်ကား-
၁။ သဒ္ဓါကြည်ရွှင်၊
လှူဒါန်းလျှင်၊ ရုပ်သွင် အဆင်းလှ။
၂။ ရိုသေလှူငြား၊
သူ့စကား၊ အများ နာယူကြ။
၃။ အခါသိသဖြင့်၊
လှူတုံလင့်၊ ချိန်သင့် ကောင်းကျိုးရ။
၄။ မစွန်းငြိတောင်း၊
လှူတုံရှောင်း၊ အကောင်းသုံးဆောင်ရ။
၅။ မထိမပါး၊ လှူတုံငြားမူ၊
ထိုသည့်သူ၏၊ ပြောထူများပြား
စည်းစိမ်အား၊ ငါးပါး ရန်မခ။ ။
သပ္ပုရိသ၊ ဒါနကျိုးဆက်
ဤငါးချက်၊ နှုတ်တက် ဆောင်ကုန်ကြ။ ။
သပ္ပုရိသဒါနသုတ်နှင့်အညီ ဖွဲ့စီထားသည်။
ဦးဝိစိတ်တသာရဘိဝံသ
(၂-၇-၄၂)
(မင်းကွန်းဆရာတော်ဘုရားကြီးရေးသော စာတမ်းတိုကို ပြန်လည်ကူးယူ ပူဇော်ပါသည်။)
(မေတ္တာနှလုံး အစဉ်သုံး ရွှင်ပြုံးကြပါစေ)
Credit...
No comments:
Post a Comment