"ဥပုသ်သီလ၏ တန်ဖိုး"
<><><><><><><><><>
ဝိသာခုပေါသထ သုတ်မှာ
မြတ်စွာဘုရားက ဟောတယ် …
ဥပုသ်သီလ ခံယူဆောက်တည်ပြီး
ကိုယ့်ကိုကိုယ် ဆင်ခြင် သုံးသပ်ကြည့်တဲ့ …
" ငါဟာ ဒီကနေ့ ရဟန္တာ ပုဂ္ဂိုလ်တွေ
ကျင့်တဲ့ အကျင့်ကို ကျင့်ရပေပြီလို့ စိတ်ထဲမှာ
ဝမ်းမြောက် ကြည်နူးအောင် နှလုံးသွင်းပါ " တဲ့ …
ရဟန္တာတွေ
ကျင့်ရတဲ့အကျင့်ကို တို့ကျင့်ရတယ် …
ဒါကြောင့် …
တို့ရဲ့ ကျင့်စဉ်ဟာ
သီလ အနေအထား အားဖြင့်
ရဟန္တာတွေနဲ့တန်းတူ အဆင့်ရောက်သွားတဲ့
အနေအထား မျိုးဆိုတော့
အလွန်ကျေနပ်အာရစရာ ဖြစ်တယ် …
ပီတိသောမနဿတွေ
ဖြစ်လာနိုင်တယ် …
အဲဒီလို
ပီတိသောမနဿတွေ ဖြစ်လာခြင်းဟာ
ကိုယ်၏ချမ်းသာခြင်း၊ စိတ်၏ချမ်းသာခြင်းကို
ဖြစ်ပေါ်စေပြီး နောက်ဆုံးမှာ
စိတ်တည်ငြိမ်မှုကို ဖြစ်ပေါ်စေတယ် …
စိတ်တည်ငြိမ်မှု ရပြီဆိုတော့မှ
ယထာဘူတဉာဏဒဿန အမှန်အကန်တွေကို
သိနိုင်တဲ့ အကျိုးကျေးဇူးတွေကို
ဖြစ်ပေါ်စေမှာ ဖြစ်တယ် …
ဒါကြောင့် …
#ဥပုသ်သီလဟာအလွန်တန်ဖိုးရှိတယ် …
မြတ်စွာဘုရား
မိန့်ကြားတဲ့စကားနဲ့ပြောရမယ်ဆိုရင်
ဥပုသ်သီလဖြစ်တဲ့ ရှစ်ပါးသီလရဲ့
တန်ဖိုးဟာ အင်မတန်မှ ကြီးမားတယ် …
ဘယ်လောက်ထိ
ကြီးမားသလဲ ဆိုရင် …
ကမ္ဘာ လောကမှာရှိတဲ့
စိန်ရွှေ ရတနာတွေရဲ့ တန်ဖိုးဟာ
ဥပုသ်သီလစောင့်ထိန်းတဲ့
ကုသိုလ်ကို ၁၆_ စိတ် စိတ်ပြီးတော့
တစ်စိတ်ရဲ့တန်ဖိုးလောက်တောင် မရှိပါဘူးလို့
မြတ်စွာဘုရားက ရှင်းပြတယ် …
ဘာကြောင့်
ဒီလောက်တန်တယ်လို့
ပြောရတာတုန်းဆိုရင် …
အဲဒီ စိန်ရွှေရတနာတွေကို အသုံးပြုပြီး
နိဗ္ဗာန်ဆိုတာ မရောက်နိုင်ဘူး …
ဥပုသ်သီလစောင့်သုံးခြင်းဖြင့်သာ
နိဗ္ဗာန်ချမ်းသာထိအောင် ရောက်နိုင်တယ် …
ဒါကြောင့်
တန်ဖိုးချင်းကွာခြားတယ်လို့ ဆိုလိုတာ …
ငွေကြေးဓန တန်ဖိုးဆိုတာ
ကိုယ်ပေးလိုက်တဲ့ ငွေကြေးကြောင့်
ရလာတဲ့ ပစ္စည်းဥစ္စာရဲ့ တန်ကြေးလို့
ဒီလို ဆုံးဖြတ်ကြတာ …
အဲဒီတော့ …
ဥပုသ်သီလကို
ငွေကြေးဓနလို သဘောထားအသုံးချပြီး
နတ်ချမ်းသာဆိုတာ ရနိုင်တယ် …
အဲဒီထက်အဆင့်မြင့်တဲ့ နိဗ္ဗာန်
ချမ်းသာကိုလည်း ရနိုင်တယ် …
ဒါကြောင့်
ဥပုသ်သီလရဲ့တန်ကြေးဟာ
အလွန်ကြီးမားတယ်လို့ ပြောတာ …
စိန်ရွှေ ရတနာတွေနဲ့ နိဗ္ဗာန်ချမ်းသာကို
ဝယ်လို့မရဘူး …
နတ်ချမ်းသာကို ဝယ်လို့မရဘူး
ဒီလိုဆိုလိုတာ …
ပါချုပ်ဆရာတော်ဘုရား..
Credit..
No comments:
Post a Comment