အရှင်ဘုရား !
ကုသိုလ်လုပ်ပြီးရင် ဆုတောင်းဖို့ လိုပါသလားဘုရား
တစ်ချို့က မလိုဘူး ပြောနလို့ပါဘုရား။
~~~~~~~~~~~~~~~~~~~~~~~~~~~~
အကုသိုလ်တွေလုပ်ပြီးရင် ငရဲကျပါစေလို့ ဘယ်သူမှ ဆုမတောင်းကြဘူးမလား၊
ဆုမတောင်းပေမယ့်လည်း အကုသိုလ်က အကျိုးပေးခွင့်ရရင် အပါယ်ကို ရောက်စေနိုင်တာပါပဲ။
ဒီလိုပဲ ကုသိုလ်ဆိုတာလည်း ဆုမတောင်းပေမယ့်လည်း အကျိုးပေးခွင့်ရရင် ကောင်းရာသုဂတိကို ရောက်စေနိုင်တာပါပဲ။
ဒါပေမယ့် ဥပရိပဏ္ဏာသအဋ္ဌကထာ၊ ၁၀၄ မှာ ကုသိုလ်လုပ်ပြီးရင် ဆုတောင်းဖို့ တိုက်တွန်းထားတာတွေ့ရတယ်။
ဆုမတောင်းလည်း ကုသိုလ်က အကျိုးပေးနိုင်တယ်ဆိုပေမယ့် ဦးတည်ရာမရှိ အကျိုးပေးချင်တာ ပေးနေတတ်တယ်တဲ့။
အပေါ်ကို ဒုတ်ချောင်းတစ်ချောင်း ပစ်တင်လိုက်လို့ ပြန်ကျလာတဲ့အခါ အဖျားနဲ့ ကျချင်ကျမယ်၊ အရင်းနဲ့ ကျချင်ကျမယ်၊ အလယ်ပိုင်းနဲ့ ကျချင်ကျမယ်၊ သတ်သတ်မှတ်မှတ် မရှိသလိုပေါ့တဲ့။
ဆုမတောင်းဘူးဆိုရင် ကိုယ့်ရဲ့ ကိုလ်သိုလ်က အကျိုးပေးတဲ့အခါ သတ်သတ်မှတ်မှတ် မရှိတဲ့အတွက် ကိုယ့်ရဲ့ ရည်ရွယ်ချက်ကို ဖော်ထုတ်တဲ့အနေနဲ့ ဆုတောင်းသင့်ပါတယ်တဲ့။
သတိပြုစရာကတော့ ဗုဒ္ဓဘာသာမှာ ဆုတောင်းခြင်းပြုတာနဲ့ အခြားဘာသာမှာ ဆုတောင်းခြင်းကို ပြုတာက မတူပါဘူး။
အခြားဘာသာမှာ ဆုတောင်းခြင်းက ဘုရားသခင်က တန်ခိုးတော်နဲ့ ကူညီပေးဖို့ ဆုတောင်းတာမျိုးပါ။
ဗုဒ္ဓဘာသာမှာ ဆုတောင်းတာက ဘုရားက တန်ခိုးနဲ့ ကူညီဖို့ မဟုတ်ပါဘူး၊
မိမိလုပ်ထားတဲ့ ကုသိုလ်ရဲ့ အကျိုးကိုပဲ တောင်းတတာမျိုးပါ။
Credit..ဓမ္မဝိနယ pg
No comments:
Post a Comment