═══════════════════════
မေး။ ။ ဥပုသ်သီလဆောက်တည်ရာတွင်
ဘုန်းတော်ကြီးပေးသော ဥပုသ်သီလကိုစောင့်ထိန်းမှသာလျှင် ဥပုသ်စောင့်ခြင်းမည်ပါသလော။
မိမိဘာသာ ဘုရားစင်ရှေ့တွင် ခံယူဆောက်တည်ကောင်းပါသလော။ ဥပုသ်သီလကိုလပြည့်လကွယ်နှင့် လဆန်း(၈)ရက်၊ လပြည့်
ကျော် (၈)ရက်နေ့တို့၌ မဟုတ်ဘဲ စောင့်ထိန်းလိုသည့်နေ့တွင် စောင့်ထိန်းသင့်ပါသလော။ရှင်းလင်းဖြေကြားပေးတော်မူပါဘုရား။
ခင်စပယ်၊ ပြည်။
ဖြေ ။ ။ ဤမေးခွန်းသည် အလွန်တန်ဖိုးရှိ
သော မေးခွန်းဖြစ်ပါသည်။ ဥပုသ်စောင့်သုံး
ရာ၌ သံဃာတော်များထံ သီလယူခြင်းသည်
လေးစားမှုနှင့် လေးနက်မှုသဘောသက်
ရောက်စေရန်ဖြစ်ပါသည်။ အမှန်စင်စစ်
သီလစောင့်ထိန်းခြင်းမှာ မိမိကိုယ်တိုင်၏
အလုပ်သာဖြစ်ပါသည်။ ဆိုင်ရာသိက္ခာပုဒ်များကို မကျိုးမပေါက် မကျား မပြောက်ရအောင် ထိန်းသိမ်းခြင်းသာ လိုရင်းဖြစ်ပါသည်။ထို့ကြောင့် ဘုရားရှေ့မှာလည်း ခံယူဆောက်တည်ကောင်းပါသည်။
ထို့ပြင် သီလသဘောမှာ ဆောက်တည်ခံယူ
ထားခြင်းမရှိသော်လည်း အကုသိုလ်ဒုစရိုက်
မှုများ ကျူးလွန်ဖို့ရာတွေ့ကြုံလာလျှင်ရှောင်
ကြဉ်ပါက သမ္ပတ္တဝိရတီသီလမျိုးပင် ဖြစ်နေပါသည်။ သီလသည် စောင့်ထိန်းဖို့ ရှောင်ကြဉ်ဖို့သာ လိုရင်းဖြစ်ပါသည်။
မကြာခင်က ရွာတစ်ရွာတွင် ဥပုသ်နေ့၌သီလ
ပေးသော ဘုန်းကြီးကိုသီလမရှိဟုယူဆ၍
အခြားဘုန်းကြီးတစ်ပါးကိုပင့်၍ သီးသန့်သီလယူကြသော ဟူ၏။ ထိုပုဂ္ဂိုလ်များမှာ မကြာခဏအရက်မူးနေကြသော ပုဂ္ဂိုလ်များဖြစ်ကြသော ဟူ၏။ မသင့်ပါ။ သီလသည် ထိန်းသိမ်းရှောင်ကြဉ်မှ ရပါသည်။
ဥပုသ်သီလသည် မည်သည့်ရက်မဆိုဆောက်တည်အပ်သော သီလဖြစ်ကြောင်း ဒီ၊ ဋီ၊ ၂။၁၉၃ မ-ဋီ၊ ၃၊ ၃၅၅ တို့၌ ဆိုထားပါသည်။
လူအများယခုလက်ရှိစောင့်ထိန်းနေကြသော
လပြည့် လကွယ်၊ လဆန်း၊ လဆုတ် ၈ ရက်
နေ့များကို ပကတိ စာရိတ္တဥပုသ်နေ့ဟုခေါ်
သည်။ ၄င်း ၄ ရက်၏ ရှေ့နောက် လဆန်း၊
လဆုတ် (၇) ရက်၊ (၉) ရက်နေ့နှင့် လပြည့်
လကွယ်တို့၏ ရှေ့နောက် ၁၃ ရက် သို့မဟုတ်
၁၄ ရက်၊ လပြည့်ကျော် ၁ ရက်နေ့တို့ကိုအပို
အကြိုဥပုသ်နေ့အဖြစ်သတ်မှတ်၍လည်း
ဆောက်တည်ကြပါသည်။
ထို့ပြင် ကျမ်းဂန်များ၌ နယုန်လပြည့်ကျော်တစ်ရက်မှ ဝါဆိုလပြည့်အထိ (၁) လကိုလည်းကောင်း၊ သီတင်းကျွတ်လပြည့်ကျော်(၁)ရက်နေ့မှ တန်ဆောင်မုန်းလပြည့်နေ့အထိ(၁)လကိုလည်းကောင်း၊ဝါတွင်း(၃)လကိုလည်းကောင်း၊ တပို့တွဲလပြည့်ကျော်တစ်ရက်မှ တပေါင်းလပြည့်နေ့အထိ (၁)လကိုလည်း ကောင်း ပါဋိဟာရိယဥပုသ်နေ့များအဖြစ် သတ်မှတ်၍လည်းဆောက်တည်ကြပါသည်။မိမိတို့နှစ်သက်သလိုဆောက်တည်နိုင်ပါသည်။
ယခုအခါ လပြည့်လကွယ်နှင့်လဆန်း(၈)
ရက်လဆုတ်(၈)ရက်ပေါင်း (၄)ရက်၌ အများစု ဆောက်တည်နေကြသည်။ (၈)ရက်ဥပုသ်နေ့များတွင် နတ်မင်းကြီး(၄)ပါးတို့၏ အစေ
အပါးနတ်တို့သည် လည်းကောင်း၊ (၁၄)ရက်ဥပုသ်နေ့များတွင် နတ်မင်းကြီး(၄)ပါး၏ သားတော်များသည်လည်းကောင်း၊ (၁၅)ရက်ဥပုသ်နေ့များတွင် နတ်မင်းကြီး(၄)ပါးတို့ကိုယ်တိုင်သည်လည်းကောင်း လူ့ပြည်သို့လှည့်လည်၍ ဥပုသ်သီတင်းသီလ ဆောက်တည်သူ မိဘဆရာသမားတို့အား
လုပ်ကျွေးသူ၊ ကောင်းမှုအမျိုးမျိုးပြုလုပ်သူတို့ကို ရွှေပေလွှာဖြင့် စာရင်းကောက်ယူ
မှတ်သား၍ နတ်သဘင်အစည်းအဝေး၌
တင်ပြရန် သိကြားမင်းကြီးက အမိန့်
တော်ချမှတ်တာ၀န်ပေးထားကြောင်း အံ၊ ၁၊
၁၄၁၊ စတုမဟာရာဇသုတ်၌ လာရှိပါသည်။
ထို့ကြောင့် နတ်မင်းတို့၏ ရွှေပေလွှာ၌ သူ
တော်ကောင်းစာရင်း ပါ၀င်နိုင်စေရန်ဖော်ပြပါ (၄)ရပ်တို့၌ အများအားဖြင့် ဥပုသ်စောင့်ခြင်း ကုသိုလ်ကောင်းမှုအမျိုးမျိုးပြုလုပ်ခြင်းတို့ကို ဗုဒ္ဓဘာသာ၀င်များပြုကြကုန်၏။
═══════════════════════
မှတ်ချက်
ပုံများဖန်တီးသူကတော့ Bone Myat Thu ဖြစ်ပါသည် ။ အပင်ပန်းခံ၍ ရေးထားသူများ၏ အမည်များကို ဖော်ပြလို သော်လဲ မတွေ့ပါ ။ မေတ္တာဖြင့် ဘာညာဟု မိမိ အမည်တပ်ထားသူအများစုသာ တွေ့ရ၍ စာရေးတင်သူ အစစ် အမည်များကို မဖော်ပြနိူင်ခြင်းဖြစ်ပါသည် ။ ဦးဇင်း အယူ အဆက တော့ ကိုယ်ရေးတဲ့ စာမဟုတ်ရင် မိမိ အမည်ကို မထည့်သင့်ပါ ။
Credit..
No comments:
Post a Comment