⚡ ဒေါသဟူသည် စိတ်၏ အကုသိုလ် တစ်ခုဖြစ်သည်..'
✏ ( ဖူးလား )
သာကီဝင်မင်းများနှင့် တကွ ၀ိဋဋူပမင်းသားတို့ ပျက်စီးဆုံးရှုံးကြရသည်မှာ ဒေါသနှင့် မာနတို့က အရင်းခံပင်ဖြစ်သည်..။'
ကောသလမင်းကြီးသည် ဗုဒ္ဓနှင့် ဆွေမျိုးတော်စပ်ချင်လှသဖြင့် သာကီဝင်မင်းများထံ မင်းသမီးတစ်ပါးကို တောင်းရာ မာနခက်ထန်လှသော ' သာကီဝင်များက ကျွန်မတစ်ယောက်ကိုသာ မင်းသမီးဟု လိမ်ညာပြီး ဆက်သလိုက်လေသည်..။
ကောသလမင်းကြီးမှာ မသိရှာဘဲ မိဖုရားမြှောက်ပြီးနောက် သားတစ်ယောက်ရလေသည်..။ ၀ိဋဋူပဟု အမည်တွင်သည်..။
တစ်နေ့တွင် အမေ့ဘက်မှ ဆွေမျိုးများကို တွေ့ချင်သည်ဆိုကာ သာကီဝင်တို့၏ ကပိလ၀တ်နေပြည်တော်သို့ သွားလေသည်..။ ရောက်သောအခါ သာကီဝင်မင်းတို့၏ ထုံးစံအတိုင်း ကြီးသူကို ငယ်သူက ၀တ်ချရှိခိုးကြရသည်..။ ထိုအခါ ၀ိဋဋူပမင်းသားမှာ သူကချည်းရှိခိုးနေရသည်..။ သူရှိခိုး ခံရမည့် သူ့ထက်လက်အောက်ငယ်သားများကို မတွေ့ဖြစ်နေသည်..။
အဘယ်ကြောင့်ဆိုသော် ကျွန်မ၏သား ဖြစ်သော ၀ိဋဋူပကို ရှိမခိုးစေနိုင်ရန်အတွက် ၀ိဋဋူပအောက် ငယ်သော သာကီဝင်များကို ကျူတောထဲတွင် ပုန်းအောင်းခိုင်းထားသောကြောင့် ဖြစ်ပါသည်..။
ထိုမျှမကသေး ၀ိဋဋူပ ပြန်သွားသောအခါ ကျွန်မသား ထိုင်သွားသော နေရာ မသန့်ဟုဆိုကာ နို့ရည်နှင့် ဆေးလိုက်ကြသေးသည်..။
အကြောင်းစုံ သိသွားသော ၀ိဋဋူပ၏ ဒေါသကား တစ်ကိုယ်လုံးသို့ ပျံ့နှံသွားလေပြီ..။
ထို့နောက် မင်းအဖြစ်သို့ ရောက်သောအခါ စစ်သည်အင်အား ကောင်းသည်နှင့် သာကီဝင်မင်းတို့ထံ ချီတက်၍ သာကီဝင်မျိုး မှန်သမျှ အကုန်သတ်လေတော့သည်..။ ဗုဒ္ဓသုံးကြိမ်တိုင် တားသော်လည်း မရနိုင်တော့ပါ..။
လူများကိုသာမက သူ့ထက်ငယ်သော သာကီဝင်များ ပုန်းအောင်းခဲ့သည့် ကျူပင်တောကိုပင် ကျူငုတ်မှမကျန်အောင် သုတ်သင်လေတော့သည်..။
ကျူပင်ခုတ် ကျူငုတ်ပါမကျန်စေရ ဟူသော စကားပုံသည် ဤဗုဒ္ဓ၀င်ကပင် စလာလေသလောဟု ထင်မှတ်ရသည်..။
သာကီဝင်များကို အားရအောင် သတ်ပြီးသည်နှင့် တပ်ခေါက်ကာ ပြန်လာခဲ့သော ၀ိဋဋူပမင်းသားသည် တပ်သားများနှင့် တကွ မြစ်ပြင်သဲခုံပေါ်တွင် စိတ်ချလက်ချ အိပ်နေခိုက် တက်လာသော မြစ်ရေများက ၀ိဋဋူပနှင့်တကွ တပ်သားအားလုံးတို့၏ အသက်ကို ယူဆောင်သွားလေတော့သည်..။
မာနဖြင့် ဒေါသတို့၏ ဆိုးပြစ်ကား ကြီးမားလှပေစွ..။
⚡ ဖျက်ဖျက်စီးစီး လောင်သည်မီးသို့
နီးစပ်ရာရာ ပရိဝါနှင့်
ဥာတကာဆွေမျိုး ပျက်စီးစေ၏။
ရေနိမ့်ရာစီး မီးမြင့်ရာလောင်
ဆိုသောယောင်သို့ မရှောင်စိတ်က
မျက်ဒေါသနှင့် မာနလွန်စွာ
ဖြစ်လေရာ၏..။ '
📝(( မဃဒေ၀-၂၃၅))
🌺မေတ္တာရှင် (ရွှေပြည်သာ ))
မေတ္တာအစွမ်းအံ့မခန်း စာအုပ်မှ။
No comments:
Post a Comment