❝ ကိုယ့်စိတ်ကိုယ်ပြုပြင်နေရင် ထိုင်ထိုင် မထိုင်ထိုင်တရားအားထုတ်တာပါပဲ ❞
ဝိပဿနာနဲ့ပတ်သက်လို့ •••
နောက်ဆုံးပြောမယ်ဆိုရင်တော့
"စရသုတ္တန်"တဲ့။
ဦးဇင်းတို့အကြိုက်ဆုံးသုတ္တန်လေးပါပဲ။
ဣတိဝုတ်ပါဠိတော်မှာ -
တခြားတရားတွေလည်းကြိုက်ပါတယ်။
ဒီစရသုတ္တလေးကိုတော့ အကြိုက်ဆုံးပါပဲ။
မြတ်စွာဘုရား -
တိုက်ရိုက်ပြောထားတာကတော့
"သွားနေဆဲမှာ ကာမဝိတက်၊ ဗျာပါဒဝိတက်၊
ဝိဟိ ံသာဝိတက် ဖြစ်ပေါ်လာလို့
အဲဒီဝိတက်ဆိုးသုံးမျိုးကို
သွားနေဆဲအခိုက်အတန့်မှာပဲ
ပယ်သတ်လိုက်နိုင်တယ်ဆိုရင် အဲဒီပုဂ္ဂိုလ်
ဝီရိယရှိတဲ့ပုဂ္ဂိုလ်လို့ခေါ်ပါတယ်။
တရားအားထုတ်နေတဲ့
ဝီရိယရှိတဲ့သူလိုခေါ်ပါတယ်။"
ဒါကိုပဲ •••
အဖြောင့်ရှင်းရှင်းပြောရမယ်ဆိုရင်တော့
သွားရင်းနဲ့ကိလေသာဖြစ်ပေါ်လာတယ်ဆိုရင်
အဲဒီဖြစ်ပေါ်လာတဲ့ကိလေသာကို
သွားနေဆဲအခိုက်အတန့်မှာပဲ တစ်ခါတည်း
ပတ်သတ်နိုင်မှ တရားအားထုတ်တယ်လို့
ခေါ်ပါတယ်။
တရားအားထုတ်တယ်ဆိုတာ
သွားရင်းဖြစ်နေတဲ့ကိလေသာကို သွားဆဲ
အခိုက်အတန့်မှာ ချက်ချင်း
ပယ်သတ်လိုက်နိုင်တာကို ခေါ်ပါတယ်။
သွားရင်းကိလေသာပယ်တော့
သွားရင်းတရားအားထုတ်တာပေါ့။
တရားအားထုတ်တာကို အများက
ထိုင်မှ တရားအားထုတ်တယ်လို့
ထင်နေကြတာနော်။
တင်ပျဉ်ခွေ၊ ခါးဆန့်၊မျက်စိမှိတ်ထားမှ
တရားထိုင်တယ်၊ တရားအားထုတ်တယ်လို့
ထင်နေကြတယ်၊ သုံးတာကိုက
တရားအားထုတ်တယ်လို့ မသုံးကြဘူးနော်။
တရားထိုင်တယ်လို့သုံးကြတယ်။
ထိုင်ရင်းတရားအာထုတ်တော့
တရားထိုင်တာပေါ့
သွားရင်း တရားအားထုတ်တော့
တရားသွားတာပေါ့ ။
ရပ်ရင်းနဲ့တရားအားထုတ်တော့
တရားရပ်တယ်။
လျောင်းရင်းနဲ့တရားအားထုတ်တော့
တရားလျောင်းတယ်၊
သောက်ရင်းနဲ့ တရားအားထုတ်တော့
တရားသောက်တယ်လို့ခေါ်တယ်နော်။
တရားထိုင်တာချည်းပဲ •••
အားကိုးမနေနဲ့နော်၊ တရားရပ်ဖို့၊
တရားလျောင်းဖို့၊ တရားစားဖို့၊
တရားသောက်ဖို့၊တရားလျှော်ဖို့၊ တရားဖွပ်ဖို့၊
အဲဒါတွေလည်း အရေးကြီးပါတယ်။
ဒါကြောင့် တရားအားထုတ်တယ်ဆိုတာ
တင်ပျဉ်ခွေ ၊ ခါးဆန့်၊မျက်စိမှတ်။
ရှူးရှဲရှူးရှဲမှတ်မှ
တရားအားထုတ်တာ မဟုတ်ဘူး။
သွားရင်းနဲ့ ကိလေသာဖြစ်ပေါ်နေရင်
အဲဒီကိလေသာကို သွားနေဆဲမှာပင်၊
ထိုင်တဲ့အချိန်အထိ အချိန်မဆိုင်းဘဲနဲ့
သွားရင်းနဲ့ပဲ ပယ်သတ်ပါ။
ဒါမှ တရားအားထုတ်တယ်လို့ခေါ်ပါတယ်။
ရပ်ရင်းနဲ့ ကိလေသာဖြစ်ပေါ်လာရင်
ရပ်ရင်းတစ်ခါတည်းပယ်ပါ -
ထိုင်ရင်းနဲ့ကိလေသာဖြစ်ပေါ်လာရင်
ထိုင်ရင်းတစ်ခါတည်းပယ်ပါ။
လျောင်းရင်းနဲ့ ကိလေသာဖြစ်ပေါ်လာရင်
လျောင်းဆဲ အခိုက်အတန့်မှာပဲ
အဲဒီကိလေသာတွေကို
ချက်ချင်းပယ်သတ်လိုက်ပါ။
အဲဒီပုဂ္ဂိုလ်မျိုးကိုမှ -
တရားအားထုတ်တဲ့ပုဂ္ဂိုလ်လို့ခေါ်ပါတယ်။
အဲဒီလိုပုဂ္ဂိုလ်မျိုးကိုမှ •••
အပ်ပမာဒတရားနဲ့
ပြည့်စုံတဲ့ပုဂ္ဂိုလ်လို့ခေါ်ပါတယ်။
အပ်ပမာဒ တရားလက်ကိုင်ထားတဲ့ပုဂ္ဂိုလ်ဆိုတာ
ဘယ်လိုပုဂ္ဂိုလ်မျိုးလဲ၊ သွားရင်း၊ရပ်ရင်း၊
ထိုင်ရင်း၊ လျောင်းရင်း၊ ကိလေသာ
ဖြစ်ပေါ်လာရင် ……
သွားဆဲ၊ရပ်ဆဲ၊ထိုင်ဆဲ၊လျောင်းဆဲ
အခိုက်အတန့်မှာ အကြွေးမထားဘဲနဲ့
အဲဒီကိလေသာကို ချက်ချင်း
ပယ်သတ်လိုက်နိုင်တဲ့ပုဂ္ဂိုလ်ကို
အပ္ပမာဒတရား လက်ကိုင်ထားတဲ့
ပုဂ္ဂိုလ်လို့ ခေါ်ပါတယ်။
【 အရှင်ဆန္ဒာဓိက (ရွှေပါရမီတောရ) 】
Credit:
No comments:
Post a Comment