____🌸🍃🌸____
မေတ္တာဆိုတာ ကာယကံ မေတ္တာ, ဝစီကံ မေတ္တာ, မနောကံ မေတ္တာလို့ ဒီလို ၃-မျိုးရှိတယ်။
ခုနက ပြောခဲ့တဲ့အတိုင်း ကိုယ်ချင်းစာတရားနဲ့ သူတပါးအား ချမ်းသာအောင်လို့ သူ့အကျိုးကို ကိုယ်ထိလက်ရောက် ကူညီဆောင်ရွက်ပေးတာဟာ မေတ္တာကာယကံပါပဲ။
သူများ နားချမ်းသာအောင် ပြောဆိုတာ, ချမ်းသာပါစေလို့ ရွက်ဆိုပြီး မေတ္တာပို့တာ, သူ့အကျိုးကိစ္စ ပြီးမြောက်အောင် ညွှန်ကြားတာ, နှုတ်နဲ့ စီမံဆောင်ရွက်ပေးတာ ဒါတွေဟာ ဝစီကံမေတ္တာပါပဲ။
သူတပါးတွေကို ချမ်းသာကြပါစေလို့ စိတ်သက်သက်နဲ့ နှလုံးသွင်းနေတာဟာ မနောကံမေတ္တာပါပဲ။
ဒီမနောကံမေတ္တာကိုတော့ အခါခပ်သိမ်း ပွါးများနိုင်ပါတယ်။
ဒီမနောကံမေတ္တာကို ပွါးများတာကလည်း ဈာန်ရအောင် ပွားများတာရယ်, ဘေးကင်း ရန်ကင်း ပါရမီဖြစ် ကုသိုလ်ဖြစ် ပွားများတာရယ် ဒီလို နှစ်မျိုးရှိပါတယ်။
ဈာန်ရအောင် ပွားများနည်းကိုတော့ ယခုလို တိုတောင်းတဲ့ အချိန်ကလေးမှာ ပြည့်စုံအောင် မပြောနိုင်ပါဘူး။
ဒါကြောင့် ယခု ဘေးကင်း ရန်ကင်း ပါရမီဖြစ် ကုသိုလ်ဖြစ် ပွားများပုံကိုပဲ ပြောမယ်။
တွေ့မြင်ရသမျှ လူတွေကို အာရုံပြုပြီး "ချမ်းသာကြပါစေ၊ ချမ်းသာကြပါစေ"လို့ ဒီလိုလည်း ပွားများနိုင်ပါတယ်။
အမိအဘ ဆရာသမား စသည်ကို အာရုံပြုပြီးတော့ "ချမ်းသာကြပါစေ ချမ်းသာကြပါစေ"လို့ ဒီလိုလည်း ပွားများနိုင်ပါတယ်။
ကိုယ်မေတ္တာပို့ချင်တဲ့ လူတွေကို အာရုံပြုပြီးတော့ တို့အိမ်ကလူတွေ ချမ်းသာကြပါစေ၊ တို့အရပ်ကလူတွေ ချမ်းသာကြပါစေ၊ တို့မြို့က, တို့ရွာကလူတွေ ချမ်းသာကြပါစေ စသည်ဖြင့်လည်း ပွားများနိုင်ပါတယ်။
တစ်ဦးတစ်ယောက်ကို ဖြစ်စေ, အများကိုဖြစ်စေ အာရုံပြုပြီး ဒီလို တစ်ကြိမ်နှလုံးသွင်းလျှင် ပါရမီကုသိုလ် တစ်ကြိမ်ဖြစ်တယ်။
ဆယ်ကြိမ် နှလုံးသွင်းလျှင် ဆယ်ကြိမ်ဖြစ်တယ်။
အကြိမ်တစ်ရာ နှလုံးသွင်းလျှင် အကြိမ်တစ်ရာ ဖြစ်တယ်။
သွားရင်း လာရင်းလည်း ဒီမေတ္တာကို ပွားများနိုင်ပါတယ်။
ဒါပေမယ့် အထူးသတိပြုဖို့ကတော့ ချမ်းသာကြပါစေလို့ စိတ်နဲ့သာ မေတ္တာပွားပြီးတော့ သူတပါးတွေ နားမချမ်းသာအောင် ဆင်းရဲဒုက္ခရောက်အောင် ပြောဆိုပြုလုပ်နေလျှင်တော့ အဲဒါဟာ မေတ္တာအစစ် မဖြစ်ဘူး။
စိတ်နဲ့ ချမ်းသာပါစေလို့ မေတ္တာပို့တဲ့အတိုင်း ကိုယ်နဲ့ နှုတ်နဲ့ရော သူတပါးချမ်းသာအောင် တတ်နိုင်သမျှ ဆောင်ရွက်နိုင်မှ မေတ္တာအစစ် အောင်အောင်မြင်မြင်ဖြစ်တယ်လို့လည်း မှတ်ရမယ်။
ယခု ထိုထက်ကျယ်ပြန့်တဲ့ ငါးရာ့နှစ်ဆယ် ရှစ်သွယ်မေတ္တာပို့ပုံကို အတိုချုံးပြီး ပြောဦးမယ်။
သဗ္ဗေ သတ္တာ၊ အားလုံးသော သတ္တဝါတွေ။
• အဝေရာ ဟောန္တု၊ ရန်ကင်းကြပါစေ။ ဒီလိုနှလုံးသွင်းတာက မေတ္တာတစ်ပါး၊
• အဗျာပဇ္ဇာ ဟောန္တု၊ စိတ်ဆင်းရဲ ကင်းကြပါစေ- ဒါကလည်း မေတ္တာတစ်ပါး။
(စိတ်ဆင်းရဲဆိုတာ စိတ်ညစ်တာ စိတ်ပူတာ ဝမ်းနည်းတာ ကြောက်လန့်တာ ချစ်တဲ့သူတွေနဲ့ ကွဲနေရလို့ စိုးရိမ်ပူဆွေးနေတာ စီးပွားဥစ္စာတွေ ဆုံးရှုံးပျက်စီးလို့ စိတ်နှလုံး ထိခိုက်နေတာ- ဒီလိုဟာတွေပါပဲ၊ အဲဒီလို စိတ်ဆင်းရဲတွေ ကင်းကြပါစေလို့ ဆိုလိုပါတယ်)
• အနီဃာ ဟောန္တု၊ ကိုယ်ဆင်းရဲ ကင်းကြပါစေ- ဒါကလည်း မေတ္တာတစ်ပါး။
• သုခီ အတ္တာနံ ပရိဟရန္တု၊ ချမ်းသာစွာနဲ့ မိမိတို့ခန္ဓာဝန်ကို ဆောင်ရွက်နိုင်ကြပါစေ- ဒါကလည်း မေတ္တာတစ်ပါး။
(သတ္တဝါတွေမှာ မိမိတို့ခန္ဓာဝန်ကို ဆောင်ရွက်နေကြရတာဟာ အင်မတန် ဝန်လေးပါတယ်၊ ဒီခန္ဓာဝန်အတွက် စားဝတ်နေရေး ကျန်းမာရေး ပြည့်စုံအောင် ရှာကြံနေကြရတာဟာ အင်မတန် ဆင်းရဲပါတယ်။
အဲဒီ ဆင်းရဲဒုက္ခတွေမှ ကင်းဝေးပြီး ချမ်းချမ်းသာသာနဲ့ မိမိတို့ ခန္ဓာဝန်ကို ဆောင်ရွက်နိုင်ကြပါစေလို့ ဆိုလိုပါတယ်)
ယခုပြောခဲ့တာတွေဟာ သတ္တဝါအားလုံးကို အာရုံပြုပြီး မေတ္တာပွားပုံ ၄-ပါးတဲ့။
ထို့အတူပဲ-
သဗ္ဗေ ပါဏာ၊ အားလုံး အသက်ရှိသူတွေ။
သဗ္ဗေ ဘူတာ၊ အားလုံး ထင်ရှားဖြစ်သူတွေ။
သဗ္ဗေ ပုဂ္ဂလာ၊ အားလုံး ပုဂ္ဂိုလ်တွေ။
သဗ္ဗေ အတ္တဘာဝပရိယာပန္နာ၊ အားလုံး ခန္ဓာကိုယ်အတ္တဘော ရှိသူတွေ-ဆိုတဲ့ ဒီ၄-ပုဒ်နဲ့လည်း ခုနက မေတ္တာပွားပုံ ၄-ပါးကို အသီးအသီးတွဲပြီး မေတ္တာပို့ရပါတယ်။
ဒါကြောင့် မူလပုဒ် ငါးခုကို ခုနက မေတ္တာလေးလီနဲ့ မြှောက်လိုက်လျှင် မေတ္တာပေါင်း ၂ဝ-ရပါတယ်။ အဲဒါတွေဟာ သတ္တဝါအားလုံးကိုချည်း ရည်ညွှန်းတဲ့အတွက် #အနောဓိသမေတ္တာ ခေါ်တယ်။ အပိုင်းအခြား အကန့်အသတ်မရှိတဲ့ မေတ္တာလို့ ဆိုလိုပါတယ်။
နောက်ပြီးတော့ သဗ္ဗာဣတ္ထိယော၊ အားလုံးသော အမျိုးသမီးတွေ စသည်ဖြင့် ၂-ပိုင်းစီခွဲပြီး ပို့တာက ၄-ပုဒ်၊ ၃-ပိုင်းခွဲပြီး ပို့တာက ၃-ပုဒ်၊ ပေါင်း ၇-ပုဒ်ရှိသေးတယ်၊ အဲဒီ ၇-ပုဒ်ကိုလည်း အဝေရာ ဟောန္တု၊ ရန်ကင်းကြပါစေ-အစရှိတဲ့ မေတ္တာပွားပုံ လေးလီနဲ့ မြှောက်လိုက်တော့ ၂၈-ရတယ်။
အဲဒီ ၂၈-ပါးကတော့ အမျိုးသမီးသန့်သန့်, အမျိုးသားသန့်သန့် စသည်ဖြင့် ပိုင်းခြားကန့်သတ်ပြီး ပို့တဲ့အတွက် #ဩဓိသမေတ္တာ လို့ ခေါ်တယ်။
အဲဒီ ဩဓိသ ၂၈-ပါးနဲ့ ခုနက အနောဓိသ ၂ဝ-ကို ပေါင်းလိုက်လျှင် မေတ္တာ ၄၈-ပါးရတယ်။
ထို့အတူ အရှေ့အရပ်က အားလုံးသတ္တဝါတွေ ရန်ကင်းကြပါစေ-စသည်ဖြင့် ပို့တာကလည်း ၄၈-ပါး၊ အနောက်အရပ်, မြောက်အရပ်, တောင်အရပ်, အရှေ့တောင်အရပ်, အနောက်မြောက်အရပ်, အရှေ့မြောက်အရပ်, အနောက်တောင်အရပ်, အောက်အရပ်, အထက်အရပ်တွေကလည်း နည်းတူပဲ ၄၈-ပါးစီရတယ်။
ဒါကြောင့် အရပ်ဆယ်မျက်နှာမှာ မေတ္တာ ၄၈ဝ-ရပါတယ်။
အဲဒါတွေက အရပ်မျက်နှာနဲ့ ပိုင်းခြားပြီး ဖြန့်တဲ့အတွက် #ဒိသာဖရဏမေတ္တာ လို့ ခေါ်တယ်။
အဲဒီ ၄၈ဝ-ထဲမှာ ခုနက အနောဓိသ ဩဓိသ မေတ္တာ ၄၈-ပါးကို ပေါင်းထည့်လိုက်လျှင် ၅၂၈-သွယ် မေတ္တာဖြစ်တယ်။
အဲဒီ ၅၂၈-သွယ် မေတ္တာအရ ဘုန်းကြီးက ယခု အသံလွှင့်ရုံကနေပြီး မေတ္တာပို့မယ်။ တရားနာနေကြတဲ့ ဓမ္မမာမကပုဂ္ဂိုလ်တွေ အားလုံးကလည်း စိတ်နဲ့ လိုက်ပြီး မေတ္တာပို့ကြပါ။
အားလုံးသတ္တဝါတွေ ဘေးရန် ကင်းကြပါစေ၊
စိတ်ဆင်းရဲ ကင်းကြပါစေ၊
ကိုယ်ဆင်းရဲ ကင်းကြပါစေ၊
ချမ်းသာစွာနဲ့ မိမိတို့ခန္ဓာဝန်ကို ရွက်ဆောင်နိုင်ကြပါစေ။
အားလုံး အသက်ရှိသူတွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး ထင်ရှားဖြစ်သူတွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံးပုဂ္ဂိုလ်တွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး ခန္ဓာကိုယ်အတ္တဘော ရှိသူတွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အဲဒါတွေက အနောဓိသမေတ္တာ ၂ဝ-တဲ့။
အားလုံး အမျိုးသမီးတွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး အမျိုးသားတွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး အရိယာပုဂ္ဂိုလ်တွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး ပုထုဇဉ်ပုဂ္ဂိုလ်တွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံးနတ်ဗြဟ္မာတွေ ဘေးရန် ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး လူတွေ ဘေးရန်ကင်းကြပါစေ ။ပ။ ရွက်ဆောင်နိုင်ကြပါစေ။
အားလုံး အပါယ်ဘုံသူ အပါယ်ဘုံသားတွေ ဘေးရန် ကင်းကြပါစေ၊ စိတ်ဆင်းရဲ ကင်းကြပါစေ၊ ကိုယ်ဆင်းရဲ ကင်းကြပါစေ၊ ချမ်းသာစွာနဲ့ မိမိတို့ခန္ဓာဝန်ကို ရွက်ဆောင်နိုင်ကြပါစေ။ ဒါတွေဟာ ဩဓိသမေတ္တာ ၂၈-ပါးတဲ့။
ယခု အရပ်မျက်နှာ ၁ဝ-ပါးနဲ့ မေတ္တာပို့ပုံကို အတိုချုံးပြီး ပြောမယ်။ အရှေ့အရပ်က အားလုံးသတ္တဝါတွေ ဘေးရန် ကင်းကြပါစေ၊ စိတ်ဆင်းရဲ ကင်းကြပါစေ။
ကိုယ်ဆင်းရဲ ကင်းကြပါစေ၊ ချမ်းသာစွာနဲ့ မိမိတို့ခန္ဓာဝန်ကို ရွက်ဆောင်နိုင်ကြပါစေ။ ရှေးနည်းတူ ၄၈-ပါး အပြည့်အစုံပို့ရမယ်။ အနောက်အရပ်က အားလုံး သတ္တဝါတွေ ဘေးရန်ကင်းကြပါစေ၊ နည်းတူ ၄၈-ပါးပဲ။
ထို့အတူ မြောက်အရပ်က၊ တောင်အရပ်က၊ အရှေ့တောင်အရပ်က၊ အနောက်မြောက်အရပ်က၊ အရှေ့မြောက်အရပ်က၊ အနောက်တောင်အရပ်က၊ အောက်အရပ်က၊ အထက်အရပ်က၊ ၄၈-စီချည်းပဲ။ အားလုံးပေါင်း ၅၂၈-သွယ် မေတ္တာဖြစ်ပါတယ်၊
အချိန်မရှိလို့ နားလည်ရုံမျှချုံးပြီး ပြောလိုက်ရတယ်။ ယခု မြန်မာပြည်သူ ပြည်သားတွေကို အထူးမေတ္တာပို့ပြီး တရားသိမ်းတော့မယ်။ အားလုံး စိတ်နဲ့ လိုက်ပြီး မေတ္တာပို့ကြပါ။
ပြည်ထောင်စု မြန်မာနိုင်ငံသူ နိုင်ငံသားတွေ အားလုံး ဘေးရန်ကင်းကြပါစေ၊ စိတ်ဆင်းရဲ ကင်းကြပါစေ၊ ကိုယ်ဆင်းရဲ ကင်းကြပါစေ၊ ချမ်းသာစွာနဲ့ မိမိတို့ခန္ဓာဝန်ကို ရွက်ဆောင်နိုင်ကြပါစေ။
မဟာစည်ဆရာတော်ဘုရားကြီး
("ဗြဟ္မစိုရ်တရားတော်ကြီး" မှ )
No comments:
Post a Comment