သင် လူတစ်ယောက်ဖြစ်ပြီလား
*********************
သာသနာတော်သက္ကရာဇ် ၃၈၁ ခုနှစ်ခန့်က ဒုဌဂါမဏိမင်းကြီးသည် ဗုဒ္ဓသာသနာတော်ကို ဖျက်ဆီးနေကြသော ကြေးကုလားမင်းပေါင်း ( ၃၂ )ဦး ၊ နောက်လိုက်စစ်သည်ပေါင်း ၂၁၈၇၀၀ ကျော်တို့ကို တိုက်ပွဲကြီး ၂၉ ကြိမ် ဆင်နွှဲပြီး ၂နှစ်ကျော်ကြာအောင် ရှင်းလင်းခဲ့ရသည်။
သာသနာ့ရန်သူများ ရှင်းလင်းပြီးဖြစ်သော်လည်း ဒုဌဂါမဏိမင်းကြီးသည် မင်းစည်းစိမ်ကို ချမ်းသာစွာ မခံစားနိုင်ဘဲ မအိပ်နိုင် မစားနိုင်ဖြစ်ကာ စိတ်အဆင်းရဲကြီး ဆင်းရဲနေရရှာသည်။
အကြောင်းကား ကြေးကုလားများကို သိန်းနှငိ့ချီပြီးသတ်ခဲ့ရသော အကုသိုလ်များကို တွေးမိနေသောကြောင့်ပါတည်း။
ထိုအခါ ပီယဂုင်္ကျွန်းတွင် သီတင်းသုံးနေထိုင်သော ရဟန္တာ ရှစ်ပါးကြွလာပြီး...
သဂ္ဂမဂ္ဂန္တရာယောစ
နတ္ထိတေ တေန ကမ္မုနာ
ဒီယဍ္ဎ မနုဇာ ဝေတ္ထ၊
ဃာတီတာ မနုဇာဓိပ။
ဒကာတော်မင်းကြီး ကြေးကုလားတို့ကို သတ်ခဲ့သော အကုသိုလ်သည် သင်မင်းကြီးအား နတ်ပြည်မရောက်အောင် မဂ်ဖိုလ်မရအောင် မတားနိုင်ပါ။
သေသူလူနှစ်သိန်းကျော်တို့တွင် လူတစ်ယောက်နှင့် တစ်ခြမ်းကိုသာ သတ်ဖြတ်မိရာ ရောက်ပေသည်။
သရဏေသုဋ္ဌိတော ဧကော
ပဉ္စသီလေပိ စာပရော။
မိစ္ဆာဒိဋ္ဌိစ ဒုဿီလာ၊
သေသာ ပသုသမာ မတာ။
အဘယ်ကြောင့်ဆိုသော သရဏဂုံသုံးပါးတည်သူတစ်ယောက် ပါသွားသောကြောင့် လူတစ်ခြမ်းကိုသာ သတ်ရာရောက်သည်။
သရဏဂုံ သုံးပါးနှင့် ငါးပါးသီလနှစ်မျိုးလုံးပြည့်စုံသူ တစ်ယောက် ပါသွားသောကြောင့် လူတစ်ယောက်ကို သတ်ရာရောက်သည်။
ထိုနှစ်ဦးမှ တစ်ပါး ကြွင်းသော လူတို့သည်ကား အယူမှားသည့် မိစ္ဆာဒိဋ္ဌိများ သီလမရှိသော ဒုဿီလများ ဖြစ်ကြသောကြောင့် နွားကျွဲ ဆိတ် သိုး စသော တိရစ္ဆာန် အဆင့်သာရှိသောသူများ ဖြစ်ကြသည်။
ထိုသို့ ဖြေရှင်းပေးလိုက်သောကြောင့် ယုံမှားသံသယနှင့် ကုက္ကုစ္စများ ကင်းသွားကာ ကျန်းမာချမ်းသာစွာနှင့် သာသနာပြုသွားခဲ့ပါသည်။
သက်တန်းစေ့၍ နတ်ရွာစံသော် အရိမေတ္တေယျဘုရားအလောင်း နတ်သား ရှိသည့် တုသိတာနတ်ဘုံသို့ ရောက်ခဲ့ရသည်။
ထိုနတ်ဘုံသည် လူသက်နှင့် တွက်လျှင် ငါးဆယ့်ခုနှစ်ကုဋေနှင့် အနှစ်ခြောက်သန်း အသက်ရှည်ပေသည်။
★ ★ မဟာဝင်ကျမ်း
အနှစ်ချုပ်သက်ခန်းစာ
°°°°°°°°°°°°°°°°°°°
ဤသာဓကကို ထောက်ဆသောအားဖြင့် သရဏဂုံတည်ရုံ ဗုဒ္ဓဘာသာဖြစ်ရုံနှင့် လူတစ်ယောက်ဟု မခေါ်နိုင်သေး..
သရဏဂုံနှင့် ငါးပါးသီလနှစ်မျိုးလုံးပြည့်စုံမှ လူတစ်ယောက်ဖြစ်ကြောင်း သိရပေသည်။
ထို့ကြောင့် သရဏဂုံတည်ရရုံနှင့် အားရတင်းတိမ်မနေဘဲ ငါးပါးသီလကိုပါ စောင့်ထိန်းသင့်ကြောင်း သတိပြုစေချင်ပါသည်။
(( မေတ္တာရှင် .. ရွှေပြည်သာ ))
No comments:
Post a Comment