စကားဆယ်ခွန်း
🙏🙏🙏 🌷🌿🌷🙏🙏🙏
ရှေးဦးစွာ သီလကျင့်စဉ် သမာဓိကျင့်စဉ်
ပညာကျင့်စဉ်တွေနှင့် ဆက်စပ်နေတဲ့
ဘုရားရှင်ဘက်က ပြောကြားစေတော်မူလိုတဲ့
စကား ( ၁ဝ ) ခွန်းအကြောင်းကို
ဆက်ပြီး ပြောကြရအောင်
ရပ်အကြောင်း ရွာအကြောင်း အစားအကြောင်း အဝတ်အကြောင်း ဆွေမျိုးအကြောင်း
မိတ်ဆွေအကြောင်းစတဲ့ မဂ်ဖိုလ်နိဗ္ဗာန်သို့ သွားရာလမ်းကြောင်းမှ ဖီလာကန့်လန့်ဖြစ်နေတဲ့
မဂ်ဖိုလ်နိဗ္ဗာန်သို့ ရောက်ကြောင်းကျင့်စဉ်နှင့်
ထိပ်တိုက် ဆန့်ကျင်ဘက် ဖြစ်နေကြတဲ့
* တိရစ္ဆာနကထာ * လို့ ဘုရားရှင်က ရှုတ်ချကာ
ခေါ်ဝေါ် သုံးစွဲထားတော်မူပါတယ်
ဒီစကားအမျိုးမျိုးတွေကို ဝိုင်းဖွဲ့ကာ
ပြောဆိုနေတာမျိုးကိုတော့ ဘုရားရှင်က
နှစ်ခြိုက်တော် မမူပါဘူး
ဘုရားရှင် ပြောကြားစေတော်မူလိုတဲ့
စကား (၁၀) ခွန်းကိုတော့
အင်္ဂုတ္တိုရ်ဒသကနိပါတ်
ပဌမကထာဝတ္ထုသုတ္တန်မှာတော့
မြတ်စွာဘုရား ဟောကြားထားတော်မူခဲ့ပါတယ်
ဒီစကားဆယ်ခွန်းကဘာတွေလဲ..?
၁။ အပ္ပိစ္ဆကထာ
အလိုနည်းပါးခြင်းနှင့် စပ်တဲ့တရားစကား
၂။ သန္တုဋ္ဌိကထာ
ရောင့်ရဲလွယ်ခြင်းနှင့် စပ်တဲ့တရားစကား
၃။ ပဝိဝေကကထာ
ကင်းဆိတ်မှု ဝိဝေကသုံးဖြာနှင့် စပ်တဲ့တရားစကား
၄။ အသံသဂ္ဂကထာ
ရောရောနှောနှော မနေထိုင်ခြင်းနှင့်
စပ်တဲ့တရားစကား
၅။ ဝီရိယာရမ္ဘကထာ
သမထ ဝိပဿနာ ဘာဝနာလုပ်ငန်းရပ်တို့၌ အပြင်းအထန် ကြိုးစားအားထုတ်ခြင်း
လုံ့လဝီရိယနှင့် စပ်တဲ့တရားစကား
၆။ သီလကထာ
သီလကျင့်စဉ်နှင့် စပ်တဲ့တရားစကား
၇ ။ သမာဓိကထာ
သမာဓိကျင့်စဉ်နှင့် စပ်တဲ့တရားစကား
၈။ ပညာကထထာ
ဝိပဿနာပညာကျင့်စဉ်နှင့် စပ်တဲ့တရားစကား
၉။ ဝိမုတ္တိကထာ
ကိလေသာတို့မှ လွတ်မြောက်မှု
ဝိမုတ္တိနှင့် စပ်တဲ့တရားစကား
၁၀။ ဝိမုတ္တိဉာဏဒဿနကထာ
အရိယဖိုလ် အသီးအသီးကို ရပြီးနောက်
ဖြစ်ပေါ်လာတဲ့ ပစ္စဝေက္ခဏာဉာဏ်အမြင်နှင့်
စပ်တဲ့တရားစကား
အားလုံးပေါင်းလိုက်တော့
စကား (၁၀) မျိုးဖြစ်ပါတယ်
ဒီစကား (၁၀) မျိုးကိုတော့
ပြောသင့်တဲ့ အချိန်အခါမှာ ပြောသင့်တဲ့
အတိုင်းအတာ ပမာဏကို နှိုင်းချိန်ပြီးတော့
ပြောတန်သလောက် ပြောဆိုဖို့ရန်
ဘုရားရှင်က ခွင့်ပြုထားတော်မူပါတယ်
သို့သော် ပြောသင့်တဲ့ စကားတွေပဲ
ဆိုပြီးတော့ ဝိုင်းဖွဲ့ကာ
* ပြောမဆုံးပေါင် တောသုံးတောင် * လုပ်ကာ
* ဟိမဝန္တာ ချီးမွမ်းခန်းတွေ *
ဖွင့်ဆိုနေကြခြင်းမျိုးကိုတော့
မြတ်စွာဘုရား နှစ်ခြိုက်တော် မမူပါဘူး...
(အံ ၊၃၊၃၅၉ ။ )
( ဖားအောက်တောရဆရာတော်ဘုရားကြီး )
🙏 Ni Ni 🙏
No comments:
Post a Comment