_______________________
လောကမှာ ဘယ်အရာမှ ထာဝရ ဆုပ်ကိုင်ထားလို့ မရဘူး၊ ဒါကြောင့် ဘာကိုပဲဖြစ်ဖြစ် " မရှိလို့ မဖြစ်ဘူး၊ ရှိကို ရှိမှ ဖြစ်မယ်" ဆိုပြီး တမ်းတမ်းစွဲ မဖြစ်ဖို့ အရေးကြီးတယ်။ တမ်းတမ်းစွဲဖြစ်နေရင် " ရမှ ရပါ့မလား" ဆိုပြီး စိုးရိမ်စိတ် လွန်ကဲသွားတယ်။ စိုးရိမ်စိတ် လွန်ကဲရင် စိတ်ဖိစီးမှု များသွားတယ်။
စိတ်ဖိစီးမှုများရင် အိပ်လို့ မကောင်းတော့ဘူး။ အိပ်လို့ မကောင်းရင် စားလို့လည်း မကောင်းတော့ဘူး။ ဒီတော့ "စိတ်ပျိုတော့ ကိုယ်နု စိတ်ထောင်းတော့ ကိုယ်ကြေ" ဆိုတဲ့အတိုင်း လူက ပုံကျသွားတယ်။
ဒါကြောင့် စိတ်ချမ်းသာဖို့ အရေးကြီးတယ်။ စိတ်ချမ်းသာဖို့အတွက် ပေါ့ပေါ့ပါးပါးလေး နေတတ်ရမယ်။ ပေါ့ပေါ့ပါးပါးနေဆိုတာ အလေးအနက် မထားတာကို ပြောတာ မဟုတ်ဘူး။ "ကိုယ့်အလုပ် ကိုယ်လုပ်၊ မဆိုင်တာတွေ ခေါင်းထဲ မထည့်နဲ့" လို့ ဆိုလိုတယ်။
လမ်းဆိုတာ အများအတွက်
--------------------------
စစ်ကိုင်းတိုင်းအထက်ပိုင်း၌ ရွာကြီးတစ်ရွာ ရှိတယ်။ ရေခံမြေခံ ကောင်းလို့ ကောက်ပဲသီးနှံ ဖြစ်ထွန်းတဲ့ ရွာကြီးပါပဲ။ ဒါပေမဲ့ မြို့သွားဖို့ လမ်းပန်းဆက်သွယ်ရေးက မကောင်းဘူး။
ဒါကြောင့် ရွာသူရွာသားတွေက လမ်းဖောက်ပေးဖို့ သက်ဆိုင်ရာ အုပ်ချုပ်ရေး အကြီးအကဲများကို တင်ပြကြတယ်။ ဒါနဲ့ သက်ဆိုင်ရာ အုပ်ချုပ်ရေး အကြီးအကဲများက လမ်းဖောက်ဖို့ ခွင့်ပြုလိုက်တယ်။ ရွာသူရွာသားတွေ ဝမ်းသာသွားကြတယ်။
အဲဒီနောက် အုပ်ချုပ်ရေးအကြီးအကဲများ ရွာကို ရောက်လာပြီး လမ်းဖောက်ဖို့ မြေတိုင်းတာကြတယ်။ မြေတိုင်းတာပြီးတဲ့နောက် ရွာထဲမှာ အသံတွေ ဆူညံသွားတယ်။ ဘာကြောင့်လဲ၊ လမ်းနယ်နိမိတ်ထဲ သူတို့ရဲ့ လယ်မြေတွေ ပါသွားကြလို့။ တချို့ဆိုရင် ငိုတောင်ငိုကြတယ်။
ရွာထဲက လူတစ်ယောက်လည်း သူ့မြေတွေ အများကြီး လမ်းထဲ ပါသွားတယ်။ ဒီတော့ သူ့ညီက " အကိုရေ ... အကို့မြေတွေတော့ လမ်းထဲ ပါသွားပြီဗျာ" လို့ ပြောလိုက်တယ်။
ဒီတော့ သူက ပြန်ပြောတယ်။ " ဘာတတ်နိုင်မှာလဲကွာ၊ လမ်းဆိုတာ အများအတွက်ပဲ၊ ငါ့မြေတွေ လမ်းထဲ ပါသွားလို့ မွဲမသွားပါဘူး၊ ကျန်တဲ့မြေနှင့် လုပ်စားရမှာပေါ့" တဲ့။
အလွန်တော်တဲ့ လူလို့ ဆိုရမှာပါ။ ဘာကြောင့်လဲ၊ သူ့မြေတွေ လမ်းထဲပါသွားပေမဲ့ စိတ်ဓာတ်မကျဘူး၊ သောက မဖြစ်ဘူး။ သူပြောလိုက်တဲ့ စကားက မှတ်သားစရာ။ " လမ်းဆိုတာ အများအတွက်ပဲ" တဲ့။ ဒီလိုစိတ်ထားတတ်လို့လည်း သူဟာ ဘာသောကမှ မဖြစ်တော့ဘူး။
လွတ်လပ်မှ ငြိမ်းချမ်းမယ်
-------------------------
ရှေးလူကြီးတွေက ပြောကြတယ်။ " ဦးခေါင်း အေးစေ ခြေထောက်နွေးစေ" တဲ့။ ဦးခေါင်းအေးစေဆိုတာ သောကကို အကြာကြီး သိမ်းမထာနဲ့လို့ ဆိုလိုတယ်။ သောကဖြစ်လွန်းအားကြီးရင် ခေါင်းပူသွားတယ်။ ဒီတော့ လူက နေလို့ထိုင်လို့ မကောင်းတော့ဘူး။ ဒါကြောင့် ပေါ့ပေါ့ပါးပါး နေတတ်ဖို့ လိုတယ်။
#ဘာပဲလုပ်လုပ် လုပ်စရာရှိတာကို လုပ်နိုင်သလောက် အေးအေးဆေးဆေး လုပ်ပါ။ ဆန္ဒမစောရဘူး။ အလုပ်လုပ်ပြီးရင်လည်း အေးအေးဆေးဆေး အနားယူရမယ်။
#အလုပ်လုပ်ရင်လည်း လောဘ မကြီးရဘူး၊ ဖြစ်ရင် ဖြစ်သလောက်ပဲ ကျေနပ်ပါ။ လိုသေးတယ် လိုသေးတယ်ဆိုပြီး မတွေးရဘူး။ နည်းနည်းရရ များများရရ ကျေနပ်ရမယ်။
#ဘယ်အရာမဆို အကြောင်းစုံမှ ဖြစ်တာပါ။ ဒါကြောင့် ပြောကြတာပေါ့၊ ကံမရှိ ဉာဏ်ရှိတိုင်းမွဲဆိုပြီး။ ဒါကြောင့် အလုပ်လုပ်ပါလျက် မဖြစ်ခဲ့ရင် ကံမပေးသေးလို့ပဲလို့ နှလုံးသွင်းရမယ်။
ဒီလိုစိတ်ထားတတ်ရင် ဘာသောကမှ ဖြစ်စရာ အကြောင်း မရှိဘူး။ သောကမဖြစ်ရင် လူက ပေါ့ပေါ့ပါးပါးလေး ဖြစ်သွားတယ်။ ပေါ့ပါးမှ လွတ်လပ်မယ်။ လွတ်လပ်မှလည်း ဘဝက ငြိမ်းချမ်းမှာ မဟုတ်လား။
"သတ္တဝါခပ်သိမ်း၊ တရားကိန်း၊ အေးငြိမ်းချမ်းသာ ရှိပါစေ"
_______________________
#အင်ကြင်းမြိုင်ဆရာတော်
#အရှင်ဒေဝိန္ဒာဘိဝံသ
No comments:
Post a Comment