1# သင်္ခါရအကြောင်း တစေ့တစောင်း.(၁)
=====================
" သူငယ်ချင်းရေ ဒီနေ့တော့ "သင်္ခါရ"အကြောင်းမေးချင်တယ်ကွ။
သင်္ခါရနဲ့ပတ်သက်ပြီး အဓိပ္ပါယ်အမျိုးမျိုး၊ အယူအဆအမျိုးမျိုးရှိနေတော့
ဘယ်လိုသဘောလဲလို့သိချင်လို့ မင်းဆီလာခဲ့တာပဲ။ မင်းသိသမျှ ရှင်းပြ
ပါအုံးကြာ.."
" မင်းပြောသလိုပဲ သင်္ခါရအသုံးက အမျိုးမျိုးရှိနေတော့ အကုန္မသိပါဘူး။ သိသလောက်၊ မှတ်သားမိသလောက်တော့ပြောပါ့မယ်။ လိုရင်
လဲဖြည့်ယူပေါ့ကွာ။
မနောရထပူရဏီကျမ်းမှာ သင်္ခါရကိုဘယ်လိုဖွင့်ပြထားသလဲဆို
တော့ -" သင်္ခတံ အဘိသင်္ခရောန ္တီတိ သင်္ခါရာ" =အကြင်ကုသိုလ်၊ အကု
သိုလ်စေတနာတရားတို့သည် ပြုပြုင်အပ်သော ဝိပါက်ကဋတ္တာရုပ်ကို ပြု
ပြင်စီရင်တတ်ကုန်၏။ ထိုသို့ ပြုပြင်စီရင်တတ်သောသတ္တိကြောင့် ထိုကု
သိုလ်၊အကုသိုလ်စေတနာတရားတို့သည် သင်္ခါရမည်ကုန်၏တဲ့။
ဒီအဖွင့်က ကံကိုသင်္ခါရလို့ခေါ်ကြောင်းဖွင့်ပြချက်ပါပဲ။ ဝိပါက်နာမ်
တရားတွေနဲ့ ကမ္မဇရုပ်တွေဖြစ်ပေါ်အောင် ပြုပြင်ဖန်တီးတတ်တဲ့သတ္တိရှိလို့ သင်္ခါရလို့ခေါ်ကြောင်းဖွင့်ပြထားတာပါ။ တရားကိုယ်ကောက်ရင်တော့
ကုသိုလ်စေတနာ(၁၇)ခု၊ အကုသိုလ်စေတနာ(၁၂)ခု၊ စုစုပေါင်းစေတနာ
(၂၉)ခုကိုကောက်ယူရပါတယ်။ ကာမာဝစရကုသိုလ်စေတနာ(၈)ခု၊ ရူပါဝစရကုသိုလ်စေတနာ(၅)ခု၊ ပေါင်း(၁၃)ခုကို ပုညဘိသင်္ခါရလို့ခေါ်ပါတယ်။ အကုသိုလ်စေတနာ(၁၂)ခုကို အပုညာဘိသင်္ခါရခေါ်ပါတယ်။ အရူပါ
ဝစရကုသိုလ်စေတနာ(၄)ခုကိုတော့ အာနေဉ္ဇာဘိသင်္ခါရလို့ခေါ်ပါတယ်။
ဒီကုသိုလ်၊အကုသိုလ်ကံတွေကိုပဲ ကာယသင်္ခါရ၊ ဝစီသင်္ခါရ၊ စိတ္တ
သင်္ခါရဆိုတဲ့အမည်နဲ့ တိကအဂုင်္တ္တိုရ် သင်္ခါရသုတ်စတဲ့ပါဠိတော်တွေမှာ
ဟောထားလဲတွေ့ရပါတယ်။ ကာယဒွါရနဲ့ ပြုလုပ်တဲ့ကံတွေကို ကာယ
သင်္ခါရ၊ ဝစီဒွါရနဲ့ပြုလုပ်တဲ့ကံတွေကို ဝစီသင်္ခါရ၊ မနောဒွါရနဲ့ပြုလုပ်တဲ့ကံ
တွေကို စိတ္တသင်္ခါရလို့ခေါ်ပါတယ်။ ဒါက ကံတွေကို ပြုလုပ်တဲ့ဒွါရအလိုက် သင်္ခါရသုံးမျိုးခွဲပြထားတာပါ။
ဒီသင်္ခါရသုံးမျိုးကို တရားကိုယ်ကောက်ရင် ကယသင်္ခါရနဲ့ ဝစီသင်္ခါ
ရ တစ္ခုစီမွာ ကုသိုလ်စေတနာ(၈)ခု၊ အကုသိုလ်စေတနာ(၁၂)ခု၊ပေါင်း
စေတနာ(၂၀)စီရပါတယ်။ စိတ္တသင်္ခါရမှာတော့ ကုသိုလ်စေတနာ(၈)ခု၊ အကုသိုလ်စေနတနာ(၁၂)ခု၊ ရူပကုသိုလ်စေတနာ(၅)ခု၊ အရူပကုသိုလ်
စေတနာ(၄)ခု၊ ပေါင်းစေတနာ(၂၉)ခုရပါတယ်။
အခုပြောခဲ့တဲ့ သင်္ခါရ(၆)မျိုးဟာ အဝိဇ္ဇာပစ္စယာ သင်္ခါရာဆိုတဲ့အတိုင်း အဝိဇ္ဇာဟူသောအကြောင်းကြောင့်ဖြစ်လာတဲ့ သင်္ခါရများလို့့့ဆိုပါတယ် ။ သူငယ်ချင်းရှင်းပါတယ်နော်..."
" အေးကွ၊ ဒီကံသင်္ခါရတွေဟာ ပဋိစ္စသမုပ္ပါဒ်ဒေသနာနည်းအရ အဝိဇ္ဇာကြောင့်ဖြစ်တဲ့သင်္ခါရတွေလို့ဆိုထားတော့ အဝိဇ္ဇာကြောင့်မဟုတ်တဲ့ တစ်ခြားသင်္ခါရတွေလဲ ရှိအုံးမှာပေါ့.."
" အေး..ရှိသေးတယ်ကွ။ ဝိသုဒ္ဓိမဂ်နဲ့ မနောရထပူရဏီကျမ်းတွေမှာ
သင်္ခါရကို လေးမျိုးပြထားပါတယ်။
၁။ သင်္ခတသင်္ခါရ= အကြောင်းရှိသောတရားအလုံးစုံတို့သည် သင်္ခတသင်္ခါရမည်ပါတယ်တဲ့။ မဟာစည်ဆရာတော်ဘုရားကြီးကတော့-ကံ
စိတ် ဥတု အာဟာရ စသောအကြောင်းတို့က ပေါင်းစုညီညွတ်၍ ပြုအပ်၊
ဖြစ်စေအပ်သောသင်္ခါရတရားများလို့ မိန့်ကြားထားပါတယ်။(စိတ်-၈၉၊
စေတသိက်-၅၂၊ ရုပ်-၂၈)
၂။ အဘိသင်္ခတသင်္ခါရ= ကံကြောင့်ဖြစ်ကုန်သော ဘုံသုံးပါး၌ အတွင်းဝင်ကုန်သော ရုပ်နာမ်တရားတိုသည် အဘိသင်္ခတသင်္ခါရမည်ပါတယ်တဲ့။ (စိတ်-၈၁၊ စေတသိက်-၅၂၊ ရုပ်-၂၈)
၃။ အဘိသင်္ခရဏက သင်္ခါရ=ဘုံသုံးပါး၌ဖြစ်သော ကုသိုလ်၊အကု
သိုလ်စေတနာ ၂၉-ခုတို့သည် အဘိသင်္ခရဏက သင်္ခါရမည်ပါတယ်တဲ့။
၄။ ပေယာဂါဘိ သင်္ခါရ= ကိုယ်၌ဖြစ်သောဝီရိယ၊ စိတ်၌ဖြစ်သော
ဝီရိယတို့ကိုတော့ ပယောဂါဘ်ိ သင်္ခါရလို့ခေါ်ပါတယ်တဲ့။
ပြီးတော့ သင်္ခါရယမိုက်နဲ့ စူဠဝေဒလ္လသုတ်မှာ ကာယသင်္ခါရ၊ ဝစီသင်္ခါရ၊ စိတ္တသင်္ခါရအမည်နဲ့လာတဲ့ သင်္ခါရသုံးမျိုးလဲရှိသေးတယ်။
ဒါပေမဲ့ ဒီသင်္ခါရသုံးမျိုးက ကံသင်္ခါရတွေမဟုတ်ဘူး။ အမည်သာတူပေမဲ့
အရတရားကိုယ်တွေမတူကြဘူး။ ကာယသင်္ခါရဆိုတာက ဝင်သက်ထွက်
သက်ကိုခေါ်တယ်။ ဝစီသင်္ခါရဆိုတာက ဝိတက်ဝိစာရကိုခေါ်တယ်။ စိတ္တ
သင်္ခါရဆိုတာက ဝိတက်ဝိစာရမှတပါး ကျန်စေတသိက်အားလုံးကိုခေါ်ပါ
တယ်။ ဒီသင်္ခါရသုံးမျိုးကို ခန္ဓာဖွဲ့ရင် ကာယသင်္ခါရက ရူပက္ခန္ဓာမှာအကျုံး
ဝင်ပါတယ်။ ဝစီသင်္ခါရက သင်္ခါရက္ခန္ဓာမှာအကျုံးဝင်ပါတယ်။ စိတ္တသင်္ခါရ
ကေတာ့ ဝေဒနာက္ခန္ဓာ၊ သညာက္ခန္ဓာ၊ သင်္ခါရက္ခန္ဓာတို့မှာအကျုံးဝင်ပါတယ်။
ဝင်သက်ထွက်သက်ဟာ ကာယဆိုတဲ့ကိုယ်နဲ့စပ်ပြီးဖြစ်တာကြောင့်
ကာယသင်္ခါရလို့ခေါ်အပ်ကြောင်း၊ မပြောဆိုမီမှာ ဘယ်လိုပြောဆိုမယ်လို့
ကြံစည်မှုဝိတက်၊ သုံးသပ်ဆင်ခြင်မှုဝိစာရတို့ ဖြစ်ပြီးမှသာ နှုတ်ဖြင့်ပြောဆိုခြင်းဖြစ်တာကြောင့် ဝိတက်ဝိစာရကို ဝစီသင်္ခါရလို့ခေါ်ဆိုအပ်ကြောင်း၊
ဝိတက်ဝိစာရတို့မှတပါး ဝေဒနာ၊ သညာစတဲ့စေတသိက်တရားတွေဟာ
စိတ်မှာမှီတွယ် စိတ်နဲ့စပ်ခါ စိတ်ကိုပြုပြင်ကြတာကြောင့် ဒီစေတသိက်
တွေကို စိတ္တသင်္ခါရလို့ခေါ်ဆိုအပ်ကြောင်း ဓမ္မဒိန္နာထေရီက ဖြေဆိုရှင်းပြ
ထားတာတွေ့ရပါတယ်။
အခုပြောခဲ့တဲ့ သင်္ခါရတွေအပြင် သင်္ခါရသဒ္ဒါနဲ့လာတဲ့ တခြားသော
သင်္ခါရတွေလဲ များစွာရှိသေးတယ်လို့ ဝိသုဒ္ဓိမဂ်မှာဆိုထားပါတယ်။ ပြီး
တော့ သင်္ခါရသဒ္ဒါနဲ့လာတဲ့ သင်္ခါရတိုင်းဟာလဲ သင်္ခတသင်္ခါရမှာ အကုန်
အကျုံးဝင်ကြတယ်၊ သင်္ခတသင်္ခါရမှာ အကျုံးမဝင်တဲ့ တစ်ခြားတစ်ပါးသော သင်္ခါရရယ်လို့ မရှိပါဘူးလို့လဲ ဆက်ပြီးဆိုထားပါသေးတယ်။
ကဲ-သူငယ်ချင်း၊ဘယ်လိုသဘောပေါက်လိုက်သလဲ၊ ပြောပါအုံး..."
" အေးကွ..အမှန်အတိုင်းဝန်ခံရရင် ငါတို့က ကံကိုသင်္ခါလို့ခေါ်တယ်
ဆိုတာလောက်သာသိထားတာကွ။ ဒါ့ကြောင့် သင်္ခါရလို့ပြောလိုက်ရင် ပြုလုပ်မှု၊ အားထုတ်မှုကံတွေပဲလို့ နားလည်လိုက်တာပေါ့ကွာ။ ခုလိုတစ်ခါမှ
မကြားဖူးခဲ့ဘူး။ မင်းပြောတဲ့ကျမ်းဂန်တွေအရဆိုရင် အကြောင်းကြောင့်ဖြစ်လာတဲ့တရားမှန်သမျှ သင်္ခတသင်္ခါရမည်တယ်ဆိုတော့ ရုပ်နာမ်မှန်သမျှ သင်္ခတသင်္ခါရမည်တယ်ဆိုတဲ့အဓိပ္ပါယ်ပဲပေါ့။ ဘာကြောင့်လဲဆိုတော့ အကြောင်းမရှိဘဲဖြစ်လာတဲ့ရုပ်နာမ်လို့မှမရှိဘဲကိုကွ။ အကြောင်းကင်းတဲ့ ရုပ်နာမ်လို့ လောကမှာမရှိဘူးလေကွာ။"
" ဟုတ်ပါပြီ၊ ဆက်ပြောပါအုံး"
" ပြီးတော့သင်္ခတသင်္ခါရဟာ သင်္ခါရအားလုံးရဲ့အချုပ်ပဲလို့သိလိုက်ရ
တယ်။ သင်္ခါရအမျိုးအစားတွေဘယ်လိုပဲ ကွဲပြားကွဲပြား ဆိုင်ရာအကြောင်းတွေကြောင့်ဖြစ်လာကြတဲ့ ရုပ်နာမ်တရားတွေချည်းဖြစ်တာကြောင့် သင်္ခတသင်္ခါရအတွင်းဝင်ကုန်ကြတယ်လို့ နားလည်သွားပါတယ်။ ဒါ့ကြောင့်
ရုပ်နာမ်ဓမ္မသင်္ခါရလို့ပြောရင် သင်္ခါရအမျိုးအစားအားလုံးကို သိမ်းယူပြီးပြောတယ်ဆိုတာရှင်းသွားတာပေါ့ကွာ။
ပြီးတော့"အနိစ္စာ ဝတ သင်္ခါရာ ဥပ္ပါဒဝယဓမ္မိနော"ဆိုတဲ့ဟောကြား
ချက်အရ သင်္ခါရတရားတွေဟာ ဖြစ်လဲဖြစ်တတ်၊ ပျက်လဲပျက်တတ်ကြ
တာကြောင့် သင်္ခတလက္ခဏာလဲရှိနေပြန်တယ်။ ဒါ့ကြောင့် သင်္ခါရတရား
တွေဟာ သင်္ခတသဘောအတွင်းဝင်နေတယ်လို့ ဆိုနိုင်မယ်ထင်တယ်"
" မှန်ပါတယ်၊ သင်္ခတသဘောမှလွတ်တဲ့ သင်္ခါရရယ်လို့ မရှိကောင်း
ပါဘူး။ ပရမတ်တရားတွေကို သင်္ခတပရမတ်၊ အသင်္ခတပရမတ်လို့နှစ်မျိုးပဲခွဲခြားနိင်ပါတယ်။ သုံးခုမြောက်ပရမတ်ရယ်လို့မရှိဘူးလေ။ အသင်္ခတ
ဖြစ်တဲ့နိဗ္ဗာန်ကိုဖယ်လိုက်ရင် ကျန်တဲ့ရုပ်နာမ်တရားအားလုံးဟာ သင်္ခတ
ပရမတ်ပဲပေါ့။ ပြီးတော့သင်္ခတဆိုတာ အကြောင်းမကင်းတဲ့တရားပဲ။ ဖြစ်
တည် ပျက် ဥပါဒ် ဌီ ဘင်လက္ခဏာရှိတဲ့တရားပဲ။ သင်္ခါရတရားတွေဟာလဲ အကြောင်းမကင်းတဲ့တရား၊ ဥပါဒ် ဌီ ဘင်လက္ခဏာရှိတဲ့တရားတွေ
ဆိုတော့ သင်္ခါရတရားဟာ သင်္ခတသဘောအတွင်းဝင်တဲ့တရားဆိုတာ
သဘာဝကျပါတယ်။ "
" အေးကွ..ဒီအချက်ကိုတော့ စိတ်ထဲရှင်းသွားပါပြီ။ ဒါပေမဲ့ဒေသနာတွေမှာ သင်္ခါရပုဒ်ကိုတွေ့ရင် ဘယ်တရားတွေကိုကောက်ယူရမယ်ဆို
တဲ့ နည်းလမ်းညွှန်ကြားချက်မျိုးရှိရင် ဒါလဲသိချင်သေးတယ်ကွ"
ဆက်လက်ဖေါ်ပြပါမည်........
ဓမ္မမိတ်ဆွေအပေါင်း ရွှင်လန်းချမ်းမြေ့ တရားထူးတွေ့ကြပါစေ.....
Credit: ဆရာဝင်းအောင်ကြည်
No comments:
Post a Comment