ကောင်းသောစိတ်၏ ကောင်းနိူင်စွမ်း
_____________________________
ကောင်းသောစိတ်က လွဲလို့
မိမိကိုယ် ကူညီနိုင်သော
စောင့်ရှောက်နိုင်သော
ဖေးမနိုင်သော
ကောင်းသွားစေနိုင်သော အရာ
အခြားမရှိ။
စိတ်တကယ် ကောင်းလာပြီဆိုလို့ရှိရင်
စိတ်တကယ် အဆင့်မြင့်လာပြီဆိုလို့ရှိရင်
နိဗ္ဗာန်ကိုတောင် မြင်နိုင်စွမ်း ရှိလာတယ်။
အခု နိဗ္ဗာန်ကို မမြင်သေးဘူး။
နိဗ္ဗာန်ကို မမြင်သေးတော့ ချမ်းသာစစ်
ချမ်းသာမှန်ကို မမြင်သေးတော့
ဒီချမ်းသာတု ချမ်းသာယောင်ကိုပဲ
ချမ်းသာစစ် ချမ်းသာမှန် ထင်ပြီးတော့
လောဘတွေ ကြီးကြတယ်, လိုချင်မူတွေ
များလာတယ်။
လိုချင်တဲ့အတိုင်း မဖြစ်တဲ့အခါ
မကျေနပ်မူတွေ ဖြစ်လာတယ်။
လိုချင်မူရဲ့ ဖြည့်ဆည်းပေးမယ့်
အရာကိုတောင် တာဆီးလာပြီဆိုရင်
အဲဒီ အတားအဆီးတွေကို
ဖျက်ဆီးပစ်မယ်ဆိုပြီးတော့
ဒေါသတွေကြီးကြတယ်။
ဒေါသတွေ ကြီးတယ်ဆိုတာ
လောဘတွေ ကြီးလို့ ကြီးတာဗျ။
အကြောင်းမဲ့ ဒေါသ ဖြစ်တာ မဟုတ်ဘူး။
အလိုဆန္ဒတွေ ရှိနေသေးသမျှ
အလိုကျခြင်း, အလိုမကျခြင်းဆိုတာတွေ
ရှိနေအုံးမှာပဲ။
ဆိုလိုတာက လောဘတွေ ရှိနေသေးသမျှ
ဒေါသတွေ ကြီးနေရအုံးမှာပဲ။
ဒေါသတွေ ကြီးနေရသေးသမျှ
ဒုက္ခတွေ ရောက်နေရအုံးမှာပဲ။
စိတ်ဟာ မသက်မသာ ဖြစ်နေအုံးမှာပဲ။
စိတ်ဓာတ်တွေ နိမ့်ကျနေတဲ့အချိန်မှာ
နိဗ္ဗာန်ကို မမြင်နိုင်ဘူး။
စိတ်ဓာတ်တွေ တကယ်မြင့်လာပြီ
အရည်အသွေး ရှိလာပြီ
အမှန်တွေ မြင်ပါ များလာပြီ
စိတ်ဓာတ်တွေ ဖြူစင်လာပြီ
သန့်ရှင်းလာပြီဆိုရင် နောက်ဆုံး
နိဗ္ဗာန်ကို မြင်မယ်။
ခန္ဓာရဲ့အပြစ်ကို မြင်မယ်။
ခန္ဓာဟာ ဆင်းရဲပဲဆိုတာကို
တကယ် သိမယ်။
တကယ်သိလာတာနဲ့ တစ်ပြိုင်နက်တည်း
လိုချင်မူဟာ တကယ် နည်းလာမယ်။
လိုချင်မူ နည်းလာတာနဲ့ တစ်ပြိုင်နက်တည်း
အလိုမကျဘူးဆိုတာတွေဟာ နည်းလာမယ်။
လိုချင်တာတွေ များနေသေးသမျှ
ကြိုးစားအားထုတ်မူတွေ များမယ်။
ကြိုးစားအားထုတ်မူတွေ များလာတာနဲ့
တစ်ပြိုင်နက်တည်း အခက်အခဲတွေ
အကြပ်အတည်းတွေ ခလုတ်တွေ
ဆူးငြှောင့်တွေဆိုတာတွေ
အများကြီး ဖြစ်လာမယ်။
အေး ဒါကြောင့် ကောင်းတဲ့စိတ်ကလေးကို
အခြေခံလိုက်ရတာဟာ ဘယ်လောက်
ကောင်းလည်းဆိုတာလေးကို ပုံပေါ်အောင်
ပြောနေတာ။
စိတ်တကယ်ကောင်းလာပြီ
စိတ်တကယ် မြင့်မြတ်လာပြီဆိုလို့ရှိရင်
တကယ် ဖြူစင်လာပြီဆိုလို့ရှိရင်
နိဗ္ဗာန်ကိုတောင် မြင်နိူင်တယ်။
စိတ်တကယ် ဖြူလာပြီဆိုတော့
အရိယာကိုကစ ဖြူစင်ခြင်းလို့
အဓိပ္ပာယ် ရတာ မဟုတ်လား။
စိတ်တကယ် ဖြူလာပြီ
စိတ်တကယ် အဆင့်မြင့်လာပြီဆိုရင်
နိဗ္ဗာန်ကို မြင်ပြီးတော့
လောကရဲ့ အမှန်တရားတွေကို မြင်ပြီးတော့
စိတ်ဓာတ်တွေ မြင့်ပြီးတော့
ဆင်းရဲဒုက္ခ တကယ် ငြိမ်းသွားကြတယ်။
ဒါကြောင့် စိတ်တွေ ဖြူစင်ရတာ
စိတ်တွေ ကောင်းရတာဟာ
လောကမှာ အကောင်းဆုံးပဲလို့
နားလည်ဖို့ လိုတယ်။
သစ္စာရွှေစည်ဆရာတော်
"ချမ်းသာချင်ရင် စိတ်ကိုပြင်" တရားတော်မှ
ကောက်နူတ်ချက် ဖြစ်ပါသည်။
No comments:
Post a Comment