အကောင်းရဖို့ မလွယ်သူမှာ,အညံ့နှင့်သာ,ပျော်ရ၏..

အကောင်းရဖို့ မလွယ်သူမှာ,

အညံ့နှင့်သာ,ပျော်ရ၏..

_________________

(သစ္စာရွှေစည်)

နာဂိတ..

​ကျောင်းတံခါးမုခ်ပြင်ဘက်၌

ငါးလုနေသောတံငါသည်တို့ကဲ့သို့

ကျယ်လောင်သောအသံရှိသူတို့ကား

အဘယ်သူတို့နည်း..

မြတ်စွာဘုရား..

မြတ်စွာဘုရားနှင့်ရဟန်းသံဃာကို

ဖူးမျှော်ရန်အတွက်

လှူဖွယ်တို့နှင့်တကွ

ရောက်ရှိနေသော

ဣစ္ဆာနင်္ဂလရွာသား

ဒကာ ဒကာမတွေပါဘုရား..

နာဂိတ..

ငါသည် 

အခြံအရံအကျော်အစောနှင့်

မဆက်ဆံလို..

အခြံအရံအကျော်အစောသည်လည်း

ငါနှင့်မဆက်ဆံစေနှင့်..

နာဂိတ..

လွတ်မြောက်မှုချမ်းသာ

ဆိတ်ငြိမ်မှုချမ်းသာ

ငြိမ်းအေးမှုချမ်းသာ

သိမှုချမ်းသာ တို့ကို

လွယ်လွယ်ကူကူ

မရသူတို့သည်သာ

မစင်ကြယ်သောကာမချမ်းသာ

ငိုက်မျဥ်းမှုချမ်းသာ

လာဘ်ပူဇော်သက္ကာရချမ်းသာ

ကျော်ကြားမှုချမ်းသာတို့ကို

ခံစားကြကုန်၏..

နာဂိတ..

လွတ်မြောက်မှုချမ်းသာ

ဆိတ်ငြိမ်မှုချမ်းသာ

ငြိမ်းအေးမှုချမ်းသာ

သိမှုချမ်းသာ တို့ကို

အလိုရှိတိုင်း

လွယ်လွယ်ကူကူ

ရသော ငါ သည်

အဘယ်မှာလျင်

မစင်ကြယ်သောကာမချမ်းသာ

ငိုက်မျဥ်းမှုချမ်းသာ

လာဘ်ပူဇော်သက္ကာရချမ်းသာ

ကျော်ကြားမှုချမ်းသာတို့ကို

ခံစားကုန်အံ့နည်း...

နာဂိတ..

စားသောက်အပ်သော

အစာအာဟာရ၏အကျိုးဆက်ကား

မစင်ကျင်ကြီးကျင်ငယ်တို့တည်း..

နာဂိတ..

ချစ်ခင်နှစ်သက်မှုတို့၏

အကျိုးဆက်ကား

ဝမ်းနည်းပူဆွေးငိုကြွေးခြင်းတို့တည်း..

နာဂိတ..

မတင်တယ်မှု(အသုဘ)ကို

အဖန်ဖန်ရှုခြင်း၏အကျိုးဆက်ကား

တင့်တယ်မှုတို့၌

ရွံရှာစက်ဆုပ်မှုဖြစ်ခြင်းတည်း..

နာဂိတ..

မျက်စိ နား နှာ

လျာ ကိုယ် စိတ် တို့ကို

မမြဲဟု အဖန်ဖန်ရှုခြင်း၏

အကျိုးဆက်ကား

တွေ့ထိမှုဖဿ တို့၌

ရွံရှာစက်ဆုပ်မှုဖြစ်ခြင်းတည်း..

နာဂိတ..

ခန္ဓာငါးပါးတို့၏

ဖြစ်ခြင်းပျက်ခြင်းကို

အဖန်ဖန်ရှုခြင်း၏အကျိုးဆက်ကား

စွဲလန်းမှုဥပါဒါန်တရားတို့၌

ရွံရှာစက်ဆုပ်မှုဖြစ်ခြင်းတည်း..

(အင်္ဂုတ္ထိုရ် ပဥ္စကနိပါတ်

နာဂိတသုတ်၌ အကျယ်ရှုလေ..)

(သစ္စာရွှေစည်)

***************