အကြိမ်ကြိမ်ကြိုးစားပါ

အကြိမ်ကြိမ်ကြိုးစားပါ

___________________

လောကီအလုပ်ဖြစ်စေ, လောကုတ္တရာအလုပ်ဖြစ်စေ အလုပ်တစ်ခု အောင်မြင်ဖို့အတွက် ခဏတဖြုတ် လုပ်လို့ မရပေ၊ အချိန် ကြာမြင့်စွာ ကြိုးစားရ၏။ အချိန်ကြာမြင့်စွာ ကြိုးစားအားထုတ်ခြင်းကို "စိရကာလ ဘာဝနာ" ဟု ခေါ်သည်။

စိတ်ကလည်း ခက်၏။ ဘာပဲလုပ်လုပ် အစပိုင်းမှာတော့ စိတ်ပါလက်ပါ လုပ်၏။ ကြာတော့ ငြီးငွေ့သွား၏။ ငြီးငွေ့လျှင် " ဖြစ်မှာ မဟုတ်ပါဘူး" ဆိုပြီး နောက်ဆုတ်သွားတော့၏။ 

ယင်းသို့ နောက်ဆုတ်သွားသည့်အတွက် အလုပ်လည်း မပြီးတော့ပေ။ ထို့ကြောင့် အလုပ်တစ်ခု အောင်မြင်ဖို့အတွက် အချိန်ပေးရမည် ဖြစ်သည်။ ပန်းတို့သည် ချက်ခြင်း ပွင့်လာကြသည် မဟုတ်သကဲ့သို့ အသီးတို့သည်လည်း ချက်ခြင်း သီးလာကြသည် မဟုတ်ပေ။

ပေးဆပ်မှ ရနိုင်တာပါ

--------------------------

#ကဗျာဆရာ ရော့ဘတ်ဖရော့စ်သည် ကဗျာရေး ဝါသနာပါ၏။ ထို့ကြောင့် ကဗျာတို့ကို မြောက်များစွာ ရေးခဲ့၏။ သို့သော် ကဗျာစာအုပ် တစ်အုပ်ကိုတောင် မထုတ်နိုင်ခဲ့ပါ။ သူသည် ကဗျာများကို ကြိုးစားပြီး ရေး၏။ နှစ်ပေါင်း ၂၀- ကျော် ကြာမှ သူ ရေးသော ကဗျာများ နာမည်ကြီးပြီး ကဗျာစာအုပ် ထုတ်ဝေနိုင်ခဲ့သည်။

#အဆိုတော် ပါဗာရော့တီသည် သီချင်းဆို ဝါသနာပါ၏။ ထို့ကြောင့် ပညာရှင်များထံ ချဉ်းကပ်ပြီး အဆိုပညာ သင်ယူလေသည်။ သီချင်းပေါင်း မြောက်များစွာလည်း ဆိုခဲ့၏။ သို့သော် မအောင်မြင်ခဲ့ပါ။ ၁၄- နှစ်ကြာမှ သူဆိုသော သီချင်းသည် နာမည်ကျော်သွားလေတော့သည်။

#စန္ဒယားဆရာကြီး ရူဘင်စတိုင်ဆိုလျှင် နာမည် မကြီးခင်က စန္ဒယားကို နေ့တိုင်း လေ့ကျင့်၏။ တစ်ရက်မှ အပျက်မခံပေ။ နာမည်ကြီးသည့်နောက်ပိုင်းမှာလည်း နေ့တိုင်း လေ့ကျင့်၏။ လူတစ်ယောက်က " ဆရာကြီး ဒီလောက်တော်နေတာပဲ၊ နေ့တိုင်း လေ့ကျင့်စရာ မလိုပါဘူး" ဟု ပြောသောအခါ " အတော်ဆုံး ဖြစ်ချင်လို့ကွ" ဟု ပြောသတတ်။

#မဟာသီဝဆရာတော်ကြီးသည် တရားရဖို့အတွက် တောထဲကို ရောက်လာပြီး ဝိပဿနာတရားကို အပြင်းအထန် အားထုတ်လေ၏။ သို့သော် ဘာတရားမှ မရ။ ထိုသို့ အားထုတ်ရင်းဖြင့် နှစ်ပေါင်း ၃၀- ကြာသွားလေသည်။ ထို့နောက် ဆက်လက်ပြီး အားထုတ်တော့မှ ရဟန္တာအဖြစ်သို့ ရောက်ရှိသွားလေတော့သည်။

ကြိုးစားမှအောင်မြင်မယ်

----------------------

မည်သည့်နယ်ပယ်မှာ ဖြစ်ဖြစ် အောင်မြင်မှု ရဖို့အတွက် ကြိုးစားအားထုတ်ရစမြဲပင် ဖြစ်သည်။ စစ်မှန်သော အောင်မြင်မှုတွင် ဖြတ်လမ်းဆိုသည်မှာ မရှိပါ။ ထို့ကြောင့် ခိုင်မာသော စိတ်ဓာတ်ဖြင့် ပုံမှန် ကြိုးစားဖို့ လို၏။

" အနာခံမှ အသာစံရမည်" ဆိုသည့်အတိုင်း အောင်မြင်ဖို့အတွက် ကြိုးစားရစမြဲ ဖြစ်သည်။ ထို့ကြောင့် ဘာပဲလုပ်လုပ် "ငုတ်မိသဲတိုင် တက်နိုင်ဖျားရောက်" ဆိုသကဲ့သို့ နောက်မဆုတ်တမ်း ကြိုးစားရမည် ဖြစ်၏။ ယင်းသို့ ကြိုးစားမှလည်း အောင်မြင်မှု ရရှိမည် ဖြစ်ပါပေ၏။

သံကောင်းသည့်ဓား၊ ဖြစ်တုံငြားလည်း၊ 

ကျောက်သားထက်တွင်၊ မပြုပြင်က၊

သံပင်ကောင်းလျှက်၊ ဓားမထက်နိုင်။

ဉာဏ်စွမ်းဉာဏ်ဆ၊ ရှိတုံကလည်း 

လုံ့လနတ္ထိ၊ ဇွဲမရှိက၊ လိုရာခရီး၊

အချည်းနှီးတည်း။

သီဟမည်ခေါ်၊ ခြင်္သေ့သော်လည်း၊ 

အိပ်ပျော်၍သာ၊ နေခဲ့ပါမူ ၊

ဘယ်မှာစားဖွယ်၊ ခံတွင်းလယ်သို့၊

သားငယ်သမင်၊ ဝင်လာအံ့နည်း။ 

(မန်လည်ဆရာတော်)

"သတ္တဝါခပ်သိမ်း၊ တရားကိန်း၊ အေးငြိမ်းချမ်းသာ ရှိပါစေ"

_______________________

#အင်ကြင်းမြိုင်ဆရာတော်

#အရှင်ဒေဝိန္ဒာဘိဝံသ