_____________
လူတိုင်းလူတိုင်းသည် အသက်ရှည်ချင်ကြ၏။ ထို့ကြောင့် အသက်ရှည်ပါရစေဟု ဆုတောင်းကြခြင်း ဖြစ်သည်။ ဘယ်လိုပင် ဆုတောင်းဆုတောင်း မိမိ၏ အသက်အပိုင်းအခြားကို ဘယ်သူမှ အတိအကျ မသိနိုင်ပေ။ ကံဉာဏ်ဝီရိယ အားလျော်စွာ အချိန်ကာလတစ်ခုထိ နေရသည်သာ ဖြစ်သည်။
ထို့ကြောင့် အကန့်အသတ်နှင့် နေရသည့် လူ့ဘဝလေးမှာ စင်ကြယ်သော ရှင်သန်ခြင်း ဖြစ်ဖို့ အရေးကြီး၏။ စင်ကြယ်သော ရှင်သန်ခြင်း ဖြစ်ဖို့အတွက် ရိုးသားဖို့ လို၏။ ရိုးသားမှ လိပ်ပြာလုံ၏။ လိပ်ပြာလုံမှ အဓိပ္ပါယ်ရှိသော ရှင်သန်ခြင်းဟု ဆိုရမည် ဖြစ်သည်။
ကိုယ်က မရိုးသားလျှင် ကိုယ့်စိတ်က ပြန်ခြောက်နေ၏။ ကိုယ့်စိတ်က ပြန်ခြောက်နေလျှင် လိပ်ပြာမလုံတော့ပေ။ လိပ်ပြာမလုံလျှင် ကျီးလန့်စာစားဘဝဟု ဆိုရမည် ဖြစ်၏။ ကျီးလန့်စာစားဘဝ ဖြစ်နေလျှင် မိမိ၏ ရှင်သန်ခြင်းသည် အဓိပ္ပါယ် မရှိတော့ပေ။ ထို့ကြောင့် ကိုယ့်ကိုယ်ကို လိပ်ပြာလုံအောင် ကြိုးစားရမည် ဖြစ်သည်။
ပန်းပုဆရာ
---------------
တနေ့တွင် လူငယ်လေးတစ်ယောက်သည် တည်ဆောက်ဆဲ ဘုရားကျောင်းတစ်ကျောင်းကို ရောက်သွားလေသည်။ ထိုဘုရားကျောင်းတွင် ထားရှိမည့် ရုပ်တုကြီးတစ်ခုကို ပန်းပုဆရာကြီးတစ်ဦးက ထုလုပ်နေသည်ကို မြင်လိုက်ရသည်။
ပန်းပုဆရာကြီး ထုလုပ်နေသည့် ရုပ်တုကြီးအနီးတွင် ထိုရုပ်တုနှင့် ပုံစံတူ ရုပ်တုကြီးတစ်ခုကို လှဲလျက် အနေအထားဖြင့် တွေ့လိုက်ရ၏။ ထို့ကြောင့် သူသည် ပန်းပုဆရာကြီးကို မေးလိုက်၏။
"ဆရာကြီး ဤဘုရားကျောင်းတွင် ပုံစံတူ ရုပ်တုနှစ်ခု ထားမလို့လား ” ။
" တစ်ရုပ်တည်း ထားမှာပါကွယ် ... လှဲထားတဲ့ ရုပ်တုက ပြီးခါနီးမှ ပျက်စီးသွားလို့ အခု နောက်တစ်ခု ထပ်လုပ်နေရတာကွဲ့"။
"ဆရာကြီးခင်ဗျား ... ဘယ်နေရာမှာများ ပျက်စီးသွားလို့လဲ ... ကျွန်တော်တော့ မတွေ့မိဘူး"။
" သေချာကြည့်လိုက်ပါ၊ နှာခေါင်းမှာ နည်းနည်းလေး ပဲ့နေတယ်”။
“ဒီရုပ်တုကို ဘယ်နေရာ ထားမှာမို့လဲ"။
“ဘုရားကျောင်းထဲက ပေ ၂၀ အမြင့်ရှိတဲ့ တိုင်လုံးပေါ်မှာ ထားမယ်" ။
“ဆရာကြီးရယ် ပေ ၂၀ -အမြင့်ရှိတဲ့ တိုင်လုံးပေါ်မှာ ထားမယ်ဆိုရင် ဒီရုပ်တု နှာခေါင်းပဲ့တာလေးကို ဘယ်သူမှ မမြင်နိုင်ပါဘူး၊ ကျွန်တော်တောင် မနည်းကြည့်မှ မြင်ရတာပါ”။
ထိုအခါ ပန်းပုဆရာကြီးက ရှင်းပြလိုက်၏။ " လူလေး ဘယ်သူမှမသိပေမယ့် ... ကိုယ်ကိုယ်တိုင် သိနေတယ်လေ၊ ဒီတော့ ကိုယ့်ကိုယ်ကို လိပ်ပြာမလုံဘူး၊ ဒါကြောင့် နောက်တစ်ခု ထပ်လုပ်ရတာပေါ့ကွယ်"။
လူငယ်လေးသည် ထိုစကားကို ကြားလိုက်သောအခါ ပန်းပုဆရာကြီး၏ ရိုးသားမှုကို ကြည်ညိုပြီး ဦးညွတ် လိုက်လေတော့သည်။
ကိုယ့်ကိုယ်ကို လိမ်လို့မရ
-------------------------
လောကကြီးမှာ မည်သူမဆို ကိုယ့်အကြောင်း ကိုယ်အသိဆုံး ဖြစ်၏။ ထို့ကြောင့် ကိုယ့်ကိုယ်ကို လိမ်လို့ မရပေ။ မှန်၏။ ကိုယ်က မဟုတ်တာလုပ်ခဲ့လျှင် သူများ မသိသော်လည်း ကိုယ်က သိနေ၏။
ကိုယ်သိနေသည့်အတွက် ကိုယ်က မဟုတ်တာ လုပ်ခဲ့လျှင် ကိုယ့်ကိုယ်ကို လိပ်ပြာ မလုံတော့ပေ။ လိပ်ပြာမလုံလျှင် တွေးလိုက်တိုင်း မသိုးမသန့် ဖြစ်နေတော့၏။ ထို့ကြောင့် လိပ်ပြာလုံဖို့ လို၏။ လိပ်ပြာလုံဖို့အတွက် ရိုးသားဖို့ လိုအပ်ပေသည်။
လေးလေးနက်နက် တွေးကြည့်သောအခါ ရိုးသားခြင်းသည် တန်ဖိုးဖြတ်လို့ မရပေ။ ထို့ကြောင့် ကိုယ့်ဘဝကို ရိုးသားမှုဖြင့် တည်ဆောက်ရမည် ဖြစ်၏။ သို့မှသာ ကိုယ့်ကိုယ်ကို လိပ်ပြာလုံမည် ဖြစ်သည်။ လိပ်ပြာလုံမှလည်း ဘဝသည် တည်ငြိမ်မည် ဖြစ်၏။ တည်ငြိမ်မှလည်း ငြိမ်းချမ်းမည် ဖြစ်ပါပေ၏။
"သတ္တဝါခပ်သိမ်း၊ တရားကိန်း၊ အေးငြိမ်းချမ်းသာ ရှိပါစေ"
________________________
#အင်ကြင်းမြိုင်ဆရာတော်
#အရှင်ဒေဝိန္ဒာဘိဝံသ
No comments:
Post a Comment