ကိသာဂေါတမီ

ကိသာဂေါတမီ

🌿🌺🌺🌺🌿

ရှေးသရောအခါ သာဝတ္ထိပြည်တွင် ကိသာဂေါတမီ အမည်ရှိ ချမ်းသာသောသူဌေးသမီးတစ်ဦးရှိလေသည်။ သူမအရွယ်ရောက်သောအခါ မိဘများမှာ နွမ်းပါးသောအဖြစ်သို့ ရောက်ရှိသွားရသည်။ ထိုအချိန်တွင် သာဝတ္ထိပြည်ရှိသူဌေးကြီးတစ်ဦးကလည်း သူ့ထံ၌ ပိုင်ဆိုင်ထားသော ရွှေများမှာ မီးသွေးအဖြစ်သို့ ပြောင်းသွား၍ စိတ်ညစ်နေချိန်ဖြစ်၏။ 

ထိုအခါ မိတ်ဆွေတစ်ဦးမှ အသင် စိတ်မပျက်ပါနှင့် ဘုန်းကံရှိသူတစ်ဦးနှင့်တွေ့ပါက သင်၏ မီးသွေးများမှာ ရွှေအဖြစ်သို့တစ်ဖန်ပြန်ရောက်နိုင်ကြောင်း အားပေးစကား ပြောဆို၏။ သူဌေးကြီးလည်း သူ့ရွှေများ ပြန်လည်ရရှိရေးအတွက် လုံ့လစိုက်ကာ ဈေးတွင် မီးသွေးတစ်ဖြစ်လည်းရွှေများကို လာဝယ်မည့်သူကို စောင့်စားရောင်းချနေတော့သည်။ ကိသာဂေါတမီမှ ထိုမီးသွေးများကို မြင်သော် “ဒီလောက်များပြားလှတဲ့ ရွှေများကို အဘယ်သူ ဝယ်နိုင်ပါမည်နည်း” ဟု ပြောဆိုပြီး ကိသာဂေါတမီလက်နှင့် ထိလိုက်သည်နှင့်တစ်ပြိုင်နက် မီးသွေးများမှာ ရွှေအဖြစ်သို့ပြောင်းသွားရလေသည်။ 

သူဌေးကြီးမှာ ဝမ်းမြောက်ဝမ်းသာဖြင့် “ဘုန်းကံရှိသူကို တွေ့ပြီ”ဟုဆိုကာ သူ၏ သားကြီးနှင့် ကိသာဂေါတမီကို ထိမ်းမြားလက်ထပ်ပေးရန် စီစဉ်ပေးလေသည်။ သို့ဖြစ်၍ ကိသာဂေါတမီလည်း သူဌေးသားနှင့် လက်ထပ်လိုက်ရတော့သည်။ 

လက်ထပ်ပြီးသော ကိသာဂေါတမီမှာ ယောက္ခမ သူဌေးကြီးအိမ်မှာပင် လိုက်လံနေထိုင်ရသောကြောင့် စိတ်ထားမကောင်းသူ ယောက္ခမကြီး၏ ကြမ်းကြုတ်သော အပြုအမူတို့ကြောင့် စိတ်မချမ်းမြေ့ဖြစ်ရလေတော့သည်။ ကံဆိုးမှုများနှင့်နေထိုင်လာရာ အချိန်အတော်တန်ကြာမှ သားလေးတစ်ယောက် ဖွားမြင်လေသည်။ သားလေးမွေးဖွားလာ၍ ကံကောင်းမှုများပင် ကြာကြာမခံသေးချိန်တွင် သားကလေးမှာ သုံးနှစ်သားအရွယ်တွင် ဆုံးပါးသွားတော့သည်။

ထိုအခါ ကိသာဂေါတမီတစ်ယောက် ဆုံးပါးသွားသော သားသေကို ရင်ဝယ်ပိုက်လျက် ရူးမတတ်ဖြစ်ပြီး အရပ်တကာလှည့်ကာ သူ့သားသေကို အသက်ရှင်အောင် ကုစားပေးပါဟု  လူတကာကို လိုက်လံတောင်းပန်နေတော့သည်။လူများကလည်း ကိသာဂေါတမီကို “သင်ရူးနေလေပြီ” ဟု ဆိုကြသည်။ ကြင်နာသော သူတစ်ယောက်ကမူ “ချစ်သမီး သင့်သားကို ပြန်ရှင်လာအောင် ကုသနိုင်သောဆေးကိုတော့ ငါမသိ၊ သို့သော် ဂေါတမမြတ်စွာဘုရားရှင်ကမူ ကုသနိုင်သော ဆေးနည်းကို သိတော်မူ၏။ ဒါကြောင့် ချစ်သမီး ဂေါတမဘုရားရှင်ကိုယ်တော်မြတ်ထံသာ သွားပါလေ” ဟု လမ်းညွှန်လေသည်။ 

ကိသာဂေါတမီလည်း အလျင်အမြန်ပင် မြတ်စွာဘုရားရှင်ထံ သွားရောက်တော့သည်။ မြတ်စွာဘုရားထံတွင် သူ့သား အသက်ပြန်ရှင်နိုင်မည့် ဆေးကို တောင်းသည်။ ဘုရားရှင်က “ကိသာဂေါတမီ သင့်သားအတွက် ဆေးဖော်စပ်ရန် လူမသေဖူးသော အိမ်မှ မုန်ညင်းစေ့ တစ်ဆုပ်မျှ တောင်းခဲ့လော့” ဟု ဉာဏ်တော်ဖြင့် ဆင်ခြင်၍ မိန့်တော်မူလိုက်သည်။ 

ကိသာဂေါတမီလည်း လူမသေဖူးသော အိမ်မှ မုန်ညင်းတစ်ဆုပ်ရဖို့သာ အရေးတင်၍ မြို့တစ်ပတ်အနှံ့ လိုက်ရှာလေတော့သည်။ မည်သည့်အိမ်မှာမှ လူမသေဖူးသည်ဆိုသည်မှာ မရှိ တစ်ဦးမဟုတ်တစ်ဦး သေဖူးကြသည်ချည်းသာ ဖြစ်နေသောကြောင့် လက်လျှော့ပြီး သေဆုံးပျက်စီးတတ်ခြင်း အနိစ္စတရားကို နားလည်သဘောပေါက်ကာ မြတ်စွာဘုရားရှင်ထံ ပြန်လာခဲ့သည်။ 

ထိုအခါ မြတ်စွာဘုရားရှင်က “ကြီးစွာသော ရေအလျဉ်သည် အိပ်ပျော်နေသော ရွာသူ၊ ရွာသားအပေါင်းကို တိုက်ယူ၍ သွားသကဲ့သို့ ထို့အတူ သေမင်းသည်လည်း လွန်စွာမေ့လျော့၍ ကပ်ငြိစိတ်ရှိသော သတ္တဝါတို့ကို ခေါ်ဆောင်၍ သွားလေ၏။” ဟု တရားရေအေးကို တိုက်ကျွေးတော်မူလိုက်လေသည်။ ကိသာဂေါတမီလည်း သောကအပူမီးတို့ ငြိမ်းလျက် သောတာပန် အဖြစ်သို့ ဆိုက်ရောက်သွားလေသည်။ 

ထို့နောက် ရဟန်းမပြုလျက် တရားအားထုတ်နေစဉ် တစ်နေ့သ၌ တောက်လောက်နေသော ဆီမီးကို ကြည့်ရင်း ကုန်ခမ်း ပျက်စီးတတ်သော တရားကို နှလုံးသွင်းလျက် ဝိပဿနာတရားများ ပွားများအားထုတ်လိုက်ရာ သစ္စာတရားများ သိမြင်ကာ ရဟန္တာမ အဖြစ်သို့ ဆိုက်ရောက်သွားလေတော့သည်။ ထိုသို့လျှင် ရဟန္တာမတို့တွင်လည်း ခေါင်းပါးသော အကျင့်ကို ကျင့်ရာတွင် အမြတ်ဆုံးသော ဧတဒဂ် ဘွဲ့ထူးကိုပါ ရရှိသွားလေသည်။

ထို့ကြောင့် သားသေသည်မှ အစ လောကဓံကို အကြောင်းပြုပြီး တရားထူးရရှိသည်အထိ အားထုတ်နိုင်ခဲ့သော ရဟန္တာမကြီး ကိသာဂေါတမီ၏ အကြောင်းကို ဗဟုသုတရဖွယ် ဖော်ပြပေးလိုက်ရပါတယ်။နောက်တစ်ပတ်တွေမှာလည်း စိတ်ဝင်စားဖွယ် အကြောင်းအရာတွေ ဝေမျှပေးသွားဦးမှာမို့ စောင့်မျှော် ဖတ်ရှုပေးကြပါဦးဗျ။

Cartoon Bakery မှ သားသားမီးမီးတို့အတွက် ဗဟုသုတရစေရမယ့် ဇာတ်နိပါတ်တော်များနှင့် နာမည်ကျော် ဘုရားစေတီပုထိုးများရဲ့ သမိုင်းကြောင်းကို အပတ်စဉ် အင်္ဂါနေ့တိုင်း ဖော်ပြပေးနေတာကြောင့် ကာတွန်းမုန့်တွေကို အားပေးရင်း ပုံပြင်ဇာတ်နိပါတ်များကို ဖတ်ရှု့နိုင်ဖို့အတွက် Pageကို See First လုပ်ထားဖို့ သတင်းကောင်းပါးလိုက်ရပါတယ်ခင်ဗျာ။

Credit..

Cartoon