ဗားမဲ့ဆရာတော်ဘုရားကြီး

ဗားမဲ့ဆရာတော်ဘုရားကြီး 🙏

ဗားမဲ့ဆရာတော်ဘုရား အလောင်းလျာကို တောင်ငူခရိုင်၊ ပဲခူးရိုးမတောင်တန်းအနီး ရွာသာယာနေ အဖ ကိုအင်းတောင်နဲ့ အမိ မဒေါင်းတို့မှ သက္ကရာဇ် (၈၄၄)ခုနှစ် တွင်ဖွားမြင်ခဲ့ကာ ငယ်နာမည်မှာ မောင်နန္ဒဖြစ်ပါတယ်။ မိဘနှစ်ပါးမှာ သားဖြစ်သူ ဆရာတော်ဘုရားအလောင်းလျာကို ရွာဦးကျောင်းတွင် ရှင်သာမဏေပြုစေခဲ့ရာ ဘွဲ့အမည်မှာ ရှင်နန္ဒသာရဖြစ်လေတယ်။ မောင်နန္ဒအား ရှင်သာမဏေပြုရန် ဆံချစဉ် မဟာသိဒ္ဓိ ဝိဇ္ဇာဓိုရ်နှင့် ပန်းစားဘီလူး မယ်ဝဏ္ဏတို့ ရောက်လာပြီး မဟာဝိဇ္ဇာဓိုရ်မှ ငါ့ညီမောင်နန္ဒကို သာသနာ့ဘောင်ပို့ဆောင်ပေးတဲ့အတွက် ဝမ်းမြောက်ကြောင်းနဲ့ မယ်ဝဏ္ဏမှာလည်း သားကဲ့သို့ဖြစ်နေသော မောင်နန္ဒအတွက် ဝမ်းမြောက်ကြောင်းပြောကာ သာဓုအနုမောဒနာများ ခေါ်ဆိုခဲ့ကြလေတယ်။ ရှင်နန္ဒသာရမှာ ဟံသာဝတီမြို့သို့ သွားကာ ပရိယတ္တိစာပေများကို ဆက်လက်ဆည်းပူးခဲ့လေတယ်။ 

တစ်နေ့ ရှင်နန္ဒသာရ ပဲခူးမြစ်ကမ်းနဖူးတွင် တစ်ပါးတည်း ဗုဒ္ဓါနုဿတိဘာဝနာပွားများစဉ် သူရူးတစ်ယောက်မှာ ကြေးပုရပိုက်ရထိုက်သူအကြောင်း ပြောကာမြူးထူးနေစဉ် မိကျောင်းတစ်ကောင်မှာ ရေထဲမှ ကြေးပုရပိုက်ကို ကိုက်ချီလျက် ကမ်းနားရောက်လာလေတယ်။ ထိုအခါ သူရူးအား ဒကာကြီး ကြေးပုရပိုက်ကို ဆောင်ယူပေးလော့ဟု ဆိုလိုက်လေသော် သူရူးမှာ မိကျောင်းထံမှ သွားယူလို့ အရှင်အား ဆက်သာလေတယ်။ ထို့နောက် မိကျောင်းလည်း ရှင်နန္ဒသာရအား ဦး(၃)ကြိမ်တိုက်လို့ နေရပ်ပြန်သွားကာ သူရူးလည်း ပျောက်သွားလေတယ်။

 ရှင်နန္ဒသာရမှာ ကြေးပုရပိုက်မှ စာများကို ကျောင်းသင်္ခမ်းတွင် ဖတ်ရှုကြည့်လေသော် နားမလည်နိုင်ဖြစ်နေစဉ် ရှေးဘဝမှ ညီအစ်ကိုတော်စပ်သူ မဟာဝိဇ္ဇာဓိုရ်ရောက်ရှိလာပြီး ပုရပိုက်အတွင်းမှ စာပေများကို နားလည်အောင် ကြံဆောင်ပေးနိုင်မယ့် နည်းလမ်းကို ညွှန်ခဲ့လေတယ်။ ဝိဇ္ဇာဓိုရ်၏ ပြောပြချက်အတိုင်း ပုပ္ပါးတောင်၏ အရှေ့ဘက်ကျောက်ဂူတွင် သွားရောက်လို့ ဝိဇ္ဇာဓိုရ်ပြောပြသည့်နည်းအတိုင်း ဆောင်ရွက်လိုက်သော် လိုအင်ဆန္ဒပြည့်ဝလို့ ပုရပိုက်အတွင်းက စာပေများကိုလည်း နားလည်တတ်မြောက်ခဲ့လေတယ်။ ထို့နောက် ဟံသာဝတီသို့ ပြန်လာပြီး လောကီပညာရပ်များကိုလည်း လိုက်စားတော်မူခဲ့ရာ အထူးအထွေသော လောကီပညာရပ်များကို တတ်မြောက်လို့ နာမည်ကျော်ကြားလာခဲ့လေတယ်။ ဤသည်ကို ဟံသာဝတီပြည့်ရှင်က ရဟန်းနှင့် မအပ်စပ်သော လောကီပညာရပ်များအား လိုက်စားမှုကြောင့် ရှင်နန္ဒသာရကို ညောင်ရမ်းသို့နှင်လေတယ်။ 

ဒီလိုနဲ့ သက္ကရာဇ် (၉၅၅)ခုနှစ်တွင် ညောင်ရမ်းသို့ရောက်သော် ညောင်ရမ်းမင်း မင်းရဲနန္ဒမိတ်က ရှင်နန္ဒသာရ၏ အတ္ထုပ္ပတ္တိနဲ့ ပညာရပ်အလုံးစုံကို သိရှိပြီး နသာရ ကဝိဓဇ ဟူသောဘွဲ့တံဆိပ် ဆက်ကပ်လို့ ကျောင်းဆောက်လုပ်လှူဒါန်းကာ ကိုးကွယ်ခဲ့လေတယ်။ထိုအချိန်မှစ၍ ဗားမဲ့ဆရာတော်ဟူ၍ ကျော်ကြားလာခဲ့လေတယ်။ ညောင်ရမ်းမင်းသည် ဗားမဲ့ဆရာတော်ထံ တိုင်းရေးပြည်ရေးများကို အကြံဉာဏ်တောင်းခံရာ ဆရာတော်ဘုရားရဲ့ အကြံပေးချက်များအတိုင်း အင်းဝမြို့ကို တည်ထောင်နိုင်ခဲ့လေတယ်။ ထို့နောက် အင်းဝမြို့ကို ရတနာပူရ်ရွှေမြို့တော်ဟု သမုတ်ခဲ့လေတယ်။ တစ်ခါသော် အင်းဝမြို့တွင် ရေကြီးမှုဖြစ်ရာ မြို့တွင်းသို့ရေများစွာ ဝင်ရောက်လေတယ်။ ဗားမဲ့ဆရာတော်ဘုရားကြီးနဲ့ တိုင်ပင်လို့ အစီအရင်များ ပြုလုပ်လို့ တားမြစ်ခဲ့လေရာ တစ်ညအတွင်း ရေများလျောကျခဲ့လေတယ်။ နောင်တွင်လည်း တိုင်းပြည်၌ ကြုံတွေ့ရသော အခက်အခဲများကို ဆရာတော်ဘုရားရဲ့ အစီအရင်နဲ့ ပပျောက်စေခဲ့လေတယ်။ 

သက္ကရာဇ် (၉၆၇)ခုနှစ်တွင် ညောင်ရမ်းမင်း ကံကုန်သော် သားဖြစ်သူအနောက်ဘက်လွန်မင်း နန်းတက်လေတယ်။ အနောက်ဘက်လွန်မင်းလက်ထက်တွင်လည်း ဗားမဲ့ဆရာတော်ကို ယခင်အတိုင်း ချီးမြှင့်မြှောက်စားလို့ နိုင်ငံရေး အကြံဉာဏ်များ တောင်းခံလေတယ်။ တောင်ငူကို သိမ်းပိုက်မည့်အရေးကိုလည်း ဆရာတော်ဘုရား ဟောပြောချက်များအတိုင်း လုပ်ဆောင်ခဲ့ရာ တောင်ငူဘုရင် နတ်သျှင်နောင်မှာ အညံ့ခံလာပြီး အနောက်ဘက်လွန်မင်းက တောင်ငူကို အောင်နိုင်ခဲ့လေတယ်။

တစ်ခါကလည်း အင်းဝနေပြည်တော်တွင် မီးမကြာခဏလောင်ခြင်း၊ တောကောင်များ မြို့တွင်းသို့ မကြာခဏဝင်ရောက်လာခြင်း၊ လေကြမ်းများ တိုက်ခတ်ခြင်း၊ မိုးသည်းထန်ခြင်းတို့ကြောင့် ပြည်သူပြည်သားများ ရောဂါထူပြောခြင်း၊ အပျက်အစီးများပြားခြင်းတို့နဲ့ ကြုံနေရသောကြောင့် ဗားမဲ့ဆရာတော်ဘုရားထံလျှောက်တင်ကြလေသော် စေတီတည်ခြင်း၊ ကောင်းမှုကုသိုလ်များပွားများခြင်း အဓိဌာန်တို့ကြောင့် တိုင်းသူပြည်သားများ ကပ်ဘေးမှ လွတ်မြောက်ခဲ့ရလေတယ်။ အခြားသော ကပ်ဘေးများ ကြုံလာရချိန်မှာလည်း ဗားမဲ့ဆရာတော်ဘုရားကြီး၏ အစီအရင်များဖြင့် ဘေးများကို လွန်မြောက်စေခဲ့လေတယ်။ သို့နှင့် မင်းတရားကြီးမှာ ဆရာတော်ဘုရားအား ယခင်ကထက် လွန်စွာကြည်ညို၍ ပြာသာဒ်သုံးဆောင်ဆောက်လုပ် ကိုးကွယ်ခဲ့လေတယ်။

ဗားကရာ ဆရာတော်ဘုရားကြီးမှာ ကာယသိဒ္ဓိ၊ ပီယသိဒ္ဓိ အစရှိသော သိဒ္ဓိလမ်းကို အကြွင်းမဲ့ ပြီးမြောက်ခဲ့ပြီး အလုံးစုံတတ်မြောက်တော်မူခဲ့သောကြောင့် လွန်စွာ ကျော်စောခဲ့လေတယ်။ ဗားမဲ့ဆရာတော်ကြီး သီတင်းသုံးခဲ့သော နေရာများစွာထဲမှ အင်းဝရှိ ဗားကရာကျောင်းမှာ ဗားမဲ့ကျောင်းတော်အဖြစ် လူသိများခဲ့တာပဲဖြစ်ပါတယ်။ လောကီပညာရပ်များနဲ့ ပြည့်စုံသော ဗားမဲ့ဆရာတော်ဘုရားကြီးမှာ သက္ကရာဇ် (၉၇၂)ခုနှစ်တွင် အင်းဝနေပြည်တော်တွင် တစ်ဘဝ ခန္ဓာချုပ်ငြိမ်းတော်မူခဲ့လေတယ်။

ကာတွန်းမုန့်ချစ်သူတို့အတွက် ထင်ရှားကျော်ကြား ပုဂ္ဂိုလ်များဆိုတဲ့ ကဏ္ဍလေးကနေ ဗဟုသုတရဖွယ်အကြောင်းအရာများစွာကို ဖော်ပြပေးသွားဦးမှာမို့ ကာတွန်းမုန့်တွေကို အားပေးရင်း ပေ့ချ်လေးကို Like နဲ့ See First လုပ်ထားဖို့ သတင်းကောင်းပါးလိုက် ရပါတယ်ခင်ဗျာ။

Credit..Cartoon..