မဟာဒုတ်

မဟာဒုက်

မဟာဒုဂ္ဂတ-မဟာဒုက် ... အပြည့်အစုံ“မဟာဒုဂ္ဂတ” ဆိုတာ ပါဠိသတ် ဝေါဟာရပဲ ဖြစ်ပါတယ်။ မဟာ-များစွာသော၊ ဒုဂ္ဂတ-ဆင်းရဲခြင်း၊ ဖတ်ရအဆင်ပြေအောင် မြန်မာပြန်လိုက်ရင်  လွန်စွာဆင်းရဲသော ပုဂ္ဂိုလ် လို့ အဓိပ္ပာယ်ရပါတယ်။

မဟာဒုက်ဆိုတာ ဆွမ်းလောင်းပွဲ တစ်နည်းအားဖြင့် ဆွမ်းလှူပွဲလေးကို အကြောင်းပြုပြီး ဖြစ်ပေါ်လာကြောင်း ဖြစ်ပါတယ်။ မဟာဒုဂ္ဂတ- မဟာဒုက် ဆွမ်းလောင်းပွဲလေးသည် ဘုရားငါးဆူပွင့်မည့် ဘဒ္ဒကမ္ဘာတွင် ပွင့်တော်မူကြသော မြတ်စွာဘုရားရှင်တို့တွင် သုံးဆူမြောက် ကဿပမြတ်စွာဘုရားရှင် လက်ထက်တော်အခါကဖြစ်ပါတယ်။ ကဿပမြတ်စွာဘုရားရှင်သည် တပည့်သာ၀ကအပေါင်း နှစ်သောင်းခြံရံတော်မူကာ ဗာရာဏသီပြည်သို့ ကြွချီတော်မူစဉ်အခါက တိုင်းသူပြည်သားများက ရှစ်ဦးစီ-ဆယ်ဦးစီ ဖွဲ့စည်း၍ မြတ်စွာဘုရားရှင်နှင့်တကွ တပည့်သာ၀ကတို့အား အာဂန္တုကဆွမ်း= ဧည့်သည်ဆွမ်းကပ် လှူဒါန်းမှု့ပြုခဲ့ကြပါသည်။ ဆွမ်းလှူပွဲအပြီးတွင် မြတ်စွာဘုရားရှင်က တပည့် ဒကာ ဒကာမတို့အား ဆွမ်းအနုမောဒနာတရား မိန့်ချွေတော်မူပါတယ်။ 

ကဿပ မြတ်စွာဘုရားရှင်၏ တရားဒေသနာကို ကြားနာခဲ့ရသော ပညာရှိသူတော်ကောင်းများသည် ဥာဏ်ပညာများပြဋ္ဌာန်းလျက် ပစ္စည်းဥစ္စာများလည်းကြွယ်၀ ချမ်းသာချင်သလို- သားသမီး အခြွေအရံ အသင်းအပင်း အပေါင်းအသင်းလည်း ပေါများချင်ကြသော အမျိုးကောင်းသား ပုဂ္ဂိုလ်များက ကဿပမြတ်စွာဘုရားရှင်နှင့်တကွ နောက်ပါတပည့်သာ၀က နှစ်သောင်းတို့ကို နောက်နေ့ နံနက်မိုးသောက် အလင်းရောက်သောအခါ ဆွမ်းအလှူခံရန် မြတ်စွာဘုရားရှင်အား လျောက်ကြားပြီး အပြန်တွင် မိမိနှင့် နီးစပ်ရာရပ်ကွက် အိမ်စသည်တို့ကို ၅-ပါး ၈-ပါး ၁၀-ပါး စသည်ဖြင့် တတ်နိုင်သမျှ မိမိတို့အိမ်၌ ဘုရားအမှူးရှိသော သံဃာတော်အရှင်သူမြတ်တို့အား ဆွမ်းခဲ့ဖွယ်ဘောဇဉ်တို့ကို ဆက်ကပ်လှူဒါန်းရန် တိုက် တွန်းနိုးဆော်သမှု့ပြု ကြလေသည်၊ နှိုးဆော်ပြီးချိန်၌ အိမ်ရှင်များက နိဗ္ဗာန်ဆော်ထံ သံဃာစာရင်းပေးသွင်းကာ နောက်နေ့ နံနက် မင်္ဂလာရှိသော အချိန်အခါကာလ သမယတွင် ဆွမ်းလှူဒါန်းရန် ပြင်ဆင်ကြပါတော့သည်။

ထိုအချိန်၌ ဗာရာဏသီမြို့တွင် အဆင်းရဲအနွမ်းပါးဆုံး သူရင်ငှါးဖြစ်သည့် မဟာဒုဂ္ဂတ ခေါ် မဟာဒုက်လည်း နိဗ္ဗာန်ဆော်၏ အနီးအနားတွင်း မျက်နှာငယ်လေးနှင့် ငေးမှိုင်နေသည်ကို နိဗ္ဗာန်ဆော်က “ဟေး မဟာဒုဂ္ဂတ မင်းဘာလို့ငေးမှိုင်နေတာလဲ မင်းမှာ မရှိလို့မလှူ မလှူလို့မရှိဆိုတာ မင်းမကြားဘူးဖူးလားကွ မင်းဟာ မြတ်စွာဘုရားနှင့် ကြုံကြိုက်နေသည့် အခွင့်အချိန်မှ လှူဒါန်းမှု့မပြုလျှင် ဘယ်တော့မှ ဆင်းရဲနွမ်းပါးမှု့ လွတ်မြောက်တော့မှာ မဟုတ်တော့” စသည်ဖြင့် တိုက်တွန်းလိုက်သည့်အချိန်တွင် “နိဗ္ဗာန်ဆော်ကြီး ကျွန်တော်မျိုး သံဃာတော်တစ်ပါးအတွက် တာ၀န်ယူပါမယ်ခင်ဗျား စာရင်းမှတ်ထားပေးပါ” ဆိုပြီးအိမ်သို့ ပြန်လာခဲ့ပါတယ်။

အိမ်သို့အရောက်တွင် အိမ်သူသက်ထားကို “အရှင်မ ငါတော့ မနက်ဖြန်နံနက် မင်္ဂလာရှိသော အချိန်အခါကာလ သမယတွင် သံဃာတစ်ပါးကို ဆွမ်းလှူဒါန်းရန် နိဗ္ဗာန်ဆော်ကြီးထံ စာရင်းပေးခဲ့တယ် ငါတို့ အခုချိန်ကစပြီး ဆွမ်းတစ်နပ်စာ ဆက်ကပ်လှူဒါန်းဖို့ ငွေရှာထွက်ကြမယ်” ဆိုပြီး ထွက်ကြရာ သူဌေးတစ်ဦးထံတွင် သူရင်းငှါးလုပ်ပြီး လုပ်ခအဖြစ် သူဌေးကြီးထံမှ သလေးဆန် ရှစ်စလယ်ကို ရရှိခဲ့ပါသည်၊ ထို့ပြင် အိမ်ရှင်မကလည်း သူဌေးကတော် တစ်ဦးထံမှာ သူရင်းငှါလုပ်ပြီး လုပ်ခအဖြစ် ထောပတ်တစ်ဇလုံ၊ နို့ဓမ်းအိုးနှင့် သလေးဆန် တစ်စလည်တို့ကို ရရှိပြန်ပါတယ်၊ ဤသို့ဖြင့် မဟာဒုဂ္ဂတို့ အကြင်လင်မယားနှစ်ဦးမှာ သံဃာတော် တစ်ပါးဆွမ်းတော်ကပ်ဖို့ရန် ပြည့်စုံနေပြီဖြစ်ရကား ပဌမဇောစေတနာ ပြဌာန်းလျက် စိတ်ကြည်နူး ၀မ်းမြောက်လျက်ရှိပေသည်။ 

နောက်နေ့နံနက် ဆွမ်းဆက်ကပ် လှူဒါန်းမည့်နေ့တွင် ဆွမ်းစားပွဲဝုိင်း၌ ပြည့်စုံလုံလောက်စေရန် ဟင်းသီးဟင်းရွက်နှင့် အသားငါးတို့ကိုလည်း တံငါသည်တို့အား ဝုိင်း၀န်းကူညီဆောင်ရွက်ပေးရာမှ ဆွမ်းကပ် လှူဒါန်းဆိုသည့်အတွက် ငါးကြင်းလေးကောင်တို့ကို လက်ဆောင်အဖြစ် ပေးလိုက်လေသည်။ လူမင်းဘုန်းကြီး နတ်မင်းမနေသာ ဆိုသလိုပဲ သကြားမင်းသည် မြတ်စွာဘုရား မဟာဒုဂ္ဂတ- မဟာဒုက်အိမ်သို့ဆွမ်းအလှူခံ ကြွချီးမြှောက်အကြောင်းကို သိသဖြင့် မဟာဒုဂ္ဂတဒုက်ကြီး အိမ်သို့ ဆွမ်းချက်စေတနာ့ ၀န်ထမ်းပြုလိုပါကြောင်း စသည်ဖြင့် စကားစမည်ပြောဆိုကာ ဆွမ်းချက်တာ၀န်ကို ဆောင်ရွက်ပါတော့တယ်။

မဟာဒုဂ္ဂတ-မဟာဒုက်သည် သံဃာတော်ပင့်ချိန်နီး၍ နိဗ္ဗာန်ဆော်ထံသို့ သွားရောက်ပြီး မိမိတာ၀န် ယူထားသည့် သံဃာတော်တစ်ပါးပေးပါရန် တောင်းခံသည့်အခါတွင်မှ နိဗ္ဗာန်ဆော်ကြီးသည် မဟာဒုက် သံဃာတော် တစ်ပါး ယူထားသည်ကို သတိထားမိပြီး “သူငယ်ချင်းငါတော့ ငါမင်းအတွက်စာရင်းမှတ်ဖို့ မေ့သွားတယ်ကွာ၊ အခုလည်း သံဃာတော်တွေ ပင့်သွားကြတာကုန်ပြီ” ဟုဆိုလိုက်ရာ မဟာဒုက် ခမျာ ရင်၀ကို လှံနှင့်ထိုးလိုက်သည့်အလား စိတ်အလွန်ထိခိုက်သွားပြီး “အဲလိုလုပ်လို့ ဘယ်ရမလဲ၊ နိဗ္ဗာန်ဆော်ကြီး သံဃာတစ်ပါး မဖြစ်မနေ ပေးမှဖြစ်မယ်”လို့ လက်မြှောက်ပြီး ငိုကြွေးပါတော့သည်။ ထိုအချိန်တွင် နိဗ္ဗာန်ဆော်ကြီးက မဟာဒုက်ကို နှစ်သိမ့်သောအားဖြင့် အခြားသံဃာတွေကိုတော့ လိုက်ပင့်ပေးလို့ မရတော့ဘူးကွာ၊ မြတ်စွာဘုရားရှင် ကိုယ်တော်ကြီးတော့ ဂန္ဓကုဋီတိုက်တော်အတွင်းမှာ ရှိနေသေးတယ် မင်း သတ္တိရှိရင်တော့ မြတ်စွာဘုရားရှင်၏ မြသပိတ်တော်ကို တောင်းခံပေတော့၊ ဂန္ဓကုဋီတိုက်ရှေ့မှာ အိမ်ရှေ့မင်း၊ သူဌေး သူကြွယ်တွေ စောင့်နေကြတယ် မြတ်စွာဘုရားတို့မည်သည် သူဆင်းရဲကို သနားချီးမြှောက်လေ့ ရှိပါတယ် မင်းသာရဲရဲဝံ့ဝံ့သာ လျောက်ကြားပေတော့ မင်းကံကောင်းရင်တော့ ရမှာပဲ” လို့ စေလွှတ်လိုက်ပါတော့တယ်။

ထိုအခါ မဟာဒုက်သည် မြတ်စွာဘုရား သီတင်းသုံးတော်မူရာ ဂန္ဓကုဋီတိုက်ရှေ့သို့ အလျှင်အမြန် သွားရောက်ပါတော့သည်၊ ထိုအချိန်တွင် သူဌေး သူကြွယ်များက စာကြွင်းစာကျန်များကို လာတောင်းသူလို့ ထင်မှတ်က ဆွမ်းစားချိန်မဟုတ်သေးကြောင်း ပြောဆိုကာ မောင်းထုတ်လေသည်၊မဟာဒုက်က စာကြွင်းစာကျန်ကို တောင်းစားသူမဟုတ်ပါ မြတ်စွာဘုရားရှင် ကိုယ်တော်မြတ်ကြီးကို ဖူးမြှော်ရန်လာရောက်သူဖြစ်ပါသည်” ဟု ပြောဆိုကာ ဂန္ဓကုဋီတိုက်တံခါးခုံကို နဖူးနှင့် ဦးတိုက်ကာ “ဘုန်းတော်ကြီးတော်မူသော မြတ်စွာဘုရား ဗာရာဏသီမြို့မှာ တပည့်တော်ထက် ဆင်းရဲတဲ့သူမရှိပါဘုရား၊ အရှင်ဘုရားသည် ဘုရားတပည့်တော်၏ အားကိုးအားထားရာ ဖြစ်တော်မူပါဘုရား၊ ဘုရားတပည့်တော်ကို သနားသဖြင့် ဆွမ်းအလှူခံ ချီးမြှောက်တော်မူပါဘုရား” ဟု မြင်သူတိုင်းက သနားချင်အောင် သနားစဖွယ် လျောက်ထားပါတော့သည်။

ထိုအချိန်တွင် မြတ်စွာဘုရားရှင်က ဂန္ဓကုဋီတံခါးကို ဖွင့်တော်မူကာ သပိတ်တော်ကို မဟာဒုက် လက်ထဲသို့ အပ်နှင်းလိုက်လေသည်၊

သပိတ်တော် လက်ထဲသို့ရောက်သည်နှင့် တစ်ပြိုင်နက် မဟာဒုက်သည် တိုင်းပြည်အုပ်ချုပ်ရသည့် မင်းဘုရင်ဖြစ်ရသည့်အလား အလွန့်အလွန်ပင် ၀မ်းသာအားရဖြစ်သွား ပါတော့တယ်။

မြတ်စွာဘုရားရှင်၏ သပိတ်တော်ကို ရယူဖို့ရန်စောင့်စားနေသော သူဌေးသူကြွယ်များကလည်း တစ်ယောက် မျာက်နှာ တစ်ယောက်ကြည့်လျက် အံသြမဆုံး ဖြစ်နေကြပါသည်။ဘုရားရှင်ကိုယ်တော်တိုင် ပေးအပ်လိုက်သည့် သပိတ်ကို တန်းခိုးရှင်ဖြစ်စေကာမူ ယူနိုင်ရိုးထုံးစံမရှိပေ၊ ထို့ကြောင့် မဟာဒုက်ထံမှ သပိတ်တော်ကို ငွေအသပြာများပေး၍ ၀ယ်ယူကြပါသည်၊ မဟာဒုက်က--------“အကျွန်ုပ် ငွေမလိုပါ၊ ဗုဒ္ဓမြတ်စွာကိုသာ ဆွမ်းဆက်ကပ်လိုပါသည်” ပြောဆိုကာ ဘုန်းတော်ကြီးတော်မူသော မြတ်စွာဘုရားရှင်ကိုယ်တော်မြတ်ကြီးကို အိမ်သို့ပင့်ဆောင်သွားပါသည်၊ ဗုဒ္ဓမြတ်စွာသည်လည်း မဟာဒုက်၏ နိမ့်လှစွာသော တဲပုတ်အိမ်လေးအတွင်းသို့ ပကတိအတိုင်းကြွတော်မူ၍ သိကြားမင်းခင်းထားသော နေရာ၌ သီတင်းသုံးတော်မူပါသည်၊ မဟာဒုက်ကလည်း သိကြားမင်းစီမံထားသော ယာဂုဆွမ်းစသည်တို့ကို ရိုသေကိုင်းညွတ်စွာ ဆက်ကပ်လှူဒါန်းပါသည်၊ မြတ်ဗုဒ္ဓသည်လည်း ဆွမ်းခဲဖွယ်ဘောဇဉ် ချိုချဉ်တို့ကို ဘုန်းပေးသုံးဆောင်တော်မူပြီးသောအခါ အနုမောဒနာတရား ဟောကြားပြီး ပြန်ကြွတော်လေ၏။

မြတ်စွာဘုရား ဆွမ်းဘုန်ပေးပြီးနောက် ဆွမ်းအနုမောဒနာတရား ဟောသောအခါတွင် မဟာဒုက်တို့ဇနီးမောင်နှံနှစ်ဦး သောတာပန်တည် ကြလေသည်။ မဟာဒုက်သည်လည်း မြတ်စွာဘုရားရှင်၏ သပိတ်တော်ကို ထမ်းလျက် မြတ်စွာဘုရားရှင်ကို ကျောင်းတော်သို့ အရောက်ပို့ဆောင်ခဲ့ပါသည်။

သိကြားမင်းသည် မဟာဒုက်အား ပါရမီဖြည့်ဆည်းပြီးနောက် နတ်ပြည်သို့ပြန်ရန် အိမ်မှအထွက်တွင် တံခါး၀၌ရပ်ကာ အထက်ကောင်းကင်သို့ မော့ကြည့်လိုက်သည်နှင့် တစ်ပြိုင်နက် ရတနာခုနှစ်ပါးမိုး ရွာသွန်းဖြိုးလေရာ မဟာဒုက်အိမ်၌ အိုးခွက်များပါမကျန် တစ်အိမ်လုံး တစ်အိမ်လုံးရတနာများဖြင့် လွှမ်းမိုးသွားပါတော့သည်၊ မဟာဒုက်၏ အိမ်သူဇနီးသည်မှာ နေစရာမရှိသဖြင့် ကလေးများကိုပါ ခေါ်ထုတ်ကာ အိမ်အပြင်တွင် ရပ်နေရပါသည်၊မဟာဒုက်သည် မြတ်စွာဘုရားကျောင်းတော်မှ ပြန်ရောက်လာ၍ ရတနာမိုးများ ရွာသွန်းသည့်အကြောင်းသိရသည့်အခါ “ငါ့ဆွမ်းအလှူကတော့ ဒီနေ့မှာပဲ အကျိုးပေးပြီ” ဟုဆိုကာ ရှင်ဘုရင်ထံမှောက်သို့ သွားရောက်ကာ “မိမိရဲ့ရတနာခုနှစ်ပါးကို လှည်းအစီးတစ်ထောင်ဖြင့် သယ်ဆောင်တော်မူပါ” လျောက်တင်ပါတော့သည်။

မင်းကြီးသည် မဟာဒုက်လျောက်ထားသည့်အတိုင်း ရတနာခုနှစ်ပါးတို့ကို လှည်းများဖြင့်သယ်ဆောင်၍ မင်းရင်ပြင်၌ စုပုံထားရာ ယခုခေတ်အခေါ် ထီးရိုးဝါး နှစ်ပြန်စာလောက်ရှိသတဲ့၊ ယင်းနောက် တိုင်းသူပြည်သူများ၏ ဆန္ဒအတိုင်း မဟာဒုတ်ကြီးအား ထူးခြားသောသူအဖြစ် ပူဇော်သက္ကရပြု၍ သူဌေးရာထူးကို ပေးသနားတော်မူပါသည်။ယင်းနောက် သူဌေးကြီးတစ်ဦးနေထိုင်ခဲ့သော မြေနေရာဟောင်းကို နေစေကာ အိုးသစ်အိမ်သစ် ဆောက်လုပ်ပြီး ဘုရားအမှူးရှိသော သံဃာတော်အရှင်သူမြတ်တို့ကိုအား ခုနှစ်ရက် ခုနှစ်လီ ဆွမ်းအစရှိသော ဒါတဗ္ဗ၀တ္ထု အစုစုတို့ကို လှူဒါန်းဆက်ကပ်ပါတော့သည်။ယင်းနောက် မဟာဒုက်ကြီးဘ၀ အဆက်ဆက် သံသရာလည်ခဲ့ပြီးနောက် ဂေါတမဗုဒ္ဓမြတ်စွာလက်ထက်တွင် ပဏ္ဍိတသာမဏေဖြစ်လာ၍ ခုနစ်နှစ်အရွယ်၌ပင် ပဋိသမ္ဘိဒါပတ္တ ရဟန္တာဖြစ်လာခဲ့ပါသည်။

ဤသည်ကို အကြောင်းပြု၍ မဟာဒုက်ဆွမ်းအလှူပွဲဖြစ်ပေါ်လာလေ၏။ ဤဆွမ်းအလှူပွဲလေးကို အကြောင်းပြုပြီး ဗုဒ္ဓဘာသာ မြန်မာလူမျိုး သူတော်စဉ်များသည် မြန်မာလူမျိုးတို့၏ ဓလေ့ထုံးစံအတိုင်း အစဉ်လာမပျက် ယနေ့တိုင် ကျင်းပပြုလုပ်ခဲ့ကြသလို ဆက်လက်၍ ကျင်းပနေဆဲလည်း ဖြစ်ပါတယ်။ 

Cartoon Bakery မှ သားသားမီးမီးတို့အတွက် ဗဟုသုတရစေရမယ့် ဇာတ်နိပါတ်တော်များနှင့် နာမည်ကျော် စေတီဘုရားများရဲ့ သမိုင်းကြောင်းကို အပါတ်စဉ် အင်္ဂါနေ့တိုင်း ဖော်ပြပေးနေတာကြောင့် ကာတွန်းမုန့်တွေကို အားပေးရင် ပုံပြင်ဇာတ်နိပါတ်များကို ဖတ်ရှု့နိုင်ဖို့အတွက် Pageကို See First လုပ်ထားဖို့ သတင်းကောင်းပါးလိုက်ရပါတယ်ခင်ဗျာ။

Credit....Cartoon_Bakery