ကိလေသာဝင်ပေါက်ကို ရတနာသုံးပါးနဲ့ပိတ်ဆို့ပေး
🌷🍀🌷🌿🌷🍁🌷🌿🌷🍀🌷🌿🌷
ဘုရားရှိခိုးတယ်၊ တရားထိုင်တယ်ဆိုတာ အမှန်တော့ ကိလေသာကို မောင်းထုတ်တာပဲဗျ။ လူဟာ မနက်လင်းတာနဲ့ ကိလေသာနဲ့ အရင်တွေ့ရတယ်။ ကိလေသာက မျက်စိပေါက်ကလည်း ဝင်လာတာပဲ။ အဲဒီ ကိလေသာဝင်ပေါက်တွေကို ဗုဒ္ဓ၊ ဓမ္မ၊ သံဃာဆိုတဲ့ ရတနားသုံးပါးနဲ့ ပိတ်ဆို့ပေးမှ ကိလေသာဝင်ပေါက်က ပိတ်မှာ။ အဲလိုမှမဟုတ်ရင် ကိလေသာတွေက ဝင်ချင်သလို ဝင်ရောက်ပြီး လူကို ဒုက္ခပေးသွားမှာဗျ။ လူတွေဆင်းရဲဒုက္ခရောက်ကြရတယ်ဆိုတာ ကိလေသာကြောင့်ပဲ။
အားပြိုင်နေကြတယ်
-----------------------------
လူ့ခန္ဓာမှာ အဆိုးနဲ့အကောင်းဟာ အားပြိုင်နေကြတာ။ အဆိုးထက်အကောင်း လက်ဦးအောင် မြန်မြန်လုပ်မှ ဖြစ်မယ်။ သတိ၊ ဝီရိယနဲ့ နိုးနိုးကြားကြား၊ တက်တက်ကြွကြွ အကောင်းတွေကို ထုတ်ဖော်ပေးနိုင်မှ အဆိုးတွေက နောက်ဆုတ်မှာ။ အကောင်းတွေက လက်မဦးရင် အဆိုးတွေက ကိုယ့်အပေါ်က လွှမ်းမိုးသွားမှာ။
ကုန်ရင်အားပါရမယ်
---------------------------
သာသနာနဲ့ တကယ်တွေ့တဲ့သူဆိုတာ-
၁။ ရည်ရွယ်ချက် ကောင်းရမယ်။
၂။ လမ်းကြောင်း ကောင်းရမယ်။
၃။ အလုပ်တိုင်းမှာ အစီအစဉ်ပါရမယ်။
ဘယ်ဟာမှ အလကား ကုန်သွားတယ်ဆိုတာ မရှိရဘူး။ ကုန်ရင် အားပါရမယ်။ ကုန်ကျမဖြစ်စေရဘူး။ ကုန်ရပဲ ဖြစ်ရမယ်။
မြင်ရပါလျက်သားနဲ့မတွေ့ရဘူး
-----------------------------------------
အတိတ်ဘုန်းကံ အင်မတန်ကောင်းလွန်းလို့ ဘုရား၊ တရားရှိတဲ့နေရာမှာ နေရပေမယ့် သဒ္ဓါနဲ့ စိတ်ကို မသန့်ရှင်းနိုင်ရင်၊ ပညာနဲ့အမြင်ရှင်းအောင် မကြည့်နိုင်ရင် ဘုရားကိုမြင်ရပါရဲ့သားနဲ့ မတွေ့ရဘူး။
အဖိုးတန်တွေဖော်ထုတ်ချင်လို့ကျွေးတာ
-----------------------------------------------------
မော်တော်ကားထဲ ဓာတ်ဆီ၊ စက်ဆီထည့်တယ်ဆိုတာ အလှကြည့်ဖို့ မဟုတ်ဘူး။ လိုရာအရပ်ရောက်အောင် မောင်းဖို့ထည့်တာ။ ခန္ဓာကြီးကို ကျွေးတယ်ဆိုတာဟာလည်း အလှကြည့်နေဖို့ မဟုတ်ဘူး။ အဖိုးတန်တရားတွေ ဖော်ထုတ်ချင်လို့ လိုရာအရပ်ကို ရောက်အောင် မောင်းဖို့ကျွေးတာ။
ကျွေးရကျိုးနပ်အောင်လုပ်ကြ
အိုထုပ်၊ နာထုပ် သေထုပ်ကြီးကို အိုစာ၊ နာစာ၊ သေစာ၊ ကျွေးနေရုံနဲ့ မပြီးသေးဘူ။ အဖိုးတန်စွမ်းအား ကောင်းတွေပေါ်အောင် မြန်မြန်ဖော်ထုတ်ပေးမှ ဖြစ်မှာ။ ဒါမှ ခန္ဓာကြီး ကျွေးရကျိုးနပ်မှာ။
အိုနာသေကလက်ဦးသွားမယ်
---------------------------------------
ခန္ဓာကြီးကို သိပ်တွယ်တာ မနေကြနဲ့။ ကျွေးရကျိုးနပ်အောင် များများခိုင်းပေး။ မအိုတော့ဘူးလိုလို၊ မနာတော့ဘူးလိုလို၊ မသေတော့ဘူးလိုလို အေးစက်စက်မလုပ်ကြနဲ့။ တစ်နေ့ ထမင်းနှစ်ထပ်မကကျွေးပြီး ခန္ဓာကြီးကို အသုံးမချလိုက်ရဘဲ အို၊ နာ၊ သေက လက်ဦးသွားရင် ကိုယ့်အတွက် ဘာမှ ရလဒ်ကျန်မှာ မဟုတ်ဘူး။
(တိပိဋကယော ဆရာတော်ဘုရားကြီး)
Credit..
No comments:
Post a Comment